“9–15 ni Tiseba. Ai Vakatakila 1–11: ‘Na iUkuuku, kei na Kaukauwa, Vei Koya … na Lami ka Sega ni Mudu’” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)
“9–15 ni Tiseba. Ai Vakatakila 1–11,” Lako Mai, Mo Muri Au—Me Baleti Ira na Tamata Yadua kei na Matavuvale: 2019
Na Vakatawa ni Sipi Vinaka, mai vei Del Parson
9–15 ni Tiseba.
Ai Vakatakila 1-11.
“Na iUkuuku, kei na Kaukauwa, Vei Koya … na Lami ka Sega ni Mudu”
Vakasamataka eso na taro me baleta na veika o wilika mai na Ai Vakatakila. Ena rawa ni o vakasaqara na isaunitaro kina nomu taro se veitalanoataka kei ira na lewe ni matavuvale se kalasi ena Lotu.
Vola na Veika o Vakauqeti Kina
O sa bau kunea dredre mo vakamacalataka e dua na ka vakayalo kaukauwa o vakila? Na vosa ni veisiga ena rawa ni sega ni veiganiti me vakamacalataki kina na veika o vakila se veivakasama titobu vakayalo. O koya beka oqo e vakayagataka kina o Joni na ivakatakilakila momona kei na raitayaloyalo me vakamacalataka na cecere ni vakatakila. E rawa ni tukuna vakarawarawa ni a raici Jisu Karisito, ia me vukei keda meda kila na veika e sotava, e vakamacalataka na iVakabula ni vakayagataka na vosa me vakataka na: “Ka sa vaka na yameyame ni buka na matana,” “ka sa lako mai gusuna na iseleiwau gata ka batirua,” kei na “matana sa vaka na matanisiga ni sa cila vakaukauwa” (Ai Vakatakila 1:14–16). Ni o wilika na ivola ni Ai Vakatakila, tovolea mo raica na itukutuku a vinakata mo vulica ka vakila o Joni, kevaka madaga o sega ni kila nai balebale ni vakatakilakila kece. Na cava na vuna e vakatautauvatataki kina na vavakoso lewe ni Lotu kina itutu ni cina, na tevoro kina dua na gata levu, kei Jisu Karisito kina lami? Na kena icavacava, e sega sara ni gadrevi mo kila nai vakatakilakila kece sara ena Ai Vakatakila mo kila vinaka na kena iulutaga bibi, oka kina na kena iulutaga kilai levu: Era na qaqa o Jisu Karisito kei ira na dau vakamuri Koya mai na matanitu ni tamata kei Setani.
Vakasama eso ni Vuli iVolanikalou Yadua
iVakatakila
Ena rawa vakacava meu kila vinaka na ivola ni Ai Vakatakila?
Na ivola ni Ai Vakatakila ena rawa ni dredre na kila vinaka, ia, kua ni yalolailai. Ena rawa ni vakauqeti iko nai yalayala i Joni mo tovolea tikoga: “Sa kalougata ko ira era sa wilika, kei ira era rogoca ka kila na vosa ni parofisai oqo, ka muria na veika esa volai, ni sa roro voleka mai na gauna ni lesu mai ni Turaga” (iVakadewa i Josefa Simici, Ai Vakatakila 1:3 [tiko ena iKuri ni Vola ena Daku ni Vola Tabu (Bible Appendix), vakaikuritaki).
Na veitaro eso oqo ena rawa ni vakarautaka eso na rai titobu ni o vulica na Ai Vakatakila:
-
O cei o Joni? (Raica na 1 Nifai 14:18–27; Bible Dictionary, “John.”)
-
E tuvai tu vakacava na ivola oqo, ka e cava eso nai ulutaga o rawa ni vaqara kina? (Raica na Bible Dictionary, “Revelation of John.”)
-
Na cava e matataka na ivakatakilakila ena Ai Vakatakila? (Raica na Vunau kei na Veiyalayalati 77; New Testament Student Manual [Church Educational System manual, 2014], 525–68.)
Ena rawa ni veivuke ni da raica talega eso na rai titobu ena iVakadewa i Josefa Simici ni so na tabana ena Ai Vakatakila. (Raica nai vakamacala e ra kei na Bible appendix.)
iVakatakila
Na raivotu i Joni e vakatavulica na iwalewale ni Tamada Vakalomalagi ena nona vakabulai ira na Luvena.
Ni sa tekivu nomu vulica na Ai Vakatakila, vakasamataka na veisemati ni veika o wilika tiko kei na veika o kila me baleta nai tuvatuva ni veivakabulai ni Tamada Vakalomalagi kei na vakacerecerei ni Luvena. Mo tekivu ena kena talevi tale na ituvatuva raraba ni ituvatuva ni veivakabulai ena Vunautaka Noqu Kosipeli (tabana 47–59). Ni o qai wilika na itukutuku ni raivotu nei Joni, vakatarogi iko na mataqali taro vakaoqo: Na cava eso na dina au sa vulica mai na Ai Vakatakila me baleta na veika esa cakava na Tamada Vakalomalagi me vukei au meu lesu tale Vua? Ena vukei au vakacava na veika oqo meu kila vinaka cake na ituvatuva ni Kalou me baleti au?
