« 14–20 nō Māti. Genese 42–50 : ’O tā te Atua ïa i ’ōpua ’ei maita’i’ », Mai, pe’e mai—nō te ta’ata hō’ē ’e te ’utuāfare : Faufa’a Tahito 2022 (2021)

« 14–20 nō Māti. Genese 42–50 », Mai, pe’e mai—nō te ta’ata hō’ē ’e te ’utuāfare : 2022

Hōho’a

Iosepha nō ’Aiphiti

Fa’ahōho’ara’a nō Iosepha nō ’Aiphiti, nā Robert T. Barrett

14–20 nō Māti

Genese 42–50

« ’O tā te Atua ïa i ’ōpua ’ei maita’i »

Nā te tai’ora’a i te mau pāpa’ira’a mo’a e ani manihini i te Vārua. ’A fa’aro’o i tāna mau muhumuhu ’a tai’o ai ’outou, noa atu ē, mai te huru ra ē, ’aita te reira e tū’ati ra i ni’a i tā ’outou e tai’o ra.

Pāpa’i i tō ’outou mau mana’o

Fātata e 22 matahiti mai te taime ’a ho’ohia ai o Iosepha i Aiphiti nā tōna mau taea’e. ’Ua fa’aruru ’oia e rave rahi mau tāmatara’a, tae noa atu i te pari ha’avarera’ahia ’e te tāpe’ara’ahia i te fare auri. I te taime ’a ’ite fa’ahou ai Iosepha i tōna mau taea’e, e tāvana ïa ’oia nō Aiphiti tā’āto’a, i raro noa mai ia Phara’o. E mea ’ōhie nāna ’ia tāho’o, inaha ’ia hi’ohia te ’ohipa tā rātou i rave i ni’a iāna, e mea māramarama roa ’ia feruri. Terā rā, ’ua fa’a’ore ’o Iosepha i te hapa a tōna mau taea’e. E ’ere i te reira noa, ’ua tauturu rā ’oia ia rātou ’ia hi’o i te ’ōpuara’a hanahana i roto i tōna māuiui. ’Ua parau ’oia « ’O tā te Atua ïa i ’ōpua ’ei maita’i » (Genese 50:20), nō te mea ’ua tu’u te reira iāna i roto i te hō’ē ti’ara’a ’ia fa’aora i « te ’utuāfare ato’a o tōna metua » (Genese 47:12) i roto i te o’e.

E rave rahi te mau tū’atira’a o te orara’a o Iosepha i tō Iesu Mesia. Noa atu ’ua fa’atupu tā tātou mau hara i te māuiui rahi i ni’a iāna, tē pūpū nei te Fa’aora i te fa’a’orera’a hara, e fa’aora nei ia tātou pā’āto’a i te hō’ē ti’ara’a hau atu i te ’ino i te o’e. Noa atu e tītauhia ia tātou ’ia fāri’i i te fa’a’orera’a hapa ’aore rā ’ia fa’a’ore i te hapa—i te reira taime, e tītauhia ia tātou ’ia rave i nā mea e piti—tē fa’afāriu nei te hi’ora’a o Iosepha ia tātou i ni’a i te Fa’aora, te puna mau o te ora ’e te fa’ahaura’a.

Hōho’a

’ītona tuatāpapara’a a te ta’ata hō’ē

Mau mana’o nō te tuatāpapara’a pāpa’ira’a mo’a a te ta’ata hō’ē

Genese 45:1–8 ; 50:20

« Nā te Atua ho’i i tono mai iā’u i’ō nei nā mua ia ’outou, ’ia ora ’outou ».

’A tai’o ai ’or nō ni’a ia Iosepha, ’ua ’ite ānei ’oe i te tahi mau tū’atira’a i rotopū i tōna ’ā’amu ’e i te misiōni tāra’ehara a Iesu Mesia ? E nehenehe ’oe e feruri nāhea te ’ohipa a Iosepha i roto i tōna ’utuāfare e tū’ati ai i te ’ohipa a te Fa’aora i roto i te ’utuāfare o te Atua. E aha te mau tū’atira’a tā ’oe e ’ite nei i rotopū i te mau ’itera’a o Iosepha ’e te misiōni a te Fa’aora, tei tonohia mai « ’ia ora [tātou] i te orara’a rahi »? (Genese 45:7).

Genese 45 ; 50:15–21

E hōpoi mai te fa’a’orera’a hara i te fa’aorara’a.

