Fa’a’ohipa i te Mai, pe’e mai—nō te ta’ata hō’ē ’e te ’utuāfare

Nō te mau ta’ata ato’a ’e te mau ’utuāfare i roto i te ’Ēkālesia teie mātēria. ’Ua hāmanihia te reira nō te tauturu ia ’outou ’ia ha’api’i i te ’evanelia—’outou ana’e iho ’aore rā ’ei ’utuāfare. Mai te peu ’aita a’enei ’outou i tuatāpapa pinepine i te ’evanelia nā mua a’e, e nehenehe teie mātēria e tauturu ia ’outou ’ia ha’amata. Mai te peu ’ua mātau maita’i ’outou i te tuatāpapa i te ’evanelia, e nehenehe teie mātēria e tauturu ia ’outou ’ia fari’i i te mau ’itera’a faufa’a atu ā.

Nā ’outou e hi’o i te fa’a’ohipara’a o te reira, ’ia tauturu te reira ia ’outou. E nehenehe te reira e tauturu ’ei arata’i ’aore rā ’ei tauturu tuatāpapara’a pāpa’ira’a mo’a nō te ta’ata hō’ē ’e te ’utuāfare. E nehenehe ato’a e fa’a’ohipa i te reira nō te purera’a pō ’utuāfare. E ha’afaufa’a te arata’ira’a ha’api’ira’a i te mau parau tumu faufa’a rahi i roto i te Faufa’a ’Āpī, ma te tu’u i te tahi mau mana’o tuatāpapara’a ’e mau ’ohipara’a ’e ma te fa’afāna’o i te vāhi nō te tāpa’opa’o i te mana’o e tae mai.

Tē tuatāpapa tāmau a’ena ra paha ’outou ’e tō ’outou ’utuāfare i te ’evanelia. Penei a’e e fā nā ’outou te tai’ora’a i te Buka a Moromona. ’Aore rā, penei a’e tē tai’o ra ’outou i te tahi atu buka pāpa’ira’a mo’a nō te séminaire ’e te institut.E ’ere te Mai, pe’e mai nō te mono ’aore rā nō te ’ume i te mau mea maita’i tā ’outou e rave ra. Penei a’e e mau rāve’a nō te ha’api’i tāmau i roto i te Faufa’a ’Āpī ’e e rave fa’aoti ato’a i tā ’outou fā nō te tahi atu mau pāpa’ira’a mo’a. ’Ei hi’ora’a, e tāmau ’outou i te tai’o i te Buka a Moromona nō te tuatāpapara’a pāpa’ira’a mo’a ta’ata hō’ē ’e e tai’o ’outou i te Faufa’a ’Āpī ’e te ’utuāfare (’aore rā e taui). ’Aita ana’e, ’a tai’o ’outou i te Faufa’a ’Āpī, e nehenehe ’outou e ’imi i roto i te Buka a Moromona i te mau tuha’a e ha’apāpū i te mea e ha’api’i ra ’outou. E pe’e i te arata’ira’a a te Vārua nō te fa’aoti nāhea i te rave i tā ’outou iho tuatāpapara’a i te parau a te Atua.

’Ua fa’anahohia te arata’ira’a ha’api’ira’a i roto i teie mātēria nā ni’a i te tai’ora’a tāhepetoma. E pe’e ato’a te mau ha’api’ira’a i roto i te piha Paraimere ’e te mau piha Ha’api’ira’a Sābati i teie tārena. Nō te turu i tā ’outou mau tauto’ora’a i te fare nō te ha’api’i ’e nō te ora i te ’evanelia, e hōro’a tō ’outou mau ’orometua i te taime nō te fa’a’ite i te mau ’ohipa i tupu nō ’outou, tō ’outou mau mana’o ’e tā ’outou mau uira’a nō ni’a i te mau tuha’a pāpa’ira’a mo’a i tuatāpapahia i roto i te hepetoma.

Tē vai ra i roto i te Mai, pe’e mai—nō te Paraimere ’e te Mai, pe’e mai—nō te Ha’api’ira’a Sābati te mau arata’ira’a ha’api’ira’a nō te hepetoma tāta’itahi o te matahiti ta’a ’ē ’eiaha rā nā sābati e piti nō te ’āmuira’a rahi. Mai te peu ’aita te purera’a i fa’atupuhia nō te tupura’a te ’āmuira’a titi ’aore nō te tahi atu tumu, tē anihia ra ia ’outou ’ia tāmau noa i te tuatāpapa i te Faufa’a ’Āpī i te fare. E nehenehe e vaiiho i te ha’api’ira’a i tārenahia nō terā nau tai’o mahana ’aore rā e ’āmui e piti ha’api’ira’a nō te pe’e i te tārena.

E tauturu te tārena ia ’outou ’ia pe’e i te mau mātēria i fa’anahohia nō te mau piha ha’api’ira’a i te sābati, ’eiaha rā ’outou e mana’o ē, e fa’ahepora’a te reira; ’ua riro noa te tārena ’ei arata’i nō te tauturu ia ’outou ’ia tātuha’a i te ha’api’ira’a. Te mea faufa’a rahi, ’o te ha’api’ira’a ïa i te ’evanelia ’ei ta’ata hō’ē ’e ’ei ’utuāfare.

Hōho’a

e ’utuāfare e tai’o ra i te mau pāpa’ira’a mo’a