1 Korintasve 14–16

Përsëriteni disa herë me fëmijët frazën vijuese: “Të gjithë do të ngjallën në Krishtin” (1 Korintasve 15:22). Paraqitni një figurë të Shpëtimtarit të ringjallur (shih përvijimin e mësimit të kësaj jave tek Eja, Më Ndiq – Për Individët dhe Familjet). Shpjegoni që një ditë ne do të vdesim, por ngaqë Jezusi u ringjall, ne të gjithë do të kthehemi në jetë pasi të vdesim.

Përdorni një mësim me sende si ky për të dhënë mësim rreth Ringjalljes: Paraqituni fëmijëve një xhaketë, që përfaqëson trupat tanë fizikë. Kur jemi gjallë, shpirtrat tanë janë në trupat tanë dhe trupat tanë mund të lëvizin (visheni xhaketën). Kur vdesim, shpirtrat tanë i lënë trupat tanë fizikë dhe trupat tanë nuk mund të lëvizin (hiqeni xhaketën dhe vendoseni në një tavolinë ose karrige për të përfaqësuar një trup pa shpirtin e tij). Kur ringjallemi, shpirtrat tanë iu kthehen trupave tanë (visheni përsëri xhaketën) dhe ata nuk ndahen më kurrë. Lërini fëmijët që me radhë ta veshin dhe ta heqin xhaketën ndërsa një fëmijë tjetër shpjegon atë çfarë ndodh kur ringjallemi.

Ndihmojini fëmijët të mendojnë për gjëra që nuk mund t’i bëjnë dot vetë (të tilla si të mbajnë diçka të rëndë ose të zgjaten për të kapur diçka në një raft të lartë). Kush i ndihmon ata që t’i bëjnë këto gjëra? Paraqitni një figurë të një prej paraardhësve tuaj që vdiq pa u pagëzuar. Flituni fëmijëve për këtë person, dhe shpjegoni se ky person nuk mund të pagëzohet pa ndihmë nga një person në tokë.

Pyetini fëmijët nëse kanë ndonjë pjesëtar të familjes që ka qenë në tempull për të kryer pagëzime për të vdekurit. Paraqitni figura të një vaske pagëzimi në tempull. A e dinë fëmijët se çfarë ndodh këtu? Shpjegoni se në tempull ne mund të pagëzohemi për njerëzit që kanë vdekur pa u pagëzuar. Atëherë ata njerëz mund të zgjedhin që ta pranojnë apo jo pagëzimin.

Shkruani në tabelë çelestiale, terrestriale dhe telestiale. Ndihmojini fëmijët të mësojnë që t’i thonë këto terma.

Paraqitni figura të diellit, hënës dhe yjeve. Cili ndriçon më shndritshëm? Lexojuni fëmijëve 1 Korintasve 15:40–41 (shih edhe Përkthimi prej Joseph Smith-it, 1 Korintasve 15:40, Udhëzuesi për Shkrimet e Shenjta, [f. 236]). Shpjegoni se dielli, hëna dhe yjet përfaqësojnë mbretëritë në të cilat ne mund të jetojmë pasi të ringjallemi. Në mbretërinë çelestiale, ne mund të jetojmë me Atin Qiellor.

Vizatojeni diellin në tabelë dhe vendosni në dysheme copa të vogla letre, të cilat përfaqësojnë hapa, që çojnë drejt diellit. Secila letër mund të përfaqësojë diçka që kemi nevojë të bëjmë për të hyrë në mbretërinë çelestiale (shih DeB 76:50–53). Lejojini fëmijët të tregojnë ide dhe të ndërmarrin hapa drejt mbretërisë çelestiale.

Ftojini fëmijët që me radhë t’i lexojnë vargjet te 1 Korintasve 15:12–22, duke kërkuar përgjigje për pyetjen: “Çfarë do të ndodhte nëse nuk do të kishte ringjallje?”

Ftojini fëmijët ta interpretojnë me role mënyrën se si t’ia shpjegojnë ringjalljen një personi. Për ide, shih mesazhin e Tomas S. Monsonit “Zonja Pejtën – Historia Vazhdon” (Ensign ose Liahona, nëntor 2007, f. 21–24). Shih edhe materialin filmik “Until We Meet Again” [“Kur Prap’ t’Takohemi”] (LDS.org). Jepni dëshminë tuaj për Ringjalljen e Jezu Krishtit.

Lexojini 1 Korintasve 15:29. Çfarë po bënin shenjtorët në kohën e Palit që e bëjmë edhe ne sot?

Pyetini fëmijët për arsyen përse pagëzohemi për të vdekurit. Nëse është e nevojshme, shpjegoni se shumë prej paraardhësve tanë nuk e patën mundësinë që të pagëzoheshin dhe konfirmoheshin gjatë kësaj jete. Në tempull, ne mund të pagëzohemi dhe konfirmohemi për ta.

Disa ditë përpara orës mësimore, kërkojini një prindi të njërit prej fëmijëve që të vijë i përgatitur për të folur për pemën e tij apo të saj familjare, ose të tregojë një histori rreth një paraardhësi. Ju gjithashtu mund të flisni për vetë paraardhësit tuaj.

Ftojeni një anëtar të peshkopatës të tregojë disa gjëra që mund t’i bëjnë fëmijët, për të qenë të denjë për të hyrë në tempull. Pyetini fëmijët se çfarë mund të bëjnë ata për t’u kujtuar që t’i bëjnë këto gjëra. Shkruajini në tabelë idetë e tyre. Ftojini që të vendosin një qëllim për të shkuar në tempull një ditë.

Lexojini 1 Korintasve 15:40–41 dhe ftojeni një fëmijë ta vizatojë diellin, hënën dhe një yll në tabelë. Kërkojuni anëtarëve të klasës të përcaktojnë se cili lloj trupi i ringjallur simbolizohet nga secili vizatim.

Këndoni së bashku një kënge rreth tempujve, të tillë si “The Lord Gave Me a Temple” [“Zoti Më Dha një Tempull”], (Children’s Songbook [Libri i Këngëve të Fëmijëve], f. 153). Çfarë na mëson kjo këngë rreth përgatitjes për të jetuar në lavdinë çelestiale?

Shpjegoni se Jozef Smithi pati një vegim në të cilin ai pa tri mbretëritë të cilat përputheshin me llojin e trupave qiellorë që përshkroi Pali. Ndihmojini fëmijët të gjejnë fraza nga Doktrina e Besëlidhje 76:50–53, 70; 76:71–79; 76:81–82, të cilat i përshkruajnë këto tri mbretëri.