8–14 nō Tiunu. Alama 8–12 : E tae mai Iesu Mesia nō te fa’aora i tōna mau ta’ata », Mai, pe’e mai—nō te ta’ata hō’ē ’e te ’utuāfare : Buka a Moromona 2020 (2020)

« 8–14 nō Tiunu. Alama 8–12 », Mai, pe’e mai—nō te ta’ata hō’ē ’e te ’utuāfare : 2020

Hōho’a

tē poro ra ’o Alama

Ha’api’ira’a i te ha’api’ira’a tumu, nā Michael T. Malm

8–14 nō Tiunu

Alama 8–12

E haere mai Iesu Mesia nō te fa’aora i tōna ra mau ta’ata

Nā te tuatāpapara’a i te mau pāpa’ira’a mo’a e tītau i te heheura’a. Nō reira ’ia tai’o ’outou i te Alama 8–12, ’a pāpa’i i te mau mana’o e tae mai nō ’ō mai i te Vārua ’a ha’api’i ai ’oia ia ’outou nā roto atu i te mau poro’i a Alama ’e a Amuleka.

Pāpa’i i tō ’outou mau mana’o

E’ita te ’ohipa a te Atua e manuia ’ore. Terā rā i te tahi taime mai te huru ē, tē manuia ’ore ra tā tātou tauto’ora’a nō te tauturu i tāna ’ohipa—’ia hi’o a’e tātou, ’aita tātou e ’ite ra i te mau maita’i e tīa’ihia ra. I te tahi taime, te ’ite ra tātou ē mai ia Alama tātou i te porora’a ’oia i te ’evanelia i tō Amoniha—’ua pāto’ihia, ’ua tūtuhahia ’e ’ua tīahihia. ’Āre’a rā, i te fa’auera’a te hō’ē melahi iāna ’ia ho’i fa’ahou e tāmata, ’ua fa’aitoito Alama ’e ’ua « ho’i ’oi’oi ihora ’oia » (Alama 8:18), ’e ’ua fa’aineine te Atua i te ’ē’a i mua iāna. ’Aita ’oia i fa’aineine noa i te mā’a ’ia ’amu Alama ’e i te vāhi ’ia fa’aea ’oia, ’ua fa’aineine ato’a rā ’oia ia Amuleka, tei riro mai ’ei hoa tāvini nōna, ’ei pāruru pūai nō te ’evanelia ’e ’ei hoa ha’apa’o maita’i ho’i. ’Ia fa’aruru ana’e tātou i te mau taupupura’a ’e te mau ha’aparuparura’a mana’o nō te tāvini i roto i te bāsileia o te Fatu, e nehenehe tā tātou e ha’amana’o nāhea te Atua i te turura’a ’e i te arata’ira’a ia Alama, ’e e nehenehe tā tātou e tu’u i tō tātou ti’aturi ē, e turu ato’a mai ’e e arata’i mai te Atua ia tātou, noa atu ā tō tātou vaira’a fifi.

Hōho’a

ītona tuatāpapara’a a te ta’ata iho

Mau mana’o nō tā ’oe iho tuatāpapara’a pāpa’ira’a mo’a

Alama 8

E tītau paha tā’u mau tauto’ora’a nō te fa’a’ite i te ’evanelia i te onoonora’a ’e te fa’a’oroma’i.

Noa atu ā e pāto’i te hō’ē ta’ata i tō ’oe ’itera’a pāpū nō te ’evanelia, ’eiaha ato’a ’ia mo’e te tīa’ira’a—inaha ho’i e’ita te Fatu e fa’aru’e i terā ta’ata, ’e nāna e arata’i ia ’oe nāhea i te rave. Nō Alama, ’ua fa’aue te hō’ē melahi iāna ’ia ho’i i Amoniha nō te poro i te ’evanelia noa atu ā ’ua pāto’i ’e ’ua ha’amāuiui a’ena rātou iāna (hi’o Alama 8:14–16). E aha tā ’oe i ha’api’i mai nā roto i te hi’ora’a o Alama nō ni’a i te fa’a’itera’a i te ’evanelia noa atu te mau fifi ’e te pāto’ira’a ? E aha te mau ’īrava i roto i te Alama 8 e fa’arahi nei i tō ’oe hia’ai ’ia fa’a’ite i te ’evanelia ?

Hi’o ato’a 3 Nephi 18:30–32; Jeffrey R. Holland, « Te ho’o—’e te mau ha’amaita’ira’a—nō te ti’ara’a pipi », Ensign ’aore rā Liahona, Mē 2014, 6–9.

