Mme Nwed Ndutum ye mme Ikoot
2. Edinwam Mme owo ye Ufɔkemana ke Utom Erinyaŋa-ukpɔŋ ye Edimenede

“2. Uduak Abasi ye Ubiɔŋ Fo ke Utom Erinyaŋa-ukpɔŋ ye Edimenede,” Se Emekde eto Ofuri Ŋwed Ndutum (2023).

“2. Utom Erinyaŋa-ukpɔŋ ye Edimenede,” Se Emekde eto Ofuri Ŋwed Ndutum

Ndise
ndise eke ufɔkemana

2.

Edinwam Mme owo ye Ufɔkemana ke Utom Erinyaŋa-ukpɔŋ ye Edimenede

2.0

Ntɔŋɔ

Nte adausuŋ ke Ufɔk Abasi Jesus Christ, afo eyenwam mme owo ye ufɔkemana ke ndinam utom Abasi eke erinyaŋa-ukpɔŋ ye edimenede okure (seke 1.2). Akpatre uduak eke utom emi edi ndinwam kpukpru nditɔ Abasi ebɔ mme edidiɔŋ eke nsinsi uwem ye uyɔhɔ idara.

Enam ediwak utom eke erinyaŋa-ukpɔŋ ye edimenede ekure ke ufɔkemana. Eke ofuri mbon Ufɔk Abasi, utom emi ɔkɔŋɔ ke ufɔkiduŋ.

2.1

Ubiɔŋ eke Ufɔkemana ke Uduak Abasi

Nte ubak-ŋkpɔ eke uduak Esie, Ete Heaven ama asiak mme ufɔkemana enim ke isɔŋ. Enye aduak ete mme ufɔkemana enɔ nnyin inemesit. Mme ufɔkemana enɔ nti-ifet ke ndibɔ-ukpep, nkɔri, nnwam, nkabarae-esit, nyuŋ, mfen-nnɔ. Mmɔ ekeme edinwam nnyin ibeŋe-idem inɔ nsinsi uwem.

Enwɔŋɔ Abasi kabaŋa nsinsi uwem esine nsinsi ndɔ, nditɔ, ye kpukpru mme edidiɔŋ eken eke nsinsi ufɔkemana. Enwɔŋɔ emi edi ɔnɔ mbon emi midɔhɔ ndɔ idahaemi mme eke minyeneke ufɔkemana ke Ufɔk Abasi.

2.1.1.

Mme Nsinsi Ufɔkemana

Enam mme nsinsi ufɔkemana kini mbon Ufɔk Abasi enamde ediomi ke nte mmɔ ebɔde mme edinam edidian-kiet ke temple. Edinyene mme edidiɔŋ eke nsinsi ufɔkemanake nte mbon ufɔk Abasi enimde ediomi oro enyuŋ ekabare-esit kini mmɔ enamde ndudue. Mme adausuŋ Ufɔk Abasi enwam mbon ufɔk Abasi ebeŋe-idem man ebɔ mme edinam emi enyuŋ ekpono ediomi mmɔ.

Ndadiana nkpɔ efen ke edisiak nsinsi ufɔkemana edi edinam mme edinam ke temple emi ayakde mbon ufɔk Abasi man edian mmɔ enɔ mbon ntɔŋɔ-ubon mmɔ emi ekekkpade.

2.1.2.

Ebe ye Ŋwan

Abasi ekemek ndɔ ke ufɔt eren ye ŋwan enim (seke Doctrine ye Covenants 49:15). Eyom ebe ye ŋwan ekɔri ɔtɔkiet ekesim nsinsi uwem (seke Akpa Ŋwed Mbon Corinth 11:11).

Kiet kotu nkpɔ emi eyomde man ɔbɔ nsinsi uwem edi ke erenowo ye ŋwan enyene ediduk ediomo eke ndɔ celestial see Doctrine ye Covenants 131:1–4). Ebe ye ŋwan enam ediomi emi kini mmɔ ebɔde edinam edidian ndɔ ke temple. Ediomo emi edi itiat-idak-isɔŋ eke nsinsi ufɔkemana. Ke ini enehede enim, oro eyeyak ndɔ ebighe ke nsinsi.

