Mosiah 4–6

Usahay, bisan og gibati ninyo nga gipasaylo na sa inyong mga sala, mahimong kamo manlimbasog aron mapabilin kana nga pagbati ug magpabilin diha sa dalan sa pagkamatarong. Si Hari Benjamin mitudlo sa iyang katawhan kon unsaon sa pagdawat ug pagpabilin sa kapasayloan sa mga sala. Samtang magtuon ka sa kapitulo 4 sa Mosiah, ikonsiderar ang pagpangutana og sama niini:

Mga bersikulo 1–8.Unsa ang mga kondisyon diin ang Dios moganti og kapasayloan sa inyong mga sala? Unsa ang inyong nakat-onan mahitungod Kaniya niining mga bersikulo nga makapadasig kaninyo sa paghinulsol? Unsaon ninyo pagkahibalo nga kamo nakahinulsol?

Mga bersikulo 11–16.Sumala niini nga mga bersikulo, unsa ang mahitabo sa atong mga kinabuhi kon kita mobuhat sa mga butang nga gihulagway diha sa bersikulo 11? Sa unsang paagi nga kamo, o ang tawo nga inyong gimahal, nakasinati niini nga mga kausaban? Itandi kini nga mga kausaban ngadto sa mga kausaban nga gihulagway diha sa Mosiah 3:19.

Mga bersikulo 16–30.Sa unsa kaha nga paagi ang pagpakigbahin sa unsay anaa kaninyo ngadto sa uban makatabang kaninyo nga makapabilin sa kapasayloan sa inyong mga sala? Unsaon ninyo sa paggamit ang bersikulo 27 sa inyong mga paningkamot nga mahimong sama ni Kristo?

Sa unsang paagi kitang tanan mga makililimos? Sumala niini nga mga bersikulo, kinahanglan unsaon nato sa pagtagad ang tanang mga anak sa Dios? (tan-awa sa Mosiah 4:26). Kinsa ang nagkinahanglan sa inyong tabang?

Tan-awa usab sa Becky Craven, “Imo na ang Sukli,” Liahona, Nob. 2020, 58–60.

Imahe

icon sa seminary

Mosiah 4:5–10

Ako motuo ug mosalig sa Dios.

Ang imbitasyon ni Hari Benjamin nga motuo ug mosalig sa Dios sama ra kaimportante karon sama sa karaang mga panahon. Samtang inyong basahon ang Mosiah 4:5–10, pangitaa ang mga kamatuoran mahitungod sa Dios nga makahatag kaninyo og rason sa pagsalig Kaniya. Hinumdomi ang mga imbitasyon nga gihatag ni Hari Benjamin diha sa bersikulo 10. Ngano nga ang pagsalig sa Dios mas makapasayon sa pagbuhat sa unsay gidapit ni Hari Benjamin?

Ikonsiderar ang pagsiksik og pipila niining dugang nga mga kasulatan aron makahimo og lista sa mga hiyas sa Dios: Jeremias 32:17; 1 Juan 4:8; 2 Nephi 9:17; Alma 32:22; Mormon 9:9; Ether 3:12; Doktrina ug mga Pakigsaad 19:1–3; 88:41. Mahimo ka nga mogamit sa inyong lista aron makahimo og lain-laing pamaagi sa pagkompleto sa kapahayag nga sama niini: “Tungod kay ako nakaila sa Dios , ako makasalig Kaniya sa .”

Ang atong pagsalig sa Dios magkadaghan samtang kita makabaton og mga kasinatian uban Kaniya. Sa Mosiah 4:1–3, unsa ang nakatabang sa katawhan ni Hari Benjamin nga “nakakab-ot sa usa ka kasayoran sa kaayo sa Dios”? (bersikulo 6). Hunahunaa ang mahitungod sa mga kasinatian nga inyong naangkon uban sa Dios. Unsa ang gitudlo niini nga mga kasinatian diha kaninyo mahitungod Kaniya? Unsa nga mga lakang ang inyong gibuhat (o mahimo ninyong buhaton) aron mapalawman ang inyong pagtuo o pagsalig diha sa Dios?

Tan-awa usab sa “Ako Nasayod Akong Amahan Buhi,” Mga Himno, nu. 302.

Ang Dios wala maghatag kanato og lista sa matag posible nga sala. Sumala sa Mosiah 4:29–30, unsa hinoon ang Iyang gibuhat? Pamalandongi kon sa unsang paagi ang inyong mga hunahuna, mga pulong, ug mga buhat makaapekto sa inyong kaugalingon ug sa uban. Sa unsa nga paagi kini nakaapekto sa inyong relasyon uban sa Dios? Giunsa ninyo sa “pagbantay [ang inyong kaugalingon]”?

