Mateo 1; Lucas 1

Si Mateo usa ka Judeo nga publikano o maniningil og buhis, nga gitawag ni Jesus nga usa sa Iyang mga Apostoles (tan-awa sa Mateo 10:3; tan-awa usab sa Giya ngadto sa mga Kasulatan, “Publikano”). Misulat si Mateo sa iyang Ebanghelyo alang sa iyang isig ka Judeo; busa, mipili siya sa paghatag og gibug-aton sa mga panagna sa Daang Tugon bahin sa Mesiyas nga natuman pinaagi sa kinabuhi ug pangalagad ni Jesus.

Si Lucas usa ka hentil (dili Judeo) nga doktor nga mibiyahe uban ni Apostol Pablo. Gisulat niya ang iyang Ebanghelyo human sa kamatayon sa Manluluwas alang lang sa mga dili Judeo nga magbabasa. Mipamatuod siya ni Jesukristo isip Manluluwas sa mga Hentil ug sa mga Judeo. Girekord niya ang mga istorya sa personal nga mga saksi sa mga panghitabo sa kinabuhi sa Manluluwas, ug giapil niya ang mga istorya nga naglakip sa kababayen-an kon itandi sa ubang mga Ebanghelyo.

Tan-awa usab sa Giya ngadto sa mga Kasulatan, “Mga Ebanghelyo,” “Mateo,” “Lucas.”

Si Presidente Russell M. Nelson mipasabut nga ang Pag-ula ni Jesukristo “nagkinahanglan og personal nga sakripisyo sa usa ka imortal nga binuhat nga dili ubos sa kamatayon. Gani Siya kinahanglang mamatay ug mopabangon pag-usab sa Iyang kaugalingong lawas. Ang Manluluwas mao lamang ang bugtong tawo nga makatuman niini. Gikan sa Iyang inahan Siya nakapanunod sa gahum nga mamatay. Gikan sa Iyang Amahan Siya nakabaton og gahum batok sa kamatayon” (“Constancy amid Change,” Ensign, Nob. 1993, 34).

Alang sa bisan unsa nga mga rason, ang tayming sa Dios gipahaum nga ang gitinguha nga panalangin ni Elisabet ug Zacarias nga makabaton og anak, dugay nga miabut kay sa ilang gidahum. Kon mamatikdan nimo ang imong kaugalingon nga naghulat og panalangin, o kon ingon og ang Dios wala maminaw sa imong mga pag-ampo, ang istorya ni Elisabet ug Zacarias magsilbi nga pahinumdom nga wala Siya makalimot kanimo. Siya adunay plano alang nimo, ug tumanon Niya kanunay ang Iyang mga saad ngadto sa Iyang matarung nga mga Santos. Sama sa gisaad ni Elder Jeffrey R. Holland, “Ang uban nga mga panalangin moabut dayon, ang uban ulahing moabut, ug ang uban dili moabut hangtud sa langit; apan niadtong kinsa modawat sa ebanghelyo ni Jesukristo, moabut kini” (“An High Priest of Good Things to Come,” Ensign, Nob. 1999, 38). Giunsa nila ni Zacarias ug Elisabet pagpabilin nga matinud-anon? (tan-awa sa Lucas 1:5–25, 57–80). Naghulat ba ikaw og panalangin? Unsay imong gibati nga ang Ginoo nagpaabut kanimo samtang ikaw naghulat?

Unsa ang ubang mga mensahe nga gihatag sa Ginoo kanimo niini nga istorya?

Imahe

Sila si Elisabet ug Zacarias uban sa batang masuso nga si Juan

Sama ni Maria, usahay atong makita nga ang mga plano sa Dios alang sa atong kinabuhi lahi sa unsay atong giplano. Unsay imong nakat-unan gikan ni Maria bahin sa pagdawat sa kabubut-on sa Dios? Sa mosunod nga mga tsart, isulat ang mga pamahayag gikan sa anghel ug ni Maria (tan-awa sa Lucas 1:26–38), uban sa mga mensahe nga imong makita sa ilang mga pamahayag:

Samtang magbasa ka sa matarung nga ehemplo ni Jose sa Mateo 1:18–25, unsay imong makat-unan bahin sa pagdawat sa kabubut-on sa Dios? Unsay imong makat-unan gikan sa mga kasinatian ni Zacarias ug Elisabet? (tan-awa sa Lucas 1).

Tan-awa usab sa Mosiah 3:19; Lucas 22:42; Helaman 10:4–5; Giya ngadto sa mga Kasulatan, “Gabriel.”

Ang mga pulong ni Maria sa Lucas 1:46–55 nagtagna sa mga aspeto sa misyon sa Manluluwas. Unsay imong nakat-unan bahin ni Jesukristo gikan sa mga pamahayag ni Maria? Unsa ang dugang nga mga panabut ang imong naangkon bahin sa mga panalangin nga gitanyag sa Manluluwas pinaagi sa pagtandi niini nga mga bersikulo uban sa mga pulong ni Ana sa 1 Samuel 2:1–10 ug uban sa mga Kabulahanan ni Jesus sa Mateo 5:4–12? Unsa ang gitudlo sa Espiritu kanimo samtang mamalandong ka niini nga mga panabut?

Samtang ang imong pamilya magbasa sa genealogy ni Jesus, mahimo nimong ipasabut nga kini mosubay sa Iyang harianong kaliwatan pinaagi ni Jose balik ngadto ni Haring David. Kini nga kaliwatan importante tungod kay gipanagna kini nga ang Mesiyas magagikan sa kaliwatan ni David (tan-awa sa Jeremias 23:5–6). Tingali usa kini ka maayong oportunidad sa paghisgot sa imong kaugalingong family history ug mopakigbahin og pipila ka mga istorya bahin sa imong mga katigulangan. Sa unsa nga paagi nga ang pagkahibalo sa imong family history makapanalangin sa imong pamilya?

Unsa kaha ang gikahadlokan sa mga tawo niini nga mga bersikulo? Unsa ang hinungdan nga mobati kita og kahadlok? Sa unsa nga paagi kaha ang Dios moingon nato “ayaw kalisang”?

Aron matabangan ang imong pamilya nga mopalig-on sa pagtuo nga “kay sa Dios walay butang nga dili mahimo,” masiksik ninyo ang Lucas 1 ug mangita sa mga butang nga gibuhat sa Dios nga maisip nga imposible. Unsa ang ubang mga istorya nga ilang mapaambit—gikan sa mga kasulatan o sa ilang kaugalingong mga kinabuhi—diin ang Dios mibuhat og imposible nga mga butang? Ang pagsiksik sa Libro sa Hulagway sa Ebanghelyo makatabang nila sa paghunahuna sa mga ideya.