“Pebrero 5–11: ‘Hilway sa Pagpili sang Kahilwayan kag Kabuhi nga Wala’y Katapusan, paagi sa Dako nga Manugpatunga.’ 2 Nefi 1–2,” Dali, Magsunod sa Akon—Para sa Puluy-an kag Simbahan: Libro ni Mormon 2024 (2024)
“Pebrero 5–11. 2 Nefi 1–2,” Dali, Magsunod sa Akon—Para sa Puluy-an kag Simbahan: 2024 (2024)
Si Adan kag si Eva, ni Douglas Fryer
Pebrero 5–11: “Hilway sa Pagpili sang Kahilwayan kag Kabuhi nga Wala’y Katapusan, paagi sa Dako nga Manugpatunga”
2 Nefi 1–2
Kon nahibal-an mo nga ang imo kabuhi malapit na lang matapos, ano ang imo ipamilin-bilin sa mga tawo nga imo pinakapalangga? Sang si propetang Lehi nakabatyag nga malapit na lang sia mapatay, gintipon niya ang iya mga kabataan sa ulihi nga tion. Ginpaambit niya sa ila ang ginpahayag sang Amay nga Langitnon sa iya. Naghatag sia sang iya testimonya parte sa Mesias. Nagtudlo sia sang mga kamatuoran sang ebanghelyo nga iya ginapakamahal sa mga tawo nga iya ginapakamahal. Naghambal sia parte sa kahilwayan, pagtuman, sa Pagkahulog nanday Adan kag Eva, pagtubos paagi kay Jesucristo, kag kalipay. Indi tanan sang iya kabataan nagpili nga magpangabuhi suno sa iya gintudlo—wala sing bisan isa sa aton ang makahimo sini nga mga pagpili para sa aton mga mahal sa kabuhi. Pero mahimo kita magtudlo kag magpamatuod parte sa Manunubos, nga “[nag]hilway [sa aton] sa pagpili sang kahilwayan kag kabuhi nga wala’y katapusan” (tan-awa sa 2 Nefi 2:26–27).
Mga Ideya sa Pagtuon sa Puluy-an kag sa Simbahan
Sarang ako “Magbugtaw! kag magbangon gikan sa yab-ok.”
Sa 2 Nefi 1:13–29, talupangda ang mga pulong nga gingamit ni Lehi para ilaragway ang espirituhanon nga kondisyon nanday Laman kag Lemuel. Ano ang nakabulig sa imo nga magbugtaw halin sa espirituhanon nga “mahamuok nga katulugon”? Ano ang makabulig sa imo nga iwaslik ang espirituhanon nga mga “kadena” sa imo kabuhi? Hunahunaa ang testimonya ni Lehi sa bersikulo 15 kag ang iya imbitasyon sa bersikulo 23. Ano ang mensahe sang Amay nga Langitnon para sa imo sa sining mga bersikulo?
Maggamit sang mga visual. Ang paggamit sang mga visual makabulig sa mga nagatuluon nga maintiendihan ang mga kamatuoran sang ebanghelyo kag madumduman ini sing mas malawig. Samtang nagahanda ka sa pagtudlo halin sa sini nga outline, pamensara kon ano nga mga visual ang pwede mo gamiton. Halimbawa, mahimo nga ang kadena nga papel makabulig sa mga nagatuon nga maintiendihan ang mga pulong ni Lehi sa 2 Nefi 1:13 ukon 2 Nefi 2:27.
Tungod kay Jesucristo, ako “hilway sa pagpili sang kahilwayan kag kabuhi nga wala’y katapusan.”
Ang pamilya ni Lehi ara na karon sa bag-o nga lugar, nga puno sang bag-o nga mga posibilidad. Ang mga pagpili nga himuon nila sa sining bag-o nga lugar mangin importante sa ila kadalag-an kag kalipayan. Amo siguro nga gintudloan ni Lehi ang iya anak nga si Jacob parte sa pagbuot, ukon ang ikasarang sa pagpili, sa 2 Nefi 2. Samtang ginatun-an mo ang mga bersikulo 11–30, isulat ang posible nga mga sabat sa sining mga pamangkot:
-
Ngaa importante kaayo ang pagbuot sa Amay nga Langitnon, bisan pa nga ginagamit ini sang iban nga mga tawo sa mga paagi nga makasakit?
