Ngkana ko ongo bwa a kabonganai aomata taeka n aron te bata are i Iteraera, ko namakinna ae kanga a taetae ibukim? Nibwaite ao Reimwanaite bon kaain te kanoa are Iteraera, “kaain mwaangan te kai are Iteraera,” ma a bon “bua man rabwatana” (Aramwa 26:36; taraa naba 1 Nibwaai 15:12). Ma e tangiria te Tia Kamaiu bwa a na ataia ae aki bua Irouna. “Ngkami kaain te bata are Iteraera,” E taku, “ao ngkami kaain te berita are e tabu” (3 Nibwaai 20:25). E na taekina te bwai ae ti tebo nakoim n te bong aei, ibukina bwa ane e bwabetitoaki ao ni karaoi berita aika tabu ma Ngaia bon kaain naba te bata are Iteraera, “n te berita ae tabu,” N taekana tabeua, ngke e taetae ibukin te bata are i Iteraera, E taetae ibukim. Te kaetieti ni kakabwaiaia “ni kabane kaain te aonnaba” bon ibukim (3 Nibwaai 20:27). Te kakao n “uti riki, ao katoka korakoram” bon ibukimi (3 Nibwaai 20:36). Ao Ana berita ae kakawaki, “Au akoi e bon aki kona ni kitaniko, ao e aki kamwaingaki au berita n rau ae tabu,” bon ibukimi (3 Nibwaai 22:10).
Iango ibukin Reiakinana n te Mweenga ao n te Taromauri
Inanon boong aika kaitira, e na karaoi mwakuri te Atua aika korakora ma ni kamimi.
Inanon 3 Nibwaai 20–22, e taetae ni burabeti te Tia Kamaiu ibukiia Ana aomata ni berita ibukin taai aika a na roko (taraa riki 3 Nibwaai 20:30–32, 39–41; 21:9–11, 22–29). Ngkana ko wareki kiibu aikai, uringa te bwai are e a tia n taekinna Beretitenti Russell M. Nelson: “Ti mena ibuakoia ana aomata ni berita te Uea. Tabera bwa ti na iri ni kakoroi nanon berita aikai. Ai kakukureiraal te tai ni maiu aei!” (“The Gathering of Scattered Israel (Botakiia Kaain Iteraera ake a Maenako),” Liahona, Nob. 2006, 79). Tera mai ibuakon taeka ni burabeti aikai aika a kakukurei riki nakoim? Tera ae ko kona ni karaoia ni buokia bwa a na koro bukiia?
Kakaei taeka ao kibun taeka aika kaunganano. Ko kona ni kunea bwa taeka ao mwakoro n taeka inanon booki aika tabu a taraa ni kakawaki nakoim, ae kanga titebo ma a koreaki bon ibukim. Iangoia ni mwakenii inanon am boki aika tabu ke ni koroi inanon am tieno ni kamatebwai.
E korakora ana akoi te Atua nakoia naake a oki Nakoina.
Inanon 3 Nibwaai 22 ao 24, e mwanewei taeka aikai te Tia Kamaiu man aia taeka Itaia ao Maraki are a kaonaki n tamnei ao kabootau—te atibu n te ai, te tirewa ae itiaki, te mare, wintoon karawa (taraa riki 3 Nibwaai 22:7–8, 10–17; 24:10–12, 17–18). Tera ae ko reiakinaki ni kabootau aikai ibukin ana reitaki te Atua ma Ana aomata—ao Ana reitaki ma ngkoe? A kanga berita inanon kiibu aikai ni koro bukiia inanon maium ke maiuia am utu?
Ni korei mwiin au taneiai n te maiu n tamnei e kona ni kakabwaia au utu.
Tera am namakin ibukin ana reitaki te Tia Kamaiu ma Nibwaai inanon 3 Nibwaai 23:6–13? Ngkana e na tuoi rekooti te Tia Kamaiu ake ko a tia ni kawakin, tera titiraki aika E na kona n titirakiniko iai? Tera bwaai aika a riki ke taneiai n tamnei ake ko na korei mwiia ni kawakin? Bukin tera ngkai e kakawaki karaoana? (taraa 3 Nibwaa 26:2).
Te Tia Kamaiu e tangirai bwa N na ukori koroboki aika tabu.
Ngkai ko wareka 3 Nibwaai 20:10–12; 23; 26:1–12, iangoia inanom bwa tera ana namakin te Tia Kamaiu ibukin booki aika tabu. Tera te kaokoro imarenan ukoukoran koroboki aika tabu ao n tii warekii? (taraa 3 Nibwaai 23:1).
A tuangaki ana aomata te Atua bwa a na kabwakai aia kabwianibwai n taainako (taraa Karikan Bwaai 14:17–20; Maraki 3:8–11). Ngkai ko kamatebwaia 3 Nibwaai 24:7–12, iangoia bwa bukin tera ngkai te Atua e tuangiia Ana aomata bwa a na kabwaka aia kabwianibwai. Titiraki aikai a kona ni kaira am kamatebwai:
Tera tuan te kabwianibwai? (Taraa Reirei ao Berita aika Tabu 119. “Te raka” n te kaotioti aei nanona karekemwane. Ni kabane membwa ake iai aia karekemwane a na riai ni kabwakai aia kabwianibwai.) Tera kaokoron te kabwianibwai man aekakin angabwai riki tabeua?
