3 Nefi 17–19

Përmblidheni rrëfimin tek 3 Nefi 17 ndërkohë që paraqitni një figurë si ajo në përvijimin e kësaj jave te manuali Eja, Më Ndiq – Për Individët dhe Familjet. Ose ju mund të përdorni “Kapitullin 44: Jezu Krishti Bekon Fëmijët” (Tregime të Librit të Mormonit, f. 124–125). Lexoni fraza ose vargje nga 3 Nefi 17 që e vënë theksin te dashuria e Shpëtimtarit për njerëzit (të tilla si vargjet 7 dhe 20–25). Lërini fëmijët që me radhë ta mbajnë figurën dhe të tregojnë se çfarë bëri Jezusi ngaqë Ai i donte njerëzit.

Përdoreni faqen e veprimtarisë së kësaj jave për t’i ndihmuar fëmijët që të vizatojnë një figurë të vetes së tyre me Jezusin. Ndërsa e bëjnë atë, ndihmojini të mendojnë për mënyrat se si Jezusi e ka treguar dashurinë e Tij për ta.

Pamja

Jezusi duke bekuar fëmijët nefitë

Ftojini fëmijët t’ju tregojnë se çfarë ndodh gjatë sakramentit. Lexoni vargje nga rrëfimi për Jezusin tek u administron sakramentin nefitëve (shih 3 Nefi 18:1–12) dhe kërkojuni fëmijëve të ngrihen në këmbë kur dëgjojnë diçka që është e ngjashme me atë që bëjmë ne gjatë sakramentit. Çfarë do Jezu Krishti që ne të “kujto[jmë]” ose të mendojmë gjatë sakramentit? (Shih 3 Nefi 18:7, 11.)

Këndojeni nën zë, me zë ose luajeni me vegla një himn ose këngë të Fillores ndërkohë që fëmijët ngjyrosin figura që mund t’i ndihmojnë ata ta kujtojnë Shpëtimtarin gjatë sakramentit (shih faqen e veprimtarisë së kësaj jave). Nxitini që t’i shikojnë këto figura për t’i ndihmuar që ta kujtojnë Jezusin kur e marrin sakramentin.

Paraqitni figura të njerëzve duke u lutur (të tilla si ato në “Kapitullin 46: Jezu Krishti Mëson dhe Lutet me Nefitët” te Tregime të Librit të Mormonit, f. 128–130). Ftojini fëmijët të nxjerrin në pah hollësi te figurat që tregojnë se këta njerëz po luten. Lexoni vargjet tek 3 Nefi 19:16–17 për të shpjeguar se Jezusi na mësoi se si të lutemi. Lërini fëmijët t’ju tregojnë se si ndihen kur luten.

Lexoni nga 3 Nefi 18:21 dhe ftojini fëmijët të vizatojnë një figurë të vetes ose të familjeve të tyre duke u lutur. Nxitini fëmijët t’i ftojnë familjet e tyre që të luten me ta.

Këndoni së bashku një këngë për lutjen, të tillë si “A Child’s Prayer” [“Lutja e Një Fëmije”] (Children’s Songbook [Libri i Këngëve të Fëmijëve], f. 6). Kërkojuni fëmijëve të tregojnë atë që mësojnë rreth lutjes nga kënga. Jepni dëshminë tuaj për lutjen.

Lexoni së bashku disa vargje nga 3 Nefi 17 që e ndieni se do të jenë domethënëse për fëmijët të cilëve u jepni mësim. Teksa e lexoni secilin varg, kërkojuni fëmijëve të zgjedhin një fjalë ose frazë që ata mendojnë se është e rëndësishme dhe pastaj të tregojnë arsyen përse ato fjalë ishin domethënëse për ta. Dëshmoni se Jezusi i do shumë fëmijët dhe kjo është arsyeja përse Ai i bekoi ata dhe u lut për ta.

Ftojini fëmijët të tregojnë se si mund të ishin ndier nëse do të ishin mes fëmijëve të cilët Shpëtimtari i bekoi. Çfarë bëri Shpëtimtari për ta shfaqur dashurinë e Tij? Çfarë mund të bëjmë për ta përgatitur veten që të jemi me Të kur Ai të vijë përsëri?

Ndihmojini fëmijët të lexojnë tek 3 Nefi 18:1–12. Çfarë mësojnë ata rreth sakramentit nga këto vargje? Ndihmojini që t’i lexojnë lutjet e sakramentit te Doktrina e Besëlidhje 20:77 dhe 79, dhe të gjejnë fjalë e fraza te lutjet që gjenden gjithashtu tek 3 Nefi 18:1–12. Çfarë domethënie kanë këto fjalë e fraza? Si mund të përgatitemi për ta marrë sakramentin? Çfarë premtojmë ose besëlidhim që të bëjmë ne kur e marrin sakramentin?

Këndoni së bashku një këngë rreth nderimit, të tillë si “Reverently, Quietly” [“Me Nderim, Qetësi”] (Children’s Songbook [Libri i Këngëve të Fëmijëve], f. 11). Si mund të na ndihmojë marrja e sakramentit me nderim që ta ndiejmë Shpirtin? Si na ndihmon të bëjmë zgjedhje të drejta?

Shkruajini referencat vijuese të shkrimit të shenjtë në copa letre dhe jepuani ato secilit fëmijë ose grupeve të vogla të fëmijëve: 3 Nefi 18:15; 3 Nefi 18:20; 3 Nefi 18:21; 3 Nefi 19:19 dhe 3 Nefi 19:24. Ftojini fëmijët t’i lexojnë shkrimet e shenjta, duke kërkuar gjëra që Jezu Krishti ose dishepujt e Tij i dhanë mësim rreth lutjes. Kërkojuni atyre t’i raportojnë klasës për atë që mësojnë.

Në tabelë, shkruani Unë të falënderoj për . Jepuni fëmijëve një minutë kohë që të mendojnë sa më shumë gjëra që munden për ta plotësuar vendin bosh. Përse është e rëndësishme që ne t’i shprehim mirënjohje Atit Qiellor? Pastaj shkruani në tabelë Unë të kërkoj ty për dhe lexojini së bashku vargjet tek 3 Nefi 18:18–21 e 19:9, 23, duke kërkuar ide rreth asaj se për çfarë duhet të lutemi.

Jepni dëshminë tuaj ose një përvojë vetjake rreth fuqisë së lutjes dhe nxitini fëmijët të japin dëshmitë ose përvojat e tyre.