-
Paano ginatinguhaan sang kaaway nga pahuyangon ukon gub-on ang imo pagbuot?
-
Paano ka ginabuligan sang Manluluwas nga “[mag]pili sang kahilwayan kag kabuhi nga wala’y katapusan” (bersikulo 27)?
Ari ang isa ka pa paagi nga magtuon parte sa pagbuot sa 2 Nefi 2: Pangitaa ang mga butang nga kinahanglanon para makaangkon kita sang kahilwayan sa pagpili kag malab-ot ang aton diosnon nga potensyal. Halimbawa:
-
2 Nefi 2:5: Ihibalo parte sa maayo kag malain; ang layi
Ano ang matabo sa aton kahilwayan sa pagpili kon ang isa ukon mas madamo pa sining mga butang wala?
Ang tagsa sa anum ka seksyon sang Para sa Kusog sang mga Lamharon: Giya sa Paghimo sang mga Pagpili nagaunod sang “Mga Imbitasyon” kag “Ginpromisa nga mga Bugay.” Tan-awa ang isa ukon masobra pa sining mga seksyon, kag magpili sang ginpromisa nga bugay nga gusto mo sa imo kabuhi. Ano nga imbitasyon ang kinahanglan mo aktohan para mabaton ini nga bugay? Pamensara nga ipaambit sa isa ka tawo ang mga bugay nga imo nabaton tungod sa pagsunod sining mga imbitasyon.
Mahimo sang Dios nga bayluhan sang mga bugay ang akon mga pagtilaw.
Nahibal-an ni Lehi nga ang iya bata pa nga anak nga si Jacob nag-eksperiyensya sang “pag-antos” kag “tuman nga kasubo” sa iya pagkabata (2 Nefi 2:1). Ngaa sa banta mo nga ang testimonya ni Lehi sa 2 Nefi 2:1–3, 6–25 mangin malahalon para kay Jacob? Ngaa malahalon ini para sa imo? Pangitaa ang mga tinaga kag mga dinalan nga mabaskog gid para sa imo. Paano ginkonsagrar sang Dios ang imo mga pag-antos para sa imo kaayohan? (Tan-awa sa 2 Nefi 2:2.)
Tan-awa man sa Mga Taga-Roma 8:28; sa Dale G. Renlund, “Makapaakig nga Inhustisya,” Liahona, Mayo 2021, 41–45.
Ang Pagkahulog kag ang Pagbayad-Sala ni Jesucristo importante nga mga bahin sang plano sang Amay nga Langitnon.
Madamo nga mga tawo ang nagapati nga ang Pagkahulog isa lamang ka trahedya kag si Eva kag Adan nakahimo sang permanente nga sayop sang ginpili nila nga kaunon ang prutas. Sa 2 Nefi 2:15–28, nagatudlo si Lehi sang dugang nga kamatuoran parte sa Pagkahulog —kag parte sa pagtubos paagi kay Cristo. Samtang ginausisa mo ining mga bersikulo, ilista ang mga kamatuoran parte sa natabo sa Hardin sang Eden. Makabulig ang mga pamangkot pareho sini:
-
Ngaa kinahanglanon ang Pagkahulog ?
-
Ano ang nangin papel ni Jesucristo sa paglampuwas sa mga epekto sang Pagkahulog?
-
Sa ano makabulig sa aton ang husto nga paghangop sang Pagkahulog nga maintiendihan ang aton kakinahanglan kay Jesucristo?
Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.
Let Not Your Heart Be Troubled [Indi Kamo Matublag sa Tagipusuon], ni Howard Lyon
Mga Ideya para sa Pagtudlo sang mga Kabataan
Si Jesucristo nagabulig sa akon nga malampuwasan ang mga epekto sang sala.
