“Appendix B: Para sa Primary—Paghanda sang Inyo Kabataan para sa Bilog-Kinabuhi nga Paglakat sa Dalan sang Kasugtanan sang Dios” Dali, Magsunod sa Akon—Para sa Puluy-an kag Simbahan: Libro ni Mormon 2024 (2023)

“Appendix B,” Dali, Magsunod sa Akon—Para sa Puluy-an kag Simbahan: 2024

Appendix B

Para sa Primary—Paghanda sang Inyo Kabataan para sa Bilog-Kinabuhi nga Paglakat sa Dalan sang Kasugtanan sang Dios

Sa binulan nga may lima ka Domingo, ginapaisog ang mga titser sa Primary nga buslan ang naiskedyul nga outline sa Dali, Magsunod sa Akon sa ikalima nga Domingo sang isa ukon madamo pa sining mga aktibidades sa pagtuon.

Mga Prinsipyo kag mga Ordinansa sang Ebanghelyo ni Jesucristo

Ang doktrina ni Cristo nagatudlo sa aton kon paano makabalik sa Dios.

Sang si Jesucristo nagpakita sa mga tawo sa Amerika, gintudloan Niya sila sang Iya doktrina. Siling Niya nga makasulod kita sa ginharian sang Dios kon kita magtuo, maghinulsol, magbaton sang Balaan nga Espiritu, kag magpadayon tubtob sa katapusan (tan-awa sa 3 Nefi 11:31–40; Doktrina kag mga Kasugtanan 20:29). Ang mga aktibidades sa idalom makabulig sa imo sa pagtudlo sang mga kabataan nga ining mga prinsipyo kag mga ordinansa makabulig sa aton nga mas magpalapit sa Manluluwas sa bilog naton nga kabuhi.

Para magtuon pa gid parte sa doktrina ni Cristo, tan-awa sa 2 Nefi 31.

Posible nga mga Kahiwatan

Hatagi ang mga kabataan sang mga litrato nga nagasimbolo sang pagtuo kay Jesucristo, paghinulsol, bunyag, kag kompirmasyon (tan-awa sa Libro sang mga Larawan nga Pang-Ebanghelyo, mga num. 1, 111, 103, kag 105). Basaha ukon sulita upod sa mga kabataan ang ikaapat nga artikulo sang pagtuo, kag pangabaya sila nga alsahon ang ila mga litrato kon mamitlang ina nga prinsipyo ukon ordinansa. Buligi ang mga kabataan nga maintiendihan kon paano kita ginabuligan sang tagsa sining mga prinsipyo kag ordinansa nga mangin mas pareho sa Amay nga Langitnon kag kay Jesucristo.
Paano mo buligan ang mga kabataan nga maintiendihan nga ang pagtuo, paghinulsol, bunyag, kag kompirmasyon indi kaisa lamang nga mga hitabo sa kabuhi kundi nagaimpluwensya sa aton espirituhanon nga pagtubo sa bilog naton nga kinabuhi? Halimbawa, pwede ka magpakita sa ila sang litrato sang binhi kag sang dako nga kahoy (ukon idrowing ining mga butang sa board). Buligi sila nga magpanumdom sang mga butang nga nagabulig sa liso nga magtubo sa dako nga kahoy, pareho sang tubig, duta, kag adlaw. Buligi sila nga makita nga daw pareho ini sa mga butang nga aton ginahimo para mas maglapit sa Dios sa bilog naton nga kabuhi—pagpatubo sang aton pagtuo kay Jesucristo, paghinulsol adlaw-adlaw, pagpangabuhi sang aton mga kasugtanan sa bunyag, kag pagpamati sa Balaan nga Espiritu.
Ngaa nagakabatyagan naton ang kalipay kon maghinulsol kita? Iistorya sa mga kabataan ang kalipay kag pagpalangga nga imo nabatyagan sang ginpangayo mo sa Amay nga Langitnon nga patawaron ka.

Bunyag

Si Jesucristo nagpahamtang sang ehemplo para sa akon sang Sia ginbunyagan.

Bisan pa nga wala sang sala si Jesus, ginbunyagan Sia para magpahamtang sang perpekto nga ehemplo sang pagtuman sa Amay nga Langitnon (tan-awa sa 2 Nefi 31:6–10).

Para magtuon pa gid parte sa bunyag, tan-awa sa Doktrina kag mga Kasugtanan 20:37.