E kabonganaaki ibukin tera te kabuanibwai? Ko kona ni kakaea tabeua karinan taeka n te Gospel Topics, “Tithing” (Gospel Library). Tera baikaaw ko a tia ni kakabwaiaaki iai ibukina bwa a kabwakai aia kabwianibwai kaain te Ekaretia?
Tera kakabwaia aika a karekei aomata ake a kawakina tuan te kabwianibwai? (Taraa 3 Nibwaai 24:7–12). Ko kona ni kunei tabeua n ana marooro Unimwaane David A. Bednar “The Windows of Heaven” (Riaona, Nob. 2013, 17–20). Taraia, n te aro ae onoti, ibukin kakabwaia ae tiaki taekan te mwane. Ko kanga n tia n noori kakabwaia aikai inanon maium?
Ko bae ni kan mataku n te witeo “Jesus Teaches about the Widow’s Mite” (Gospel Library), ke wareka Mareko 12:41–44. Tera reiakinam man te karaki aei?
Te Uea e kanakoa Eria bwa e na raira nanou nakoia au bwakatibu.
Inanon ara bong, nanora a “rairaki nakoia [ara] bakatibu” rinanon te tembora ao te mwakuri ibukin rongorongon te utu. E kanga n ae e a tia n riki aei ibukim? Ngkai ko wareka 3 Nibwaai 25:5–6 ao Reirei ao Berita aika Tabu 110:13–16, iangoia inanom bukin tera aei mwakoron ana babaire te Atua.
Taraa naba “Families Can Be Together Forever,” Aia Boki n Anene Ataei, 188.
Ibukin iango riki tabeua, taraa te beeba ni kaongora n te namwakaina aio n te Liahona ao Ibukin Kakorakoraia Kairake maekatiin.
I kona ni botumwaaka n ukoukori koroboki aika tabu.
Ana kaetieti te Tia Kamaiu inanon 3 Nibwaai 23 e kaota aron kakawakin booki aika tabu Nakoina. Ni buokiia am ataei bwa a na kunea aei, ko kona ni wareka 3 Nibwaai 23:1, 5 ni kabaibati ao n tuangiia bwa a na kakauongo nakon te taeka are e okioki teniua te tai. E kanga ni kaokoro ae ukeraki ma ae e warekaki?
Tao ngkoe ma am ataei kam kona ni korea te kibu man booki aika tabu ae mamate nanomi iai ao karaba. Ngkanne kam kona n ikaruoruo ni kakaei kiibu, kam na kaai ni warekii, ao maroroakinna bukin tera a rangi uaana kiibu aikai.
Buokiia am ataei bwa a na kakaea n 3 Nephi 24:8–12 ni kakaei kawai ni kabwanina te tiententi aei: Ngkana I kabwaka au kabwianibwa, te Uea e na … . Ko kona naba n tibwaua te bwai are ko a tia n rinanona ike ko kakabwaiaki iai ibukina bwa ko kabwakaa am kabwianibwai. Ngkana e rangi n ibuobuoki, iangoia korea mwaitin te mwane ae bon tau ao buokiia am ataei bwa a na warebwaia mwaitira tekabwianbwai (10 te batienti) ae a na anga man te mwaiti ni mwane anne n tatabeua.
Te iteraniba ibukin te waaki ni kakukurei n te wiiki aei e kona ni buokiia am ataei ni maroroakin tabeua kawai ike te Uea e kabongana te kabwianibwai ni kakabwaiaia kaain te Ekaretia. Tao a kona ni korea tamnein (ke ni kakaei tamnei n ana maekatiin te Ekaretia) taian anga are a kakabwaiaki iai man te kabwianibwai.
Tamara are i Karawa e tangirai bwa N na reiakin taekaia au bakatibu.
Ko na kanga ni kaungai nanoia am ataei n ukori ao n reiakin rongorongoia aia bakatibu? Ko na kanga ni kaungai nanoia am ataei bwa a na karaoi otenanti ibukiia aia bakatibu ngkana a ikawai? Iangoia buokiia bwa a na kakaea n 3 Nibwaai 25:5–6 ni kunea te bwai ae na riki ni boong aika kaitira. A kona ataei aika a uarereke ni katokai baia iaon burooia ni katoa te tai are ngkana a ongo te taeka ae “te nano” ngkai ko wareki kiibu aikai. Ko kona naba ni warekia bwa e kanga ni koro bukin te taetae ni burabeti aei n Reirei ao Berita aika Tabu 110:13–16 (taraa naba Gospel Art Book, no. 95). Karakinna nakoia am ataei bwa e kanga n rairaki nanom nakoia am bakatibu. N aron te katooto, ko kona n tibwauai am taneiai ni baike ko reiakin ibukiia am bakatibu ao ni karaoi otenanti n te tembora ibukiia.
Buokia am ataei ni kanoa rikiia ma aran aia karo ao tibuia. Tera karaki ake ko kona n tibwauaia ibukin temanna mairouia am bakatibu? Kaota tamneia ngkana iai. Kam kona ni kaai n anenea “Families Can Be Together Forever” (Aia Boki n Anene Ataei, 188) ao maroro ma am ataei bwa bukin tera ngkai a rangi ni kakawaki utu n ana babaire Tamara are i Karawa.
Ibukin iango riki tabeua, taraa te beeba ni kaongora n te namwakaina aio n te Rao maekatiin.
Tamnei
Iesu ngke e wareka aia rekooti Nibwaite ma Nibwaai