Mataio 1; Luka 1

O Mataio o se telona Iutaia, po o se ao lafoga, lea sa valaauina e Iesu e avea ma se tasi o Ana Aposetolo (tagai Mataio 10:3; tagai foi Bible Dictionary, “Publicans”). Sa tusia faapitoa e Mataio lana Evagelia i tagata Iutaia; o le mea lea, sa ia filifili ai e faamamafa ia valoaga o le Feagaiga Tuai e uiga i le Mesia ia ua faataunuuina e ala i le soifuaga ma le galuega a Iesu.

O Luka o se fomai o nuuese (e le o se Iutaia) o le sa malaga faatasi ma le Aposetolo o Paulo. Sa ia tusia lana Evagelia ina ua mavae le maliu o le Faaola e faamuamua i se aofia e le o ni Iutaia. Sa ia molimau atu ia Iesu Keriso o le Faaola o Nuuese ma Iutaia. Sa ia tusifaamaumauina tala o molimautino o mea na tutupu i le soifuaga o le Faaola, ma sa ia tuu i ai ma nisi tala e aofia ai fafine pe a faatusatusa i isi Evagelia.

Tagai foi Bible Dictionary, “Gospels,” “Mataio” “Luka.”

Sa faamalamalama mai e Peresitene Russell M. Nelson e faapea o le Togiola a Iesu Keriso, “sa manaomia ai se taulaga patino a se tagata tino ola pea e le mafai ona oti. Peitai e tatau ona Ia maliu ma toe faatuina mai Lona lava tino. Sa na’o le Faaola lava sa mafai ona ia faia lenei mea. Sa ia maua mai Lona tina faaletino le mana e maliu ai. Ae sa Ia maua mai Lona Tama le mana e manumalo ai i le oti” (“O Le Tumau i le Lotolotoi o Suiga,” Liahona, Nov. 1994, 39).

Pe o le a lava le mafuaaga, o le taimi a le Atua o lona uiga o le faamanuiaga na manaomia e Elisapeta ma Sakaria, o le maua o se atalii, na umi lava se taimi faatoa maua nai lo le mea sa la faamoemoeina. Afai e iai se taimi e te iloa ua tatau ona e faatali mo se faamanuiaga, pe foliga mai foi e le o faafofoga mai le Atua i au tatalo, e mafai ona avea le tala ia Elisapeta ma Sakaria ma se faamanatu e Na te le’i faagaloina oe. E i ai sana fuafuaga mo oe, ma Na te tausia lava e le aunoa Ana folafolaga i Ana Au Paia amiotonu. E pei ona sa folafola mai Elder Jeffrey R. Holland, “O nisi faamanuiaga e vave oo mai, o ni isi e tuai, a o nisi e le oo mai lava seia oo i le lagi, ae mo i latou o e taliaina le talalelei a Iesu Keriso, e oo mai” (“An High Priest of Good Things to Come,” Ensign, Nov. 1999, 38). Na faapefea ona tumau le faamaoni o Sakaria ma Elisapeta? (tagai Luka 1:5–25, 57–80). Pe ua i ai se taimi ua e faatalitali ai mo se faamanuiaga? O le a sou lagona i le mea ua faamoemoe mai le Alii ia te oe a o e faatalitali?

O a isi savali atonu o i ai i le Alii mo oe i lenei tala?

Ata

O Elisapeta ma Sakaria ma Ioane le tamameamea

E pei o Maria, o nisi taimi tatou te iloa ai e fai si ese o fuafuaga a le Atua mo o tatou olaga mai mea sa tatou fuafuaina. O le a se mea ua e aoaoina mai ia Maria e uiga i le taliaina o le finagalo o le Atua? I siata ia, tusi ai faamatalaga mai le agelu ma Maria (tagai Luka 1:26–38), faatasi ai ma savali e te mauaina mai a la faamatalaga:

A o e faitau e uiga i le faataitaiga amiotonu a Iosefa i le Mataio 1:18--25, o le a se mea ua e aoao mai ai e uiga i le taliaina o le finagalo o le Atua? O le a se mea e mafai ona e aoao mai aafiaga o Sakaria ma Elisapeta? (tagai Luka 1).

Tagai foi Mosaea 3:19; Luka 22:42; Helamana 10:4–5; Bible Dictionary, “Gabriel.”

O upu a Maria i le Luka 1:46–55 ua muai ta’u mai ai itu o le misiona a le Faaola. O le a se mea ua e aoaoina mai e uiga ia Iesu Keriso mai faamatalaga a Maria? O a nisi malamalamaaga ua e maua mai e uiga i faamanuiaga o loo ofo mai e le Faaola pe a faatusatusa nei fuaiupu i upu a Hana i le 1 Samuelu 2:1–10 Faaamuia a Iesu o i le Mataio 5:4–12? O le a se mea o aoao atu ia te oe e le Agaga a o e manatunatu loloto i nei malamalamaaga?

A o faitau e lou aiga le gafa o Iesu, atonu e te faamatalaina atu faapea e tosi atu Lona gafa faatupu e ui atu ia Iosefa ma tau atu ai i tua i le Tupu o Tavita. O lea gafa e taua aua sa valoia faapea o le a afio mai le Mesia i le gafa o Tavita (tagai Ieremia 23:5–6). E mafai ona avea lea ma avanoa lelei e talanoaina ai lou lava talafaasolopito o lou aiga ma faasoa mai ni nai tala e uiga i ou augatuaa. E faamanuiaina faapefea lou aiga i le iloaina o le talafaasolopito o lou aiga?

Aise na faamata sa fefefe ai tagata o i nei fuaiupu? O a ni faapogai o lo tatou fefefe? Na mafai faapefea ona poloai mai le Atua ia i tatou e “aua le matatau”?

Ina ia fesoasoani i lou aiga e fausia le faatuatua faapea “e leai se mea e tasi e le mafaia e le Atua, e mafai ona outou sailiili faatasi i le Luke 1 ma sue mea na faia e le Atua e ono manatu i ai e le mafai. O a isi tala e mafai ona latou faasoa maia---mai tusitusiga paia po o o latou lava olaga---ia na faia ai e le Atua ni mea na matua foliga mai e le mafai? O le sailiili i le Tusi Ata o le Talalelei e mafai ona fesoasoani ai ia te i latou mo manatu.