Luke 2; Mataio 2

A o e faitauina le tala o le fanau mai o Keriso, valaaulia tamaiti e faatino mai le tala e i latou lava pe faaaoga le itulau o gaoioiga o le vaiaso lenei. Tagai foi “Mataupu 5: Ua Fanau Mai Iesu Keriso,” Tala o le Feagaiga Fou, 13–15, po o le vitio e o faatasi ai (LDS.org).

Afai o i ai, aumai se seti o le fanau mai o Iesu ma valaaulia tamaiti e faatutu fasi mea o le seti i o latou tulaga talafeagai a o e faamatalaina le tala i le fanau mai o Iesu Keriso. E mafai foi ona e faaali atu se ata o le Fanau Mai o Iesu (tagai, mo se faataitaiga, otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga). Faasino i tagata eseese i le Fanau Mai ma valaaulia tamaiti e faasoa mai mea ua latou iloa e uiga i tagata taitasi.

Usu faatasi pese e fiafia i ai tamaiti e uiga i le fanau mai o Iesu. A o e faia, vaavaai mo avanoa e tuu atu ai lau molimau i le Faaola ma valaaulia tamaiti e faasoa mai pe aisea latou te alolofa ai ia Iesu.

Faaali atu se ata o le Au Makoi a o e toeiloiloina ma tamaiti la latou tala, o loo maua i le Mataio 2:1–12 E mafai ona e faaali atu le ata o le Au Makoi o loo Tuuina Atu Meaalofa (LDS.org).

Afifi faameaalofa ia ata po o meafaitino e faatusa i meaalofa e mafai ona tatou avatu ia Iesu. Valaaulia tamaiti e fesoasoani atu ia te oe e tatala ia meaalofa ma talanoaina pe faapefea ona tatou avatu nei meaalofa i le Faaola.

Fesoasoani i tamaiti taitasi e tusi se ata pe tusi se lisi o meaalofa e mafai ona latou avatu ia Iesu, e pei o le “avea ma uo lelei” po o le “tatalo.” Valaaulia tamaiti e faasoa mai a latou lisi i le vasega ma filifili se tasi e galulue ai i le vaiaso lenei.

Valaaulia se tasi o le autalavou i le uarota e asiasi ane i le vasega ma faasoa mai le tala ia Iesu o loo aoao atu i totonu o le malumalu ina o talavou o Ia.

Vave fai i ni tamaiti e aumai ni o latou lava ata a o pepe e faasoa mai. Fesili atu i ai pe na faapefea ona latou tuputupu ae. Faasoa mai nisi o auala na tuputupu ae ai Iesu (tagai Luka 2:40, 52). Usu ma tamaiti le “Sa Tamaitiiti o Iesu,” Tusipese a Tamaiti, 34, po o se isi pese e uiga i le Faaola.

Faitau le Luka 2:52 ma faamalamalama le uiga o le “poto” ma le “tino”. E mafai ona e fai i tamaiti e faatino mai i taga le uiga o le tupu le poto ma ma ua alofagia e le Atua atoa ma tagata. Mo se faataitaiga, e mafai ona latou faatinoina le faitau o se tusi po o le fesoasoani i se tagata o manaomia se fesoasoani.

Fai i tamaiti e talanoa e uiga i mea o latou sagisagi atu i ai, e pei o se aso fanau po o se aso malolo. Ia faitau e tamaiti le Helamana 14:2–5 e sue ai se mea sa sagisagi atu i ai perofeta.

Faitau faatasi ni valoaga i le fanau mai o le Faaola (tagai Isaia 7:14; 9:6; 1 Nifae 11:18; Helamana 14:5). Fesoasoani i tamaiti e lisi mai faamatalaga o nei valoaga ma sue lo latou faataunuuga i le Luka 2:1–21 ma le Mataio 2:1–2.

Valaaulia tamaiti e tusi se ata o le Fanau Mai o Iesu ma faasoa mai pe aisea latou te faafetai ai ona ua fanau mai Iesu.

A o e faitauina le Luka 2:40, 52, fai i tamaiti e faalogologo mo mea na faia e Iesu. Valaaulia tamaiti e faasoa mai ni auala ua latou tuputupu ae ai talu mai lo latou laiti. Faasoa atu lou lava poto masani i le aoaoina o le talalelei o sia mea itiiti i i ma sia mea itiiti i o; ona tuu atu lea o lau molimau.

Faamaea gaoioiga e faapupula mai ai fasifuaitau o i le Luka 2:40 52. Mo se faataitaiga e mafai ona e fuaina le maualuga o tamaiti taitasi (“Ua tupu le tino o Iesu”) pe fai foi i ai e faasoa mai a latou mau e fiafia i ai (“ua malosi lona loto”). Fesoasoani i tamaiti e fai se faamaumauga o auala ua latou tuputupu a’e ai ma faasoa atu i o latou aiga.

A uma ona toeiloilo le Luka 2:40 52, valaaulia tamaiti e faasoa mai pe o le a so latou manatu mata na faapei i Iesu ina ua pei o Ia o lo latou matutua. Pe faapefea lona faia o Lona tina? Ona uso ma tuafafine?

Valaaulia se tamaitiiti e sau saunia e aotele le tala oi le Luka 2:41–52. Ina ia fesoasoani i tamaiti ia malamalama i le tala, aoao atu le uiga o le “tatau ona ou i ai i le fale o lo’u Tama” Mo se faataitaiga, e mafai ona e ta’u atu i tamaiti au mea e fai pe fai e ou matua i mea e faigaluega ai. O le a le galuega po o le “pisinisi” a Iosefa, le tama faalelalolagi o Iesu? (tagai Mataio 13:55). O le a le pisinisi a Lona Tama Faalelagi? Tagai i le Luka 2:46–49; tagai foi i le Mose 1:39

Faitau faatasi ma tamaiti le Luka 2:46–49 ma fesili, “Na faapefea ona fai e Iesu le ‘pisinisi a Lona Tama’?” Fesoasoani i tamaiti e lisi pe tusi i le laupapa auala e mafai ai ona latou fesoasoani foi e fai le pisinisi a le Tama.

Ina ia fesoasoani i tamaiti e fausia lo latou talitonuga mautinoa e faapea, o i latou, faapei o le tamaitiiti o Iesu, e mafai ona aoao atu le talalelei, fesoasoani ia i latou e faata’ita’i ona aoao atu e le tasi le isi i se mataupu faavae mai le Mo Le Malosi o le Autalavou.