“Maji 11-17. Maciu 10-12; Marika 2; Luke 7; 11: ‘Sa Talai Ira na Lewe Tinikarua Oqo Ko Jisu’’ Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)
“Maji 11-17. Maciu 10-12; Marika 2; Luke 7;11,” Lako Mai, Mo Muri Au—Me Baleti Ira na Tamata Yadua kei na Matavuvale: 2019
Maji 11–17
Maciu 10–12; Marika 2; Luke 7; 11
“Sa Talai Ira na Lewe Tinikarua Oqo Ko Jisu”
Ni o wilika na Maciu 10-12; Marika 2; kei na Luke 7; 11, mo toqa toka na veivakanananu o ciqoma mai na Yalo Tabu. Navuca mo vakasamataka vakatitobu ka vola toka.
Vola na Nomu Veivakasama
Nai tukutuku ni veivakabulai mana nei Jisu sa dewa totolo sara. Era vakamuri Koya na lewe vuqa, ena vakanuinui me ra na vakabulai mai na nodra tauvimate. Ia, ni sa raici ira yani na lewe vuqa na iVakabula, e sa raica e levu cake mai na nodra malumalumu vakayago. E sa tuburi Koya na loloma, ni sa raica “na sipi ka sega na nodra ivakatawa” (Maciu 9:36). “E dina sa vakalewe na yabaki,” e raica o Koya, “a ra sa lewe lailai ga na ivakatawa ni were” (Maciu 9:37). Sa kacivi ira na iApositolo lewe tinikarua, “sa solia vei ira na kaukauwa,” ka qai talai ira me ra veivakavulici ka veiqaravi vei ira na “sipi ni mataqali nei Isireli era sa yali” (Maciu 10:1, 6). Nikua e sa gadrevi talega mera lewe levu cake na ivakatawa ni were me veiqaravi vei ira na luvena na Tamada Vakalomalagi. Era se lewe tinikarua tikoga na iApositolo, ia era sa levu cake na tisaipeli i Jisu Karisito ni vakatauvatani ena veigauna e liu—o ira na tamata era rawa ni cauraka ki vuravura taucoko ni sa, “Voleka mai na matanitu vakalomalagi” (Maciu 10:7).
Vakasama eso ni Vuli iVolanikalou Yadua
E solia na kaukauwa vei ira na Nona italai na Turaga me ra vakayacora na Nona cakacaka.
Na idusidusi e solia o Jisu ena Maciu 10 e baleti iratou Nona iApositolo, ia e tiko kece na noda itavi ena cakacaka ni Turaga. Na kaukauwa cava e solia vei ira Nona iApositolo o Karisito me vukei ira me ra rawata na nodra ilesilesi? O na curuma rawa vakacava na nona kaukauwa na cakacaka ko sa kacivi kina me ra cakava? (raica na 2 Korinica 6:1–10; VV 121: 34–46).
Era vakayacora na nona cakacaka na Turaga ena gauna oqo o ira na iApositolo Lewe Tinikarua.
Ni o wilika na itavi e solia o Karisito vei ira Nona iApositolo, ena rawa beka ni votu mai nomu vakanananu na cakacaka e vinakata na Turaga mo cakava. E dua na ituvatuva vaka na kena oqo ena rawa ni vukei iko mo tuva vakamatau na nomu vakasama eso:
|
Veivakasama au ciqoma | |
|---|---|
|
E solia na kaukauwa vei ira Nona tisaipeli nai Vakabula. | Veivakasama au ciqoma Ena solia vei au na Kalou na kaukauwa au gadreva meu cakacaka kina. |
Veivakasama au ciqoma |
Raica talega na Yavu ni Vakabauta 1:6; Bible Dictionary, “Apostles”; “Jesus Calls Twelve Apostles to Preach and Bless Others” (vidio ena, LDS.org).
Ni’u sa veiqaravi ena cakacaka ni Turaga, ena vakauqeti au o Koya ena veika me’u tukuna.
E sa raica taumada na Turaga ni ra na vakacacani ka tarogi na Nona tisaipeli me baleta na nodra vakabauta—ena via tautauvata kei na veika era sotava o ira na tisaipeli ena gauna oqo. Ia, e yalataka vei ira na Nona tisaipeli ni ra na kila mai na Yalo na veika me ra tukuna. O sa sotava oti beka na kena sa yaco ena nomu bula na yalayala oqo, de dua ena gauna o wasea kina na nomu ivakadinadina, solia e dua na veivakalougatataki, se dua nomudrau veitalanoa kei na dua? Navuca mo wasea na veika o sotava kei ira na nomu daulomani se toqa ena ivolaniveisiga.
Raica talega na Luke 2:11–22; Vunau kei na Veiyalayalati 84:85.
Na cava nai balebale ni vosa nei Jisu ni tukuna “Au sa sega ni lako mai me’u kauta mai na veivinakati, ai seleiwau ga”?