-
Para buligan ang mga kabataan nga maintiendihan ang imbitasyon ni Lehi nga “huksa ang mga kadena” sang sala, basi pwede kamo nga magbuligay sa paghimo sang mga kadena halin sa ginunting nga mga papel. Sa ginunting nga mga papel, pwede ka magpabulig sa imo kabataan nga isulat ang pila sa mga butang nga ginatentar ni Satanas nga aton himuon. Dayon pwede ninyo nga basahon sing ululupod ang 2 Nefi 1:13, 15, 23 samtang ginadrama-drama nila ang pila ka mga dinalan sa sining mga bersikulo—lakip na ang paghukas sang kadena nga papel. Sa ano nangin pareho sa kadena ang sala? Paano kita ginabuligan ni Jesus nga “hukson ang mga kadena” sang sala?
Ginabugayan ako kon ginatuman ko ang mga kasuguan sang Dios.
-
Makabulig bala sa imo kabataan nga ikumparar ang mga kasuguan sang Dios sa sapatos, kalo, gwantes, ukon iban pa nga butang nga nagaprotekta sa aton? Basi pwede mo sila tugotan nga isuksok ang iban sini samtang nagahambal ka parte sa kon paano kita ginaprotektahan sang mga kasuguan. Dayon pwede ninyo basahon ang 2 Nefi 1:20, nga ginapatalupangod nga kita “magauswag” (ginabugayan ukon ginaprotektahan) kon aton ginatuman ang mga kasuguan. Mag-istorya sang eksperiyensya sang ginbugayan ka ukon ginprotektahan tungod sa pagtuman sang mga kasuguan.
-
Para ipakita ang kinalain sang pag-uswag kag ang isikway sa presensya sang Dios (tan-awa sa 2 Nefi 1:20), pwede kamo sang imo pamilya nga magtan-aw sang mapagros nga tanom kag sang dahon ukon sanga nga gin-utod halin sa tanom. Dayon pwede nga rebyuhon sang imo kabataan ang mga pagpili nga ginhimo ni Nefi kag sang iya mga utod nga lalaki (tan-awa sa 1 Nefi 2:11–16; 3:5–7; 18:9–11). Ano ang nangin mga resulta sining mga pagpili? Ano nga mga pagpili ang nagabulig sa aton nga magpabilin nga konektado sa Dios?
Ginhatagan ako sang Dios sang kahilwayan sa pagpili.
-
Para buligan ang imo kabataan nga maintiendihan ang gintudlo ni Lehi parte sa mga kabaliskaran kag paghimo sang mga pagpili, pwede kamo maghampang kon sa diin mahambal ka sang isa ka tinaga (pareho sang masanag) kag ihambal sang imo kabataan ang baliskad sini (madulom). Buligi sila nga matun-an kon ngaa ang kabaliskaran may parte sa plano sang Dios samtang inyo ginabasa sing ululupod ang 2 Nei 2:11, 16. Dayon pwede kamo mag-istorya sang mga sugilanon parte sa bata nga gintentar sa paghimo sang sala nga pagpili. Pwede nga iistorya sang imo kabataan kon ano ang kabaliskaran sang sayop nga pagpili kag drama-dramahon ini.
-
Para matun-an ang kinalain sang “kahilwayan” kag “pagkabihag” (2 Nefi 2:27), pwede nga magdrowing ang imo kabataan sang mga litrato sang sapat nga ara sa hawla kag sang sapat nga ara sa natural sini nga ilistaran. Diin nga sapat ang hilway? Agdaha ang mga kabataan nga itudlo ang husto nga litrato kon mabasa mo ang tinaga nga “hilway” sa 2 Nefi 2:27. Magpamatuod nga ginhilway kita ni Jesucristo.
Para sa dugang nga mga ideya, tan-awa sa isyu sang Abyan nga magasin sini nga bulan.
Lehi and His People Arrive in the New World [Si Lehi kag Iya Katawhan Nag-abot sa Bag-ong Duta], ni Clark Kelley Price