Ang damgo ni Lehi—nga adunay gunitanan nga puthaw, gabon sa kangitngit, lapad nga gambalay, ug sa kahoy nga adunay bunga nga “hilabihan katam-is”—usa ka makadasig nga pagdapit sa pagdawat sa mga panalangin sa gugma ug maulaong sakripisyo sa Manluluwas. Hinoon, alang ni Lehi, kini nga panan-awon mahitungod usab sa iyang pamilya: “Tungod sa butang diin ako nakakita, ako may katarongan nga maglipay diha sa Ginoo tungod ni Nephi ug usab ni Sam. … Apan tan-awa, Laman ug Lemuel, ako nahadlok sa hilabihan tungod kaninyo” (1 Nephi 8:3–4). Sa dihang nahuman na si Lehi sa paghulagway sa iyang panan-awon, siya miawhag nila ni Laman ug Lemuel nga “mopatalinghog ngadto sa iyang mga pulong, nga tingali ang Ginoo magmaloloy-on ngadto kanila” (1 Nephi 8:37). Bisan kon inyong natun-an ang panan-awon ni Lehi sa makadaghan, niini nga higayon paghunahuna mahitungod niini sa paagi nga si Lehi ngahunahuna niini—paghunahuna og usa ka tawo nga inyong gimahal. Kon inyong buhaton, ang seguridad sa gunitanan nga puthaw, ang mga kakuyaw sa lapad nga gambalay, ug ang katam-is sa bunga maadunay bag-ong kahulogan. Ug masabtan ninyo og mas maayo ang “tanan nga pagbati [sa] malumo nga ginikanan” kinsa nakadawat niining talagsaong panan-awon.
Mga Ideya alang sa Pagkat-on diha sa Panimalay ug sa Simbahan
Unsa ang nagustohan ninyo mahitungod sa ehemplo ni Nephi sa 1 Nephi 7:6–21? Sa unsang paagi kita mapanalanginan kon kita “sa walay lipud-lipod mopasaylo” sa usag usa? Ang bidyo nga “Ang Ginoo Miluwas ni Nephi gikan sa Supakan Niyang mga Igsoon” (Librarya sa Ebanghelyo) mahimong makatabang sa inyong pagtuon.
Ang paghupot og maayo ngadto sa pulong sa Dios naggiya kanako ngadto sa Manluluwas ug nagtabang kanako nga mobati sa Iyang gugma.
Ang panan-awon ni Lehi nagtanyag og pagdapit sa pagpamalandong kon asa na ka diha sa inyong personal nga panaw sa pagkahimong sama ni Kristo. Si Presidente Boyd K. Packer miingon: “Kamo ania dinhi; kitang tanan ania dinhi. Anaa sa damgo o panan-awon ni Lehi sa puthaw nga gunitanan ang tanang butang nga gikinahanglan sa usa ka … Santos sa Ulahing mga Adlaw aron makasabot sa pagsulay sa kinabuhi” (“Lehi’s Dream and You,” New Era, Jan. 2015, 2).
Samtang kamo magtuon, ikonsiderar nga sulatan ang usa ka tsart nga sama niining usa.
Makapangita usab ka sa mosunod nga mga bersikulo aron makakat-on mahitungod sa upat ka grupo sa mga tawo nga nakit-an ni Lehi: 1 Nephi 8:21–23, 24–28, 30, ug 31–33. Unsa nga mga kalainan ang inyong nabatyagan niining mga grupo? Ngano kaha nga ang pipila ka mga tawo mibiya human nga nakaabot ngadto sa kahoy ug natilawan ang bunga (tan-awa sa mga bersikulo 24–28)? Unsay inyong nakat-onan gikan niini nga kasinatian?
Tan-awa usab sa Kevin W. Pearson, “Pagpabilin diha sa Ebanghelyo,” Liahona, Mayo 2015, 114–16; “Nakita ni Lehi ang usa ka Panan-awon sa Kahoy sa Kinabuhi” (bidyo), Librarya sa Ebanghelyo.
Alang sa usa ka inter-aktibo nga kasinatian aron sa pagtabang kanimo sa pagkat-on kabahin sa panan-awon ni Lehi, iklik dinhi.
Tugoti ang mga tigkat-on sa pagpakigbahin sa ilang kaugalingon nga mga nadiskobrihan. Ikonsiderar ang pagdapit sa mga tigkat-on sa pagsiksik sa mga kasulatan sa ilang kaugalingon alang sa mga kamatuoran nga ilang makit-an. Pananglitan, mahimo ninyo silang dapiton sa pagpangita sa mga pakisayran sa kasulatan diha sa tsart sa ilang kaugalingon o sa ginagmay nga mga grupo. Sila mohinumdom ug mopangga sa mga kamatuoran nga ilang madiskobrihan.
Ang karaang mga propeta nasayod mahitungod sa misyon ni Jesukristo ug mipamatuod Kaniya.
Ngano kaha nga ang Ginoo gusto nga ang pamilya ni Lehi––ug kanatong tanan––nga masayod sa mga kamatuoran nga makaplagan diha sa 1 Nephi 10:2–16? Ikonsiderar kon unsaon ninyo sa pagtabang ang inyong mga minahal sa pagdapit sa Manluluwas ngadto sa ilang kinabuhi.
Ang Dios mopadayag og kamatuoran ngari kanako pinaagi sa gahom sa Espiritu Santo.
