Septiyembre 16–22: “Ihangad ang Imong Ulo ug Pagmaya.” 3 Nephi 1–7
“Septiyembre 16–22: ‘Ihangad ang Imong Ulo ug Pagmaya.’ 3 Nephi 1–7,” Dali, Sunod Kanako—Alang sa Panimalay ug sa Simbahan: Basahon ni Mormon 2024 (2024)
“Septyembre 16–22. 3 Nephi 1–7,” Dali, Sunod Kanako—Alang sa Panimalay ug sa Simbahan: 2024 (2024)
Imahe
Ang mga Nephite nagsaksi sa adlaw nga walay gabii
One Day, One Night, and One Day [Usa ka Adlaw, Usa ka Gabii, ug Usa ka Adlaw], ni Jorge Cocco
Septiyembre 16–22: “Ihangad ang Imong Ulo ug Pagmaya”
Sa ubang mga paagi, usa kadto ka makahinam nga panahon nga mahimong usa ka tumutuo ni Jesukristo. Ang mga panagna nangatuman—talagsaong mga timailhan ug mga milagro taliwala sa katawhan nagpaila nga ang Manluluwas sa dili madugay matawo. Sa laing bahin, usa usab kini ka makapabalaka nga panahon alang sa mga tumutuo tungod kay, bisan pa sa tanang mga milagro, ang mga dili tumutuo nangusog nga “ang panahon milabay na” sa pagkatawo sa Manluluwas (3 Nephi 1:5). Kini nga mga tawo mihimo og “dako nga kasamok sa tibuok yuta” (3 Nephi 1:7) ug gani mitakda og petsa sa pagpatay sa tanang mga tumutuo kon ang timailhan nga gipanagna ni Samuel nga Lamanite—nga usa ka gabii nga dili mongitngit—dili mopakita.
Niining malisod nga mga kahimtang, si propeta Nephi “nangamuyo pag-ayo ngadto sa iyang Dios alang sa iyang katawhan” (3 Nephi 1:11). Ang tubag sa Ginoo nagdasig ngadto sa tanan kinsa nag-atubang og pagpanggukod o pagduhaduha ug nagkinahanglan nga mahibalo nga ang kahayag mobuntog sa kangitngit: “Ihangad ang imong ulo ug pagmaya; … Ako motuman sa tanan ko nga gipamulong pinaagi sa baba sa akong mga balaan nga mga propeta” (3 Nephi 1:13).
Mga Ideya alang sa Pagkat-on diha sa Panimalay ug sa Simbahan
Ang pagkahimong nakabig ngadto sa ebanghelyo ni Jesukristo nagkinahanglan og pailob ug paningkamot.
Ang 3 Nephi 1–7 naghulagway og katawhan kinsa nakabig ngadto sa Ginoo ug uban nga wala. Unsa ang nakahimo og kalainan tali niini nga mga grupo? Usa ka tsart sama sa mosunod mahimong makatabang kanimo paghan-ay sa imong mga hunahuna:
Pagsukna og personal nga mga pangutana samtang ikaw magtuon. Sama pananglit, samtang nagkompleto niini nga tsart, makapangutana ka og sama sa “Unsa ang leksiyon alang kanako dinhi?” Magdala kini sa inspirasyon gikan sa Espiritu Santo.
Ang imong Langitnong Amahan nasayod nga ang imong kinabuhi maglakip og mga higayon nga lisod, gani makahadlok. Apan gusto usab Niya nga makasinati ka og hingpit nga kalipay. Basaha ang 3 Nephi 1:1–23 aron makat-on kabahin sa mga rason nga nahadlok ang matinud-anon nga mga Nephite. Unsa ang rason nga gihatag sa Ginoo kanila aron “magmaya”?
Ang Manluluwas migamit sa pulong nga “magmaya” sa pipila ka okasyon, sama pananglit, diha sa Mateo 14:24–27; Juan 16:33; Doktrina ug mga Pakigsaad 61:36; 78:17–19. Unsa ang nakapadani kanimo mahitungod niini nga mga pagdapit? Mahimo nimong basahon ang kasikbit nga mga bersikulo aron makasabot sa mga sirkumstansiya diin ang Manluluwas miingon niini nga mga pulong. Sa matag sitwasyon, unsa ang mga rason nga Iyang gihatag sa pagtabang sa mga tawo sa pag-atubang sa ilang mga kahadlok? Sa unsang paagi Siya mibuhat niini alang kanimo?
Ikonsiderar ang pagtuon sa pakigpulong ni Presidente Russell M. Nelson, “Hingpit nga Kalipay ug Espirituhanon nga Pagsugakod” (Liahona, Nob. 2016, 81–84). Unsa ang gitudlo ni Presidente Nelson mahitungod sa pagpangita og hingpit nga kalipay diha sa bisan unsang sitwasyon? Bantayi kon kapila gigamit ni Presidente Nelson ang pulong nga tutok. Tingali imong matandi ang pagtutok sa usa ka camera o ubang lente ngadto sa pagtutok kang Jesukristo. Unsaon nimo nga mas makatutok Kaniya?
Tan-awa usab sa “Kahimsog sa Pangisip,” o ubang mga hilisgotan diha sa “Tabang sa Kinabuhi” nga seksiyon sa Gospel Library.
Ang Ginoo motuman sa tanan Niya nga mga pulong sa Iyang panahon.
Basaha ang 3 Nephi 1:4–7 ug hunahunaa kon unsa kaha imong gibati kon ikaw usa sa mga tumutuo. Unsa ang ilang gibuhat aron ipabiling lig-on ang ilang hugot nga pagtuo (tan-awa sa 3 Nephi 1:4–21 ug 5:1–3). Sa unsang paagi natuman ang mga pulong ni Samuel (tan-awa sa 3 Nephi 1:19–21). Giunsa pagtuman sa Ginoo ang Iyang mga pulong diha sa imong kinabuhi?
