“Jiune 3–9. Joni 13-17: ‘Dou Tiko ga Ena Noqu Loloma’” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)
“Jiune 3–9. Joni 13-17,” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019
Mo Vakananumi Au, mai vei Walter Rane
Jiune 3–9.
Joni 13–17
“Dou Tiko ga Ena Noqu Loloma”
Ni o wilika nai vakavuvuli ni Vakabula ena Joni 13–17, ena vukei iko na Yalo Tabu mo kunea nai tukutuku e baleti iko. Vola na veivakasama o ciqoma
Vola na Nomu Veivakasama
Eda vakatoka ena gauna oqo nai “Otioti ni Vakayakavi,” ia eda sega ni kila kevaka era a kidava vakataucoko na nona tisaipeli o Jisu, ena nodra mai soqoni vata ena Kana vata ni Lako Sivia, ni sa na iotioti ni nodra na kana vata kei na nodra iVakavuvuli ni se bera ni Nona mate. Ia o Jisu ni, “sa yaco mai na nona gauna” (Joni 13:1). Sa voleka me na sotava yani na yaluma e Kecesimani, na cakitaki kei na veivakuwai mai vei ira na Nona itokani voleka, kei na mate mosimosi ena kauveilatai. E dina ni sa votu mai na veika oqori vei Koya, e a vakanamata ga o Jisu vei ira na Nona tisaipeli ka sega ni vakaliuci Koya ga. E a savata ena yalomalumalumu na yavadra. E vakavulici ira ena loloma. E qai vakadeitaka vei ira o Koya, ena dua na vakasama, ni na sega ni biuta iratou ka me ratou na sega ni biuti Koya. Na tisaipeli ena gauna oya kei ira na gauna oqo era kune vakacegu ena Nona iyalayala: “Au na sega ni laivi kemudou mo dou luveniyali” (Joni 14:18). “Kevaka dou sa talairawarawa ki na noqu vunau, dou na tiko ga ena noqu loloma” (Joni 15:10).
Vakasama eso ni Vuli iVolanikalou Yadua
Au vakaraitaka na noqu loloma vei Jisu Karisito ena Noqu talairawarawa ki na Nona ivunau meu dau loloma.
Esa vakatavulica oti o Jisu ni vunau levu e rua e okati kina na loloma (raica na Maciu 22:34–40). Ni salavata tiko kei na iulutaga oqo, na loloma e dua na tiki levu ni ulutaga ni otioti ni Nona veivakaroti vei ira Nona iApositolo. Ni o wilika na Joni 13–15, ena rawa ni o toqa toka se makataka na vakayagataki yadua ni vosa na loloma.
Ena rawa beka ni o raica na vosa na ivunau e vakayagataki wasoma kei na vosa oqo na loloma ena veiwase oqo. Na cava e rawa ni o vulica mai na veiwekani ni loloma kei na ivunau ena ivakavuvli ni Vakabula? Na vosa cava tale eso o kunea ni vakayagataki wasoma tiko kei na vosa na loloma ena wase ni vola oqo? Ni yavutaki mai na veika o vulica, navuca mo vola e dua na vakalekaleka ni vakavuvuli ni Vakabula me baleta na loloma.
Raica talega na D. Todd Christofferson, Tiko Ga ena Noqu Loloma,” Ensign se Liaona, Nove. 2016, 48–51.
Na Yalo Tabu e vukei au me’u vakayacora na noqu inaki vakatisaipeli i Jisu Karisito.
E kila o Jisu Karisito ni sa na voleka me biuti iratou Nona tisaipeli, ka kila o Koya ni ratou na gadreva na veitokoni vakayalo ena gauna sa lako kina o Koya. Me vukei iratou me ratou kila na sala eratou na ciqoma kina na veitokoni oqo, e vakatavulici iratou me baleta na Yalo Tabu. Na cava e rawa ni o vulica me baleta na nona itavi na Yalo Tabu mai na nona vosa nai Vakabula ena veitikina oqo?
Na cava eratou gadreva kina na mataqali veivuke vakaoqo mai na Yalo Tabu? Esa vakayacora vakacava na itavi oqo na Yalo Tabu ena nomu bula? Ni tomani tiko na nomu vulica na Veiyalayalati Vou, vakasaqara eso na sala e vakalougatataki ira na tisaipeli i Jisu na Yalo Tabu. Ena duidui vakacava na nomu bula kevaka o sureta na Yalo Tabu me mai vakauqeti iko vakatitobu?
Raica talega na Mosaia 3:19; 5:1–3; 3 Nifai 27:20; Moronai 8:25–26; 10:5; Vunau kei na Veiyalayalati 11:12–14; Mosese 6:61; “Holy Ghost,” Ulutaga Vakosipeli, topics.lds.org.
