“17–23 Iuni: ‘O Le a Afio Mai Iesu Keriso e Togiola Lona Nuu.’ Alema 8–12,” Sau, Mulimuli Mai ia te A’u—Mo Aiga ma le Ekalesia: Tusi a Mamona 2024 (2024)
“17–23 Iuni. Alema 8–12,” Sau, Mulimuli Mai ia te A’u—Mo Aiga ma le Ekalesia: 2024 (2024)
Aoaoina Atu Aoaoga Faavae Moni, saunia e Michael T. Malm
17–23 Iuni: O Le a Afio Mai Iesu Keriso e Togiola Lona Nuu
Alema 8–12
O le galuega a le Atua o le a le mafai ona faalavelaveina. Ae o a tatou taumafaiga e fesoasoani i Lana galuega e i ai taimi e foliga ai e le manuia—o le mea e sili ai, atonu e le vave ona tatou vaai i taunuuga tatou te faamoemoe i ai. E i ai taimi tatou te ono maua ai sina lagona e pei o Alema ina ua ia folafola atu le talalelei i Amonaea—sa teena, tuufeanu i ai, ma tuliesea. Ae ina ua faatonuina o ia e se agelu e toe foi ma toe taumafai, sa “vave ona [ia] toe foi” atu Alema ma le lototoa (Alema 8:18), ma sa saunia e le Atua le ala i ona luma. E le gata ina sa Ia tuuina atu meaai mo Alema e ‘ai ai ma se nofoaga e nofo ai, ae sa Ia saunia foi Amoleka, o lē na avea ma ona uso a faigaluega, o se puipuiga malosi o le talalelei, ma se uo faamaoni. Pe a tatou feagai ma toatuga ma ni le fiafia a o tatou auauna atu i le malo o le Alii, e mafai ona tatou manatua le ala na lagolagoina ai e le Atua ma taitai ia Alema, ma e mafai ona tatou talitonu o le a lagolagoina ma taitai foi i tatou e le Atua, e oo lava i tulaga faigata.
Manatu mo le Aoaoina i le Aiga ma i le Lotu
O a’u taumafaiga e faasoa atu le talalelei a Iesu Keriso e ono manaomia ai le onosai.
Pe na e taumafai ea e faasoa atu le talalelei a Iesu Keriso i se tasi, ae sa teena lau valaaulia? Na oo foi Alema i lena mea. O le a se mea ua e aoao mai ia te ia i le Alema 8:13–16 e uiga i le faasoaina atu o le talalelei e ui lava i luitau ma mea faafeagai? Faaauau pea ona faitau i fuaiupu 17–32, ma vaavaai mo fasifuaitau e musuia ai oe e faaauau pea ona faasoa atu le talalelei, e tusa lava pe foliga mai e le o faamanuiaina oe.
O perofeta ma aposetolo o ni molimau faapitoa a Keriso, o lea e tele ai a latou fautuaga musuia e faasoa atu e uiga i le molimau atu e uiga ia te Ia. Vaai i le mea na saunoa ai Elder Dieter F. Uchtdorf i le “Ae A Pe Afai e Faigata?” (o se vaega i le “Galuega Faafaifeautalai: Faasoaina Atu o Mea o Loo i Totonu o Lou Loto,” Liahona, Me 2019, 18) po o mea na faasoa mai e Elder Gary E. Stevenson i le “Alofa, Faasoa Atu, Valaaulia,” (Liahona, Me 2022, 84–87). O le a se mea e te maua iina e mafai ona fesoasoani i se tasi ua amata ona lagona le lotovaivai e uiga i le faasoaina atu o le talalelei?
E faapefea ona e aoteleina mea uma sa e suesueina iinei i se tasi pe lua ni faamatalaga faamalosiau e uiga i le faasoaina atu o le talalelei? Mafaufau e fai se pepa lautele o i ai se savali po o se ata e mafai ona musuia ai oe (ma isi) e taumafai pea.
