Alema 13–16

• Atonu ua maua e nisi o tagata o lau vasega se mea ua faalolotoina ai lo latou talisapaia o le perisitua a o latou suesueina le Alema 13. Valaaulia i latou e faasoa mai mea na latou maua. E mafai foi ona outou faitauina faatasi ia fuaiupu 2 ma le 16 ma fai se fesili e pei o le “Ua fesoasoani faapefea le perisitua ma ona sauniga ia te oe e ‘vaavaai atu ai i le Alo [o le Atua] mo le togiolaina?’” Afai e aoga, e mafai ona maua se lisi o sauniga i le Faamaoni i le Faatuatua, 109–10.

  Ata

  alii talavou i le laulau faamanatuga.

• E toatele tagata i Amonaea sa mulimuli ia Neoa, o le sa aoao atu manatu sese e uiga i le matafaioi o faitaulaga. Ina ia fesoasoani i le vasega e aoao e uiga i le natura moni o le perisitua, e mafai ona e fesili ia i latou e faatusatusa le eseesega o le vaaiga a Neoa i mea e ao ona faia e faitaulaga (tagai Alema 1:3–6) i mea na aoao mai e Alema (tagai Alema 13:1–12). O a ni auala e tali tutusa ai aoaoga a Neoa ma manatu o le lalolagi e uiga i le mana ma le taitaiga? E eseese faapefea aoaoga a Alema?

• O le faitauina o le Alema 13:1--19 e mafai ona taitai atu ai i se talanoaga e uiga i le “saunia mai le faavaega o le lalolagi” mo o tatou tiutetauave i le galuega a le Alii. O a mea o fautuaina mai i le Alema 13:3 e uiga i le ala e tatau ona tatou vaai atu ai pe taulima nei tiutetauave? (tagai foi MF&F 138:56).

• Na aoao mai e Alema e faapea e fesoasoani le perisitua ia i tatou e “ulu atu ai i le malologa o le Alii” (Alema 13:16). Ina ia amatalia se talanoaga e uiga i lea manatu, e mafai ona e fai i tagata o le vasega e faitau le Alema 13:6, 12–13, 16, ma le 29 ma faasoa mai po o a mea o aoao mai e nei fuaiupu e uiga i “le malologa o le Alii.” E mafai foi ona latou faailoa maia uiga o tagata o e “ulu atu i le malologa o le Alii.” O le a se mea e mafai ona tatou faia ia tatou oo ai i le malologa o le Alii i le taimi o o tatou olaga i le tino nei?

• Alema 14 e mafai ona avea o se avanoa e talanoaina ai pe mafai faapefea ona tatou tali faamaoni atu pe a tatou feagai pe feagai a tatou pele ma sauaga po o tofotofoga tusa lava pe o tatou taumafai ia amiotonu. E mafai ona e amata i le valaaulia o tagata o le vasega e manatu faapea o i latou o ni tusitala o loo lipotia se mea na tupu i le Alema 14. O a ituaiga o fesili e mafai ona latou fesili ai ia Alema po o Amoleka e uiga i le mea na tupu? Mo se faataitaiga, “Aisea na faataga ai e le Alii oe ma isi tagata amiotonu ina ia mafatia?” pe “O lea se fautuaga e te tuuina atu mo i latou o loo feagai ma tofotofoga faigata?” E faavae i mea ua tatou iloa mai le Alema 14, mata e faapefea ona tali e Alema ma Amoleka nei fesili?

• O le toatele o i tatou e mafai ona fesootai i le ala na lagonaina e Amoleka ina ua ia molimauina le mafatia o tagata faatuatua o Amonaea: o i tatou “foi [e] tiga” (Alema 14:10), ma e tatou te moomoo maimau pe ana mafai ona tatou faia se mea i ai. O le a se mea ua tatou aoaoina mai i le tala a Alema i lea tulaga? (tagai Alema 14:8–13). E mafai ona e faasoa atu le saunoaga mai ia Peresitene Spencer W. Kimball i le “Punaoa Faaopoopo.” Atonu e mafai e tagata o le vasega ona aotele mai le savali autu o le saunoaga a Peresitene Kimball ia latou lava upu.

• O le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga o loo fautuaina ai le faia o se lisi o mea na lafoai e Amoleka ma mea na ia mauaina ina ua ia talia le talalelei. Atonu o le a loto le vasega e faasoa mai lisi sa latou fatufatuina, pe e mafai foi ona latou faia ia lisi i le vasega. E mafai ona fesoasoani mau nei: Alema 10:4–5; 15:16, 18; 16:13–15; ma le 34:8. Aisea na loto ai Amoleka e fai nei osigataulaga? Aisea tatou te loto ai e faia o lea? E mafai faapefea ona tatou mulimuli i le faataitaiga a Alema, o le na “faamalosia [Amoleka] i le Alii”?

