1 ’E i teienei, i muri a’era, ’ia oti a’era ia Alama te ha’api’ira’a atu i te mau ta’ata i Gideona i te mau mea e rave rahi ’aore i ti’a ’ia pāpa’ihia, ’e i te fa’ati’ara’a ho’i i te fa’anahora’a o te ’ēkālesia mai tāna i rave na i te fenua ra nō Zarahemela, ’ua ho’i mai ra ’oia mai te fenua mai ra mai Gideona, ’oia ïa, ’ua ho’i mai ra ’oia i tōna ihora fare i Zarahemela nō te fa’afa’aea ri’i i te mau ’ohipa o tāna i rave.

2 E ’o teie te hope’a nō te ivara’a o te matahiti nō te fa’aterera’a a te mau ha’avā i ni’a i te mau ta’ata o Nephi.

3 ’E i muri a’era, i te ha’amatara’a nō te ’ahurura’a o te matahiti nō te fa’aterera’a a te mau ha’avā i ni’a i te mau ta’ata o Nephi, ’ua reva atu ra Alama mai reira atu, ’e ’ua haere atu ra ’oia i te fenua ra nō Meleke, i te pae tō’o’a o te rā nō te ’ānāvai Sidona, i te pae tō’o’a o te rā, nā te mau fenua i te hiti nō te mēdēbara.

4 ’E ’ua ha’amata ihora ’oia i te ha’api’i i te mau ta’ata i te fenua ra nō Meleke mai te au i te fa’anahora’a mo’a a te Atua, ’e ’ua pi’ihia ho’i ’oia nā roto i te reira ; ’e ’ua ha’amata ’oia i te ha’api’i atu i te mau ta’ata ē ’ati noa a’e te fenua ra nō Meleke.

5 ’E i muri a’era, ’ua haere mai ra te mau ta’ata iāna nō ’ō mai i te mau ’ōti’a ato’a o te fenua i te pae i te mēdēbara ra. ’E ’ua bāpetizohia ihora rātou ē hope roa a’e tō taua fenua ra.

6 ’E ’ia fa’aoti a’era ’oia i tāna ’ohipa i Meleke ra, ’ua reva atu ra ’oia, ’e e toru a’era mahana ’oia i te haerera’a i te pae apato’erau nō te fenua ra nō Meleke ; ’e ’ua tae atu ra ’oia i te hō’ē ’oire i parauhia ’o Amoniha.

7 I teienei, e peu nā te mau ta’ata o Nephi ’ia ma’iri i te i’oa o tō rātou mau fenua, ’e tō rātou mau ’oire, ’e tō rātou mau ’oire iti, ’oia ïa, ’e tō rātou mau ’oire iti roa atu, i te i’oa o te ta’ata mātāmua i pārahi i reira ; ’e ’ua nā reira-ato’a-hia te fenua nō Amoniha.

8 ’E i muri a’era, ’ia tae a’era Alama i te ’oire nō Amoniha, ’ua ha’amata ihora ’oia i te a’o atu i te parau a te Atua ia rātou.

9 I teienei, e mana rahi tō Sātane i ni’a i te ’ā’au o te mau ta’ata nō te ’oire nō Amoniha ; nō reira ’aita rātou i fa’aro’o i te mau parau a Alama.

10 ’Āre’a rā ’ua rave pūai Alama i te ’ohipa nā roto i te vārua, i te tōra’a i te Atua nā roto i te pure ’ū’ana, ’ia nīni’i mai ’oia i tōna Vārua i ni’a iho i te mau ta’ata i roto i taua ’oire ra ; ’e ’ia fa’ati’a mai ho’i ’oia ’ia ti’a iāna ’ia bāpetizo ia rātou e tae atu ai i te tātarahapara’a.

11 ’Āre’a rā, ’ua fa’a’eta’eta rātou i tō rātou ’ā’au, i te nā-’ō-ra’a mai iāna ē : Inaha, ’ua ’ite mātou ē, ’o Alama ā ’oe ; ’e ’ua ’ite ato’a mātou ē, e tahu’a rahi ’oe i ni’a i te ’ēkālesia tā ’oe i fa’ati’a i te mau vāhi e rave rahi i ni’a i te fenua, mai te au i tō ’oe iho mana’o ; e ’ere mātou nō tā ’oe ’ēkālesia, ’e ’aita ho’i mātou i ti’aturi i taua mau peu tumu ma’ama’a ra.