Posible nga mga Kahiwatan

Magpakita sang litrato sang bunyag sang Manluluwas kag sang bunyag sang isa pa ka tawo (ukon tan-awa sa Libro sang mga Larawan nga Pang-Ebanghelyo, num. 35 kag num. 103 ukon num. 104). Pangabaya ang mga kabataan nga iistorya kon ano ang lain kag pareho sa duha ka mga litrato. Basaha sing ululupod ang Mateo 3:13–17.

Tugoti ang mga kabataan nga itudlo ang mga butang sa mga litrato nga namitlang sa ginbasa. Sugiri ang mga kabataan parte sa imo pagpalangga sa Manluluwas kag sa imo handum nga sundon Sia.
Basaha ang 2 Nefi 31:9–10, kag hagara ang mga kabataan nga magpamati kon ngaa ginbunyagan si Jesucristo. Agdaha sila nga idrowing ang ila mga kaugalingon sa adlaw sang ila bunyag.

Sarang ko pilion nga makigsugot sa Dios kag magpabunyag.

Ang paghanda para sa bunyag mas masobra pa sangsa paghanda para sa isa ka okasyon. Nagakahulugan ini sang paghanda sa paghimo sang kasugtanan kag dayon pagtuman sina nga kasugtanan sa bug-os nga kinabuhi. Binagbinaga kon paano mo buligan ang mga kabataan nga maintiendihan ang kasugtanan nga himuon nila upod sa Amay nga Langitnon kon bunyagan sila, nga nagalakip sang mga promisa nga Iya himuon sa ila kag sang mga promisa nga ila himuon sa Iya.

Posible nga mga Kahiwatan

Ipaathag nga ang kasugtanan isa ka promisa sa tunga sang tawo kag sang Amay nga Langitnon. Kon ginatinguhaan naton nga tumanon ang aton mga promisa sa Dios, nagapromisa ang Dios nga bugayan kita. Isulat sa board Akon mga Promisa sa Dios kag Mga Promisa sang Dios sa Akon. Basaha sing ululupod ang Mosias 18:10, 13 kag Doktrina kag mga Kasugtanan 20:37, kag buligi ang mga kabataan nga ilista ang mga promisa nga ila makita sa husto nga mga tig-ulo. Isugid sa ila kon paano ka ginbugayan sang Amay nga Langitnon samtang ginatinguhaan mo nga tumanon ang imo mga kasugtanan sa bunyag.
Ipakita sa mga kabataan ang mga litrato sang mga butang nga ginhimo ni Jesucristo sang ari Sia sa duta (para sa mga halimbawa, tan-awa sa Libro sang mga Larawan nga Pang-Ebanghelyo, num. 33–49). Tugoti ang mga kabataan nga hambalan kon ano ang ginahimo ni Jesus sa tagsa ka litrato. Basaha ang Mosias 18:8–10, 13, kag hagara ang mga kabataan nga pamatian ang mga butang nga ginapromisa nila nga himuon kon mabunyagan sila. Paano ining mga promisa magaimpluwensya sa aton mga aksyon adlaw-adlaw? Agdaha ang mga kabataan nga idrowing ang ila mga kaugalingon nga nagabulig sa iban pareho sang ginhimo ni Jesus. Ukon pwede mo himoan ang mga kabataan sang simple nga tsapa (badge) nga suksukon nga may ngalan sang Manluluwas.

Litrato
bata nga lalaki nga ginabunyagan

Kon kita bunyagan, nagahimo kita sang mga promisa sa Dios kag nagahimo Sia sang mga promisa sa aton.

Kompirmasyon

Kon ako kompirmahan, mangin miyembro ako sang Ang Simbahan ni Jesucristo sang mga Santos sa Ulihing mga Adlaw.

Ang mangin miyembro sang Ang Simbahan ni Jesucristo sang mga Santos sa Ulihing mga Adlaw nagadala sang madamo nga mga bugay, dala na ang mga oportunidad para sa mga kabataan nga mangin aktibo nga mga partisipante sa buluhaton sang Dios.