E nehenehe te tai’ora’a nō ni’a ia Iosepha i te fa’a’orera’a i te hara a tōna mau taea’e nō te mau ’ohipa ri’ari’a tā rātou i rave i ni’a iāna, e fa’auru ia ’oe ’ia feruri i te hō’ē ta’ata tā ’oe e tūtava nei e fa’a’ore i te hapa. ’Aore ra, tei roto paha i tō ’oe orara’a nō ananahi te hō’ē tāmatara’a fifi nō te fa’a’ore i te hapa. Noa atu i te reira, e nehenehe te ferurira’a ē, nō te aha i ti’a ai ia Iosepha ’ia fa’a’ore i te hapa, e tauturu. E aha te mau tāpa’o nō ni’a i te huru ta’ata ’e te peu a Iosepha tā ’oe e ’ite nei i roto i te Genese 45 ; 50:15–21 ? Nāhea te mau ’ohipa i tupu i ni’a iāna i te fa’aurura’a iāna ’ia riro ’ei ta’ata fa’a’ore hara rahi a’e ? E aha tā te hi’ora’a o Iosepha e parau nei nō ni’a e nāhea ’oe e nehenehe ai e riro ’ei ta’ata fa’a’ore hara rahi a’e ma te tauturu a te Fa’aora ?

Hi’o ato’a i te mau ha’amaita’ira’a tei tae mai i ni’a i te ’utuāfare o Iosepha maoti tāna fa’a’orera’a hara. E aha te mau ha’amaita’ira’a tā ’oe i ’ite nā roto mai i te fa’a’orera’a hara ? Tē tupu ra ānei te fa’aurura’a i roto ia ’oe ’ia fa’atoro i te rima i te hō’ē ta’ata tei fa’a’ino mai ia ’oe ?

Hi’o ato’a Genese 33:1–4 ; Te Parau Ha’api’ira’a ’e te mau Parau Fafau 64:9–11 ; Larry J. Echo Hawk, « Mai te Mesia e fa’a’ore i tā ’outou hara, ’oia ato’a ’outou », Liahona, Mē 2018, 15–16.

Genese 49

E aha te aura’a te mau tāpa’o i roto i te mau ha’amaita’ira’a o Iakoba ?

Tē vai ra i roto i te mau ha’amaita’ira’a o Iakoba i tōna huā’ai te tahi mau fa’ahōho’ara’a maita’i roa, terā rā, e nehenehe ato’a te tahi feiā tai’o e fifi ’ia māramarama i tō rātou aura’a. Aua’e rā, tē hōro’a mai nei te ’evanelia tei fa’aho’i-fa’ahou-hia mai i te tahi atu ’itera’a ia tātou. ’Ia tai’o ana’e ’oe i te ha’amaita’ira’a o Iosepha i roto i te Genese 49:22–26, ’a tai’o ato’a i teie mau ’īrava i muri nei, ’e ’a hi’o e aha te mau mana’o tā te reira e hōro’a mai nei : 1 Nephi 15:12 ; 2 Nephi 3:4–5 ; Iakoba 2:25 ; Te Parau Ha’api’ira’a ’e te mau Parau Fafau 50:44.

’A tai’o ai ’oe i te ha’amaita’ira’a o Iuda i roto i te Genese 49:8–12, ’a ha’amana’o ē, te ari’i Davida ’e ’o Iesu Mesia, e huā’ai rāua to’opiti nō Iuda. E aha te mau ta’o ’e te mau fa’ahitira’a parau i roto i teie mau ’īrava e fa’aha’amana’o nei ia ’oe i te Fa’aora ? ’Ia tuatāpapa ana’e ’oe nō ni’a i te ha’amaita’ira’a o Iuda, e mea maita’i ato’a ’ia tai’o ’oe i te Apokalupo 5:5–6, 9 ; 1 Nephi 15:14–15 ; Te Parau Ha’api’ira’a ’e te mau Parau Fafau 45:59 ; 133:46–50.

Mai te mea e hina’aro ’oe ’ia ’ite atu ā nō ni’a i te mau tamaiti a Iakoba ’e te mau ’ōpū nō ’Īsera’ela nā roto mai ia rātou, tē vai ra hō’ē fa’ata’ara’a nō rātou tāta’itahi i roto i Guide des écrittures [Te arata’i o te mau pāpa’ira’a mo’a] (scriptures.ChurchofJesusChrist.org).

Genese 50:24–25 ; Te ’īritira’a a Iosepha Semita, Genese 50:24–38 (i roto Bible appendix [Fa’ahorora’a Bibilia])

« E fa’ati’a mai te Fatu tō’u Atua i te hō’ē hi’o ».

