“Plaub Hlis Ntuj 3–9. Easter: ‘Txoj Kev Tuag, Koj txoj Kev Kov Yeej Dua Twg Lawm?,’” Los, Nrog Kuv Mus—Rau Ib Leeg thiab Tsev Neeg: Phau Tshiab 2023 (2022)

“Plaub Hlis Ntuj 3–9. Easter,” Los, Nrog Kuv Mus—Rau Ib Leeg thiab Tsev Neeg: 2023

Daim Duab

Lub Ntxa hauv lub Vaj

Plaub Hlis Ntuj 3–9

Easter

“Txoj Kev Tuag, Koj txoj Kev Kov Yeej Dua Twg Lawm?”

Thaum koj nyeem tej zaj lus tim khawv txog tus Cawm Seej txoj Kev Sawv Rov Los nyob hauv tshooj no, cia li sau ntawv txog koj tej kev xav thiab kev tshoov siab uas tus Vaj Ntsuj Plig Dawb Huv qhia rau koj.

Sau Ntawv txog Koj tej Kev Tshoov Siab

Nyob hauv lub lim tiam kawg hauv tus Cawm Seej lub neej, cov neeg Yudais coob koom ua ke ua Kev Cai Hla Dhau. Lawv tau npaj zaub mov noj, hu nkauj, thiab koom ua ke kom nco txog thaum tus Tswv tau cawm tsev neeg Ixayees dim kev ua qhev rau cov cov Neeg Iyiv. Tej tsev neeg tau mloog zaj dab neeg txog tus tim tswv ua kev puas tsuaj tau hla dhau lawv cov poj koob yawm txwv lub tsev cov uas tau pleev cov ntshav yaj rau lawv lub qhov rooj. Thaum lawv ua koob tsheej uas muaj tej lub cim txog kev cawm dim ntau heev, tsis muaj neeg coob uas paub tias Yexus Khetos, Vajtswv tus Me Nyuam Yaj tab tom yuav cawm lawv dim kev ua qhev rau kev txhaum thiab kev tuag—dhau los ntawm nws txoj kev raug txom nyem, Nws txoj kev tuag, thiab Nws txoj Kev Sawv Rov Los. Txawm yog li ntawd los, muaj cov uas pom tias Yexus yog lawv tus Mexiyas, tus uas yuav muab lawv cawm dim mus ib txhis li. Txij thaum ntawd los, Yexus Khetos cov thwj tim tau ua tim khawv rau tag nrho lub ntiaj teb hais tias “Yexus Khetos tau tuag theej peb sawv daws lub txhoj … ; luag coj nws mus faus thiab tom qab ntawd peb hnub, Vajtswv tsa nws sawv hauv qhov tuag rov qab los” (1 Kauleethaus 15:3–4).

Daim Duab

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Mathais 21–28

Yexus Khetos cawm kuv dim kev txhaum thiab kev tuag, txhawb nqa kuv kom kov yeej kuv tej kev qaug zog, thiab nplij kuv lub siab thaum kuv raug sim siab.

Ib txoj kev rau koj xav txog cov koob hmoov uas los ntawm tus Cawm Seej txoj Kev Theej Txhoj lub lim tiam no yog kev siv sij hawm txhua hnub nyeem txog lub lim tiam kawg ntawm Yexus lub neej (ib txoj kev teem sij hawm nyeem vaj lug kub los muaj nram qab no). Koj nrhiav tau dab tsi uas pab koj paub txog tus Cawm Seej txoj kev hlub tshua? Cia li xav txog tej yam uas tej tshooj no qhia koj txog qhov uas Nws muaj peev xwm cawm koj dim kev txhaum, kev tuag, kev sim siab, thiab kev qaug zog. Koj ua li cas muab siab rau ntseeg Nws lub hwj chim cawm tib neeg dim?

