Maciu 18; Luke 10

Wilika na Maciu 18:21, ka sureti ira na gone me ra kaya vakavitu “Au sa vosoti iko.” Taroga, “Sa rauta beka me vakavitu na veivosoti?” Wilika na tikina 22 ka vakamacalataka ni vinakata o Jisu me da dau digitaka me da veivosoti tikoga.

Tukuna na italanoa ni dauveiqaravi sega ni dauloloma (raica na Maciu 18:23–35). Kevaka e ganita, vakamacalataka ni dua na tamata e cakava vei keda e dua na ka e sega ni vinaka, eda na cudru se rarawa mada e liu. Ia na veivosoti e kena ibalebale ni da na vakila tale na vakacegu. (O na vakauqeti mo vukei ira na gone me ra kila ni dua e vakamosia tiko na yalodra, e dodonu me ra tukuna vua na nodra itubutubu se dua tale na qase e vakabauti.)

Vola Au sa vosoti iko ena papa, ka tukuna vei ira na gone ni veivosa oqori e rawa ni vukica na veigauna rarawa me gauna ni marau. Droinitaka e dua na mata rarawa ena papa, ka wasea eso na ivakaraitaki ni nodra veivosovosoti na gone. Ni oti na ivakaraitaki yadua, sureta e dua na gone me veisautaka na mata rarawa me mamarau.

Lagata vata kei ira na gone “Help Me, Dear Father,” Children’s Songbook, 99. Kerei ira me ra tucake ni ra rogoca na vosa help. Wasea nomu ivakadinadina ni na vukei keda na Tamada Vakalomalagi me da vosoti ira na tani.

Tarogi ira na gone yadua, “O cei na wekamu?” Vakamacalataka ni vakavulica o Jisu ni dua ga na tamata e gadreva noda veivuke sa wekada talega, kevaka mada ga e sega ni tiko voleka vei keda, ka sa dodonu me da lomana na tamata oya.

Wilika na Luke 10:25–37 ni ra matanataka na gone na italanoa vakaibalebale ni kai Samaria dauloloma, ka veivukevuke ena itavi duidui eso. Ni sa oti na vakaitavi yadua, kerei ira me ra wasea na sala e rawa ni ra vaka kina na kai Samaria dauloloma.

Vola e vica na ivakaraitaki ni ituvaki e gadreva kina e dua na veivuke, ka vunitaka wavoki ena rumu na pepa. Kerei ira na gone me ra vaqara na pepa ka vakamacalataka na ivakarau e rawa ni ra vakaraitaka kina na yalovinaka vua na tamata oya.

Laga vata kei ira na gone “Jesus Said Love Everyone” kei na “Kindness Begins with Me,” Children’s Songbook, 61, 145. Wasei ira yarua na gone me ra veisa, ka sureta na veisa yadua me vakasamataka e vica na sala e rawa ni ra vakaraitaka kina na loloma kei na yalovinaka vei ira tale eso. Sureti ira na veisa yadua mera wasea ena kalasi na nodra nanuma.

Sureti ira na gone me ra vola na ivakarau eso e rawa ni ra vakaraitaka kina na loloma vei ira na tani ena tikinipepa lalai eso. Cakava e dua na sinucodo mai na tikinipepa ka sureti ira na gone me laki liliga na sinucodo pepa ena nodra vale, me vakananuma vei ira me ra dau yalovinaka.

Wilika na Maciu 18:23–35 vata kei ira na gone; vakamacalataka ni matataka na Tamada Vakalomalagi na turaga se na tui, na dauveiqaravi e matataki keda, kei na itokani dauveiqaravi e matataki ira na dau vakacudrui keda. Tarogi ira na gone, “Na gauna cava beka a dredre kina mo vosota e dua? O qai vagalalataki iko vakacava mai na mosi ni yalo oqori? Na gauna cava beka o a gadreva kina mo vosoti ena dua na digidigi cala?”

Vakaraitaka na vidio “Forgive Every One Their Trespasses: The Parable of the Unmerciful Servant” (LDS.org) me vukei ira na gone me ra raica na italanoa vakaibalebale oqo.

Vola ena papa na fika vakalevutaki 70 × 7, ka vukei ira na gone me ra walia. Kerea e dua me wilika na Maciu 18:21–22, ka vakamacalataka ni a vakayagataka na iwiliwili oqo o Jisu me vakatavulici keda kina meda dau veivosoti e veigauna.

Solia vei ira yadua e dua na tikinipepa, ka sureti ira na gone me ra droinitaka na iyaloyalo ni dua na gone e vakasaga tiko e dua tale na gone. Qai kerei ira me ra solia nodra pepa vei koya e toka voleka ka droinitaka ena daku ni pepa vou e dua na sala e rawa ni ra veivosoti kina vei ira tale eso.

Kerei ira na gone me ra vukei iko ni vakasamataka eso na ituvaki ena gadreva kina e dua me vosota e dua tale na tamata. Sureti ira na gone me ra matanataka na ivakarau me ra veivosoti kina ena veigauna vakaoqori.

Lagata vata kei ira na gone “Help Me, Dear Father,” Children’s Songbook, 99. Vukei ira na gone me ra kila na qaqa ni sere yadua kei na veika e vakavuvulitaka vei keda me baleta na vosoti ira na tani.

Lesia vei ira na gone yadua na tiki ni italanoa vakaibalebale ni kai Samaria dauloloma mera droinitaka. Sureti ira me ra tuva vakamatau na nodra iyaloyalo ka vakayagataki ira me tukuna na italanoa.

Vakamacalataka vei ira na gone ni ra dau cati ira vakalevu na kai Samaria o ira na Jiu oya ni ra dau taubale mai Jerusalemi ki Kaleli, era dau vakatikitikitaki Samaria me ra kakua kina ni veimaliwai kei ira na kai Samaria (raica na Mape ni iVolatabu, naba 1, “Physical Map of the Holy Land”). Cava beka na vuna a vakayagataka kina o Jisu e dua na kai Samaria me ivakaraitaki ni yalo vinaka ena italanoa vakaibalebale oqo? Na cava eda vulica ena italanoa oqo me baleta na nodra vukei na vakaleqai tu? (Raica talega Mosaia 4:16–22.)

Kerei ira na gone me ra wasea e dua na gauna a vaka me kai Samaria dauloloma kina vei ira e dua.

Bolei ira na gone me ra biuta e dua na takete me ra vaka na kai Samaria dauloloma ena macawa oqo. Me ivakaraitaki, era kila beka e dua e tauvimate se galili? se dua beka e sega ni dau mai lotu wasoma? Tarogi ira na gone me ra na vukea vakacava na tamata oqori.