“Abril 8–14: ‘Ang Ginuo Nagapangabudlay upod sa Aton.’ Jacob 5–7,” Dali, Magsunod sa Akon—Para sa Puluy-an kag Simbahan: Libro ni Mormon 2024 (2024)
“Abril 8– 14: Jacob 5–7,” Dali, Magsunod sa Akon—Para sa Puluy-an kag Simbahan: 2024 (2024)
Allegory of the Olive Tree [Ang Paanggid sang Kahoy nga Olivo], ni Brad Teare
Abril 8–14: Ang Ginuo Nagapangabudlay upod sa Aton
Jacob 5–7
May madamo kaayo nga mga tawo nga wala pa makabati sang ebanghelyo ni Jesucristo. Kon nagapanghalawhaw ka sa kadakuon sang buluhaton sang pagtipon sa ila pasulod sa Simbahan sang Ginuo, ang ginhambal ni Jacob parte sa mga kahoy nga olivo sa Jacob 5 may nagapasalig nga pahanumdom: ang kaolivohan ginapanag-iyahan sang Ginuo. Ginhatagan Niya ang tagsa sa aton sang isa ka gamay nga lugar para magbulig sa Iya buluhaton—ang aton pamilya, ang aton grupo sang mga abyan, ang malab-utan sang aton impluwensya. Kag kon kaisa ang una nga tawo nga ginabuligan naton tipon amo ang aton mga kaugalingon. Pero wala kita nagaisahanon sa sining buluhaton, kay ang Ginuo sang kaolivohan nagapangabudlay upod sa Iya mga suluguon (tan-awa sa Jacob 5:72). Kilala kag palangga sang Dios ang Iya mga anak, kag magahanda Sia sang paagi para ang kada isa sa ila makabati sang Iya ebanghelyo, bisan pa atong mga nagsikway sa iya sang una (tan-awa sa Jacob 4:15–18). Kag dayon, kon tapos na ang ulubrahon, ang tanan sang mga nangin “maukod sa pagpangabudlay upod sa [Iya] … mangin inyo ang kalipay upod sa [Iya] tungod sang bunga sang [Iya] kaolivohan” (Jacob 5:75).
Mga Ideya sa Pagtuon sa Puluy-an kag sa Simbahan
Si Jesucristo amo ang Ginuo sang kaolivohan.
Ang Jacob 5 isa ka sugilanon nga may simboliko nga kahulugan. Ginalaragway sini ang mga kahoy kag prutas kag mga trabahador, pero parte gid ini sa mga inter-aksyon sang Dios sa Iya katawhan sa bug-os nga kasaysayan. Gani mientras nga imo ginabasa ang kinaandan nga istorya, hunahunaa kon ano ayhan ang ginasimbolo sang pila ka mga butang sa istorya.
Halimbawa, kon ang ulubasan nagasimbolo sang kalibutan, kag ang kultibado nga kahoy nga olivo nagasimbolo sang Israel (ukon sang mga naghimo sang mga kasugtanan upod sa Dios; tan-awa sa Jacob 5:3), ano ayhan ang ginarepresentar sang ilahas nga mga puno sang olivo? Ano ayhan ang ginasimbolo sang maayo kag malain nga bunga? Ano pa ang iban nga mga simbolo nga imo makita?
Bisan pa nga ang Jacob 5 nagatudlo parte sa mga nasyon kag mga siglo sang kasaysayan sang kalibutan, parte man ini sa imo kag sa imo kabuhi. Ano nga mga mensahe ang imo nakita para sa imo kaugalingon sa Jacob 5?
Siguro ang pinakaimportante, ang Jacob 5 parte kay Jesucristo. Pangitaa Sia samtang nagabasa ka. Ano ang imo matun-an parte Iya, halimbawa sa mga bersikulo 40–41, 46–47?
Para sa dugang nga mga ideya parte sa Jacob 5, tan-awa ang diagram sa katapusan sining outline.
Ang Ginuo nagaimbitar sa akon nga magpangabudlay upod sa Iya sa Iya ulubasan.
Ang “iban pa nga mga suluguon” (Jacob 5:70) nga gintawag sa kaolivohan sang Ginuo nagalakip sang mga tawo pareho sa imo. Ano nga mga kamatuoran ang imo makita sa Jacob 5, labi na gid sa mga bersikulo 61–62 kag 70–75, parte sa pagtrabaho sa kaolivohan sang Ginuo? Ano ang imo natun-an parte sa Iya paagi sa pagbulig sa Iya buluhaton?
Samtang imo ginabasa ang parte sa “katapusan nga tion” nga magpangabudlay ang Ginuo sa Iya kaolivohan, ano ang nagainspirar sa imo para mag-alagad sa Ginuo “sa imo ikasarang”? Jacob 5:71 Pwede ka magpanumdom sang personal nga eksperiyensya kon sa diin nabatyagan mo ang kalipay samtang nagaalagad sa Ginuo sang kaolivohan—halimbawa, paagi sa pagpaambit sang ebanghelyo, pag-alagad sa templo, ukon pagpabakod sang iban. Pwede mo man tun-an ang mga halimbawa nga ginpaambit ni Elder Gary E. Stevenson sa iya mensahe nga “Simple ang Pagkatahum—Matahum ang Pagkasimple” (Liahona, Nob. 2021, 47–50).