Hnub Xya: Kev nkag los hauv Yeluxalees (Mathais 21:6–11)
Hnub Ib: Ua rau lub tuam tsev huv (Mathais 21:12–16)
Hnub Ob: Qhia nyob hauv Yeluxalees (Mathais 21–23)
Hnub Peb: Qhia ntxiv (Mathais 24–25)
Hnub Plaub: Kev Cai Hla Dhau thiab Khetos txoj kev raug txom nyem hauv lub Vaj Khexemanes (Mathais 26)
Hnub Tsib: Kev hais plaub, Kev Ntsia Saum Ntoo Khaub Lig, thiab kev muab faus (Mathais 27:1–61)
Hnub Rau: Khetos lub cev nyob hauv lub ntxa (Mathais 27:62–66) thaum Nws mus txhawb pab cov hauv lub ntuj ntsuj plig (Lus Qhuab Qhia thiab Kev Khi Lus 138)
Hnub Xya: Yexus Khetos txoj Kev Sawv Rov Los thiab kev tshwm sim rau Nws cov thwj tim (Mathais 28:1–10)

Kuj saib Easter.ComeuntoChrist.org.

Kev Ntsia Saum Ntoo Khaub Lig, los ntawm Louise Parker

Mathais 28:1–10; Lukas 24:13–35; Yauhas 20:19–29; 1 Kauleethaus 15:1–8, 55

Neeg coob ua tim khawv txog Yexus Khetos txoj Kev Sawv Rov Los.

Cia li xav seb yuav zoo li cas thaum cov thwj tim tau saib Yexus raug thuam, raug tsim txom, thiab raug ntsia saum ntoo khaub lig. Lawv tau pom Nws lub hwj chim, paub tias Nws tej lus qhia muaj tseeb, thiab ntseeg tias Nws yog Vajtswv Leej Tub. Ntshe qhov uas Nws cov thwj tim saib Nws txoj kev tuag ua rau lawv nyuaj siab txhawj xeeb. Tiam sis tsis ntev lawv twb saib qhov txuj ci tseem ceeb uas yog Nws txoj Kev Sawv Rov Los.

Koj yuav kawm dab tsi los ntawm cov neeg tim khawv tej zaj lus txog tus Cawm Seej uas Sawv Rov Los? Sau ntawv txog los sis sau lub cim rau txhua tus neeg tej lus nyob hauv Mathais 28:1–10; Lukas 24:13–35; Yauhas 20:19–29; thiab 1 Kauleethaus 15:1–8, 55. (Muaj lwm tus uas tau pom tus Khetos uas sawv rov los nyob hauv 3 Nifais 11; Maumoos 1:15; Ethaws 12:38–39; Lus Qhuab Qhia thiab Kev Khi Lus 76:19–24; 110:1–10; and Joseph Smith—Keeb Kwm 1:15–17.) Muaj dab tsi los ntawm cov neeg tim khawv tej zaj lus uas tshoov koj lub siab? Tom qab tus Cawm Seej sawv rov los, lwm tus tau sawv rov los thiab tshwm sim rau neeg coob pom (saib Mathais 27:52–53; 3 Nifais 23:9). Koj txoj kev ntseeg tus Cawm Seej thiab Nws txoj kev cog lus tias koj yuav xav rov los hloov koj txoj kev xav ua neej li cas?

Kuj saib “Jesus Is Resurrected,” “The Risen Lord Appears to the Apostles,” “Blessed Are They That Have Not Seen, and Yet Have Believed” (cov video), ChurchofJesusChrist.org.

1 Petus 1:3–11

Yexus Khetos muab kev cia siab thiab kev xyiv fab rau peb.

Muaj tej lus twg nyob hauv 1 Petus 1:3–11 uas ua rau koj muaj kev cia siab vim muaj Yexus Khetos? Koj tau muaj kev cia siab ntawd thaum twg?