Posible nga mga Kahiwatan

Imbitara ang isa ka tawo nga bag-o lang nabunyagan kag nakompirmahan nga magkadto sa klase kag mag-istorya kon daw ano ang makompirmahan. Ano ang kahulugan para sa sining tawo nga mangin miyembro sang Ang Simbahan ni Jesucristo sang mga Santos sa Ulihing mga Adlaw? Buligi ang mga kabataan nga magpanumdom sang mga paagi nga matuman nila ang ila mga kasugtanan sa bunyag bilang mga miyembro sang Simbahan (pareho sang pagserbisyo sa iban, paghagad sa iban nga magtuon pa gid parte kay Jesus, pagpangamuyo sa mga miting, kag madamo pa). Iistorya kon paano ka nabuligan sang paghimo sining mga butang nga makabatyag sang kalipay sa pagkamiyembro sang Simbahan ni Cristo.
Ipakita ang litrato sang mga tawo sa Mga Tubig sang Mormon (tan-awa sa Libro sang mga Larawan nga Pang-Ebanghelyo, num. 76), kag ipalaragway sa mga kabataan kon ano ang ila nakita sa litrato. Isugid ang istorya ni Alma kag sang iya katawhan nga ginabunyagan didto (tan-awa sa Mosias 18:1–17.

Rebyuha ang Mosias 18:8–9 kag imbitara ang mga kabataan nga maghimo sang mga aksyon nga makabulig sa ila nga madumduman ang mga butang nga handa himuon sang mga tawo bilang mga miyembro sang Simbahan ni Cristo. Mag-istorya sang eksperiyensya sang nasaksihan mo ang mga miyembro sang Simbahan nga nagaserbisyo sa sining mga paagi.

Kon ako makompirmahan, mabaton ko ang dulot sang Balaan nga Espiritu.

Kon kita mabunyagan kag makompirmahan, ang Amay nga Langitnon nagapromisa nga aton “dalayon nga maangkon ang iya Espiritu sa pag-upod sa [aton]” (Doktrina kag mga Kasugtanan 20:77). Ining matahum nga regalo halin sa Dios ginatawag nga dulot sang Balaan nga Espiritu.

Posible nga mga Kahiwatan

Basaha ang Doktrina kag mga Kasugtanan 33:15, kag pangabaya ang mga kabataan nga pamatian ang espesyal nga regalo nga ginhatag sang Amay nga Langitnon sa aton sang kita ginbunyagan kag ginkompirmahan. Para buligan sila nga magtuon pa kon paano makabulig sa ila ang dulot sang Balaan nga Espiritu, rebyuha sing ululupod ang Juan 14:26; Mga Taga-Galacia 5:22–23; 2 Nefi 32:5; 3 Nefi 27:20.
Antes sang klase, pangabaya ang mga ginikanan sang isa ukon masobra pa nga kabataan nga mag-istorya kon paano sila ginbugayan tungod may ara sila sang dulot sang Balaan nga Espiritu. Paano Niya sila ginabuligan? Paano nila mabatian ang Iya tingug?

Ang Balaan nga Espiritu nagahambal sa akon sa madamo nga paagi.

Ang mga kabataan nga makakilala sang tingug sang Espiritu mangin handa sa pagbaton sang personal nga rebelasyon sa paggiya sa ila sa bilog nila nga kabuhi. Tudloi sila nga may madamo nga paagi nga nagahambal ang Balaan nga Espiritu sa aton.

Posible nga mga Kahiwatan

Buligi ang mga kabataan nga manumdom sang lainlain nga mga paagi nga pwede kita mag-istorya sa abyan nga nagaistar sa malayo, pareho sang pagpadala sang sulat, pagpadala sang email, ukon pagpanawag sa telepono. Tudloi sila nga ang Amay nga Langitnon makahambal sa aton paagi sa Balaan nga Espiritu.
Mag-istorya sang eksperiyensya sang ang Balaan nga Espiritu nakighambal sa imo, paagi sa imo mga panghunahuna ukon sa imo nabatyagan (tan-awa sa Doktrina kag mga Kasugtanan 6:22–23; 8:2–3. Magpamatuod sa mga kabataan nga ang Balaan nga Espiritu sarang magbulig sa ila sa pareho nga mga paagi.
Buligi ang mga kabataan nga manumdom sang tinion nga mahimo nabatyagan nila ang Espiritu—halimbawa, sa pagkanta parte sa Manluluwas ukon paghimo sang maayo sa iban. Buligi sila nga makilala ang espirituhanon nga mga balatyagon nga ginadala sang Balaan nga Espiritu. Ngaa sa banta mo nga ginahatagan kita sang Balaan nga Espiritu sang amo sina nga mga balatyagon? Buligi ang mga kabataan nga magpanumdom sang mga butang nga kinahanglan naton himuon para mabatian ang Balaan nga Espiritu nga nagahambal sa aton. Hambali kon ano ang imo ginahimo para mas mabatian sang maathag ang Espiritu.

