« សេចក្ដីណែនាំស្ដីពីចំណេះចំណានខាងគោលលទ្ធិ » ឯកសារគោលនៃចំណេះចំណានខាងគោលលទ្ធិ ( ឆ្នាំ ២០២១ )
« សេចក្ដីណែនាំ » ឯកសារគោលនៃចំណេះចំណានខាងគោលលទ្ធិ
សេចក្តីណែនាំស្តីពីចំណេះចំណានខាងគោលលទ្ធិ
នៅក្នុងព្រះគម្ពីរមរមន ព្យាការីហេលេមិនបានបង្រៀនកូនប្រុសរបស់លោកថា « គឺនៅលើសិលានៃព្រះដ៏ប្រោសលោះនៃយើង គឺព្រះគ្រីស្ទ ជាព្រះរាជបុត្រានៃព្រះ ដែលកូនត្រូវសង់គ្រឹះរបស់កូន » ( ហេលេមិន ៥:១២ ) ។ ការសង់គ្រឹះមួយនៅលើព្រះយេស៊ូវគ្រីស្ទ—ដែលរួមមានទាំងការយល់ ការជឿ និងការរស់នៅស្របតាមគោលលទ្ធិរបស់ទ្រង់—នឹងធ្វើឲ្យការផ្លាស់ប្រែចិត្តជឿ និងការតាំងចិត្តរបស់យើងក្នុងនាមជាសិស្សរបស់ទ្រង់កាន់តែស៊ីជម្រៅ ការពារយើងពីឥទ្ធិពលរបស់មារសត្រូវ ហើយជួយយើងឲ្យផ្ដល់ពរដល់ជីវិតរបស់មនុស្សដទៃទៀត ។
វិធីមួយដែលយើងសម្រេចបានកិច្ចការនេះ គឺតាមរយៈការសិក្សាបទគម្ពីរតាមលំដាប់លំដោយជាមួយគ្នានៅក្នុងថ្នាក់ ។ វិធីមួយទៀតដែលយើងសង់គ្រឹះរបស់យើងលើព្រះយេស៊ូវគ្រីស្ទ និងគោលលទ្ធិរបស់ទ្រង់ គឺតាមរយៈកិច្ចខិតខំមួយដែលហៅថាចំណេះចំណានខាងគោលលទ្ធិ ។
ចំណេះចំណានខាងគោលលទ្ធិផ្ដោតទៅលើលទ្ធផលចំនួនពីរ ៖
-
រៀន និង អនុវត្តគោលការណ៍ដ៏ទេវភាពទាំងឡាយដើម្បីទទួលបានចំណេះដឹងខាងវិញ្ញាណ ។ ព្រះវរបិតាសួគ៌បានបើកសម្ដែងគោលការណ៍ទាំងឡាយដើម្បីទទួលបានចំណេះដឹងខាងវិញ្ញាណ ។ គោលការណ៍ទាំងនេះរួមមានទាំងការធ្វើសកម្មភាពដោយសេចក្ដីជំនឿ ការពិនិត្យមើលគោលគំនិត និង សំណួរទាំងឡាយដោយទស្សនវិស័យដ៏អស់កល្បមួយ និងការស្វែងរកការយល់ដឹងបន្ថែមតាមរយៈប្រភពដែលបានតែងតាំងដ៏ទេវភាព ។ យើងចេះចំណេះចំណានខាងគោលលទ្ធិកាន់តែខ្លាំង នៅពេលយើងអនុវត្តគោលការណ៍ទាំងនេះទាំងនៅក្នុងថ្នាក់រៀន និង ក្រៅថ្នាក់រៀន ហើយស្វែងរកចម្លើយចំពោះសំណួរខាងគោលលទ្ធិ សំណួរផ្ទាល់ខ្លួន សំណួរពីសង្គម និង សំណួរខាងប្រវត្តិសាស្ត្រនានាតាមរបៀបមួយ ដែលយាងអញ្ជើញព្រះវិញ្ញាណបរិសុទ្ធឲ្យជួយពង្រឹងសេចក្ដីជំនឿរបស់យើងទៅលើព្រះយេស៊ូវគ្រីស្ទ និងគោលលទ្ធិរបស់ទ្រង់ ។
-
ចេះចាំវគ្គបទគម្ពីរចំណេះចំណានខាងគោលលទ្ធិ និង គោលលទ្ធិនៃដំណឹងល្អរបស់ព្រះយេស៊ូវគ្រីស្ទ ដែលវគ្គបទគម្ពីរនោះបង្រៀន ។ លទ្ធផលនេះសម្រេចបានដោយសារ ៖
-
ការស្គាល់គោលលទ្ធិដែលបានបង្រៀននៅក្នុងវគ្គបទគម្ពីរចំណេះចំណានខាងគោលលទ្ធិ ។
-
ការពន្យល់គោលលទ្ធិបានច្បាស់ៗ ដោយប្រើវគ្គបទគម្ពីរចំណេះចំណានខាងគោលលទ្ធិដែលទាក់ទង ។
-
ការអាចចងចាំ និង រកឃើញទីតាំងវគ្គបទគម្ពីរចំណេះចំណានខាងគោលលទ្ធិ ហើយទន្ទេញចាំឃ្លាបទគម្ពីរគន្លឹះ ។
-
ការអនុវត្តគោលលទ្ធិនៃដំណឹងល្អរបស់ព្រះយេស៊ូវគ្រីស្ទ និង គោលការណ៍ទាំងឡាយនៃការទទួលបានចំណេះដឹងខាងវិញ្ញាណក្នុងការជ្រើសរើសប្រចាំថ្ងៃរបស់យើង និង ក្នុងការឆ្លើយតបចំពោះសំណួរ និង បញ្ហាផ្ទាល់ខ្លួន ខាងគោលលទ្ធិ ខាងសង្គម និង ខាងប្រវត្តិសាស្ត្រនានា ។
-