Txwj Laug Gerrit W. Gong ua tim khawv tias txoj Kev Sawv Rov Los “muab kev cia siab rau cov uas twb xiam tes xiam taw; cov uas dig muag, lag ntseg, los sis ceg tawv, los sis leej twg uas raug kev mob kev nkees li cas, xiam paj hlwb, los sis muaj kev tsis taus. Nws nrhiav tau peb. Nws kho peb kom zoo tag nrho. … [Thiab,] vim ‘Vajtswv tus kheej thiaj li theej rau neeg ntiaj teb tej kev txhaum’ [Amas 42:15], … Nws muaj cuab kav, muaj kev hlub tshua, tu peb hauv peb tej kev txom nyem. … Peb hloov siab lees txim thiab ua txhua yam peb ua tau. Nws puag peb ‘hauv nws txoj kev hlub’ tas mus li [2 Nifais 1:15]” (“Hauxanas thiab Haleluyas—Yexus Khetos uas Muaj txoj Sia Nyob: Lub Plawv ntawm txoj Kev Txum Tim Rov Qab Los thiab lub Caij Easter,” Liahona, Tsib Hlis Ntuj 2020, 54).

Kuj saib Amas 27:28; 36:1–24; 3 Nifais 9:11–17; Maulaunais 7:40–41.

Daim Duab

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

ComeuntoChrist.org.Easter.ComeuntoChrist.org muaj ib txoj kab uas piav txog qhov uas muaj dab tsi tshwm sim txhua hnub hauv lub lim tiam kawg ntawm tus Cawm Seej lub neej. Txhua hnub hauv lub lim tiam no, tej zaum nej tsev neeg yuav xav saib tej lus piav no kom paub tias tus Cawm Seej tau ua dab tsi hnub ntawd, los sis nyeem txog Nws lub lim tiam kawg nyob hauv vaj lug kub ua ke nrog nej tsev neeg (saib tej lub tswv yim nyob hauv feem “Tej lub Tswv Yim Kawm Vaj Lug Kub ntawm Yus Ib Leeg”).

Cov Nkauj Qhuas Vajtswv thiab Children’s SongbookXav seb puas xav hu nkauj ua ke txog tus Cawm Seej txoj Kev Theej Txhoj thiab txoj Kev Sawv Rov Los hauv lub lim tiam no, tsis hais tej zaj nkauj uas nej tsis tshua paub. (Saib daim qhia txog tej ntsiab lus nyob hauv phau Cov Nkauj Qhuas Vajtswv los sis Children’s Songbook, uas muaj raws tej ntsiab lus no xws li “txoj Kev Theej Txhoj,” “Easter,” los sis “Kev Sawv Rov Los.”) Kom pab nej tsev neeg kawm tej zaj nkauj no, tej zaum nej yuav xav muab duab rau lawv pom uas haum cov lus.

Pawg ntawv txog “Yexus Khetos” hauv Txoj Moo Zoo cov Ntawv.Pawg ntawv nyob hauv Txoj Moo Zoo cov Ntawv hu ua “Yexus Khetos” muaj video, cov duab, thiab cov nkauj uas yuav pab nej tsev neeg ua koob tsheej txog tus Cawm Seej txoj Kev Sawv Rov Los hauv lub caij Easter no.

“Tus Khetos uas Muaj txoj Sia Nyob: Cov Thwj Tim tej Lus Tim Khawv.”Nrog nej tsev neeg ua ke, cia li nyeem “Tus Khetos uas Muaj txoj Sia Nyob: Cov Tim Thawj tej Lus Tim Khawv” (ChurchofJesusChrist.org). Caw txhua tus hauv nej tsev neeg kom xaiv ib zaj lus txog Easter los ntawm zaj lus tim khawv no kom qhia rau lwm tus. Piv txwv hais tias, tej zaum nej yuav xav tsim tej daim loj kom tso rau social media, muab dai rau ntawm nej lub qhov rooj, los sis nyob hauv tsev.

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Jesus Has Risen,” Children’s Songbook, 70.

Kev Kawm Zoo Dua Ntxiv ntawm Yus Ib Leeg

Cuab hom phiaj uas koj ua taus. Yog koj siv sij hawm ob peb feeb xwb kawm vaj lug kub txhua hnub ces koj yuav tau koob hmoov. Cog lus tias koj yuav kawm txhua hnub, muaj ib txoj kev kom koj nco ntsoov txog qhov uas koj cog lus, thiab ua zoo npaum li koj ua tau kom ua tiag. Yog koj tsis nco qab, tsis txhob tso tseg. Cia li rov qab pib ua dua xwb.