“Eberi 22–28: ‘Kaonaki n Tangiran te Atua ma Aomata ni Kabane.’ Motiaea 1– 3,” Nakomai, Iriirai—Ibukin te Mweenga ao te Taromauri: Ana Boki Moomon 2024 (2024)
“Eberi 22–28. Motiaea 1–3,” Nakomai, Iriirai—Ibukin te Mweenga ao te Taromauri: 2024 (2024)
Butimwaean ana Reirei te Uea ae Beniamina, iroun Maria Alejandra Gil
Eberi 22–28: “Kaonaki n Tangiran te Atua ma Aomata ni Kabane”
Motiaea 1–3
Ngke ko ongo te taeka ae te Uea,, ko na bae n iangoi baunuea, tooro, ao kaintokanuea. Ni Motiaea 1–3, kona wareka iai taekan te aeka n uea ae kaokoro. N aki karekea maiuna man aia mwakuri ana botanaomata, e a tia te Uea Beniamina “ni kakorakoraa ni beku n [oin] baina” (Motiaea 2:14). Irarikin karekeaia tabeman bwa a na beku ibukina, e buokiia ana aomata “ma a na kona, a na kaantaninga ma korakorana ni kabane ake [e] a tia n [anganna] te Uea” (Motiaea 2:11). E aki tangiria te uea bwa e na taromauriiaki irouia ana botanaomata; ma, e reireiia bwa a na neboa Uean Karawa, Iesu Kristo. E ataia te uea ae Beniamina bwa bon “te Uea ae Moan te Mwaaka ae tautaeka” (Motiaea 3:5), are e roko “mai karawa” ao n “nako buakoia aomata, … bwa e aonga n reke te kamaiuaki nakoia natiia aomata eng rinanon onimakinan arana” (Motiaea 3:5, 9).
Iango ibukin Reiakinana n te Mweenga ao n te Taromauri
“Ukori [koroboki aika tabu] ma te nanomwaaka.”
Inanon kiibu aikai, noria bwa a kanga koroboki aika tabu ni kakabwaiaia ana aomata te Uea Beniamina. E kanga n nakoraoi maium ibukina ngkai iai iroum koroboki aika tabu?
Ngkana I beku ibukiia tabeman, I bon beku naba ibukin te Atua.
Tera n am iango ae e na taekinna te Uea Beniamina ngkana ko titirakinna bwa bukin tera e mwakuri ma “ana konaa, ana kaantaninga, ma korakorana ni kabane”? (Motiaea 2:11). Iangoa aei ngkai ko wareka Motiaea 2:10–26. Tera ae e reirei iaona te Uea Beniamina ae e kaunga nanom ni beku ibukiia aomata tabeman n te kawai ae tamaroa riki? Te katooto, tera ae nanonaki i roum n ataakina bwa ngkana ko beku ibukiia aomata tabeman, ko bon beku naba ibukin te Atua? (taraa Motiaea 2:17). Ukora te kairi mai ieta bwa ko na kanga ni beku ibukin temanna n te wiiki aei.
E ngae ngke ti ataia ae ti riai ni beku ibukiia tabeman, n tabetai ti bon kaitarai kangaanga. Te kawai riki teuana ni kamatebwaia Motiaea 2:10–26 bon korean koaua ake e reiakin te Uea ae Beniamina ni karinanii ake a kona ni buokiko n tokanikai iaon kakawenako ake a totokoiko man karaoan am beku. Tera taneiai aika a tia n kaotia nakoim bwa baike e reiakin te Uea Beniamina a bon koaua?
Beretitenti Joy D. Jones e tibwa te taneiai ae korakora are e bita arona n taraa te beku nakoia tabeman. Wareka rongorongona n “For Him” (Ensign ke Riaona, Nobembwa 2018, 50–52), ao iangoa reken te tai ae ko na beku ibukiia tabeman. Ko na bae n korei ni karinani tabeua mai ibuakona ao iangoia bwa e kanga ana rongorongo Beretitenti Jones, n raonaki ma Motiaea 2:17, ni kona ni kairoroa arom ni waaki n reken taai aikai. Te anene n taromauri n aron “A Poor Wayfaring Man of Grief” (Anene n Taromauri,, nambwa 29) ke te tamnei n aron “The Old Shoemaker” (Gospel Library) e na kona ni buokiko ni iangoi nonoori tabeua.