Ena rawa ni vukei iko mo kila na veika oqo:
-
E vuqa na ka ena wase 12 e baleta na veika e yaco ena bula taumada (raica talega “Bula Taumada,” iUlutaga Va-Kosipeli, topics.lds.org).
-
Wase 6–11, 13–14, 16–19 e vakamacalataka na bula oqo kei na veika e yaco ena veigauna taumada ni vuravura oqo (raica talega na “Bula Vakayago,” iUlutaga Va-Kosipeli, topics.lds.org).
-
Wase 2–3, 15, 20–22 e vakamacalataka na iOtioti ni Veilewai kei na lagilagi e waraki ira na yalodina ena itikotiko tawamudu (raica talega na “Oti na Bula Vakayago,” iUlutaga Va-Kosipeli, topics.lds.org).
E kilai au vakavinaka o Jisu Karisito ka na vukei au, meu vorata na veibolebole au sotava.
Na vosa ni iVakabula ena Ai Vakatakila 2–3 e vakaraitaka ni kila vinaka tu o Koya na rawa-ka kei na veibolebole e sotava tu na taba ni Lotu ena gauna i Joni. E vakadeitaki vei ira na ivavakoso Yalosavasava ena vuqa na vanua ni kilai ira tiko o Koya, ka kila talega, na “nomu cakacaka,” “dauvakararawataki,” “dravudravua,” kei na “dauloloma,” (Ai Vakatakila 2:2, 9, 19)—kei na so tale na sala era na rawa ni vinaka cake kina.
Na veiwase oqo ena rawa ni vakananuma vei iko ni kilai iko vinaka na iVakabula kei na nomu qaqa kei na malumalumu ka vinakata me vukei iko mo vorata rawa na veibolebole vakavuravura. Na cava e yalataka o Jisu Karisito vei ira era rawa ni vorati vuravura? Na veisau cava soti o vakauqeti mo vakayacora me rawa ni o vorata na nomu veibolebole eso?
Ena rawata duadua ga o Jisu Karisito me vakavotukanataka na ituvatuva ni Tamada Vakalomalagi.
E dina ni na sega ni o nanuma, e rawa ni o a tiko talega ena veika e yaco ka vakamacalataka o Joni ena Ai Vakatakila 5. Ni o wilika na veika oqo, vakasamataka mada na veika e qai votu mai vei keda ni da sa mai kila ni o Jisu Karisito (na “Lami”) ena vakavotukanataka nai tuvatuva ni Tamada Vakalomalagi (dolava na ivola ka sereka na ivau e vitu). Na cava e a rawata duadua ga kina o Jisu Karisito na veika oqo? Ena rawa vakacava mo vakaraitaka na nomu vakabauti Koya ni nomu iVakabula?
Raica talega na Jope 38:4–7; “Veisorovaki i Jisu Karisito,” iUlutaga Va-Kosipeli, topics.lds.org.
Na Veivakalesui mai ena yaco ni se bera na veivakarusai ena yaco ni se bera na iKarua ni Lako Mai i Jisu Karisito.
Ai Vakatakila 6–11 e vakamacalataka na veika ena yaco ena ituvaki vakabula oqo (raica na VV 77:6), oka kina na Veivakalesui mai ni kosipeli ena gauna oqo (raica na Ai Vakatakila 7). Ni o wilika na veika e parofisaitaka o Joni ka sarava na kena yaco eso vei ira, na cava o sa vakauqeti kina mo cakava me vakarautaki iko kei na nomu vuvale ki na iKarua ni Lesu Mai?
Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:
Kaya mada ni a kerei o Joni me solia na itukutuku me vaka ga na kena e solia ena lotu ena gauna oya, kina nomu matavuvale. Na cava ena kaya o koya ni sa toso vinaka tiko? Ena rawa ni vakavinakataki cake vakacava?
Vakaraitaka nai yaloyalo ni iVakabula ni tukituki tu ena katuba (raica nai yaloyalo e sala vata mai kei na idusidusi oqo). Sureta me wilika na nomu matavuvale na Ai Vakatakila 3:20 ka veitalanoataka na taro vakaoqo: Na cava na vuna e tukituki tiko kina o Jisu ka sega ni curu ga yani? Eda na rawa ni sureta vakacava na Nona veivakayarayarataki ena noda vale?
Na cava e vakavulica vei keda na veitikina oqo me baleta na vuna eda dau vakaisulu vulavula ni da vakayacora na cakacaka vakalotu ni valetabu?
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakatorocaketaki Noda Veivakavulici
Vakauqeta na taro. Na taro e vakaraitaka ni sara vakarau tu na lewe ni matavuvale me ra vuli ka wasea eso na rai titobu kei na nodra sa rawa ni tukuna mai na veika era sa vulica tiko. Vakavulica nomu matavuvale na sala me ra rawa ni kunea nai saunitaro ena ivolanikalou. (Raica na Veivakavulici ena iVakarau ni iVakabula, 25–26.)
Vakacurumi Koya Yani ki Loma, by Greg K. Olsen