“E na sereki iko na dina,” Me iSakisaki ni iTabagone: iDusidusi ni Vakayaco Digidigi (2022)
“E na sereki iko na dina,” Me iSakisaki ni iTabagone
E na sereki iko na dina.
Joni 8:32
Na Tamamu Vakalomalagi sa Kalou ni dina. Sa kila na ka kecega. Na dina taucoko e lako mai Vua ka na mua yani Vua. O na vakaraitaka ni o vakamareqeta na dina ni o vakasaqara na vuli, bula ena yalodina, ka tutaka e na yaloqaqa na veika e dodonu—kevaka sara mada ga mo na tu taudua kina.
Dina tawamudu
Na Tamada Vakalomalagi e vinakati ira na Luvena yalewa kei na tagane me ra vuli-ka tikoga. E tiko ruarua vei iko na inaki vakayago ka vakayalo mo vakasaqara ka taleitaka kina na vuli-ka. Na vuli e sega walega ni baleta na kena rawati na ilavo. E sa tiki ni nomu lalawa tawamudu mo yaco mo vakataka sara na Tamada Vakalomalagi.
Na bula e na dina e kena ibalebale ni ko taleitaka na dina e na yalomu taucoko—ka levu cake mai na nomu taleitaka na vakacegu, na kilai levu, se na veika rawarawa. E kena ibalebale me vakayacori na ka dodonu baleta ga ni dodonu me caka vakakina.
E tiko e dua na ka vakamareqeti mo wasea. Na kosipeli i Jisu Karisito e tu kina na isau ni taro ni bula. Sa sala ni veivakacegui kei na bula marau. O na sega beka ni kila na veika kecega, ia o kila vakarauta mo vukei ira kina na tani me ra kila ka vakamareqeta na ivakavuvuli e dina, ka tawamudu.
Veisureti
Mo dau vuli-ka tikoga. Vakaraica na madigi mo vakarabailevutaka kina na nomu vakasama kei na nomu kila-ka. Na madigi oqo e rawa ni oka kina na vuli vakaivolataki e koronivuli se vuli cakacaka ka vakakina na vuli mamada mai na ivurevure o vakararavi kina. Vakaitavitaka na Turaga ena nomu sasaga, ka na dusimaki iko o Koya. Ni o vulica na veika e baleta na vuravura wavoliti iko, vulica talega na veika me baleta na iVakabula, o koya a bulia na vuravura. Vulica na Nona bula kei na ivakavuvuli. Vulica na semineri, inisitute, kei na vulici ni kosipeli yadua ka me sa nomu tiki ni bula taucoko vakavuli.
Taleitaka vakalevu na dina o na sega kina ni via butako, lasu, lawaki, se veivakacalai ena sala cava ga—e koronivuli, e na cakacaka, initaneti, e na veivanua kecega. Mo tisaipeli yalodina i Jisu Karisito e matanalevu se vakatikitiki.
Mo rarama ki vei ira tale e so. Me vakavotukanataka na nomu vosa kei na nomu ivalavala na nomu vakabauti Jisu Karisito. Vakavakarau e na gauna oqo me baleta na madigi e so ni veisiga ni mataka mo wasea kina na Nona kosipeli lagilagi, vakadaukaulotu kei na nomu bula taucoko. Ka vakarau mo tukuna vua e dua e tarogi iko me baleta na inuinui kei na marau o vakila.
Kalougata yalataki
Na vuli e vakalevutaka cake na nomu rawa ni qarava na Turaga. E vakaukauwataki iko mo vakalougatataki ira na tani, vakabibi na nomu matavuvale. Na levu ga ni nomu vuli, na levu ni nomu rawa ni veivuke e na kena tarai cake na matanitu ni Kalou ka vakauqeta na vuravura me vinaka.
Na dina e kauta mai na vakacegu kei na nomu dokai iko vakai iko. Ni salavata na nomu vosa kei na ivalavala ki na dina, o na vakaraitaka ni rawa ni o nuitaki—mai vei ira na tamata tale e so kei na Turaga.
Ni ko tutaka na ivakavuvuli i Jisu Karisito, e na tu vata kei iko o Koya. E so e ra na sega beka ni duavata kei iko, ia na nomu yaloqaqa kei na yalodina e na kilai. Ke ra muria se sega na nomu ivakaraitaki, e na tubu na nomu ivakadinadina, yalodei, kei na vakabauti Karisito.
Taro kei na isaunitaro
E cala beka ni tiko na vakatataro me baleta na Lotu? Me‘u na kunea vakacava na isaunitaro? Na vakatataro e sega ni ivakatakilakila ni malumalumu se tawavakabauta. Na kena dina, na tarogi ni taro e rawa ni vukea na tarai cake ni vakabauta. A tekivu na Vakalesui mai ni kosipeli ena gauna e a taro kina e na vakabauta na gonetagane yabaki 14 o Josefa Simici. Vakasaqara na isaunitaro e na ivolanikalou, e na nodra vosa na parofita ni Kalou, mai vei ira na nomu iliuliu kei na itubutubu yalodina, kei na Kalou Vakaikoya. Kevaka e sega ni yaco mai vakasauri na kena isau, nuitaka ni ko na vulica vakamalua. Bulataka tikoga na veika o sa kila oti tu, ka vakasaqara tikoga na dina.
Me‘u na tutaka vakacava na ka dodonu ka sega ni vakacudrui ira e ra duidui na nodra vakabauta? Tekivu e na nomu vakadeitaka ni sa vakauqeti na nomu vosa kei na nomu ivalavala e na nomu lomana na Kalou kei ira na Luvena. Na wasei ni kosipeli e sega ni dodonu me vakayacori e na yalo ni veileti ia me caka ena yalo savasava, yalomalua, kei na yalovinaka. E rawa ni o lomani ira na tamata kevaka sara mada ga o sega ni duavata kei na nodra nanuma.
Raica na Maciu 5:14–16 (me ramase na nomudou cina); Joni 14:6 (Sai Jisu na dina); 1 Pita 3:15 (mo dau tu vakarau mo wasea nomu nuitaki Karisito); Vunau kei na Veiyalayalati 88:77–80 (na veika e vinakata vei keda na Turaga meda vulica); 93:36 (na lagilagi na vuku); 124:15 (na veika dodonu sa kena ibalebale na taleitaka na veika dodonu); 130:18 (na noda vuku ena tucake vata tale kei keda ni da sa tucaketale).
Taro ni ivolatara ni valetabu
O dau saga beka mo dina e na ka kecega o vakayacora?