Taraa naba Mataio 25:40; “Faith Murray’s Story: Overcoming Adversity through Service,” “King Benjamin Teaches about Serving God” (videos), Gospel Library; JustServe.org; Gospel Topics, “Service,” Gospel Library.
Ngkana I beku ibukiia tabeman, I bon beku naba ibukin te Atua.
E roko te kukurei man kawakinan ana tua te Atua.
Ko na kanga ni kabwarabwaraa te kukurei are e roko man te ongotaeka nakon ana tua te Atua? Iai mwakoro n taeka inanon Motiaea 2:38–41 ae e kona ni buokiko ni kabwarabwaraa bwa bukin tera ko kawakin Ana tua?
I kona n riki bwa te aomata ae itiaki rinanon ana Mwakuri ni Kamaiu Iesu Kristo.
Te Uea ae Beniamina, n aroia burabeti ni kabane, a kakoaua iroun Iesu Kristo bwa aonga ana aomata “ni kona ni karekea kamaunaan aia bure, ao a na onrake n te kimwareirei ae moan te bati” (Motiaea 3:13). Aikai tabeua titiraki aika ko na iangoi ngkai ko wareka ana koaua te Uea Beniamina iaon te Tia Kamaiu n Motiaea 3:1–20:
-
Tera ae I reiakinna man kiibu aikai iaon taekan te Tia Kamaiu ao Ana mwakuri?
-
Tera ae I reiakinna man Motiaea 3:18–19 bwa tera ae nanonaki n te riki bwa te aomata ae itiaki?
-
E kanga n tia ni buokai Iesu Kristo n tokanikai iaon te bure, bita aroarou, ao n riki n aiaron te aomata ae itiaki?
“Te Uea ae Moan te Mwaaka … e na ruo mai karawa.”
Tera ae reke man korakoran te iti ae e kona n anganiko bwa ko na karaoia? E kanga n ae e na kaokoro maium ngkana akea? Titiraki aikai a kona ni buokiko ni iangoa te mwaaka ae e korakora riki are e kona te Tia Kamaiu ni karokoa inanon maium.
Te anera are e kaoti nakon te Uea Beniamina e taekina Iesu Kristo bwa “te Uea ae Moan te Mwaaka,” te ara ae nanona e mena Irouna mwaaka ni kabane. Tera ae ko reiakinna man Motiaea 3:5–21 bwa e kanga te Tia Kamaiu ni kabonganaa te mwaaka anne? Ko kanga n tia n nora mwaakan te Tia Kamaiu inanon maium ao ni maiuia aomata ake i rarikim? Tera ae ko kona ni karaoia ao n riki nako iai man Korakorana? E kanga n ae e na kaokoro maium ngkana akea?
Ibukin iango riki tabeua, taraa te beeba ni kaongora n te namwakaina aio n te Riaona ao Ibukin Kakorakoraia Kairake maekatiin.
Iango ibukin Reiakinaia Ataei
Ngkana I beku ibukiia tabeman, I bon beku ibukin te Atua.
-
Te iteraniba ibukin waaki ni kakukurei n te wiiki aei iai inanona te baunuea ae a kona natim ni karaoia. Tao a na tangiria n ikaruoruo n tei iaon te kaintekateka ke te kai n tei ao aongkoa a riki bwa te Uea Beniamina ngkai ko tibwai tabeua bwaai ake e reirei iaona te Uea Beniamina nakoia ana aomata, ae kuneaki ni Motiaea 2–3. Ko kona naba n tibwaia ma ngaiia “Mwakoro 12: Te Uea ae Beniamina” (Karaki man Ana Boki Moomon, 32–35) ni kaota aron ana reirei te Uea Beniamina.