Ang Sakramento

Kon nagaambit ako sang sakramento, ginadumdom ko ang sakripisyo sang Manluluwas kag ginabag-o ang akon mga kasugtanan.

Ang Manluluwas naghatag sa aton sang sakramento para buligan kita nga madumduman ang Iya sakripisyo para sa aton kag bag-uhon ang aton mga kasugtanan. Tungod sining semanal nga ordinansa, padayon naton nga mabaton ang mga bugay sang aton bunyag sa bilog naton nga kabuhi.

Para magtuon sang dugang, tan-awa sa Mateo 26:26–30; 3 Nefi 18:1–12; Doktrina kag mga Kasugtanan 20:77, 79.

Posible nga mga Kahiwatan

Basaha sa mga kabataan ang mga bahin sang 3 Nefi 18:1–12.ChurchofJesusChrist.org. Ano ang sarang naton himuon para dumdumon si Jesucristo sa oras sang sakramento?
Pangabaya ang mga kabataan nga sugiran ka sang pila ka mga butang nga dapat nila panumdumon pirme nga himuon, pareho sang paghigot sang ila sapatos ukon pagpanghugas sang ila mga kamot antes magkaon. Ngaa importante nga panumdumon ining mga butang? Basaha ang Moroni 4:3 sa kabataan, kag hagara sila nga pamatian kon ano ang ginapromisa naton nga dumdumon pirme kon mag-ambit kita sang sakramento. Ngaa importante nga dumdumon si Jesucristo? Buligi ang mga kabataan nga maintiendihan kon paano kita ginabuligan sang tinapay kag tubig nga dumdumon ang ginhimo ni Jesus para sa aton (tan-awa sa Moroni 4:3; 5:2).
Isulat sa board ang “Nagapromisa ako nga …” Basaha ang mga pangamuyo sa sakramento sa mga kabataan (tan-awa sa Doktrina kag mga Kasugtanan 20:77, 79). Kon mabatian nila ang promisa nga ginahimo naton sa Dios, magpundo kag buligi sila nga isugpon sa dinalan sa board ang promisa nga ila nabatian. Buligi sila nga maintiendihan nga kon mag-ambit kita sang sakramento, ginahimo naton ang pareho nga mga promisa nga ginhimo naton sa buny*ag.
Ano ang buot silingon sang dalhon naton sa aton kaugalingon ang ngalan ni Jesucristo? Para buligan ang mga kabataan nga masabat ining pamangkot, magpaambit sang halimbawa sang butang nga ginasulatan naton sang aton ngalan. Ngaa ginasulatan naton ini sang aton mga ngalan? Ngaa gusto ni Jesucristo nga isulat ang Iya ngalan sa aton? Pamensara ang pagsugid sining paathag halin kay Pangulong Russell M. Nelson: “Ang pagdala sang ngalan sang Manluluwas sa aton kaugalingon nagalakip sang pagpahayag kag pagsaksi sa iban—paagi sa aton mga buhat kag mga pulong—nga si Jesus amo ang Cristo” (“Ang Husto nga Ngalan sang Simbahan,” Liahona, Nob. 2018, 88).

Gahum, Awtoridad, kag mga Yabi sang Priesthood

Ginabugayan sang Dios ang Iya mga anak paagi sa gahum sang priesthood.

Ang tanan nga anak sang Dios—babayi kag lalaki, bata kag tigulang—makabaton sang gahum sang Dios samtang ginatuman nila ang ila mga kasugtanan sa Iya. Ginahimo naton ini nga mga kasugtanan sa pagbaton naton sang mga ordinansa sang priesthood pareho sang bunyag (tan-awa sa Mga Pinili nga Bahin sang Libro sang Pangkabilogan nga Pagsulundan: Pagserbisyo sa Ang Simbahan ni Jesucristo sang mga Santos sa Ulihing mga Adlaw, 3.5, Librarya sang Ebanghelyo). Para magtuon sing dugang, tan-awa sa Russell M. Nelson, “Espirituhanon nga mga Manggad,” Liahona, Nob. 2019, 76–79; “Mga Prinsipyo sang Priesthood,” kapitulo 3 sang Libro sang Pangkabilogan nga Pagsulundan.

