Mosaea 7--10

O le feiloai atu ia Amona, o se sa Nifae mai Saraemila, na avatu ai i le Tupu o Limae sina faamoemoe, ma sa ia manao e pasi atu lena faamoemoe i lona nuu. A o e faitauina le Mosaea 7:14--33, matau mea na fai atu ai Limae i lona nuu e fautuaina ai i latou, faamalosia lo latou faatuatua, ma avatu ia i latou se faamoemoe o le a fesoasoani le Atua ia i latou. E ui lava atonu e le o ta’usalaina oe i agasala lava e tasi e pei o le nuu o Limae, ae e mafai faapefea e ana upu ona fesoasoani ia te oe e liliu atu ai i le Alii? O le a e matauina, mo se faataitaiga, na faamanatu atu e Limae i lona nuu e uiga i tala ua tuanai e uiga i le laveaiina o i latou e le Atua (tagai fuaiupu 18–20). E faapefea e nei tala, faapea foi isi tala faatusi paia po o aafiaga patino, ona fesoasoani ia te oe e faatuatuaina le Atua?

A o sailia e aunoa ma se faamanuiaina e se vaega toalaiti o le nuu o Limae le nuu o Saraemila, sa latou mauaina papatusi e 24 e auro ma ni tusiga vane i se gagana e lei masani ai. O nei papatusi, ia na iu ina faaliliuina e le Tupu o Mosaea, sa faamatala ai e uiga i se nuu sa igoa o sa Iareto, o e na o mai i le nuu folafolaina mai le Olo o Papelu ma sa iu ina faaumatia (tagai Mosaea 28:11–19). Mulimuli ane sa faia ai e Moronae se faapuupuuga o nei papatusi (tagai Eteru 1:1–2), lea na avea ai ma tusi o Eteru. Matau i le Mosaea 28:18 le aoga o nei talafaamaumau i le nuu o Mosaea.

Ina ua faalogo Limae i le molimau a Amona faapea sa faatuina mai e le Alii se tagatavaai, sa “matuai olioli [Limae] ma ava’e le faafetai i le Atua” (Mosaea 8:19). Aisea e te manatu ai na faapena ona lagona? O le a le mea ua e aoaoina e uiga i tagatavaai mai upu a Amona i le Mosaea 8:13–19? I o tatou taimi, “o le Au Peresitene Sili ma le Aufono a le Toasefululua, ua lagolagoina o ni perofeta, tagatavaai, ma talifaaaliga” (Bible Dictionary, “Seer”). O anafea le taimi mulimuli na e manatunatu loloto ai i faamanuiaga o le i ai o perofeta, tagatavaai, ma talifaaaliga i le lalolagi? Atonu e mafai ona e tusitusia pe na faapefea ona avea perofeta, tagatavaai, ma talifaaaliga o se “manuia tele” ia te oe (Mosaea 8:18).

O le Perofeta o Iosefa Samita o le tagatavaai sili e tu i le faauluuluga o lo tatou tisipenisione (tagai i le MF&F 21:1; 124:125; Iosefa Samita—Talafaasolopito 1:62). Na faapefea ona ia faatinoina le faamatalatalaina e Amona o se tagatavaai i le taimi o lana galuega?

Sa tautino atu e Senifa na ia faia ni mea sese. Sa ova naunau o ia i nisi taimi, ma sa ia tuuina lona nuu—tuaa o le nuu o Limae—i se tulaga faigata e ala i le faia o se maliega le mafaufau ma le Tupu o Lamana. Ae mulimuli ane, ina ua ia sii taua atu ia sa Lamana, sa ia fesoasoani i lona nuu e faafetaia’ia ia luitau ma le faatuatua. A o e faitauina le Mosaea 9–10, vaavaai mo mea na faia e le nuu o Senifa e faaalia ai lo latou faatuatua. Na faapefea ona faamalolosia i latou e le Atua? O le a le uiga ia te oe o le agai i luma “i le malosiaga o le Alii”? (Mosaea 9:17; 10:10–11).

E tusa ai ma le Mosaea 10:11--17, na faapefea e faatinoga ma uiga faaalia o tuaa o sa Lamana ona papuipuia sa Lamana mai le iloaina o le upumoni? Na faapefea e filifiliga a tuaa o sa Lamana ona aafia ai tupulaga i le lumanai? Mafaufau i tagata e ono tosinaina i ou talitonuga ma filifiliga; o le a sau mea o fai e fesoasoani ai ia te i latou ia atili faatuatua atoatoa ai ia Keriso?

Matau ia faataitaiga na faasino i ai Limae ina ia faamalosiauina ai lona nuu ia faatuatua. O a ni faataitaiga mai tusitusiga paia e musuia ai i tatou e “faalagolago i le Atua”? O le a le uiga o le tuu atu o lo tatou faalagolago i le Atua? (tagai foi i le Mosaea 9:17; 10:19). O a tala mai o tatou olaga po o olaga o o tatou augatama e mafai ona tatou faasoa atu e musuia ai le faalagolago sili atu i le Atua?

O a mea ua tatou aoao e uiga i le Faaola mai i nei fuaiupu? (tagai foi i le MF&F 130:22). Aisea tatou te faafetai ai i le iloaina o nei mea?

Ina ia fesoasoani ia malamalama tagata o le aiga pe o le a le tagatavaai, atonu e mafai ona e faaali atu ia i latou ni ata o meafaigaluega e fesoasoani ia i tatou e vaai ai i mea semanu e le mafai ona tatou vaai i ai, e pei o mea vaai, o se telesikope [telescope], po o se maikolosikope [microscope]. E faapefea ona faapei nei meafaigaluega o se tagatavaai? (tagai i le Mose 6:35–36). O a mea e mafai e tagatavaai ona vaai i ai ae tatou te le mafaia? O le a se faamaoniga o ia i tatou faapea o Iosefa Samita o se tagatavaai?

E mafai ona e faaali atu ata o o tatou perofeta soifua, tagatavaai, ma talifaaaliga ma fesili i lou aiga pe o a ni mea latou te iloa ia i latou. O faapefea ona tatou mulimuli ia i latou?

Ina ua osofaia e sa Lamana, sa saunia faaletino ma faaleagaga le nuu o Senifa. O le a se mea e mafai ona tatou aoao mai le nuu o Senifa e uiga i le saunia mo luitau?