Niu sa tu vei Karisito, au na vuataka na vua vinaka.
Na cava na ibalebale ni “tu vei [Karisito]”? (Joni 15:4). Na “vua” cava e vakaraitaka ni o sa tu vata kei na vaini, ka matataki Jisu Karisito?
E tu o Jisu Karisito ena vukudra na Nona tisaipeli.
Na vosa i Jisu e tiko ena Joni 17 e kilai me Masu ni Veivakarokorokotaki. Ena masu oqo, e masulaki ira na Nona iApositolo o Jisu kei ira “era na vakabauti [Koya] ena vuku ni nodra vosa” (Joni 17:20). E kena ibalebale ni masulaki iko tiko o Koya. Na cava e kerea vei Tamana ena vukumu kei ira kece era vakabauta?
Na masu oqo e vakavulica na dina titobu e tawamudu. Na dina cava o kunea ni o wilika tiko?
E rau dua vakacava o Jisu Karisito kei na Tamada Vakalomalagi?
Ena Nona masu ena Joni 17, e vakabibitaki na Nona duavata kei Tamata o Jisu, ia e sega ni kena ibalebale oqo ni o Koya kei Tamana e rau duavata ga na tamata. Ni a masu nai Vakabula ni ratou na dua bau “me vaka”—se ena sala vata ga e rau sa dua bau—o Koya kei Tamana (Joni 17:22), e sega ni tukuna tiko o Koya me ratou sa duavata ga na tamata. Ia, e Nona gagadre mai loma me ratou marautaka na duavata e tiko Vua kei Tamana—na duavata e taucoko ena inaki, lomada kei na vakanananu.
Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:
Na cava e sa vulica na noda vuvale mai na ivakaraitaki ni iVakabula ena veitikina oqo? Eda na muria vakacava na Nona ivakaraitaki?
Ena nomuni veivosakitaka na ivakavuvuli ni iVakabula me baleta na loloma, vakasamataki talega na vosa oqo mai vei Peresitedi Thomas S. Monson: “Ena vuravura nikua, e sega ni dua tale na vanua e gadrevi vakalevu cake kina na yavuvatu oya me vaka na vuvale. Ka sega talega ni dua na vanua vinaka cake me raica kina o vuravura na ivakaraitaki ni yavu oya mai na nodra vuvale ga na Yalododonu Edaidai era sa tura me uto ni nodra bula vakamatavuvale na loloma. … Na loloma sai koya nai saluwaki ni kosipeli, e cecere sara ena itovo ni bula ni yalo ni tamata” (“Me Vaka Ka’u Sa Lomani Kemudou.” Ensign se Liaona, Fepe. 2017, 4–5).
Ena rawa ni droinitaka na nomu vuvale se volavola ena pepa ate e dua na ka era taleitaka me baleta e dua tale. E rawa ni ra kabira wavoki e loma ni vale me vakananumi tiko kina meda vakaraitaka tiko na loloma.
Ena rawa ni lasa me wiliki na tikina oqo ena yasa ni dua na kau sala, vunikau, se e dua tale nai tei. E vukea vakacava na nomu vuvale me kila vakavinaka cake nai vakavuvuli ni Vakabula na itaviqaravi oqo?
E vakatavulica o Jisu, “Oi au na vaini, koi kemudou na tabaqu” (Joni 15:5).
Na cava na nomu nanuma e vakasalataki ira kina na Nona tisaipeli o Jisu Karisito me baleta na veivakacacani? Era vakacacani vakacava na tisaipeli i Karisito ena gauna oqo? Ena rawa ni vukei keda vakacava na veivakasalataki ni iVakabula ena veitikina oqo ena gauna eda sotava kina na veivakacacani?
E sa vakamalumalumutaki vuravura vakacava o Karisito? Sa nona Veisorovaki kauta mai vakacava vei keda na vakacegu kei na marau? (raica talega VV 68:6).
Ena rawa vakacava me ra duavata na noda vuvale me vaka erau sa duavata o Jisu Karisito kei na Tamada Vakalomalagi? Na cava na vuna e vinakata kina na Turaga meda duavata? (raica talega na VV 38:27).
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakatorocaketaki ni Noda Veivakavulici
Vakayagataka na katoni ni itukutuku e vakarogoci. Ni o vakavulica nai volanikalou ki na nomu vuvale, navuca mo rogoca nai volanikalou e katoni me vakarogoci, ena kune ena LDS.org se na Gospel Library app. Vakarogoca na Joni 13–17 ena rawa ni kaukauwa sara baleta na veitikina era tiko kina na vosa ni iVakabula.
Nai Vakavuvuli ka Dauveiqaravi, mai vei Del Parson