12 ’E i teienei ’ua ’ite ho’i mātou ē, nō te mea e ’ere mātou nō tā ’oe ’ēkālesia, ’ua ’ite mātou ē ’aita ïa tō ’oe e mana i ni’a iho ia mātou ; ’e ’ua hōro’a ho’i ’oe i te pārahira’a ha’avā ia Nephiha ; nō reira e ’ere ïa ’oe i te ha’avā rahi i ni’a ia mātou nei.

13 I teienei ’ia oti a’era tā te mau ta’ata paraura’a mai i te reira, ’e te pāto’ira’a mai i tāna ato’a ra mau parau, ’e te fa’a’inora’a mai iāna, ’e te tūtuhara’a mai i ni’a iho iāna, ’e te tīahira’a ho’i iāna i rāpae i tō rātou ’oire, ’ua reva atu ra ’oia, ’e ’ua rave ihora ’oia i te ’ē’a e tae atu ai i te ’oire i pi’ihia ’o Aarona.

14 ’E i muri a’era, ’a haere noa ai ’oia i reira, ’ua teiaha roa ’oia i te ’oto, i te haerera’a nā roto i te mau ati e rave rahi, ’e te māuiui rahi o te ’ā’au, nō te parauti’a ’ore o te feiā e pārahi ra i te ’oire nō Amoniha, ’e i muri a’era, ’a teiaha noa ai Alama i te ’oto, inaha, ’ua fā mai ra te hō’ē melahi a te Fatu iāna, ’e ’ua nā ’ō mai ra :

15 E ao tō ’oe e Alama ; nō reira, ’a fa’ateitei i tō ’oe upo’o i ni’a ’e ’a ’oa’oa, e mea ti’a roa ho’i ia ’oe ’ia ’oa’oa ; nō te mea ’ua itoito ’oe i te ha’apa’ora’a i te mau fa’auera’a a te Atua mai te tau mai ā i fāri’i ai ’oe i tā ’oe parau poro’i mātāmua nō ’ō mai iāna ra. Inaha, ’o vau nei te reira tei hōro’a atu i te reira ia ’oe.

16 ’E inaha, ’ua tonohia mai au nō te fa’aue atu ia ’oe na ’ia ho’i atu i te ’oire nō Amoniha, ’e ’ia a’o fa’ahou atu i te mau ta’ata nō taua ’oire ra ; ’oia ïa, ’ia a’o atu ia rātou. ’Oia ïa, ’ia parau atu ia rātou ē, ’ia ’ore rātou ’ia tātarahapa, e ha’amou te Fatu te Atua ia rātou.

17 Inaha ho’i, tē feruri noa nei rātou i teie taime i te rāve’a nō te fa’a’ore i te ti’amāra’a o tō ’oe ra mau ta’ata, (tē nā reira mai ra ho’i te Fatu) ’e e mea au ’ore ho’i ïa i te mau ture, ’e te mau parau, ’e te mau fa’auera’a ho’i tāna i tu’u mai i tōna ra mau ta’ata.

18 I teienei, i muri a’era, ’ia fa’aro’o a’era Alama i te parau poro’i a te melahi a te Fatu ra, ’ua ho’i ’oi’oi atu ra ’oia i te fenua ra nō Amoniha. ’E ’ua tomo atu ’oia i roto i te ’oire nā te tahi ’ē’a atu, ’oia ïa, nā te ’ē’a i te pae apato’a nō te ’oire ra nō Amoniha.

19 ’E ’a tomo atu ai ’oia i roto i te ’oire, ’ua po’ia ’oia, ’e ’ua nā ’ō atu ra i te hō’ē ta’ata : E ti’a ānei ia ’oe ’ia hōro’a mai i te mā’a nā te hō’ē tāvini ha’eha’a o te Atua ?

20 ’E ’ua parau mai ra taua ta’ata ra iāna : E ta’ata ’āti Nephi au nei, ’e tē ’ite nei au ē, e peropheta mo’a ’oe nā te Atua, ’e ’o ’oe te ta’ata tā te melahi i parau mai i roto i te hō’ē ’ōrama ē : E fāri’i ’oe iāna. Nō reira, ’a haere mai nā muri iā’u i roto i tō’u fare, ’e e hōro’a atu vau nā ’oe i tā’u ra mā’a ; ’e ’ua ’ite ho’i au ē, e riro ’oe ’ei ha’amaita’ira’a nō’u ’e nō tō’u ra ’utuāfare ho’i.

