“Epereli 29–Me 5. Joni 7–10: ‘Oi Au na iVakatawa Vinaka’” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)
“Epereli 29–Me 5. John 7–10,” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019
O Koya sa Sega na Nona iValavala Ca, mai vei Liz Lemon Swindle
29 ni Epereli–5 ni Me
Joni 7–10
“Oi Au na iVakatawa Vinaka”
Ni o wilika na Joni 7–10, ena rawa ni o ciqoma na vakanananu mai na Yalo Tabu me baleta na ivakavuvuli vakaivunau ena veiwase ni vola oqo. Na nomu vola na nomu vakanananu ena rawa ni vukei iko mo tuvatuva ka taka na veika mo cakava me baleta na ka oqori.
Vola na Nomu Veivakasama
E dina ga ni a lako mai o Jisu Karisito me “sa veivinakati rawa ko ira e vuravura: sa lomani ko ira na tamata” (Luke 2:14), e “ra sa veiletitaki koya na lewe vuqa” (Joni 7:43). O ira na tamata era vakadinadinataka na veika vata ga e yaco e duidui sara na veika era qai mai kila se ko cei ko Jisu. Eso era kaya ni, “a tamata vinaka o koya,” eso tale era kaya, “sa lawakitaki ira ga na tamata” (Joni 7:12). Ena gauna e vakabula kina e dua na tamata mataboko ena Siga ni Vakacecegu, eso era kaya, “Na tamata oqo e sega ni tamata ni Kalou, ni sa sega ni vakatabuya na siga ni vakacecegu,” eso tale era kaya “E cakava rawa vakaevei na cakacaka mana oqo e dua na tamata ivalavala ca?”” (Joni 9:16.). Ia, ena veilecayaki kece oqori, o ira na vakasaqara na dina era vakila na kaukauwa ena Nona vosa, ni “sa sega e dua na tamata sa vosa me vaka na tamata oqo” (Joni 7:46). Ni ra tarogi Jisu na Jiu me “tukuna vakamatata” kevaka o koya dina na Karisito, e vakaraitaka o Koya e dua na ivakavuvuli ena rawa ni vukei keda me veidutaitaka na veika dodonu mai na cala: “Sa rogoca na noqu vosa ko ira na noqu sipi,” “ia ka’u sa kilai ira ka ra sa muri au” (Joni 10:27).
Vakasama eso ni Vuli iVolanikalou Yadua
Ni’u bulataka na dina e vakatavulica o Jisu Karisito, e na yaco me’u kila ni dina.
Era kurabui na Jiu ni levu na ka e kila o Jisu ia e a sega ni vuli o Koya (raica na tikina 15)—oya mada, ena sala era kila o ira. Ni sauma o Jisu, e veivakatavulici o Koya na sala duidui eso me kilai kina na dina ka rawa ni kila na tamata kece, veitalia na ivakatagedegede ni vuli se ituvaki cava ga ni bula eda tiko kina. Ena Joni 7:14–17, e rawa vakacava mo kila ni vakavuvuli e vakatavulica o Jisu e dina? E sa vukei iko vakacava na iwalewale oqo ena kena vakatoroicaketaki na nomu ivakadinadina ni kosipeli?
Sa soli tu vei keda kece na loloma veivueti ni iVakabula.
Ni vosa tiko me baleta na nona dau veimaliwai na iVakabula kei na yalewa sa kune ni dautagane, e kaya o Elder Dale G. Renlund: “E dina sara, na iVakabula e sega duavata kei na dautagane. Ia a sega talega ni cudruva na yalewa o Koya. A vakayaloqaqataki koya me veisautaka nona bula. A vakauqeti me veisau ena vuku ni Nona yalololoma kei na loloma cecere. Na iVakadewa i Josefa Simici ena iVola Tabu e vakadinata na nona qai veisau vakatisaipeli: ‘Sa qai vakalagilagia na Kalou ena auwa vata oya na marama oqo, ka vakabauta na yacana’ [raica na Joni 8:11, vakamacala e ra c]” (“Na iVakatawa Vinaka,” Ensign se Liaona, Me 2017, 30).
O sa bau vakila e dua na gauna o vaka kina na marama oqo, nomu ciqoma na loloma veivueti ka sega ni veibeitaki mai vua na iVakabula. Ena gauna cava o vakakina na vunivola kei na Farisi, nomu veidusi kei na vakalelewa vei ira na tani ena gauna o sega ni savasava tiko kina? (raica na Joni 8:7). Na cava tale o rawa ni vulica ena veimaliwai ni iVakabula kei ira na vunivola kei na Farisi kei na yalewa dautagane? Na cava o vulica baleta na veivosoti ni iVakabula mai na veitikina oqo?