Si Mormon mipahayag, “Tan-awa, ako usa ka tinun-an ni Jesukristo” (3 Nephi 5:13). Unsa man ang kahulogan niini nga hugpong sa mga pulong nganha kanimo? Ikonsiderar ang pagsiksik sa 3 Nephi 1:4–15; 5:12–26; 6:10–15; ug 7:15–26, mangita sa mga hiyas, mga gituohan, ug mga buhat sa mga disipulo ni Kristo.
Kon mopakita ko og hugot nga pagtuo kang Jesukristo, dili ko kinahanglan mahadlok.
Ang kasinatian sa mga Nephite sa mga pundok sa mga kawatan mahimong maglakip og mga leksiyon nga makatabang kanimo sa espirituhanon nga mga peligro nga imong giatubang. Pangitaa kini nga mga leksiyon diha sa 3 Nephi 2:11–12 ug sa 3:1–26. Sama pananglit, mahimong pangitaon nimo ang mga pulong ni Giddianhi diha sa 3 Nephi 3:2–10 ug itandi kini ngadto sa mga paagi nga si Satanas mosulay sa paglingla kanimo. Unsay makat-onan nimo gikan sa ehemplo ni Lachoneus?
Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.
Usa ka bag-o nga bituon mipakita sa dihang natawo si Jesukristo.
Ang pahina sa kalihokan niining semanaha makatabang sa inyong mga anak nga makat-on mahitungod sa mga milagro nga nasaksihan sa mga Nephite sa dihang natawo si Jesus. Mahimo usab nimong gamiton ang “Kapitulo 41: Ang Mga Timailhan Sa Pagkatawo ni Kristo” (Mga Sugilanon sa ang Basahon ni Mormon, 114–16) aron sa pagtudlo kanila niini nga istorya—o sa pagtabang kanila sa pagsugilon niini nganha kanimo.
Ang mga pulong sa mga propeta kanunay nga matuman.
Samtang ikaw ug ang inyong mga anak mobasa sa 3 Nephi 1:4–10, dapita sila sa paghisgot kon unsa kaha ang bation nga mahimong usa sa mga tumutuo nga nagpuyo nianang panahona. Dayon, samtang basahon nila ang nahibilin sa asoy diha sa mga bersikulo 11–15, mahimo silang mosugyot og mga paagi sa pagkompleto niini nga pamahayag: “Ang leksiyon niini nga istorya para nako kay …”
Tingali ang imong mga bata makatabang kanimo sa paghunahuna og ubang mga panahon sa dihang gituman sa Dios ang Iyang mga saad nga gihatag pinaagi sa Iyang propeta. Mahimong ganahan sila nga mangita og mga hulagway niini nga mga istorya diha sa Libro sa mga Hulagway sa Ebanghelyo (tan-awa, sama pananglit sa, mga nu. 7–8 ug 81). Tugoti sila nga mopakigbahin sa unsay ilang nahibaloan mahitungod niini nga mga istorya, lakip sa paagi nga natuman ang mga saad sa Dios. Magkauban nga basaha ang 3 Nephi 1:20, ug ipakigbahin ang imong kaugalingon nga pagsaksi niini nga mga kamatuoran.
Tabangi ang inyong mga anak nga makadiskobre kon ngano nga ang mga Nephite nagpundok ug sa mga panalangin nga miabot kanila diha sa 3 Nephi 2:11–12 ug 3:13–14, 24–26. Nganong importante man kanato nga magpundok karon diha sa atong mga pamilya ug sa simbahan?
Nakahibalo ba ka og usa ka leksiyon nga naggamit og butang nga nagtudlo kabahin sa kalig-on sa panaghiusa? Tingali ang inyong mga anak mahimong mosulay sa pagbali og usa ka lipak ug dayon sa usa ka bugkos sa mga lipak o sa paggisi og usa ka piraso sa papel ug dayon sa usa ka tapok sa papel. Sa unsang paagi nga kita mahisama sa mga lipak o sa mga papel?
Human nga magkaubang mabasa ang 3 Nephi 5:13, dapita ang inyong mga anak sa pagsulti og usab sa hugpong sa mga pulong nga “Ako usa ka tinun-an ni Jesukristo.” Aron makat-on kon unsay gipasabot nga mahimong usa ka disipulo ni Jesukristo, magkauban nga basaha ang pipila niini nga mga ehemplo: ang nakabig nga mga Lamanite (tan-awa sa 3 Nephi 6:14), Mormon (tan-awa sa 3 Nephi 5:12–26), ug Nephi (tan-awa 3 Nephi 7:15–26). Makakaplag usab ka og mga ideya diha sa usa ka awit sama sa “Maninguha Kong Mahimong Mahisama Kang Jesus” (Songbook sa mga Bata, 40–41).
Sa usa ka piraso nga papel, tabangi ang inyong mga anak sa pagpasubay og lapis sa ilang kamot ug guntinga ang gisubay. Sulati og “Ako usa ka tinun-an ni Jesukristo” ang usa ka bahin, ug dapita sila sa pagdrowing og usa ka butang nga mahimo nila aron mahimong usa ka disipulo sa pikas nga bahin sa papel.
Alang sa dugang nga mga ideya, tan-awa ang isyu karong bulana sa Higala nga magasin.
Imahe
Ang mga Nephite nagsaksi sa adlaw nga walay gabii
A Day, a Night, and a Day [Usa ka Adlaw, Usa ka Gabii, ug Usa ka Adlaw], ni Walter Rane.