Posible nga mga Kahiwatan

Buligi ang mga kabataan nga matalupangdan ang mga bugay nga nabaton nila tungod sang priesthood.
Pamensara nga ilista ining mga butang sa board. Ngaa importante ining mga bugay sa aton? Magpamatuod nga ining mga bugay nagaabot sa aton tungod kay Jesucristo kag sa gahum sang Iya priesthood.
Isulat ang masunod nga mga tig-ulo sa board: Gahum sang Dios kag Gahum kag awtoridad sang Dios nga ginhatag sa tawo sa duta. Ipabutang sa mga kabataan ang mga litrato sa idalom sang una nga tig-ulo nga nagabulig sa aton nga maintiendihan kon paano ginagamit sang Dios ang Iya gahum para bugayan kita, pareho sang pagtuga sang kalibutan, paggiya kag pagtuytoy sa aton, pagpakita sa aton nga palangga kag kilala Niya kita, kag pagpamati kag pagsabat sang aton mga pangamuyo (tan-awa sa Libro sang mga Larawan nga Pang-Ebanghelyo, num. 3, 68, 90, 111). Ipabutang sa ila ang mga litrato sa idalom sang ikaduha nga tig-ulo nga nagabulig sa aton nga maintiendihan kon paano ginagamit sang nagakaangay nga mga lalaki ang gahum kag awtoridad sang Dios para bugayan kita, pareho sang pagbendisyon sang nagamasakit, pagbunyag, pagkompirma, pagpanagtag sang sakramento, kag pagselyo sang mga pamilya (tan-awa sa Libro sang mga Larawan nga Pang-Ebanghelyo, num. 46, 104, 105, 107, 120). Iistorya kon ngaa nagapasalamat ka sa priesthood kag sa mga bugay nga ginadala sini.
Isa sa mayor nga mga paagi nga makabaton kita sang mga bugay sang gahum sang Dios sa aton mga kabuhi amo ang paagi sa mga ordinansa sang priesthood (tan-awa sa Doktrina kag mga Kasugtanan 84:20). Para buligan ang mga kabataan nga matun-an ini nga kamatuoran, pwede mo ilista ang masunod nga balaan nga mga kasulatan sa board: 3 Nefi 11:21–26, 33 (bunyag); Moroni 2 (kompirmasyon); Moroni 4–5 (sakramento). Pwede magpili ang kabataan sang isa sining mga dinalan kag ihambal ang ordinansa nga ginalaragway sini. Hagara ang mga kabataan nga iistorya kon paano sila personal nga nabugayan paagi sa pagbaton sang mga ordinansa sang priesthood.
Buligi ang mga kabataan nga maintiendihan nga makabaton sila sang gahum halin sa Dios sa pagbunyag sa ila kag sa pagtuman nila sang ila kasugtanan sa bunyag. Pamangkuta ang mga kabataan kon paano makabulig sa ila ining gahum.

Ang buluhaton sang Dios ginapamunoan sang mga yabi sang priesthood kag ginatuman paagi sa awtoridad sang priesthood.

Ang nagakaangay nga lalaki nga mga miyembro sang Simbahan sarang nga maordinan sa isa ka palangakuan sang priesthood. Dugang pa, kon ang isa ka tawo maset apart sa isa ka calling ukon gin-asaynan sa pagbulig sa buluhaton sang Dios, magamit niya ang gindelegar nga awtoridad sang priesthood. Ang paggamit sang tanan nga awtoridad sang priesthood sa Simbahan ginapamunoan sang mga indibidwal nga nagakapot sang mga yabi sang priesthood, pareho sang stake president, bishop, kag mga quorum president. Ang mga yabi sang priesthood amo ang awtoridad nga nagagiya sang paggamit sang priesthood sa paghimo sang buluhaton sang Ginuo.