Tagai foi “Ia Ou Aoao Atu,” Viiga, nu. 176; “Ua Poloaiina Alema e se Agelu e Toe Foi i Amonaea” (vitio), Potutusi o le Talalelei; Autu o le Talalelei, “Valaauliaina o Tagata Uma ia Talia le Talalelei a Iesu Keriso,” Potutusi o le Talalelei.
E oo mai faamanuiaga a le Atua ma se tiutetauave tele.
Pe a faitau e uiga i le ala sa taulima ai e sa Nifae i Amonaea ia auauna a le Alii, e faigofie ona galo faapea sa i ai se taimi na avea ai i latou o ni “tagata sili ona faapitoa o le Alii” (Alema 9:20). A o e faitau e uiga i faamanuiaga sili na tuu mai e le Atua i le nuu o Nifae (tagai faapitoa i le Alema 9:14–23), mafaufau loloto i faamanuiaga sili sa Ia tuuina mai ia te oe. O a tiutetauave e oo mai faatasi ma nei faamanuiaga? O le a se mea o e faia e tumau faamaoni ai i nei tiutetauave?
Tagai foi Mataupu Faavae ma Feagaiga 50:24; 82:3; 93:39.
O le fuafuaga a le Atua o se fuafuaga o le togiola.
I le Alema 11–12, sa ta’ua ai e Alema ma Amoleka o le fuafuaga o le togiola. A o e faitauina nei mataupu, mafaufau loloto pe aisea ua faaaogaina ai le upu togiola e faamatala ai le fuafuaga a le Atua. Mafaufau e tusia se aotelega puupuu o mea na aoao atu e Alema ma Amoleka e uiga i vaega nei o le fuafuaga:
-
O Le Pa’ū
-
O Le Togiola
-
Salamo
-
Maliu
-
Toetu
-
Faamasinoga
Matau le aafiaga o tagata i upu a Amoleka (tagai Alema 11:46). E faapefea e le iloa e uiga i le fuafuaga a le Atua ona aafia ai oe?
Tagai foi Dallin H. Oaks, “O Le Fuafuaga Sili,’ Liahona, Me 2020, 93–96; “Ua Molimau Amoleka ia Iesu Keriso” (vitio), Gospel Library.
Afai e le faamaaaina lo’u loto, e mafai ona tele atu afioga a le Atua ou te maua.
Atonu e tau manatunatu nisi tagata pe aisea e le faailoa mai ai e le Tama Faalelagi mea uma ia i tatou. I le Alema 12:9–14, na faamatala ai e Alema se mafuaaga talafeagai se tasi. O fesili nei e mafai ona fesoasoani e te mafaufau ai i mea na ia aoao mai:
-
O le a le uiga o le faamaaaina o o lou loto? O a taunuuga o le i ai o se loto maaa? (tagai foi Alema 8:9–11; 9:5, 30–31; ma le 10:6, 25).
-
O le a se mea e mafai ona e faia e liliu atu ai lou loto i le Atua? (tagai Ieremia 24:7; Alema 16:16; Helamana 3:35).
-
O le a se mea e mafai ona e faia ia mautinoa ai ua maua “i totonu o [oe]” le upu a le Atua? (Alema 12:13). Pe a ia te oe le upu a le Atua, o le a le aafiaga o i ai i au “upu,” “galuega”, ma “mafaufauga”? (Alema 12:14).
O le a se mea ua aoao mai e le aafiaga o Amoleka ia te oe e uiga i faamanuiaga o le i ai o se loto agamalu? (tagai Alema 10:1–11).
Tagai foi “Alma Warns Zeezrom” (vitio), Gospel Library.
Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .
Fautuaga mo le Aoaoina o Tamaiti
E mafai ona ou faasoa atu le talalelei a Iesu Keriso.