21 ’E i muri a’era, ’ua fāri’i mai ra taua ta’ata ra iāna i roto i tōna ra ’utuāfare ; ’e ’o Amuleka te i’oa o taua ta’ata ra ; ’e ’ua hōpoi mai ra ’oia i te faraoa e te ’īna’i ’e ’ua tu’u mai ra i mua ia Alama.

22 ’E i muri a’era, ’ua ’amu ihora Alama i te faraoa ’e ’ua pa’ia a’era, ’e ’ua ha’amaita’i ihora ’oia ia Amuleka ’e tōna ’utuāfare, ’e ’ua ha’amaita’i ato’a atu ra ’oia i te Atua.

23 ’E i muri iho i tōna ’amura’a ’e i te pa’iara’a, ’ua nā ’ō atu ra ’oia ia Amuleka : ’O vau nei ’o Alama te tahu’a rahi i ni’a i te ’ēkālesia a te Atua ē ’ati noa a’e te fenua nei.

24 ’E inaha, ’ua pi’ihia vau ’ia a’o atu i te parau a te Atua i rotopū i teie nei feiā, mai te au i te vārua nō te heheura’a ’e te tohu ; i pārahi na vau i teie nei fenua ’e ’aita rātou i fāri’i mai iā’u, ’ua tīahi rā rātou iā’u i rāpae ’e ’ua fātata vau i te huritua i teie nei fenua ē a muri noa atu.

25 Inaha rā, ’ua fa’auehia mai au ’ia ho’i fa’ahou mai ’e ’ia tohu i teie nei feiā ; ’oia ïa, ’ia fa’a’ite pāpū atu ia rātou i tā rātou mau ’ohipa ’ī’ino.

26 ’E i teienei, e Amuleka, nō te mea ’ua fa’a’amu mai ’oe iā’u ’e ’ua fāri’i mai ho’i iā’u, e ha’amaita’ihia ’oe ; i po’ia na ho’i au nō te mea i ha’apae nā vau i te mā’a e rave rahi mahana.

27 ’E ’ua pārahi ihora Alama i pīha’i iho ia Amuleka e rave rahi mahana hou ’oia i a’o atu ai i te mau ta’ata.

28 ’E i muri a’era, ’ua tupu rahi ihora te mau ’ohipa ’ī’ino a te mau ta’ata.

29 ’E ’ua tae mai ra te parau ia Alama, nā ’ō mai ra : ’A haere na ’oe ; ’e ’a parau ato’a atu ho’i i tō’u tāvini ra ia Amuleka, ’a haere atu ’e ’a tohu atu i teie nei feiā, i te nā-’ō-ra’a atu ē—’A tātarahapa ’outou, tē nā reira mai ra te Fatu, ’e ’ia ’ore ’outou ’ia tātarahapa, e tāho’ohia ïa teie nei feiā i tō’u ra riri ; ’oia ïa, e ’ore roa vau e fa’afāriu ’ē atu i tō’u ra riri rahi.

30 ’E ’ua haere atu ra Alama ’e Amuleka ato’a i rotopū i te mau ta’ata, ’e ’ua fa’a’ite atu ra i te mau parau a te Atua ia rātou ; ’e ’ua ’ī roa rāua i te Vārua Maita’i.

31 ’E ’ua hōro’ahia mai te mana ia rāua, ’e nō reira ’aita roa i ti’a i te hō’ē noa atu ’ia tāpe’a ia rāua i roto i te mau vāhi tāpe’ara’a i raro i te fenua ; ’e ’aita roa ho’i i ti’a i te ta’ata ’ia taparahi ia rāua ; ’āre’a rā ’aita rāua i fa’a’ohipa i tō rāua mana e tae roa atu i te taime ’ua ru’uru’uhia rāua i te mau taura ’e ’ua hurihia i roto i te vāhi tāpe’ara’a. I teienei, ’ua nā-reira-hia ’ia ti’a i te Fatu ’ia fa’a’ite atu i tōna ra mana nā roto ia rāua.

32 ’E i muri a’era, ’ua haere atu ra rāua ’e ’ua a’o atu ra ’e ’ua tohu atu ra ho’i i te mau ta’ata, mai te au i te vārua e te mana tā te Fatu i hōro’a mai ia rāua ra.