Posible nga mga Kahiwatan

Basaha upod sa kabataan ang Marcos 3:14–15, kag ipakita sa ila ang litrato sang hitabo nga ginlaragway didto (pareho sang Libro sang mga Larawan nga Pang-Ebanghelyo, num. 38). Pamangkuta ang mga kabataan kon may nakita na sila nga gin-ordin sa palangakuan sang priesthood ukon gin-set apart sa isa ka calling (ukon sugiri sila sang imo mga eksperiyensya). Sa ano ini nangin pareho sa ginhimo sang Manluluwas sa Iya mga Apostoles? Buligi ang mga kabataan nga ilista sa board ang mga palangakuan sa priesthood ukon mga calling nga pwede ihatag sa mga miyembro sang Simbahan, pareho sang titser ukon lider sang isa ka organisasyon. Sa tupad sang tagsa ka palangakuan ukon calling, pwede mo isulat kon ano ang awtorisado nga himuon sinang tawo nga may amo sina nga palangakuan ukon calling. Sugiri ang mga kabataan kon paano ang pagset apart sa imo sang isa ka tawo sa idalom sang direksyon sang mga yabi sang priesthood nakabulig sa imo nga mag-alagad.
Agdaha ang mga kabataan nga magpanumdom sang mga butang nga kinahanglanon mo sang yabi, pareho sang salakyan ukon pwertahan. Ano ang matabo kon wala ka sang yabi? Basaha sing ululupod ang Doktrina kag mga Kasugtanan 65:2, kag ipaambit ang imo testimonya parte sa importansya sang mga yabi sang priesthood sa duta.
Imbitara ang isa ka tawo nga nagakapot sang mga yabi nga magkadto sa klase kag mag-istorya kon ano ang kahulugan sang pagkapot sang mga yabi sang priesthood. Hagara sia nga ilaragway ang iya mga responsibilidad. Ano nga mga bahin sang buluhaton sang Ginuo ang iya ginapangunahan? Paano sia ginabuligan sang Manluluwas?

Ang Templo kag ang Plano sang Kalipayan

Ang templo amo ang balay sang Ginuo.

Ang mga templo kabahin sang plano sang Amay nga Langitnon para sa Iya kabataan. Sa mga templo, nagahimo kita sang sagrado nga mga kasugtanan upod sa iya, ginahatagan kita sang gahum sang priesthood, nagabaton sang rebelasyon, ginahikot ang mga ordinansa para sa patay na naton nga mga katigulangan, kag ginaselyohan upod sa aton mga pamilya para sa wala katubtuban. Tanan ini nangin posible tungod kay Jesucristo kag sang Iya nagabayad-sala nga sakripisyo.

Paano mo buligan ang mga kabataan nga imo ginatudloan nga makilala ang kasagrado sang balay sang Ginuo kag ihanda ang ila mga kaugalingon nga mangin nagakaangay sa pagpartisipar sa mga ordinansa sang templo? Pamensara nga rebyuhon ining mga balasahon: Doktrina kag mga Kasugtanan 97:15–17; Russell M. Nelson, “Panghingapos nga Pamulong-pulong,” Liahona, Nob. 2019, 120–22.temples.ChurchofJesusChrist.org.

Posible nga mga Kahiwatan

I-display ang isa ukon madamo pa nga mga litrato sang mga templo. Pamangkuta ang mga kabataan kon ano ang nagahimo sang templo nga espesyal nga lugar. Ipatalupangod nga ang tagsa ka templo may amo sini nga marka: “Balaan sa Ginoo: Ang Balay sang Ginuo.” Pamangkuta ang mga kabataan kon ano ayhan sa banta nila ang buot silingon sang “Balaan sa Ginuo”. Ngaa nga ginatawag ang templo nga balay sang Ginuo? Ano ang ginatudlo sini sa aton parte sa templo? Kon nakakadto na ang bisan sin-o sa mga kabataan, pwede man nila iistorya kon ano ang ila nabatyagan sang ato sila didto. Kon nakakadto ka na sa templo, iistorya kon paano mo nabatyagan ang presensya sang Ginuo didto, kag hambali kon ngaa ang templo isa ka sagrado nga lugar para sa imo.
Basaha sing ululupod ang Doktrina kag mga Kasugtanan 97:15–17. Pangabaya ang mga kabataan nga pangitaon ang mga ginapaabot sang Ginuo sa mga nagasulod sa Iya balaan nga balay. Ngaa kinahanglan naton nga mangin nagakaangay sa pagsulod sa Iya balay? Bilang bahin sining paghinambalanay, hambali ang mga kabataan parte sa mga temple recommend, lakip na kon paano makabaton sini. Pwede mo hagaron ang isa ka miyembro sang bishopric nga iistorya sa ila kon daw ano ang temple recommend interview kag ang mga pamangkot nga ginapamangkot sa tawo.

Sa templo, nagahimo kita sang mga kasugtanan upod sa Dios.