• Alema 16 o loo aumaia ai faataitaiga o se tasi o le sa faatuatuaina se perofeta ma tagata sa lei faia. Ina ia fesoasoani i tagata o le vasega e aoao mai nei faataitaiga, e mafai ona e tusia i luga o le laupapa ia ulutala e lua: Sorama, ma le Nuu o Amonaea. E mafai e tagata o le vasega ona faitauina le Alema 16:1--10 ma tusi i lalo o ulutala taitasi ia upu ma fasifuaitau o loo faamatala ai le uiga faaalia o nei tagata agai i upu a le perofeta o Alema. O a ni mea o tatou faia e faaali atu ai i le Tama Faalelagi tatou te faatuatua i upu a perofeta soifua?

Sa saunoa i se taimi ia Peresitene Spencer W. Kimball e uiga i le anoanoai o mala e matuai matautia o loo tutupu i le lalolagi:

“Mata e mafai e le Alii ona papupunia nei mala? O le tali o le, Ioe. O le Alii e mamana, o loo i ai le mana uma e pulea ai o tatou olaga, faasaoina i tatou mai tiga, puipuia faalavelave faafuasei uma, … e oo lava i le [puipuia o i tatou] mai le oti, pe afai e finagalo ai. Ae o le a Ia le faia o lea. …

“Afai e faamaloloina ma’i uma o e tatou te talosia, afai e puipuia tagata amiotonu uma ma faaumatia tagata leaga, o le a leai se aoga o le polokalama atoa a le Tama ma o le a faamuta ai foi ma le mataupu faavae o le talalelei, o le filifiliga saoloto. Semanu o le a leai se tagata e ola i le faatuatua. …

“… Afai o le a tatou tapunia faitotoa i luga o le faanoanoa ma le le fiafia, atonu o le a tatou tavavaeeseina atu a tatou uo silisili ma e e faamanuiaina ai. O puapuaga e mafai ai ona faapaiaina tagata a o latou aoao e onosai, talitiga, ma pulea e i latou ia latou lava. …

“… Ou te faafetai aua e oo lava e ala i le perisitua e le mafai ona ou faamaloloina ma’i uma. Atonu e mafai na ou faamaloloina tagata ua ao ona oti. Atonu ou te faamapuina tagata mai mafatiaga ia e ao ona latou mafatia ai. Ou te fefe ona o le a ou faalavelave i faamoemoega o le Atua.

“Ana faapea e iai sou mana e leai sona gataaga, e ui ina lata mai le vaai ma le malamalama, atonu ou te faasaoina Apinati mai le mumu o le afi na faaumatia ai o ia, ma e o le faia o lea mea ua le taofia ai lou faaleagaina o ia. Sa maliu fasia o ia ma sa ulufale atu o ia i le taui o se maturo---faaeaga.

“Semanu ou te puipuia Paulo mai ona tiga pe ana faapea e leai se tuaoi o lo’u mana. Semanu ou te faamaloloina moni o ia mai ona ‘mea matuitui o le tino.’ [2 Korinito 12:7.] Ma o le faia o lena mea, semanu ou te faalavelave ai i le polokalama a le Alii. …

“Ou te fefe aua pe ana ou i ai i le Falepuipui o Karefasi i le aso 27 Iuni, 1844, semanu ou te seueseina ia pulufana sa ati i le tino o le Perofeta [o Iosefa Samita] ma le Peteriaka o [Ailama Samita]. Semanu ou te faasaoina i la’ua mai mafatiaga ma tiga, ae o la le mauaina ai le taui o le maliu faamaturo. …

“Faatasi ai ma se mana e le mapuleaina, semanu ou te lagonaina moni lava e tatau ona puipuia Keriso mai puapuaga i Ketesemane, o mea faatiga, o le pale tuitui, o le le mafaufau o le faamasinoga, ma manu’a o le tino. Semanu ou te fesoasoani atu i ona manu’a ma faamaloloina, avatu ia te ia se vai malu nai lo le vineta. Semanu ou te faasaoina o ia mai mafatiaga ma le maliu, ma le mauaina ai e le lalolagi lana taulaga togiola. …

“I le vaaiga i mala o tutupu ua manino mai ai le tatau ona tatou faalagolago i le Atua, ma le iloa e ui ina lata mai la tatou vaai, o le a le toilalo lava ona faamoemoega” (Aoaoga a Peresitene o le Ekalesia: Spencer W. Kimball [2006], 14–17, 20).