“Enero 1–7: Isa Pa Ka Katipan Nahanungod Kay Jesucristo. Pauna nga Mga Pahina sang Libro ni Mormon,” Dali, Magsunod sa Akon—Para sa Puluy-an kag Simbahan: Libro ni Mormon 2024 (2024)
“Enero 1–7. Pauna nga Mga Pahina sang Libro ni Mormon,” Dali, Magsunod sa Akon—Para sa Puluy-an kag Simbahan: 2024 (2024)
Enero 1–7: Isa Pa Ka Katipan Nahanungod Kay Jesucristo
Pauna nga Mga Pahina sang Libro ni Mormon
Antes ka pa makalab-ot sa 1 Nefi kapitulo 1, matalupangdan mo nga ang Libro ni Mormon indi isa ka ordinaryo nga libro. Ang pauna nga mga pahina sini nagalaragway sang istorya nga indi matupungan —lakip na ang mga pagbisita halin sa mga anghel, isa ka dumaan nga rekord nga nalubong sa sulod sang mga siglo sa kilid sang bungyod, kag isa ka pamatan-on nga nagalubad sang rekord paagi sa gahum sang Dios. Ang Libro ni Mormon indi lamang isa ka kasaysayan sang dumaan nga sibilisasyon sang Amerika. Tuyo sini nga kumbinsihon ang tanan “nga si Jesus amo ang Cristo” (tig-ulo nga pahina sang Libro ni Mormon), kag ang Dios Mismo ang naggiya kon paano ini ginsulat, gintipigan, kag ginpatigayon para sa aton. Sini nga tuig, sa imo pagbasa sang Libro ni Mormon, pagpangamuyo parte sini, kag pagtuman sang mga pinanudlo sini, maimbitar mo ang gahum sang Manluluwas sa imo kabuhi. Kag mahimo nga matandog ka sa paghambal, pareho sang Tatlo ka mga Saksi sa ila mga testimonya, “Makahalangyag ini sa [akon] panulukan.”
Mga Ideya sa Pagtuon sa Puluy-an kag sa Simbahan
Tig-ulo nga Pahina sang Libro ni Mormon
Ang pagtuon sang Libro ni Mormon makapabakod sang akon pagtuo kay Jesucristo.
Ang tig-ulo nga pahina sang Libro ni Mormon nagahatag sang mas masobra pa sangsa tig-ulo lamang. Upod sa iban pa nga mga butang, nagaunod man ini sang pila ka mga katuyuan sining sagrado nga rekord. Pangitaa ining mga katuyuan sa tig-ulo nga pahina. Ang mga pamangkot pareho sini makabulig sa imo samtang imo ginabinagbinag: Ngaa may Libro ni Mormon kita? Ano ang kinalain sang Libro ni Mormon sa iban pa nga mga libro?
Basi husto gid ini nga tion sa paghimo sang personal ukon pang-pamilya nga plano nga basahon ang Libro ni Mormon sini nga tuig. San-o kag diin ka magbasa? Paano mo imbitaron ang Espiritu sa imo pagtuon? May partikular ka bala nga pangitaon samtang ikaw nagatuon? Halimbawa, mahimo mo nga pangitaon ang mga dinalan nga nagatuman sang mga katuyuan nga imo nakita sa tig-ulo nga pahina. Pwede ka maghimo sang listahan sang mga bersikulo nga nagapatubo sang imo pagtuo kay Jesucristo.
Tan-awa man sa 2 Nefi 25:26; Mosias 3:5–8; Alma 5:48; 7:10–13; Helaman 5:12; 3 Nefi 9:13–18; 11:6–14; Moroni 10:32–33.
Promisa sang propeta. Si Pangulong Russell M. Nelson nagsiling, “Ginapangako ko nga sa inyo pagbinagbinag sang inyo natun-an [sa Libro ni Mormon], ang mga bintana sang langit magabukas, kag makabaton kamo sang mga sabat sa inyo mismo nga mga pamangkot kag direksyon sa inyo kaugalingon nga kabuhi” (“The Book of Mormon: What Would Your Life Be Like without It?,” Liahona, Nob. 2017, 62–63).
Pauna sa Libro ni Mormon; “Ang Panaksihon sang Tatlo ka mga Saksi”; “Ang Panaksihon sang Walo ka mga Saksi”
Sarang ako nga mangin saksi sang Libro ni Mormon.
Ang Balaan nga Espiritu sarang magsaksi sa imo nga ang Libro ni Mormon matuod, bisan pa nga wala mo makita ang bulawan nga mga lamina pareho sang Tatlo ka mga Saksi kag Walo ka mga Saksi. Samtang ginabasa mo ang ila mga pulong, hunahunaa kon paano makapabakod ang ila mga testimonya sa imo testimonya.
Ano ang nanamian mo parte sa paagi nga ginpaambit sining mga saksi ang ila testimonya sang Libro ni Mormon? Binagbinaga kon paano mo ipaambit ang imo testimonya sang Libro ni Mormon—ilabi na gid ang saksi sini kay Jesucristo. Halimbawa, pamensara nga nagaistorya ka sa isa ka abyan nga wala pa gid makabati parte sa Libro ni Mormon sadto. Ano ang ihambal mo sa iya parte sini? Paano mo tinguhaan nga papagsikon ang imo abyan nga basahon ini? Pamensara nga rebyuhon ang Pauna sang Libro ni Mormon. Mahimo nga makakita ka didto sang mga detalye nga mapuslanon nga ipaambit sa imo abyan.
