Pakagupgopan ti Pakauna

Insuro ti Apo, “Adalen koma ti tunggal tao ti pagrebbenganna, ken agtignay iti takem a nakaitudinganna, iti amin a kinaregta” (Doktrina ken Katulagan 107:99). Kas maysa a lider iti Ti Simbaan ni Jesucristo dagiti Santo iti Ud-udina nga Aldaw, nasken nga agkalikagumka a manggun-od iti personal a paltiing a makatulong kenka a mangsursuro ken mangipatungpal kadagiti pagrebbengan ti calling-mo.

Ti panagadal kadagiti nasantuan a kasuratan ken pannursuro dagiti propeta iti ud-udina nga aldaw ket makatulongto kenka a mangawat ken mangipatungpal kadagiti pagrebbengam. Bayat ti panagadalmo kadagiti balikas ti Dios, ad-addanto a managawatka iti impluensia ti Espiritu (kitaen iti Doktrina ken Katulagan 84: 85).

Mabalinmo met ti mangsursuro kadagiti pagrebbengam babaen ti panagadal kadagiti pangiturong iti daytoy a handbook. Mabalin a mangawis dagitoy a pangiturong iti paltiing no mausarda a mangipaay iti pannakaawat kadagiti pagbatayan, annuroten, ken wagas [procedures] a pangyaplikar kabayatan ti panagkalikagum a manggun-od iti pannarabay ti Espiritu.

Ti Sapasap a Handbook: Panagserbi iti Ti Simbaan ni Jesucristo dagiti Santo iti Ud-udina nga Aldaw ket mangipaay iti pannarabay para kadagiti sapasap ken lokal a lider iti Simbaan.

Nanumeruan dagiti heading ken subheading iti daytoy a handbook tapno nalaka a masarakan ken agibasar kadagiti topiko. Kas pagarigan, ti instruksion maipapan no asino ti mailantip iti templo ket maited iti 27.3.1. Ti numero 27 ket maibasar iti kapitulo, ti numero 3 ket maibasar iti maysa a benneg iti dayta a kapitulo, ken ti numero 1 ket maibasar iti maysa a subsection.

Saan nga agpapada dagiti kasapulan ti amin a stake ken ward.

Agkalikagum a manggun-od dagiti lider iti pammaregta maipapan no ania a pangiwanwan ken opsional a resources ti mausar a mangipaay iti kasapulan dagiti miembro.

No adda dagiti saludsod a saan a marisut kadagiti nasantuan a kasuratan, dagiti balikas dagiti sibibiag a propeta, wenno daytoy a handbook, nasken nga agpannuray dagiti miembro ti Simbaan kadagiti katulaganda iti Dios, iti balakad dagiti lokal a liderda, ken iti pammaregta ti Espiritu para iti pannarabay.

No adda saludsod dagiti lider maipapan iti impormasion iti daytoy a handbook wenno maipapan kadagiti isyu a di marisut, agpabalakadda iti kaasitgan a mangimatmaton a dadauloda [presiding authority].

Malaksid laeng no nadakamat ti lugar:

• Dagiti balikas a bishop ken bishopric iti daytoy a handbook maibasar met kadagiti branch president ken branch presidency. Dagiti balikas a stake president ken stake presidency maibasar met kadagiti district president ken district presidency. Para iti pakagupgopan ti no kasano a maigiddiat ti turay dagiti district president iti turay dagiti stake president, kitaen iti 6.3.

• Dagiti panangibasar kadagiti ward ken stake ket gagangay a mayaplikar met kadagiti branch, district, ken mision.

• Dagiti panangibasar iti Domingo ket mayaplikar iti no ania nga aldaw ti Sabbath ti masurot iti lugar.

• Ti termino a unit ket maibasar kadagiti ward ken branch.

• Dagiti panangibasar kadagiti nagannak ket gagangay a mayaplikar met kadagiti legal nga agay-aywan [guardian].

Saan nga agpada dagiti calling ti bishop ken branch president iti turay ken pagrebbengan, kasta met a saan nga agpada dagiti calling ti stake president ken district president. Ti bishop ket maysa a pagtakeman [office] iti priesthood, ken maawtorisado laeng ti panagorden babaen ti Umuna a Panguluen. Awagan dagiti General Authority ken Area Seventy dagiti stake president.

Iraman ti sumagmamano a kapitulo iti daytoy a handbook dagiti instruksion iti panangkontak kadagiti headquarters ti Simbaan wenno ti area office. Mayaplikar ti instruksion iti panangkontak kadagiti headquarters ti Simbaan kadagiti adda iti United States ken Canada. Mayaplikar ti instruksion iti panangkontak iti area office kadagiti adda iti ruar ti United States ken Canada.