“Abril 29–Mayo 5: ‘Isa ka Dako nga Pagbag-o.’ Mosias 4–6:” Dali, Magsunod sa Akon—Para sa Puluy-an kag Simbahan: Libro ni Mormon 2024 (2024)
“Abril 29–Mayo 5. Mosias 4–6,” Dali, Magsunod sa Akon—Para sa Puluy-an kag Simbahan: 2024 (2024)
In the Service of Your God [Sa Pag-alagad sa Inyo Dios], ni Walter Rane
Abril 29–Mayo 5: “Isa ka Dako nga Pagbag-o”
Mosias 4–6
Nakaagi ka bala nga nagpamati ka sa ginhambal sang isa ka tawo kag natandog ka nga bag-uhon ang imo kabuhi? Ayhan nagdesisyon ka, tungod sang imo nabatian, nga mangabuhi sing may diutay nga kinalain—ukon bisan pa gani sing may dako nga kinalain. Ang pagwali ni Haring Benjamin daw amo sina nga klase sang pagwali, kag ang mga kamatuoran nga iya gintudlo may amo sina nga epekto sa mga tawo nga nakabati sini. Ginsugid ni Haring Benjamin sa iya katawhan kon ano ang gintudlo sa iya sang isa ka anghel—nga dalagko nga mga bugay ang posible paagi sa “[nagabayad-sala] nga dugo ni Cristo” (Mosias 4:2). Tungod sang Iya mensahe, ginbag-o nila ang ila panan-aw sa ila kaugalingon (tan-awa sa Mosias 4:2), ginliwat sang Espiritu ang ila mga huyog (tan-awa sa Mosias 5:2), kag nakigsugot sila sa Dios nga ila pirme himuon ang Iya pagbuot (tan-awa sa Mosias 5:5). Amo sini ang nangin epekto sang mga pulong ni Haring Benjamin sa iya katawhan. Ano ang epekto sini sa imo?
Mga Ideya sa Pagtuon sa Puluy-an kag sa Simbahan
Paagi kay Jesucristo, pwede ako magbaton kag maghupot sang kapatawaran sang akon mga sala.
Kon kaisa, bisan pa nga nabatyagan mo nga napatawad ka na sang imo mga sala, mahimo nga ginabudlayan ka nga magpabilin ang ina nga balatyagon kag magpadayon sa dalan sang pagkamatarong. Gintudloan ni Haring Benjamin ang iya katawhan kon paano magbaton kag maghupot sang kapatawaran sang mga sala. Samtang imo ginatun-an ang kapitulo 4 sang Mosias, pamensara nga magpamangkot sang pareho sini:
-
Mga bersikulo 1–8.Ano ang mga kondisyones kon sa diin nagahatag ang Dios sang kapatawaran sang imo mga sala? Ano ang imo natun-an parte sa Iya sa sining mga bersikulo nga nagainspirar sa imo nga maghinulsol? Paano mo mahibal-an nga naghinulsol ka na?
-
Mga bersikulo 11–16.Suno sa sining mga bersikulo, ano ang nagakatabo sa aton mga kabuhi kon ginahimo naton ang mga butang nga ginalaragway sa bersikulo 11? Paano mo naeksperiyensyahan, ukon sang imo pinalangga, ining mga pagbag-o? Ikumparar ining mga pagbag-o sa mga pagbag-o nga ginlaragway sa Mosias 3:19.
-
Mga bersikulo 16–30.Paano ayhan ang pagpaambit sa iban sang kon ano ang ara sa imo makabulig nga mahuptan mo ang kapatawaran sang imo mga sala? Paano mo gamiton ang bersikulo 27 sa imo mga pagpaninguha nga mangin pareho kay Cristo?
Sa ano nga aspeto kita tanan mga manugpakilimos? Suno sa sining mga bersikulo, paano naton dapat tratuhon ang tanan nga mga anak sang Dios? (tan-awa sa Mosias 4:26). Sin-o ang nagakinahanglan sang imo bulig?