Unsay inyong buhaton kon kamo gihangyo sa pagsunod sa usa ka baroganan sa ebanghelyo nga wala ninyo masabti? Sa mosunod nga mga kasulatan, timan-i ang mga kalainan tali sa tubag ni Nephi ngadto sa panan-awon ni Lehi (tan-awa sa 1 Nephi 10:17–19; 11:1) ug ang tubag ni Laman ug ni Lemuel (tan-awa sa 1 Nephi 15:1–10). Unsa nga mga kamatuoran nga nasabtan ni Nephi nga nakagiya kaniya sa pagtubag sama sa iyang gibuhat?
Uban sa paghunahuna sa ehemplo ni Nephi, paghimo og lista sa mga baroganan sa ebanghelyo nga gusto ninyong mas masabtan. Unsa ang mahimo ninyong buhaton aron makakaplag og mga tubag alang sa inyong kaugalingon? (Tan-awa usab sa “Ang Kamatuoran Mohimo Kaninyo nga Gawasnon” sa Alang sa Kalig-on sa mga Kabatan-onan: Usa ka Giya alang sa Paghimo og mga Pagpili, 30–33.)
Sama lang sa nakaplagan ni Nephi sa iyang kaugalingon nga ang mga pulong sa iyang amahan tinuod, kita makahimo sa samang butang kon atong madungog ang mga pulong sa mga propeta ug mga apostoles sa bag-ong panahon. Unsa ang gitudlo sa mga propeta ug mga apostoles kanato sa labing bag-o nga kinatibuk-ang komperensiya? Giunsa ninyo sa pag-angkon og personal nga pagsaksi sa unsay ilang gitudlo?
Ang paghupot og maayo ngadto sa pulong sa Dios naggiya kanako ngadto sa Manluluwas ug nagtabang kanako nga mobati sa Iyang gugma.
Ang inyong mga anak tingali malingaw sa pagdrowing og usa ka hulagway sa panan-awon ni Lehi samtang mag-uban kamo sa pagbasa sa 1 Nephi 8. Tugoti sila sa pagpakigbahin sa ilang mga hulagway, ug tabangi sila sa pagdiskobre kon unsa ang girepresentar sa mga simbolo diha sa damgo (tan-awa sa 1 Nephi 11:21–22; 12:16–18; 15:23–33, 36 ug sa pahina sa kalihokan karong semanaha). Hangyoa sila sa pagpakigbahin og daghang tubag kutob sa mahimo ngadto niining pangutana: Unsa ang atong makat-onan gikan sa panan-awon ni Lehi?
Ikaw ba adunay butang nga mahimong magrepresentar sa gunitanan nga puthaw diha sa panan-awon ni Lehi, sama sa usa ka tubo o usa ka baston? Tugoti ang inyong mga anak sa paggunit niini samtang kamo mogiya kanila libot sa kwarto paingon ngadto sa hulagway sa Manluluwas. Nganong importante man ang gunitanan nga puthaw diha sa panan-awon ni Lehi? (Tan-awa sa 1 Nephi 8:20, 24, 30). Sa unsang paagi ang gunitanan nga puthaw sama sa pulong sa Dios?
Dapita ang pipila sa inyong mga anak sa pagbasa sa 1 Nephi 8:10–12 ug sa paghulagway kon unsa ang nakita ni Lehi. Hangyoa ang uban sa pagbasa sa 1 Nephi 11:20–23 ug ihulagway kon unsa ang nakita ni Nephi. Nganong gipakita man sa anghel kang Nephi ang batang Jesus aron sa pagtudlo kaniya mahitungod sa gugma sa Dios? Pakig-istoryahi ang inyong mga anak mahitungod kon sa unsang paagi nila nabati ang gugma sa Dios diha sa ilang mga kinabuhi. Ang kanta sama sa “Gibati Ko ang Gugma sa Akong Manluluwas” (Songbook sa mga Bata, 42–43) makatabang kanila sa paghunahuna og mga ehemplo.
Ang Dios mopadayag og kamatuoran ngari kanako pinaagi sa gahom sa Espiritu Santo.
Unsaon ninyo nga makatabang sa inyong mga anak nga masabtan kon unsa ang gitudlo ni Nephi diha sa 1 Nephi 10:19? Tingali inyong pil-on ang usa ka hulagway sa Manluluwas o lain nga espesyal nga butang sulod sa usa ka habol ug dapita ang inyong mga anak sa pagbukhad niini. Samtang kamo mobasa sa 1 Nephi 10:19, sila mahimong mopataas sa ilang mga kamot kon ilang madungog ang mga pulong “ipadayag” ug “Espiritu Santo.” Dayon mahimo kamo nga mopakigbahin og usa ka kasinatian sa dihang ang Espiritu Santo mitabang kaninyo sa pagdiskobre sa kamatuoran.
Hangyoa ang inyong mga anak sa paghisgot mahitungod sa kon unsa ang ilang buhaton aron makakaplag og mga tubag sa usa ka pangutana. Unsa kaha ang isulti ni Nephi kon adunay mangutana kaniya kon unsaon sa pagpangita sa mga tubag sa usa ka pangutana mahitungod sa ebanghelyo? Awhaga ang mga bata sa pagpangita pinaagi sa pagbasa sa 1 Nephi 10:17–19; 11:1.
Nabati ba sa inyong mga anak sukad nga ang Espiritu Santo mitabang kanila nga masayod nga ang usa ka butang tinuod? Tugoti sila nga mopakigbahin sa ilang kasinatian. Unsa kaha ang atong isulti ngadto sa usa ka higala kinsa naghunahuna nga sila dili makadawat og mga tubag pinaagi sa Espritu Santo? Unsa ang atong makita diha sa 1 Nephi 10:17–19 ug sa 11:1 nga makatabang niana nga higala?
Alang sa dugang nga mga ideya, tan-awa ang isyu karong bulana sa Higala nga magasin.
