“Septyembre 16–22: ‘Ibayaw ang Imo Ulo kag Magkalipay Ka.’ 3 Nefi 1–7,” Dali, Magsunod sa Akon—Para sa Puluy-an kag Simbahan: Libro ni Mormon 2024 (2023)
“Septyembre 16–22. 3 Nephi 1–7,” Dali, Magsunod sa Akon—Para sa Puluy-an kag Simbahan: 2024 (2023)
Litrato
Ang mga Nefinhon nagasaksi sang adlaw nga wala sang gab-i
One Day, One Night, and One Day [Isa ka Adlaw, Isa ka Gab-i, kag Isa ka Adlaw], ni Jorge Cocco
Septyembre 16–22: “Ibayaw ang Imo Ulo kag Magkalipay Ka”
Sa pila ka bahin, makakulunyag ato nga panahon para mangin tumuluo ni Jesucristo. Nagakatuman ang mga propesiya—ang dalagko nga mga senyales kag mga milagro sa tunga sang katawhan nagapatimaan nga ang Manluluwas malapit na mabun-ag. Sa pihak nga bahin, isa man ato ka makakululba nga tiyempo para sa mga tumuluo kay, wala sapayan sang tanan nga mga milagro, nagainsister ang mga wala nagapati nga “ang tion nagligad na” para mabun-ag ang Manluluwas (3 Nefi 1:5). Ining mga tawo nagtuga sang “dako nga [kinagamo] sa bug-os nga kadutaan” (3 Nefi 1:7) kag nagtalana pa gani sang petsa para pamatyon ang tanan nga nagapati kon ang senyales nga ginpropesiya ni Samuel nga Lamanhon—nga isa ka gab-i nga wala sang kadulom—indi matabo.
Sa sining mabudlay nga mga sirkumstansya, ang propeta nga si Nefi “nagtuaw sing hugot sa iya Dios para sa iya katawhan” (3 Nefi 1:11) Ang sabat sang Ginuo makainspirar sa bisan sin-o nga nagapangatubang sang pagpanghingabot ukon pagduhaduha kag nagakinahanglan makahibalo nga ang kasanag magapierde sang kadulom: “Ibayaw ang imo ulo kag magkalipay ka; … pagatumanon ko ang tanan nga akon ginpahanabo nga ihambal paagi sa baba sang akon balaan nga mga [propeta]” (3 Nefi 1:13).
Ang pagkahaylo sa ebanghelyo ni Jesucristo nagakinahanglan sang pasensya kag pagpaninguha.
Ang 3 Nefi 1–7 nagalaragway sang katawhan nga nahaylo sa Ginuo kag sang iban nga wala mahaylo. Ano ang kinalain sa tunga sining mga grupo? Ang tsart nga pareho sang masunod mahimo nga makabulig sa imo nga plastaron ang imo panghunahuna:
Magpamangkot sang personal nga mga pamangkot samtang nagatuon. Halimbawa, samtang ginakumpleto ini nga tsart, pwede ka magpamangkot pareho sang “Ano ang leksyon sini para sa akon?” Magadala ini sang inspirasyon halin sa Balaan nga Espiritu.
Bangud kay Jesucristo, pwede ako nga “magkalipay.”
Nakahibalo ang imo Amay nga Langitnon nga ang imo kabuhi may upod nga tinion nga mabudlay, bisan pa gani makahaladlok. Pero gusto man Niya nga maeksperiyensyahan mo ang kalipay. Basaha ang 3 Nefi 1:1–23 para tun-an ang mga rason nga dapat mahadlok ang matinuohon nga mga Nefinhon. Ano ang rason nga ginhatag sang Ginuo sa ila para “magkalipay”?
Gingamit sang Manluluwas ang dinalan nga “magkalipay ka” sa pila ka mga okasyon—halimbawa, sa Mateo 14:24–27; Juan 16:33; Doktrina kag mga Kasugtanan 61:36; 78:17–19. Ano ang nanamian mo sa sining mga imbitasyon? Pwede mo man basahon ang nagapalibot nga mga bersikulo para maintiendihan ang mga sirkumstansya nga sa diin ginhambal sang Manluluwas ini nga mga tinaga. Sa tagsa ka kaso, ano nga mga rason ang ginhatag Niya sa mga tawo para atubangon ang ila mga kahadlok? Paano niya ini ginhimo para sa imo?
Tumanon sang Ginuo ang tanan Niya nga mga pulong sa Iya panahon.