Komon ra sa mga tawo nga mosulti nga, “Ako dili mausab. Ingon na gayod ako niana.” Agig kalahian, ang kasinatian sa katawhan ni Hari Benjamin nagpakita kanato kon sa unsa nga paagi ang Espiritu sa Ginoo sa tinud-anay makausab sa atong mga kasingkasing. Samtang kamo magbasa diha sa Mosiah 5:1–5, hunahunaa kon sa unsa nga paagi nga ang “dako nga kausaban” nga maggiya ngadto sa tinuod nga pagkakabig nahitabo—o mahimong mahitabo—sa inyong kinabuhi. Hunahunaa ang mahitungod sa ginagmay, inanay nga mga kausaban ingon man ang “dako” nga mga kasinatian. Sa unsa nga paagi nga kini nga mga kasinatian motabang kaninyo kon kamo mag-atubang og tintasyon?

Tan-awa usab sa Ezekiel 36:26–27; Alma 5:14; “Ang Katawhan ni Hari Benjamin Naghimo og Pakigsaad” (mga bidyo), Gospel Library.

Imahe

Si Kristo nag-ayo sa usa ka babaye nga masakiton

Unsay inyong nakat-onan gikan sa Mosiah 5:7–9 kon unsay gipasabot sa pagdala diha sa inyong kaugalingon sa ngalan ni Kristo? Unsa ang gitudlo sa mga pag-ampo sa sakramento (tan-awa sa Moroni 4–5) mahitungod niini? Unsaon ninyo sa pagpakita nga kamo “iya” sa Manluluwas?

Tan-awa usab sa D. Todd Christofferson, “Nganong Mahinungdanon ang Dalan sa Pakigsaad,” Liahona, Mayo 2021, 116–19.

• Sa pagtudlo mahitungod sa hingpit nga kalipay sa paghinulsol, tingali inyong tugotan ang inyong mga anak nga magkapilit o mabuling ang ilang mga kamot ug bantayi kon unsa ang ilang bation human manghugas. Dayon inyong matandi kana ngadto sa gibati sa katawhan diha sa Mosiah 4:1–3 sa wala pa ug pagkahuman nga ang ilang mga sala napasaylo na. Ipakigbahin ang inyong pagpamatuod sa gahom sa Manluluwas sa paglimpyo kanato sa espirituhanon nga paagi.

• Nasayod ba ang inyong mga anak kon unsaon sa paghinulsol sa hingpit ug sinsero nga paagi? Tabangi sila nga makakaplag sa unsay gibuhat sa katawhan ni Hari Benjamin diha sa Mosiah 4:1–3, 10. Mahimo usab sila nga makarebyo sa “Hinulsol, Paghinulsol” diha sa Giya ngadto sa mga Kasulatan. Giunsa ni Jesukristo paghimong posible sa paghinulsol?

• Ang pagserbisyo sa uban makapahimo kanato nga mobati og maayo. Tingali ang inyong mga anak makahisgot mahitungod sa usa ka higayon sa dihang ilang gimahal ug giserbisyohan ang usa ka tawo ug kon sa unsa ang ilang gibati niana nga kasinatian. Unsa ang pipila ka rason nganong ang mga tawo dili ganahan moserbisyo sa uban? Unsa ang atong mahimong isulti sa tawo aron madapit sila sa pagtabang sa mga tawo nga nanginahanglan? Pangitaa ang mga ideya diha sa Mosiah 4:16-26.

• Si Hari Benjamin mitudlo nga kon kita moduol kang Kristo ug makadawat og kapasayloan sa atong mga sala, kita “mapuno uban sa gugma sa Dios” (Mosiah 4:12). Kini mogiya kanato ngadto sa pagkahimong mahigugmaon ug mabination ngadto sa uban. Ikaw ug ang inyong mga anak makapangita diha sa Mosiah 4:13–16, 26 (o usa ka awit sama sa “Mouban Ko ninyo,” Songbook sa mga Bata, 78–79) ug pangitaa ang hugpong sa mga pulong nga naghulagway kon sa unsang paagi kita makaserbisyo sa uban. Mahimo na dayon sila nga moaksiyon niini nga mga butang o magdrowing sa ilang mga hulagway ug tag-anon ang hugpong sa mga pulong sa usag usa. Unsaon nato sa pagpakita og gugma ug kamabination diha sa panimalay, sa eskwelahan, o sa simbahan?

Imahe

batan-ong babaye nga nakigdula sa gamayng bata

• Ang inyong mga anak tingali malingaw sa paghimo og mga tsapa nga nagpakita sa ngalan ni “Jesukristo” ug magsul-ob niini ibabaw sa ilang kasingkasing (tan-awa ang pahina sa kalihokan niini nga semana). Samtang sila magbuhat sa ingon, mahimo ninyong basahon ngadto kanila ang Mosiah 5:12 ug maghisgot kon sa unsang paagi ang mga pakigsaad, o mga saad, uban sa Dios nahisama sa pagbaton og ngalan ni Kristo nga “kanunayng nahisulat diha sa [atong] mga kasingkasing.”