Tan-awa man sa Becky Craven, “Imo Lang ang Kambyo,” Liahona, Nob. 2020, 58–60.
Nagatuo kag nagasalig ako sa Dios.
Ang imbitasyon ni Haring Benjamin nga magtuo kag magsalig sa Dios tama kaimportante sa karon nga panahon pareho sang dumaan nga panahon. Samtang imo ginabasa ang Mosias 4:5–10, pangitaa ang mga kamatuoran parte sa Dios nga nagahatag sa imo sang rason nga magsalig sa Iya. Pat-ini ang mga imbitasyon nga ginhatag ni Haring Benjamin sa bersikulo 10. Ngaa ang pagsalig sa Dios nagapahapos sa paghimo sang ginaagda ni Haring Benjamin nga aton himuon?
Pamensara nga pangitaon ang iban sining dugang nga balaan nga mga kasulatan para maghimo sang listahan sang mga kinaiya sang Dios: Jeremias 32:17; 1 Juan 4:8; 2 Nefi 9:17; Alma 32:22; Mormon 9:9; Eter 3:12; Doktrina kag mga Kasugtanan 19:1–3; 88:41. Pwede mo gamiton ang imo listahan para kompletuhon sa lainlain nga paagi ang dinalan pareho sini: “Tungod nahibal-an ko nga ang Dios , makasalig ako sa Iya nga .”
Ang aton pagsalig sa Dios nagadako kon may mga eksperiyensya kita upod sa Iya. Sa Mosias 4:1–3, ano ang nagbulig sa katawhan ni Haring Benjamin nga “[maka]dangat sa ihibalo nahanungod sa kaayo sang Dios”? (bersikulo 6). Pamensara ang imo mga eksperiyensya upod sa Dios. Ano ang ginatudlo sa imo sining mga eksperiyensya parte sa Iya? Ano ang mga tikang (ukon himuon nga mga tikang) para padalumon ang imo pagtuo ukon pagsalig sa Dios?
Pag-istorya sang sagrado nga mga eksperiyensya. Ang iban nga mga eksperiyensya tama kasagrado ukon kapersonal para iistorya. Kon mag-imbitar sa iban nga mag-istorya sang mga eksperiyensya, indi sila pagpilita nga mag-istorya kon indi nila gusto.
Kinahanglan ko bantayan ang akon mga panghunahuna, mga pulong, kag mga buhat.
Wala kita ginhatagan sang Dios sang listahan sang tanan nga posible nga sala. Suno sa Mosias 4:29–30, ano ang Iya ginhimo sa baylo sini? Binagbinaga kon paano ang imo panghunahuna, mga tinaga, kag mga binuhatan makaapekto sa imo kag sa iban. Paano ini makaapekto sa imo relasyon sa Dios? Paano mo “bantayan ang [imo kaugalingon]”?
Ang Espiritu sang Ginuo mahimo nga magtuga sang dako nga pagbag-o sa akon tagipusuon.
Kinaandan na para sa mga tawo nga magsiling, “Indi na ako magbag-o. Amo na ako sini ’ya.” Sa kabaliskaran, ang eksperiyensya sang katawhan ni Haring Benjamin nagapakita sa aton kon paano bag-uhon sing matuod-tuod sang Espiritu sang Ginuo ang aton mga tagipusuon. Samtang imo ginabasa ang Mosias 5:1–5, hunahunaa kon paano ang “dako nga pagbag-o” padulong sa matuod-tuod nga pagkahaylo natabo—ukon mahimo nga matabo—sa imo kabuhi. Hunahunaa ang indi hilmunon, amat-amat nga mga pagbag-o lakip na ang “dako” nga mga eksperiyensya. Paano makabulig sa imo ining mga eksperiyensya kon nagaatubang ka sang tentasyon?
Tan-awa man sa Ezequiel 36:26–27; Alma 5:14.