-
O le itulau o gaoioiga o lenei vaiaso e mafai ona fesoasoani ia te oe e aotele ai mea na tutupu i le Alema 8–10 mo lau fanau. Atonu e te manao e fesoasoani ia i latou e saili mataupu faavae na avea ai Alema ma Amoleka o ni faifeautalai lelei. Mo se faataitaiga, la te lei fiu (tagai Alema 8:8–13), sa la molimau atu e uiga ia Keriso (tagai Alema 9:26–27), ma sa la galulue faatasi (tagai Alema 10:12).
-
O se pese e faatatau i le galuega faafaifeautalai, e pei o le “Ou Te Fia Avea Nei Ma Faifeautalai” (Tusipese a Tamaiti, 90) e mafai ona tuuina atu i lau fanau ni manatu e uiga i auala e faasoa atu ai le talalelei ia latou uo. Valaaulia i latou e lisi ni manatu latou te maua ma tagata e mafai ona latou faasoa atu i ai le talalelei. E mafai foi ona e tuu atu ia i latou e faatino mai tala latou te ono fai atu ai pe fai atu foi.
Uunaia le auai. A o e sauni e aoao atu, nai lo le fuafuaina o mea e fai atu, fesili ifo ia te oe lava, “O le a se mea o le a fai e tamaiti e aoao ai?” O le a sili atu ona aoao ma manatua umi e tamaiti pe a latou auai atoatoa.
O le fuafuaga a le Atua o se fuafuaga o le togiola.
-
Atonu e mafai e lau fanau ona tusi se ata e faatusa i mataupu faavae o le fuafuaga o le togiola, e pei o le Pau o Atamu ma Eva, le Togiola a Iesu Keriso, salamo, maliu, toetu, ma le faamasinoga. Ona mafai lea ona e fesoasoani ia i latou e faafetaui a latou ata i fuaiupu i le Alema 11–12 o loo aoao mai ai e uiga i nei mataupu faavae.
E mafai ona avea a’u ma se uo lelei.
-
E mafai ona e valaaulia se tamaitiiti e faafoliga o Amolek ma se isi tamaitiiti e faafoliga o Alema ao e faamatalaina le tala i le Alema 8:18–22. Na faapefea ona avea Amoleka ma se uo lelei ia Alema? Ona mafai lea e lau fanau ona faasoa mai pe na faapefea ona avea se tasi ma se uo ia i latou ma le auala na latou lagonaina i lena aafiaga.
-
Atonu e mafai ona e faia se paso o faauoga: sue pe tusi se ata e faatusa i se faigauo ma otioti i ni fasi paso. I tua o fasipepa taitasi, tusi ai se mea e mafai ona tatou faia e avea ai ma se uo lelei, e aofia ai mea na faia e Alema ma Amoleka. E mafai e lau fanau ona feauauai i le filifilia o se fasi pepa ma faaopoopo i le paso ao e faitauina mea o loo tusia i tua. O ai e manaomia la tatou faauoga?
E mafai ona avea i tatou ma ni uo lelei i isi.
Ona o Iesu Keriso, o le a ou toetu ai.
-
Mafaufau i se lesona faatino faapenei e aoao atu ai e uiga i le Toetu: o lou lima e mafai ona faatusa i lou agaga, ma o se totinilima e mafai ona faatusa i lou tino. Aveese lou lima mai le totinilima e faaali atu ai o le a tuueseeseina o tatou agaga ma tino i le oti. Ona toe tuu lea o lou lima i le totinilima e faaali atu ai o o tatou agaga ma tino o le a toe tuufaatasia i le Toetu. Tuu atu i lau fanau e auauai e tui le totinilima ma aveese ao e faitauina atu le Alema 11:43 ia i latou. Faaali atu se ata o le Faaola Toetu (tagai Tusiata o le Talalelei, nu. 59), ma molimau atu o Iesu Keriso na mafai ai e tagata uma ona toetutu.
Mo nisi manatu, tagai i le lomiga o lenei masina o le mekasini o le Uo .
Atatusi o Alema o loo talisua ma Amoleka, saunia e Dan Burr