E vakatavulica o Elder D. Todd Christofferson: “Au kila deivaki eso vei kemuni o ni sa cakitaki ka biliraki mai vei tamamuni, tinamuni, tacimuni tagane se yalewa ena gauna o ni ciqoma kina na kosipeli i Jisu Karisito ka qai veiyalayalati kei Koya. Ena dua se so tale na sala, e sa gadrevi kina mo solibulataka na veiwekani dredre baleta na nomu loloma cecere vei Karisito, ka turu kina vakalevu na wai ni matamu. E sega ni vakalailaitaki tu na nomu loloma, o tudei tu ena ruku ni kauveilatai, ka vakaraitaka na nomu sega ni maduataka na Luveni Kalou” (Finding Your Life,” Ensign, Mar. 2016, 28).
Na lomasoli oqo mo vakayalia na isema vakaveiwekani e dredre mo rawa ni muria na iVakabula e salavata mai kei na yalayala “ia o koya sa vakayalia na nona bula ena vukuqu ena maroroya” (Maciu 10:39).
Ena solia vei au na vakacegu o Jisu Karisito niu vakararavi Vua kei na Nona Veisorovaki.
Eda vakaicolacola kece—eso e yaco baleta na noda ivalavala ca kei na cala, eso e yaco baleta na nodra digidigi cala eso tale, ka eso e sega ni cala nei dua ia, e tiki ga ni bula e vuravura. Veitalia na inaki cava ga ni noda dredre, e vakatakekere vei keda o Jisu meda lako yani Vua me rawa ni vukei keda ena noda colata na nodai colacola ka kunea na vakacegu (raica talega na Mosaia 24). E vakatavulica o Elder David A. Bednar, “Ni da vakayacora na veiyalayalati tabu ka maroroya eda sa taqara na noda ivua vua na Turaga o Jisu Karisito” (Colata na Nodra iColacola ena Loloma,” Ensign se Liaona, Me 2014, 88). Ni tiko oqo ena nomu vakasama, vakasamataka vakatitobu na veitaro eso oqo me rawa ni da kila vinaka na vosa ni Vakabula mai na veitikina oqo: “E rawa vakacava meda vakataqara vei keda na Nona ivua ni da veiyalayalati kei na iVakabula?” “Na cava meu cakava meu lako kina vei Karisito?” se “Ena sala cava e rawarawa kina na nona ivua na iVakabula ka mamada na Nona icolacola?”
Na taro cava tale e votu mai vei iko ni o wiliwili tiko? Toqa toka ka vakasaqara na isau ni taro ena loma ni macawa ena ivolanikalou kei na nodra vosa na parofita. Ena rawa ni o kunea eso na nomu saunitaro ena itukutuku nei Elder David A. Bednar na itukutuku era tiko e cake.
Ni sa vosoti na noqu ivalavala ca, e vakatitobutaki na noqu lomana nai Vakabula.
O raici iko beka ena itukutuku ena veitikina oqo me baleta na nona sikovi Saimoni na Farisi na iVakabula? O dau vakai Simoni beka? Na cava e rawa ni o cakava mo vakamuria nai vakaraitaki ni marama ena vakaraitaka na yalomalumalumu kei na loloma vei Jisu Karisito? Ena gauna cava o sa bau sotava kina na malumu kei na loloma veivueti e vakaraitaki na iVakabula vua na marama oqo? Na cava o sa vulica mai na veitikina oqo me baleta na kena rawa i vaqaqacotaka na noda loloma vua na noda iVakabula na veivosoti?
Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:
Ni da vakananuma na veitukutuku ni koniferedi raraba se qai oti ga oqo, sa vakacava tiko beka na noda ciqoma ka muria vakavuvale na nodra ivakasala na iApositolo ni gauna oqo? E vakavolekataki keda vakacava vei Jisu Karisito na noda talairawarawa ki na nodra ivakasala?
Ena rawa ni o raitayaloyalotaka vakavuvale na ivakavuvuli ni Vakabula ena veitikina oqo ena nodra dreketa yadudua e dua na ka bibi, me ra cakava ga vakataki ira eliu ka qai muri na veivuke. Na cava eso na icolacola eda dreketa tu? Na cava na kena ibalebale me da vakataqara vei keda na ivua i Karisito? Na iyaloyalo e salavata tiko mai na idusidusi oqo ena vukei iko mo vakamacalataka na ivua.
Ena rawa vakacava meda “caka vinaka” ena Siga ni Vakacecegu? (Maciu 12:12). Na sala cava ena rawa ni vakabulai keda kina na iVakabula ena Siga ni Vakacecegu?
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakavinakataki ni Vuli Yadudua
Vakarogoca na Yalotabu. Ni o vuli tiko, yadrava matua na nomu vakasama kei na veika o vakila (raica na VV 8:2–3), ke sega madaga ni veisotari kei na veika o wilika tiko. Na veivakanananu oqori e rawa saraga ni veika e vinakata na Kalou mo kila ka cakava.
E tukuna na iVakabula, “Vakataqara vei kemudou na noqu ivua” (Maciu 11:29).
Katiladi kei na iMatai ni Valetabu, mai vei Dan Burr