Na cava era vakacudrui kina na Jiu ni tukuna o Jisu, “Ni sa bera ko Eparaama, Sa Bula Koi Au”?
“Koi au” e vosa ka vakayagataka ko Jiova me vakaraitaki Koya vei Mosese, me vaka e volai ena Lako Yani 3:14. Ena gauna a kaya kina o Jisu, “Koi au,” E tukuni Koya ni sai Jiova, na Kalou ni Veiyalayalati Makawa. Era raica oqo na Jiu me vosavakacaca, ka ena lawa i Mosese, e kena itotogi me lauvirilaki ena vatu me yaco na mate.
Ena veibolebole eda sotava, e rawa ni vakaraitaki Koya mai na Kalou ena noda bula.
Baleta ni dau sau ni valavala ca na veika e sega ni vinaka, eda rawa ni dau raica eso na noda kalouca me isau ni caka cala. Ia, ena gauna eratou a nanuma kina na tisaiplei ni iVakabula ni a sucu mataboko e dua na turaga baleta nai valavala ca ni nona itubutubu, e vakadodonutaki ira ko Jisu. E rawa ni veisautaka vakacava na nomu rai na vosa ni iVakabula ena Joni 9:3 me baleta na nomu veibolebole kei na nodra na tani? Ni o wilika na Joni 9, vakananuma ena rawa vakacava me “vakatakilai ga na cakacaka [ni] Kalou” (Joni 9:3). E sa vakatakilai mai vakacava na cakacaka ni Kalou ni o sotava na nomu veibolebole?
E ka ni vuli dina meda raica na nodratou taro na tisaipeli ena Joni 9:2 e vakaraitaka ni ra vakabauta na bula taumada, e dua na ivakavuvuli ka yali ena vakabauta va-Karisito ena gau ni Vukitani Levu ia a vakalesui mai vua na Parofita o Josefa Simici (raica na VV 93:29; Mosese 4:1–4; Eparama 3:22–26).
Ocei na so “tani tale na sipi” e tukuna nai Vakabula ena Joni 10:16?
Ni a veisiko i Amerika nai Vakabula ni oti Nona Tucake tale, e vakamacalataka o Koya ocei o ira na so tani tale na sipi oya (raica na 3 Nifai 15:21–16:5).
Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:
O na vukea rawa vakacava nomu vuvale me kila vakavinaka na veika e vakavulica o Jisu ena Joni 7:24? E dua na sala sai koya mo dou lako i tuba ka vakaduka e dua na lewe ni vuvale. Na cava ena nanuma o ira na vulagi ni ra raica na lewe ni vuvale oqo ena kena ituvaki e tautuba? Tuva eso na ivakarau ni bula vinaka e tiko vua na lewe ni vuvale oqo e sega ni rawa ni laurai walega ena noda vakaraica koya (raica talega na 1 Samuela 16:7).
Ena sala cava so eda dau yaco kina meda bobula ni ivalavala ca? Na dina cava e vakatavulica o Jisu ka na rawa ni sereki keda?
E Vakabula tiko na Tamata Mataboko o Jisu, mai vei Carl Heinrich Bloch
Ena rawa vakacava mo vukea na nomu matavuvale ena kena raitayaloyalotaki nai talanoa ni vakabula tiko na tamata mataboko o Jisu ena Joni 9? E rawa ni dou vakatasuasuataka na italanoa se vakaraitaka na iyaloyalo na “Jesus Heals a Man Born Blind” (LDS.org). Tarova wasoma na italanoa me rawa ni wilika na lewe ni vuvale na tikina veisemati eso ena Joni 9. Sureti ira me ra vola na veilesoni era vulica ena italanoa oqo, me vaka, na cava e kena ibalebale meda sa saumaki vakaidina ki na kosipeli i Jisu Karisito.
Me okati ira na lewe ni vuvale ena vulici ni vosavakatautauvata ni Vakatawa Vinaka, kerea e dua vei ira me droinitaka e dua na iyaloyalo ni dua vei ira na ka oqo: e dua na daubutako, katuba, vakatawa ni sipi, dua na daucakacaka saumi, na olifa, kei na sipi. Sureti ira me ra wilika na Joni 10:1–18, 27–29, qai veitalanoataka vakavuvale na veika e vakatavulica na iVakabula me baleta na veika era droinitaka.
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakavinakataki ni Vuli Yadudua
Vakaraica na veivosa kei na malanivosa veivauqeti. Ni o wiliwili tiko, ena rawa ni kauta mai eso na vosa kei na malanivosa vei iko na Yalo ka na vakauqeti iko qai vakayaloqaqataki iko se e vakaga e volai me baleti iko. Navuca mo toqa toka eso na vosa kei na malanivosa e vakauqeti iko ena Joni 7–10.
Lost No More, mai vei Greg K. Olsen