Alama 9:18–25 ; 10:16–23

E ha’avā te Atua i tāna mau tamari’i mai te au i te māramarama ’e te ’ite tei noa’a ia rātou.

’Ia tai’ohia te huru o te mau ’āti Nephi i Amoniha i te ravera’a i te mau tāvini a te Fatu, e mea ’ōhie roa ’ia ha’amo’e ē, e ta’ata ha’apa’o ’evanelia rātou i muta’a ra, « e feiā ha’amaita’i-rahi-hia e te Fatu ra » (Alama 9:20). ’E inaha, te hō’ē pae o te poro’i a Alama i tō Amoniha, ’oia ho’i, nō tō rātou fa’a’eta’etara’a i tō rātou ’ā’au ’e nō tō rātou ha’amaita’i-roa-’ino-hia, ’ua ’ino atu ā ïa tō rātou vaira’a i tō te mau ’āti Lamana, tei hara ma te ’ite ’ore. E aha tā teie fa’aaura’a e ha’api’i nei ia tātou nō ni’a nāhea te Atua e ha’avā i tāna mau tamari’i ?

’Ia tai’o ’oe nō ni’a i te mau ha’amaita’ira’a rahi tā te Atua i hōro’a i te mau ta’ata o Nephi (hi’o ta’a ’ē Alama 9:19–23), ’a feruri i te mau ha’amaita’ira’a rahi tāna i hōro’a ia ’oe. E aha tā ’oe e rave ra nō te tū’ati mau noa i teie mau ha’amaita’ira’a ? E aha te mau tauira’a tā ’oe e mana’o ra e tītauhia ’ia rave ?

Hi’o ato’a Te Parau Ha’api’ira’a ’e te mau Parau Fafau 82:3.

Alama 11–12

Te fa’anahora’a a te Atua, e rāve’a ora ïa.

’Ua fa’a’ohipa te mau peropheta o te Buka a Moromona i te mau i’oa rau nō te fa’ahiti i te fa’anahora’a a te Atua nō tāna mau tamari’i, mai te rāve’a o te ora ’aore rā te rāve’a rahi ’oa’oa’. I roto i te Alama 11–12, ’ua fa’ahiti Alama ’e Amulek i te reira ’ei rāve’a ora. ’Ia tai’o ’oe i teie mau pene, ’a feruri nō te aha i fa’a’ohipahia ai te ta’o ra « ora » nō te fa’ahiti i te parau nō te fa’anahora’a. E nehenehe tā ’oe e pāpa’i i te tahi parau pū’ohura’a nō tā Alama ’e Amuleka i ha’api’i nō ni’a i te mau tuha’a o te fa’anahora’a.

Te Hi’ara’a :

Te Tāra’ehara :

Tātarahapara’a :

Pohe :

Ti’afa’ahoura’a :

Ha’avāra’a :

’A hi’o na i tā te mau parau a Amuleka i fa’atupu i ni’a i te ta’ata (hi’o Alama 11:46). ’Ia mana’o ’oe, nō te aha e mana rahi mau te reira i roto i teie mau parau tumu ? E aha tā te reira i fa’atupu i roto i tō ’oe orara’a ?

Hi’o ato’a D. Todd Christofferson, « Te ti’afa’ahoura’a o Iesu Mesia », Ensign ’aore rā Liahona, Mē 2014, 111–14

Alama 12:8–18

Mai te peu e’ita vau e fa’a’eta’eta i tō’u ’ā’au, e ti’a iā’u ’ia fāri’i rahi atu ā i te parau a te Atua.

E ui paha te mana’o o vetahi ē, nō te aha ’aita te Metua i te Ao ra e fa’a’ite ia tātou i te mau mea ato’a. I roto i te Alama 12:9–14, ’ua fa’ata’a Alama i te hō’ē tumu e tāpe’ahia, i te tahi taime, te mau parau ’aro a te Atua, ia tātou nei. E nehenehe teie mau uira’a e tauturu ia ’oe ’ia feruri i te mea tāna i ha’api’i :

E aha te aura’a e fa’a’eta’eta i tō tātou ’ā’au ? ’Ua ’ite a’enei ’oe i roto ia ’oe i teie huru ?
Nō te aha te Fatu e tāpe’a ai i tāna parau i te feiā e fa’a’eta’eta i tō rātou ’ā’au ?
E aha te ’ohipa i tupu nō ’oe nō te tupura’a te parau nō te fāri’ira’a i « te tufa’a rahi o te parau » ? (Alama 12:10). Mai te aha te huru o te reira ?
E aha tā ’oe e nehenehe e rave nō te ha’apāpū ē e ’itehia te parau a te Atua i roto ia ’oe ? (Alama 12:13). Mai te peu tei roto ia ’oe te parau a te Atua, e aha te hope’a i ni’a i tā ’oe « mau parau », « mau ’ohipa » ’e « mau mana’o » ? (Alama 12:14).