Basaha ang 3 Nefi 1:4–7 kag hunahunaa kon ano ayhan ang imo nabatyagan kon isa ka sa mga nagtuo. Ano ang ila ginhimo para magpabilin nga mabakod ang ila pagtuo? (tan-awa sa 3 Nefi 1:4–21 kag 5:1–3). Paano natuman ang mga pulong ni Samuel? (tan-awa sa 3 Nefi 1:19–21). Paano gintuman sang Ginuo ang Iya mga pulong sa imo kabuhi?
Si Mormon nagsiling, “Yari karon, isa ako ka gintutun-an ni Jesucristo” (3 Nefi 5:13). Ano ang kahulugan sining dinalan sa imo? Pamensara nga basahon ang 3 Nefi 1:4–15; 5:12–26; 6:10–15; kag 7:15–26, nga ginapangita ang mga kalidad, mga pagpati, kag mga aksyon sang mga disipulo ni Cristo.
Kon ginapakita ko ang pagtuo kay Jesucristo, indi ko kinahanglan mahadlok.
Ang mga eksperiyensya sang mga Nefinhon sa mga grupo sang mga kawatan may mga leksyon nga makabulig sa imo sa espirituhanon nga mga peligro nga imo ginaatubang. Pangitaa ining mga leksyon sa 3 Nefi 2:11–12 kag 3:1–26. Halimbawa, pwede mo pangitaon ang mga pulong ni Gidianhi sa 3 Nefi 3:2–10 kag ikumparar ini sa mga paagi nga ginatinguhaan ka nga intuon ni Satanas. Ano ang matun-an mo sa halimbawa ni Laconeus?
Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.
Ang mga pulong sang mga propeta nagakatuman gid pirme.
Samtang ginabasa ninyo sang imo kabataan ang 3 Nefi 1:4–10, hagara sila nga hambalan kon ano ayhan ang pamatyagan sang mangin isa sang mga nagapati sang amo sadto nga panahon. Dayon, samtang ginabasa nila ang nabilin nga panaysayon sa mga bersikulo 11–15, pwede sila magpanugyan sang pamaagi nga makompleto ini nga dinalan: “Ang leksyon sining istorya para sa akon amo ang …”
Basi mabuligan ka sang imo kabataan nga magpanumdom sang iban pa nga mga tion sang gintuman sang Dios ang Iya mga promisa nga ginhatag paagi sa Iya propeta. Basi manamian sila nga magpangita sang mga litrato sining mga istorya sa Libro sang mga Larawan nga Pang-Ebanghelyo (tan-awa halimbawa, sa num. 7–8 kag 81). Tugoti sila nga iistorya kon ano ang ila nahibal-an parte sa sining mga sugilanon, lakip na kon paano natuman ang mga promisa sang Dios. Basaha sing ululupod ang 3 Nefi 1:20, kag ipaambit ang imo kaugalingon nga saksi sa sining mga kamatuoran.
Buligi ang imo kabataan nga madiskubrehan kon ngaa nagatipon ang mga Nefinhon kag ang mga bugay nga nag-abot sa ila sa 3 Nefi 2:11–12 kag 3:13–14, 24–26. Ngaa importante para sa aton nga magtipon sa karon sa aton mga pamilya kag sa simbahan?
May nahibal-an ka bala nga leksyon nga nagagamit sang bagay nga nagatudlo parte sa kusog sang paghiliusa? Basi pwede tilawan sang imo kabataan nga balion ang isa ka lipak kag dayon ang isa ka bugkos sang lipak ukon paggisi sang isa ka papel kag dayon sang isa ka tangkas sang papel. Sa ano kita pareho sa mga lipak ukon mga papel?
Pagkatapos nga basahon sing ululupod ang 3 Nefi 5:13, agdaha ang imo kabataan nga suliton ang dinalan nga “Isa ako ka disipulo ni Jesucristo.” Para tun-an kon ano ang buot silingon sang mangin disipulo ni Jesucristo, basaha sing ululupod ang pila sining mga halimbawa: ang hinaylo nga mga Lamanhon (tan-awa sa 3 Nefi 6:14), Mormon (tan-awa sa 3 Nefi 5:12–26), kag Nefi (tan-awa sa 3 Nefi 7:15–26).
Sa isa ka panid sang papel, buligi ang imo kabataan nga i-trace ang ila kamot kag guntinga ang korte sang ila kamot. Isulat ang “Isa ako ka disipulo ni Jesucristo” sa atubang, kag dayon hagara sila nga idrowing ang pwede nila himuon para mangin disipulo ni Jesucristo sa likod.
Para sa dugang nga mga ideya, tan-awa sa isyu sang Abyan nga magasin sini nga bulan.
Litrato
Ang mga Nefinhon nagasaksi sang adlaw nga wala sang gab-i
A Day, a Night, and a Day [Isa ka Adlaw, Isa ka Gab-i, kag Isa ka Adlaw], ni Walter Rane