Nā roto i te mau moemoeā a Iosepha (hi’o Genese 37:5–11) ’e tāna tātarara’a i te tahi atu mau moemoeā (hi’o Genese 40–41), ’ua heheu mai te Fatu i te mau mea e tupu i te mau mahana ’aore rā i te mau matahiti i muri nei. Terā rā, ’ua heheu ato’a mai te Fatu ia Iosepha i te mau mea e tupu i roto i te mau u’i i muri nei. ’Ua ha’api’i ta’a ’ē mai ’oia nō ni’a i te mau misiōni tohuhia a Mose ’e a Iosepha Semita. ’A tai’o ai ’oe i te mau parau a Iosepha i roto i te Genese 50:24–25 ’e i roto i Te ’īritira’a a Iosepha Semita, Genese 50:24–38 (i roto Bible appendix [Fa’ahorora’a Bibilia]), e ani ia ’oe iho nāhea te ’itera’a i teie mau mea i te ha’amaita’ira’a ia Iosepha ’e i te mau tamari’i nō ’Īsera’ela. I tō ’oe mana’o, nō te aha i riro ai ’ei mea faufa’a nō te Fatu ’ia fa’aho’i mai i teie parau tohu nā roto mai ia Iosepha Semita ? (hi’o ato’a 2 Nephi 3).

Nāhea tō Iosepha Semita fa’atupura’a i te mau parau tohu i roto i te ’īritira’a a Iosepha Semita, Genese 50:27–28, 30–33 ? (hi’o Te Parau Ha’api’ira’a ’e te mau Parau Fafau 1:17–23 ; 20:7–12 ; 39:11 ; 135:3).

Hōho’a

’ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare

Genese 42–46.E ’oa’oa tō ’outou ’utuāfare ’ia ha’uti i te ’ā’amu o Iosepha i te tāhō’ē-fa’ahou-ra’a ’e tōna mau taea’e. E nehenehe (« Iosepha ’e te o’e », i roto Te mau ’ā’amu nō te Faufa’a Tahito e tauturu.) ’A ha’uti i te reira—’a fa’a’ohipa i te mau ’ahu ’e te mau tao’a mai te mea e hina’aro ’outou. E fa’aitoito i te mau melo o te ’utuāfare ’ia tāmata i te hāro’aro’a i te mau mana’o ’e te hi’ora’a ātea o te mau ta’ata. E nehenehe ’outou e rōtahi ta’a ’ē i ni’a i te mau mana’o o Iosepha i ni’a i tōna mau taea’e, ’e i ni’a i tō rātou mana’o i te taime ’a fa’a’ore ai ’oia i tā rātou hara. E nehenehe te reira e arata’i atu i roto i te hō’ē ’āparaura’a nō ni’a e nāhea te fa’a’orera’a i te hara e nehenehe ai e ha’amaita’i i tō ’outou ’utuāfare.

I te taime ’a fārerei fa’ahou ai Iosepha i tōna mau taea’e i muri a’e e rave rahi matahiti, e mea nāhea tō rātou fa’a’itera’a ē, ’ua taui rātou mai te taime hope’a ’a ’ite ai ’oia ia rātou ? E aha tā tātou e nehenehe e ha’api’i mai nō ni’a i te tātarahapa nā roto mai i tō rātou mau ’itera’a ?

Genese 45:3–11 ; 50:19–21.’Ua ’ite ’o Iosepha ē, noa atu ’ua fifi mau ’oia i Aiphiti, « ’O tā te Atua ïa i ’ōpua ’ei maita’i » (Genese 50:20). ’Ua fārerei ānei tō ’outou ’utuāfare i te mau tāmatara’a tā te Atua i huri ’ei ha’amaita’ira’a ?

E nehenehe te hō’ē hīmene nō ni’a i te maita’i o te Atua i roto i te mau taime tāmatara’a (mai te « ’Auē te pa’ari » [Te mau Hīmene, no. 41]) e ha’amaita’i i teie ’āparaura’a. E aha te mau mea i roto i te mau ’itera’a o Iosepha e fa’ahōho’a nei i te mea tā te hīmene e ha’api’i nei ?

Genese 49:9–11, 24–25.E aha tā tātou e ’ite nei i roto i teie mau ’īrava ’o tē ha’api’i nei ia tātou nō ni’a i te mau ’ohipa ’e te misiōni a Iesu Mesia ? (Nō te tauturu ’ia māramarama i te mau pereota i roto i teie mau ’īrava, ’a hi’o i te mātēria nō ni’a i te Genese 49 i roto i « Te mau mana’o nō te tuatāpapara’a pāpa’ira’a mo’a a te ta’ata hō’ē ».)

Nō te mau mana’o hau atu nō te ha’api’ira’a i te mau tamari’i, hi’o te arata’i nō teie hepetoma i roto Mai, pe’e mai—nō te Paraimere

Hīmene i mana’ohia : « ’Auē te pa’ari », Te mau hīmene, no. 41.

Ha’amaita’ira’a i tā tātou ha’api’ira’a

Fa’a’ohipa i te pehe. ’A tauturu i te mau melo o te ’utuāfare ’ia ’imi i te mau parau mau o te ’evanelia i roto i te mau parau o te mau hīmene ’e o te mau hīmene a te Paraimere. ’A ’imi i te mau rāve’a nō te fa’ariro i te pehe mo’a ’ei tuha’a tāmau nō tā ’outou tuatāpapara’a ’evanelia.