’Ei hi’ora’a nō teie mau parau tumu, ’a fa’aau ia Amuleka i te tahi atu mau ta’ata nō Amoniha. Nāhea te ’ohipa i tupu nō Amuleka (hi’o ta’a ’ē i te Alama 10:1–11) e fa’ahōho’a nei i tā Alama e ha’api’i ra i roto i teie mau ’īrava ?

Hōho’a

ītona tuatāpapara’a a te ’utuāfare

Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare

’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.

Alama 8:10–18

E aha tā tātou e nehenehe e ’apo mai nā roto mai ia Alama nō ni’a i te ha’apa’o-« ’oi’oi »-ra’a i te parau a te Fatu (’īrava 18) noa atu ā e ’ere i te mea ’ōhie ? ’Ei tūra’ira’a i teie parau tumu nō te mau tamari’i ri’i, e nehenehe e ha’uti i te hō’ē ha’uti, i reira ’outou e hōro’a ai i te mau arata’ira’a nō te hō’ē ’ohipa ’a hi’o atu ai i te ’oi’oi o te mau melo o te ’utuāfare i te ravera’a i te reira. ’Ei hi’ora’a, e nehenehe e hi’o ’o vai tē nehenehe e tūfene ’oi’oi i te hō’ē ’ahu.

Alama 10:1–12

E aha tā tātou e nehenehe e ha’api’i mai nā roto mai i te ’ohipa i tupu nō Amuleka i roto i teie mau ’īrava ? E aha te fa’ahope’ara’a o tōna ’itera’a pāpū i ni’a i te feiā i fa’aro’o iāna ? ’A ani i te mau melo o te ’utuāfare ’ia fa’ata’a i te hō’ē fa’anahora’a nō te ravera’a i teie hepetoma i te hō’ē mea tā rātou i ha’api’i mai nā roto mai i te hi’ora’a o Amuleka.

Alama 10:22–23

E aha tā tātou i ha’api’i mai i roto i teie mau ’īrava nō ni’a i te fa’ahope’ara’a o te hō’ē pupu ta’ata parau ti’a i ni’a i te hō’ē ’oire parau ti’a ’ore ?

Alama 11:34–37

E aha te ta’a-’ē-ra’a e vai ra i roto i te fa’aorara’a Iesu Mesia ’ia tātou ’ia vai noa tātou i te hara ’e i tā tātou hara ? (hi’o Helaman 5:10; hi’o ato’a 1 Ioane 1:9–10). ’Ei fa’ahōho’ara’a i tā Amuleka i ha’api’i, e nehenehe tā ’outou e fa’a’ite i te ’ā’amu i te ha’amatara’a o te a’ora’a a Elder Allen D. Haynie « ’Ia ha’amana’o ’o vai tā tātou e ti’aturi » (Ensign ’aore rā Liahona, Novema 2015, 121-23). E mea nāhea Iesu Mesia i te fa’aora ia tātou i tā tātou mau hara ?

Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetomai roto Mai, pe’e mai—nō te Paraimere

Ha’amaita’ira’a i te tuatāpapara’a pāpa’ira’a mo’a a te ta’ata iho

Tuatāpapa i te mau parau a te mau peropheta ’e te mau ’āpōsetolo o te mau mahana hope’a nei. E tai’o i te mea tā te mau peropheta ’e tā te mau ’āpōsetolo i te mau mahana hope’a nei i ha’api’i nō ni’a i te mau parau tumu tā ’oe i ’ite i roto i te mau pāpa’ira’a mo’a. ’Ei hi’ora’a, e nehenehe tā ’outou e hi’o mai i te hō’ē tumu parau i roto i te Alama 8–12 ’a ’imi atu ai i te reira tumu parau i roto i te ’āmuira’a rahi i tupu a’enei (hi’o Ha’api’ira’a mai tā te Fa’aora, 21).