Pamensara ang paghimo sang lista sang mga butang nga gusto mo ipaambit sa isa ka abyan parte sa Libro ni Mormon. Tilawi ang pagpaambit sang Libro ni Mormon gamit ang Libro ni Mormon nga app.
Tan-awa man sa Ronald A. Rasband, “Sini nga Adlaw,” Liahona, Nob. 2022, 25–28.
Ang Tatlo ka mga Saksi nagpamatuod sa Libro ni Mormon.
“Ang Panaksihon sang Propeta nga si Joseph Smith”
Ang paggwa sang Libro ni Mormon isa ka milagro.
Kon may magpamangkot sa imo kon sa diin naghalin ang Libro ni Mormon, ano ang imo ihambal? Paano mo ilaragway ang kahilabtanan sang Ginuo sa paghatag sa aton sang Libro ni Mormon? Samtang imo ginabasa ang testimonya ni Joseph Smith, tutoki kon paano niya ini ginlaragway. Base sa imo nabasa, sa banta mo ano ang nabatyagan sang Dios parte sa importansya sang Libro ni Mormon?
Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.
Mga Ideya sa Pagtudlo sang mga Kabataan
Tig-ulo nga Pahina sang Libro ni Mormon
Ang pagbasa sang Libro ni Mormon nagapabakod sang akon pagtuo kay Jesucristo.
-
Tugoti ang imo kabataan nga tan-awon kag uyatan ang isa ka kopya sang Libro ni Mormon. Buligi sila nga itudlo ang ikaduha nga tig-ulo, Isa Pa Ka Katipan Nahanungod Kay Jesucristo. Pwede mo man sila buligan nga pangitaon sa tig-ulo nga pahina, ang dinalan nga “si Jesus amo ang Cristo, ang Wala’y Katapusan nga Dios, nga nagapakita sang iya kaugalingon sa tanan nga mga kapungsuran.” Buligi sila nga maintiendihan nga nagakahulugan ini nga ang Libro ni Mormon nagatudlo sa aton parte kay Jesucristo. Sugiri sila sing malip-ot kon paano ginpabakod sang Libro ni Mormon ang imo pagtuo kay Jesucristo. Pwede mo man sila pamangkuton parte sa paborito nila nga mga sugilanon sa Libro ni Mormon.
Ang Libro ni Mormon amo ang pamag-ang nga bato sang aton relihiyon.
-
Ang pahina para sa kahiwatan sini nga semana kag ang imahe sa idalom makabulig sa imo kabataan nga maintiendihan ining mga pulong ni Joseph Smith sa pauna sang Libro ni Mormon: “Ang Libro ni Mormon [amo] ang pamag-ang nga bato sang aton relihiyon.” Basi masadya man nga magpatindog ukon magdrowing sang arko nga may pamag-ang nga bato sa ibabaw. Ano ayhan ang matabo kon kakason ang pamag-ang nga bato? Ano ang matabo kon wala kita sang Libro ni Mormon? Pwede ninyo nga basahon sing ululupod ang katapusan nga parapo sang pauna para hibaluon kon ano pa ang aton matun-an kon batunon naton ang kamatuoran sang Libro ni Mormon. Paano naton himuon ang Libro ni Mormon nga pamag-ang nga bato sang aton pagtuo kay Jesucristo?
Ang Libro ni Mormon amo ang pamag-ang sang aton relihiyon.
“Ang Panaksihon sang Tatlo ka mga Saksi”; “Ang Panaksihon sang Walo ka mga Saksi”
Sarang ako nga mangin saksi sang Libro ni Mormon.
-
Para buligan ang imo mga kabataan nga maintiendihan kon ano ang buot silingon sang mangin saksi, pwede mo ilaragway sa ila ang butang nga imo na nakita pero wala pa nila makita. Dayon tugoti man sila nga himuon ini sa imo. Mahimo nga magaresulta ini sa pag-istoryahanay parte sa 11 ka tawo nga nakakita sang bulawan nga lamina nga halin diri ginlubad ang Libro ni Mormon. Samtang ginabasa ninyo sing ululupod ang mga testimonya, pwede ninyo hambalan kon ngaa gusto sining mga saksi nga mahibal-an sang iban nga mga tawo ang ila mga testimonya. Ano ang gusto naton isugid parte sa Libro ni Mormon?
“Ang Panaksihon sang Propeta nga si Joseph Smith”
Ang Libro ni Mormon ginhatag sa aton paagi sa gahum sang Dios.
-
Para buligan ang imo kabataan nga matun-an kon paano ginhatag sang Dios sa aton ang Libro ni Mormon, pwede mo basahon ang mga bahin sang “Ang Panaksihon sang Propeta nga si Joseph Smith” sa ila. Mahimo nga masadyahan ang imo kabataan sa pagdrama-drama sining sugilanon sing pila ka beses.
Para sa dugang nga mga ideya, tan-awa sa mga isyu sang Abyan nga magasin sini nga bulan.
Moroni Delivers the Golden Plates [Si Moroni nga Ginahatag ang Bulawan nga mga Lamina], ni Gary L. Kapp