Healing Hands [Nagapang-ayo nga mga Kamot], ni Adam Abram
Ginadala ko sa akon kaugalingon ang ngalan ni Cristo samtang nagahimo ako sang mga kasugtanan upod sa Iya.
Ano ang imo matun-an sa Mosias 5:7–9 parte sa buot silingon sang pagdala sa imo kaugalingon sang ngalan ni Cristo? Ano ang ginatudlo sang mga pangamuyo sa sakramento (tan-awa sa Moroni 4–5) parte diri? Paano mo ipakita nga “Iya” ka sang Manluluwas?
Mga Ideya para sa Pagtudlo sang mga Kabataan
Ang paghinulsol nagadala sang kalipay.
-
Para magtudlo parte sa kalipay sang paghinulsol, pwede mo tugotan ang imo kabataan nga mahigkuan ang ila mga kamot kag talupangda kon ano ang ila nabatyagan pagkatapos nga magpanghugas. Dayon pwede mo ina ikumparar sa nabatyagan sang katawhan sa Mosias 4:1–3 antes kag pagkatapos nga mapatawad sang ila mga sala. Ipaambit ang imo testimonya sa gahum sang Manluluwas nga tinloan kita sa espirituhanon.
-
Nakahibalo bala ang imo kabataan kon paano maghinulsol sing lubos kag sinsero? Buligi sila nga pangitaon kon ano ang ginhimo sang katawhan ni Haring Benjamin sa Mosias 4:1–3, 10. Paano ni Jesucristo ginpatigayon nga mangin posible ang paghinulsol?
Ang ebanghelyo ni Jesucristo nagainspirar sa akon nga tratuhon ang iban nga may pagpalangga kag kaayo.
-
Manami sa balatyagon ang paserbisyo sa iban. Basi pwede nga iistorya sang imo kabataan ang tion sang ginpalangga ukon ginserbisyohan nila ang isa ka tawo kag kon ano ang ila nabatyagan sa sina nga eksperiyensya. Ano ang pila ka mga rason nga indi ang mga tawo gusto nga magserbisyo sa iban? Ano ang pwede naton ihambal sa isa ka tawo para hagaron sila nga magbulig sa mga nagakinahanglan? Magpangita sang mga ideya sa Mosias 4:16–26.
-
Gintudlo ni Haring Benjamin nga kon magpalapit kita kay Cristo kag makabaton sang kapatawaran sang aton mga sala, “mapuno [kita] sang gugma sang Dios” (Mosias 4:12). Ginagiyahan kita sini nga mangin mapinalanggaon kag maayo sa iban. Pwede ninyo usisaon sang imo kabataan ang Mosias 4:13–16, 26 kag pangitaon ang mga dinalan nga nagalaragway kon paano naton sarang alagaran ang iban. Dayon pwede nila ini idrama-drama ukon idrowing kag pakton ang mga dinalan sang kada isa. Paano naton ipakita ang pagpalangga kag kaayo sa balay, sa eskwelahan, ukon sa simbahan?
Gintudloan kita ni Jesucristo nga mangin maayo sa iban.
Sa paghimo ko sang mga kasugtanan upod sa Dios, ginadala ko sa akon kaugalingon ang ngalan ni Cristo.
-
Basi masadyahan ang imo kabataan sa paghimo sang mga badge nga may ngalan “Jesucristo” kag isibit ini sa ibabaw sang ila mga tagipusuon (tan-awa sa pahina para sa kahiwatan sini nga semana). Samtang ginahimo nila ini, pwede mo basahon sa ila ang Mosias 5:12 kag hambalan kon paano nangin pareho ang paghimo sang mga kasugtanan, ukon mga promisa sa Dios, sa pagbutang sang ngalan ni Cristo nga “dalayon nga nakasulat sa [aton] mga tagipusuon.”
Para sa dugang nga mga ideya, tan-awa sa isyu sang Abyan nga magasin sini nga bulan.
In His Constant Care [Sa Iya Dalayon nga Pag-atipan], ni Greg K. Olsen