-
Motiaea 2:17 tao te kibu ae tamaroa ibukiia natim bwa a na reiakinna. Ko kona ni buokiia n taekin tabeua taeka ni kaokiokii tabeua te tai. Ke ko kona ni korea te kibu, ma taeka aika a bua, ao tuangiia natim bwa a na kakaea te taeka ae bua. Imwiina ko kona n marooro ma natim bwa bukin tera te Uea e tangiriira bwa ti na beku imarenara.
-
Ko kona ni buokiia natim bwa a na ukoria n Motiaea 2:11–18 ni kakaea bwa tera ae e karaoia te Uea Beniamina ni beku ibukiia tabeman. Imwiina natim a kona ni korei iaon moti ni beeba tabeua kawai ae a kona ni beku ni buokiia kaain aia utu. Katikui moti ni beeba inanon te kaonteina n aron te baeki ke te turumwa, are a na kona natim n anaa teuana ni katoa bong ao ni karaoa te mwakuri n ibuobuoki ibukin temanna.
Ana reiakinaki riki ataei man kaokiokana. Tai maaku ni kaokioki waaki ni kakukurei n te tai ae mwaiti, riki ma ataei aika a uarereke. Kaokiokana e na buokiia ataei n uringa te bwai are a tia n reiakinna.
Te Uea ae Beniamina e reirei bwa ti kona ni beku ibukin te Atua ngkana ti buokiia tabeman.
Kakabwaia ni kabane a roko mai iroun Tamara are i Karawa.
-
Ana mwakuri n ibuobuoki te Uea Beniamina nakoia ana aomata e reke man nanona ni kakaitau nakon te Uea. Ko na kanga ni karika te namakin ae aekan anne inanoia natim? Kam kona n uaia ni wareka Motiaea 2:21 ao moana korean kakabwaia ake e anganiira Tamara are i Karawa. Imwiina ko kona ni karinii riki nakon ake ko korei tabeua kakabwaia ake a iangoi ataei.
-
Aio te takakaro ae kam kona ni karaoia ni buokiia natim n atai ana kakabwaia Tamara are i Karawa. Ataei a kona ni bwaatina tamnein te Tia Kamaiu imarenaia ngkai anene ke n ongora nakon te anene iaon te kakaitau (taraa “Gratitude” n te intekiti n atuun reirei n Aia Boki n Anene Ataei). Katoka te anene ke katoka te katangitang ni katoaa te tai, ao kaoa are e reke irouna te tamnei bwa e na tibwaua te kakabwaia are e kakaitau ibukina. Ni kaineti ma Motiaea 2:22–24, ti na kanga ni kaotia bwa ti kakaitau ibukin ara kakabwaia?
Iesu Kristo e na buokai bwa na kona n riki n ai Arona.
-
Te anera e tuanga te Uea ae Beniamina koaua aika kakawaki iaon maiun ao ana mwakuri Iesu Kristo. Tao ngkoe ma natim kam kona n tarai tabeua tamnei ni baika a riki ake a taekinaki ni Motiaea 3:5–10 (taraa, te katooto, Te Boki n Tamnei ibukin te Euangkerio, nambwa 30, 41, 42, 57,59). Ngkai ko wareka Motiaea 3:5–10, a kona natim ni katei baia ngkana a ongo man te wareware te bwai teuana are iai n te tamnei.
-
A tia ni buobuokiko natim ni katauraoa te amwarake ni kabongana te retibii? Tao ko kona ni marooro iaon te taneiai anne ao ni kabongana Motiaea 3:19 ni karekea te “retibii” ibukin arora ni kona n riki n ai aron Iesu Kristo. E kanga Iesu Kristo ni buokiira bwa ti na riki n ai Arona?
Ibukin iango riki tabeua, taraa te beeba ni kaongora n te namwakaina aio n te Rao maekatiin.
Ana Taetae te Uea ae Beniamina,, iroun Jeremy Winborg