Si Pangulong Russell M. Nelson nagtudlo, “Si Jesucristo nagaagda sa aton nga usuyon ang dalan sang kasugtanan pauli sa aton Langitnon nga Mga Ginikanan kag mangin kaupod sang aton mga pinalangga” (“Dali, Magsunod sa Akon,” Liahona, Mayo 2019, 91). Buligi ang mga kabataan nga maintiendihan nga ang dalan sang kasugtanan nagalakip sang bunyag, kompirmasyon, kag sang endowment sa templo kag pagselyo.

Posible nga mga Kahiwatan

Pangabaya ang mga kabataan nga buligan ka sa pagrebyu sang kasugtanan nga ginahimo naton upod sa Dios sang ginbunyagan kita kag inang ginabag-o naton kon mag-ambit kita sang sakramento (tan-awa sa Mosias 18:10; Doktrina kag mga Kasugtanan 20:77, 79). Magpakita sang litrato sang templo kag ipaathag nga ang Amay nga Langitnon may mas madamo pa nga mga bugay nga gusto Niya ihatag sa aton sa templo.
Magdrowing sang pwertahan padulong sa isa ka alagyan. Pamangkuta ang mga kabataan kon ngaa sa banta nila makabulig nga may alagyan nga lalaktan. Basaha sing ululupod ang 2 Nefi 31:17–20, kon diin ginakumparar ni Nefi ang kasugtanan sa bunyag bilang pwertahan kag ginahagad kita nga magpadayon sa alagyan pagkatapos sang bunyag. Madamo pa nga mga kasugtanan ang dapat himuon pagkatapos sang bunyag, dala na ang mga kasugtanan nga ginahimo sa templo. Ipaathag nga gintawag ni Pangulong Nelson ining alagyan nga “dalan sang kasugtanan.”

Sa templo, sarang kita mabunyagan kag makumpirmahan para sa mga katigulangan naton nga napatay na.

Ang ebanghelyo ni Jesucristo nagapatigayon para sa tanan nga mga anak sang Dios nga makabalik sa pagpuyo upod sa iya, bisan nga napatay sila nga wala makahibalo sang ebanghelyo. Sa templo, sarang kita mabunyagan kag makumpirmahan nga mga miyembro sang Simbahan ni Jesucristo para sa ila.

Posible nga mga Kahiwatan

Hambali ang tion sang may ginhimo para sa imo ang isa ka tawo nga indi mo mahimo para sa imo kaugalingon. Agdaha ang mga kabataan nga mag-istorysa sang pareho nga mga eksperiyensya. Ipaathag nga kon magkadto kita sa templo, sarang kita makabaton sang sagrado nga mga ordinansa pareho sang bunyag para sa iban nga napatay na. Paano kita nangin pareho kay Jesus kon ginahimo naton ang buluhaton para sa patay na. Ano ang Iya ginhimo para sa aton nga indi naton mahimo para sa aton mga kaugalingon?
Agdaha ang isa ukon madamo pa nga mga lamharon nga ginbunyagan para sa ila mga katigulangan sa pag-istorya sang ila eksperiyensya. Pamangkuta sila kon daw ano sa sulod sang templo. Paisoga sila nga ipaambit kon ano ang ila nabatyagan sa paghimo sining buluhaton para sa ila mga katigulangan.
Magdrowing sang kahoy sa board, upod ang mga gamot kag mga sanga. Pangabaya ang mga kabataan nga hunahunaon kon paano nangin pareho sa kahoy ang pamilya. Ngalani ang mga gamot nga Mga Katigulangan, ngalani ang mga sanga Mga Anak, kag ngalani ang puno sang kahoy nga Ikaw. Basaha sing ululupod ining dinalan sa Doktrina kag mga Kasugtanan 128:18: “Kay indi kita maperpekto kon wala sila [aton mga katigulangan]; kag indi man sila maperpekto kon wala kita.” Magpamangkotpareho sa masunod: “Ngaa kinahanglan naton ang aton mga katigulangan? Ngaa kinahanglan kita sang aton mga kabataan? Paano kita ginbuligan sang aton mga ginikanan, kalolohan, kag sang iban pa nga mga katigulangan?” Agdaha ang mga kabataan nga pangitaon sa bilog nga Doktrina kag mga Kasugtanan 128:18 ang dinalan nga nagalaragway kon paano naton mabuligan ang aton mga katigulangan.
Pamensara nga magbuligay upod sa mga ginikanan sang tagsa ka bata nga magpangita sang ngalan sang isa katigulangan para dalhon sang bata sa templo (tan-awa sa FamilySearch.org).