Gintudlo ni Pangulong Russell M. Nelson: “Sa tagsa nga himuon ninyo ang bisan ano nga nagabulig sa bisan kay sin-o—sa magtimbang nga bahin sang kabuhi—nga magtikang padulong sa paghimo sang mga kasugtanan upod sa Dios kag pagbaton sang ila kinahanglanon nga mga ordinansa sang bunyag kag templo, nagabulig kamo sa pagtipon sang Israel. Amo lang ina kasimple” (“Hope of Israel” [bug-os-kalibutan nga debosyunal sang mga lamharon, Hunyo 3, 2018], ChurchofJesusChrist.org). Hunahunaa ang pagsugod sang lista sang mga ideya sang pwede mo himuon agud magbulig sa pagtipon sang Israel. Sa imo ginlista, ano sa pamatyag mo ang ipaobra sang Ginuo sa imo sini nga adlaw sa Iya ulubasan? Suno sa bersikulo 75, paano kita ginapremyohan sang Ginuo sa pagserbisyo sa Iya ulubasan?
Itudlo ang doktrina. Siguroha nga ang imo mga diskusyon nagatutok sa pundasyon nga doktrina sa balaan nga mga kasulatan. Mahimo mo ini paagi sa pagbasa sang balaan nga mga kasulatan sing ululupod kag dayon pag-istoryahanay sa kada isa sang mga kamatuoran nga inyo nakita, lakip na ang mga eksperiyensya sa pagpangabuhi sina nga mga kamatuoran.
Ginadumdom sang Ginuo ang Iya katawhan nga may pagpalangga kag kaluoy.
Sa istorya sang kahoy nga olivo, paano gin-untay sang Ginuo sang kaolivohan ang iya “butkon sang kaluoy”? (tan-awa halimbawa, sa Jacob 5:47, 51, 60–61, 71–72). Paano Niya ini ginhimo para sa imo?
Sarang ako magtindog nga mabakod kon ginahangkat sang iban ang akon pagtuo kay Jesucristo.
Ang eksperiyensya sang mga Nefinhon kay Serem masami nagakasulit sa karon nga panahon: ginatinguhaan sang mga tawo nga gub-on ang pagtuo kay Cristo. Paano si Jacob nagsabat sang gin-atake ang iya pagtuo? Ano ang matun-an mo sa iya mga reaksyon? Ano ang himuon mo karon para handaan ang mga tion nga hangkaton ang imo pagtuo sa Manluluwas?
Tan-awa man sa Jeffrey R. Holland, “Ang Presyo—kag Mga Bugay—sang Pagkasumulunod,” Ensign ukon Liahona, Mayo 2014, 6–9.
Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.
Mga Ideya para sa Pagtudlo sang mga Kabataan
Ang Ginuo nagaulikid sa Iya katawhan.
-
Paano mo isugid ang istorya sang mga kahoy nga olivo sa paagi nga maintiendihan sang imo kabataan? Isa ka paagi amo ang paglakat sa gwa para magtan-aw sang kahoy kag makadali nga rebyuhon ang mayor nga mga punto sang istorya. Ano ang ginhimo sang Ginuo sang kaolivohan sa Iya mga kahoy? Paano kita mangin pareho sa mga trabahador sa istorya kag buligan ang iban nga mabatyagan ang pagpalangga sang Manluluwas?
-
Ginsugid ni Jacob ang istorya sang mga kahoy nga olivo para agdahon ang iya katawhan nga magpalapit kay Cristo. Amo man sini ang iya himuon sa imo kabataan. Siguro pwede mo ihambal ang kabilogan sang istorya paagi sa mga bersikulo pareho sang Jacob 5:3–4, 28–29, 47, kag 70–72. Pwede mo basahon ukon sang imo kabataan ang Jacob 5:11, 41, 47, kag 72, nga ginapangita ang mga butang nga nagapakita kon daw ano ang pag-ulikid sang Ginuo sang kaolivohan (si Jesucristo) sa mga kahoy. Ano ang ginhimo sang Manluluwas para ipakita nga nagaulikid Sia sa aton?
Palangga ako sang Amay nga Langitnon kag patawaron Niya ako kon maghinulsol ako.
-
Ang Jacob 6:4–5 may importante nga mensahe para sa aton kon makahimo kita sang sayop nga mga pagpili. Basi pwede mo buligan ang imo kabataan nga pangitaon ini. Ano nga mga tinaga sa sining mga bersikulo ang nagahatag sa aton sang paglaum sa nagatubos nga gugma sang Dios? Ano ang ginatudlo sa aton sang Jacob 6:4–5 parte sa kinahanglan naton himuon para maluwas sa ginharian sang Dios?
Sarang ko tindugan ang nahibal-an ko nga matuod.
-
Paano mo papagsikon ang imo kabataan nga tindugan ang kamatuoran pareho sang ginhimo ni Jacob? Paano gintindugan ni Jacob ang nahibal-an niya nga husto? Agdaha ang imo kabataan nga iistorya ang mga eksperiyensya sang gintindugan nila ang husto, ukon mag-istorya sang imo kaugalingon nga eksperiyensya.
Para sa dugang nga mga ideya, tan-awa sa isyu sang Abyan nga magasin sini nga bulan.