“Faaopoopoga A: E Faapefea Ona Molimau Mai le Agaga ia te A’u E Moni le Tusi a Mamona?” Sau, Mulimuli Mai ia te Au—Mo Tagata Taitoatasi ma Aiga: Tusi a Mamona 2020 (2020)

“Faaopoopoga A,” Sau, Mulimuli Mai ia te Au—Mo Tagata Taitoatasi ma Aiga: 2020

Faaopoopoga A

E Faapefea Ona Molimau Mai le Agaga ia te A’u E Moni le Tusi a Mamona?

Atonu ua e faalogo i le folafolaga a Moronae ia i latou uma o e faitau i le Tusi a Mamona: “Afai tou ole atu ma le loto faamaoni, ma le manatu moni i ai, ma le faatuatua ia Keriso, o le a ia faaali mai le moni o ia mea ia te outou, i le mana o le Agaga Paia” (Moronae 10:4). Ae o le a le uiga o le ia iloa le moni “e ala i le mana o le Agaga Paia”? E mafai faapefea ona e iloa le taimi e talanoa atu ai le Agaga Paia ia te oe?

Atonu e aoga le manatua, e talanoa mai le Agaga Paia ia i tatou i auala e matuai ese lava mai auala ua tatou masani ai ona talanoa le tasi i le isi. Ae e finagalo lou Tama Faalelagi e fesoasoani ia e aoao ia iloa le Agaga. Ua ia tuuina mai ia te oe le Tusi a Mamona, lea o loo faamatala ai e nisi o auauna faamaoni o latou aafiaga ma le siufofoga o le Alii.

Mo se faataitaiga, sa ta’u atu e Nifae i ona uso, na fetalai mai le Alii ia i latou “i se leo filemu itiiti” e ui e le o se leo e mafai ona latou faalogoina i o latou taliga. O le mea moni na fai mai Nifae, o ona uso sa “te’a atu” ma le toe “lagona ana fetalaiga” (1 Nifae 17:45, ua faaopoopo le faatusilima). Sa faamatala e Enosa le tali i ana tatalo o “le siufofoga o le Alii” na sau “i [lona] mafaufau” (Enosa 1:10). Ma mafaufau i upu nei ua faamatalaina ai le siufofoga lea na sau mai le lagi ina ua faaali mai le Faaola toetu i le nuu o Nuumau: “sa le o se leo saua, pe o se leo sa leotele, e ui i lea, … sa ati lava i o latou agaga, ma sa mu ai o latou loto” (3 Nifae 11:3).

Atonu na i ai ni ou aafiaga e tai faapenei, pe atonu na ese foi ou aafiaga. E fesootai mai le Agaga Paia i ni auala eseese, ma e eseese auala e mafai ona o’o mai ai faaaliga ia i tatou taitoatasi. Ma a i ai le Agaga i o tatou olaga, o le a tatou vaaia Ona aafiaga i o tatou luga i ni auala se tele. Sa saunoa le Aposetolo o Paulo e faatatau “i le fua o le Agaga”—o lagona o le “alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le le gaoia,” faatasi ai ma le tele o isi mea (Kalatia 5:22–23).

O nisi nei o aoaoga ma faataitaiga mai le Tusi a Mamona e uiga i le Agaga Paia. A o e faitau i ai, atonu e te iloa ai, na talanoa atu lava le Agaga Paia ia te oe e sili atu nai lo o lou iloa, e molimau atu ia te oe e moni lava o le Tusi a Mamona o le afioga a le Atua.

Agaga Faafetai ma le Olioli

E amatalia le Tusi a Mamona i le vaai a le perofeta o Liae i se faaaliga vaaia ofoofogia. I le faaaliga vaaia lenei sa tuuina atu ai ia te ia se tusi ma valaaulia [o ia] e faitau. Fai mai le faamaumauga, “Sa oo ina ua faitau o ia, sa tumu o ia i le Agaga o le Alii.” O lenei aafiaga na taitai atu ai Liae e vivii i le Atua mo Lona “mana, ma [lona] agalelei, ma [lona] alofa mutimutivale,” ma “sa olioli [le] agaga [o Liae], ma sa tumu lona loto atoa” (1 Nifae 1:12, 14–15).

Pe na e mauaina se aafiaga tai faapena? Pe na faatumuina ea e le faitauina o le Tusi a Mamona lou loto i le agaga faafetai mo le agalelei ma le alofa mutimutivale o le Atua? Na i ai se taimi na faaosofia ai e ni fuaitau i le Tusi a Mamona lou loto ia olioli? O nei lagona o faatosinaga ia a le Agaga, o loo molimau atu ia te oe o upu o loo e faitauina e mai le Atua ma aoao mai ai Ana upumoni.

O Se Loto ua Suia

Ina ua uma ona talai atu se lauga mataina e uiga i le Togiola a Iesu Keriso (tagai Mosaea 2–4), sa manao le Tupu o Peniamina e fia iloa pe “talitonu lona nuu i upu sa ia tautala atu ai ia i latou.” Sa latou tali mai sa latou talitonu i lana savali, Aisea? “Ona o le Agaga o le Alii Mamana Aoao, lea ua ia faia se liuga tele i totonu o i matou, po o i totonu o o matou loto, ua le toe i ai so matou manao e fai mea leaga, ae ia faia mea lelei e le aunoa” (Mosaea 5:1–2).

Atonu na e maitauina se mea e tai faapena i lou loto a o e faitauina le Tusi a Mamona. Mo se faataitaiga, atonu na e lagonaina le musuia ia avea ma se tagata lelei atu, ia liliu ese mai le agasala, pe ia faia se mea agalelei mo se tasi. O le molimau faaleagaga lea o loo e sailia e faapea, o le tusi ua musuiaina e le Atua. Aua e pei ona aoao mai Mamona, “O mea uma ua valaau mai ma faatosina mai ia faia mea lelei, ma alofa i le Atua, ma auauna atu ia te ia,ua musuia e le Atua” (Moronae 7:13; tagai foi 2 Nifae 33:4, 10; Alema 19:33; Eteru 4:11–12).

O Se Mafaufau ua Faamalamalamaina

Ina ua manao Alema e fesoasoani ia sa Sorama ia “tofotofo i [ana] upu” ma iloa mo i latou lava pe moni lana molimau, sa ia faatusaina le afioga a le Atua i se fatu: “Afai e te tuu ane se avanoa, e mafai ona toto ai o se fatu i lou loto” sa ia fai mai ai, “o le a amata ona malena ae i totonu o lou fatafata; ma pe a e lagona ia faalogona o le malena ae, o le a amata ona e fai ifo ia te oe lava—Ua tatau ona lelei lenei fatu, pe ua lelei le afioga, ona ua amata ona faalauteleina ai lo’u agaga; ioe, ua amata ona faamalamalama ai lo’u malamalamaaga, ioe, ua amata ona suamalie ia te au” (Alema 32:27–28).

E te “tuu ane se avanoa” i lou loto mo upu o le Tusi a Mamona pe a e faatagaina i latou e faatosinaina lou olaga ma taiala au filifiliga. Ma o le a faapefea ona “faalauteleina ai [lou] loto” ma “faamalamalama ai [lou] malamalamaaga”? Atonu e te lagonaina ua faapea ona e malosi atu faaleagaga. Atonu e te lagonaina le alofa faateleina ma malamalama i isi. Atonu foi e te matauina ua e malamalama lelei atu i mea, ae maise lava i mea faaleagaga—e toetoe lava faapei ua susulu atu se malamalama i lou mafaufau. Ma atonu e te ioeina o aoaoga faavae ua aoaoina i le Tusi a Mamona e “suamalie.” O lagona faapena e mafai ona fesoasoani e te malamalama ai ua e maua moni lava se molimau faaleagaga o le upumoni, e pei ona tautino mai e Alema: “O lea la, pe ua le moni ea lenei mea? Ou te fai atu ia te outou, Ioe, aua o le malamalama lea; ma o soo se mea ua malamalama, ua lelei, aua ua iloatino, o lea e tatau ona e iloa ai ua lelei” (Alema 32:35).

E Te Le Tau Mafaufau

O nisi nei o auala e fesootai mai ai le Agaga. E tele lava isi [auala]. Ia vaavaai pea mo ni avanoa e faalogologo ai i le siufofoga o le Agaga, ma o le a e maua Lana molimau faifaipea, ma mautinoa i le moni o le Tusi a Mamona.

Ua folafola mai e Peresitene Russell M. Nelson: E te le tau mafaufau po o le a le mea e moni. E te le tau mafaufau po o ai e mafai ona e faatuatuaina ma le saogalemu. E ala mai i faaaliga faaletagata lava ia, e mafai ai ona e mauaina lau oe lava ia molimau o le Tusi a Mamona o le afioga a le Atua, o Iosefa Samita o se perofeta, ma o le Ekalesia lenei a le Alii. Po o a lava tala po o mea e fai e isi, e leai se tasi e mafai ona aveesea se molimau na fanau a’e i lou loto ma le mafaufau e uiga i le mea e moni” (“Faaaliga mo le Ekalesia, Faaaliga mo o Tatou Olaga,” Ensign po o le Liahona, Me 2018, 95).