Ekere ke ebuana ima ke ufɔt ebe ye ŋwan akpana eye onyuŋ edi edisana. Edi Abasi ekemek oro ɔnɔ ke edibot nditɔ ye ediwut ima ke ufɔt ebe ye ŋwan. Esitmbɔm ye ukpono—idige uma idem ikpɔŋ—akpana ekpeme ntotuŋɔ ebuana mmɔ.

Abasi ama eteme ete ke ana enim ebuana ima enɔ ndɔ ke ufɔt eren ye ŋwan.

Ebe ye Ŋwan edi ukem-ukem ke enyin Abasi. Kiet inaha nte akakara kiet eken. Ana mmɔenam ubiere mmɔ ke edidiana-kiet ye ke ima, ke ɔyɔhɔ ebuana eke mmɔ mbiba.

2.1.3.

Mme Ete ye Eka ye Nditɔ

Mme prophet eke ekpere edem usen emi ekpep ete ke “mbet emi Abasi ɔnɔde nditɔ Esie ete ewak enyuŋ etɔt osuk ododu” (“Ufɔkemana: Etop emi enɔde Ererimbot”; se nko Doctrine ye Covenants 49:16–17).

Edima ebe ye ŋwan ediana-kiet enɔ ata-eti ndaha ke edikama ye edibɔk nditɔ. Ndaha owo ekeme edikpan mme ete ye eka ke edibɔk nditɔ ɔtɔkiet. Nte ededi, Abasi eyediɔŋ mmɔ ke nte mmɔ eyomde unwam Esie enyuŋ edomo ke edinim ediomi mmɔ ye Enye.

Mme ete ye eka enyene akpan ubiɔŋ-utom ke edinwam nditɔ mmɔ ebeŋeidem man ebɔ mme edidiɔŋ eke nsinsi uwem. Mmɔ ekpep nditɔ mmɔ ete ema enyuŋ enam-nkpɔ enɔ Abasi ye mbon efen (se Matthew 22:36–40).

“Mme ete enyene edidi-ibuot ke ufɔkemana mmɔ ke ima ye edinen-ido enyuŋ enyene ubiɔŋ ke edinɔ se uwem oyomde enyuŋ ekpeme mme ufɔkemana mmɔ” (“Ufɔkemana: Etop emi enɔde Ererimbot”). Kini ebe mme ete miduhe ke ufɔkiduŋ, eka etie-ibuot ke ufɔkemana.

Editie-ibuot ke ufɔkemana edi ubiɔŋ-utom ke edinwam nda mbon ufɔkemana usuŋ mfiak nkoduŋ kiso Abasi. Enam emi ke edinwam nyuŋ mkpep ye ifure-ifure ido, suŋ-suŋ ido, ye ata ima, etienede uwunkpɔ Jesus Christ (se Matthew 20:26–28). Editie-ibuot ke ufɔkemana esine edida mbon ufɔkemana usuŋ ke edibɔŋ akam ndien-ndien, edikot ikɔ Abasi, ye mme mbiet ntuak-ibuot efen. Mme ete ye eka enam-utom ke edidiana-kiet man enam mme ubiɔŋ-utom emi ekure.

“Mme eka enehede enyene ubiɔŋ-utom ke edibɔk nditɔ mmɔ” (“Ufɔkemana: Etop emi enɔde Ererimbot”). Edikama ɔwɔrɔ edibɔk, mkpep, nyuŋ nnwam, etienede uwutnkpɔ Jesus Christ (se 3 Nephi 10:4). Ke adianade-kiet ye ebe esie, eka eyenwam ufɔkemana esie ekpep mme akpanikɔ ikɔ Abasi enyuŋ enyene mbuɔtidem ke Ete eke Heaven ye Jesus Christ. Mmɔ ɔtɔkiet enim ebiet ima ke ufɔkemana.

“Ke mme nsasana ubiɔŋ-utom emi mme ete ye eka enyene utom ke edinwam kiet eken nte ukem-ukem nsaŋa” (“Ufɔkemana: Etop emi enɔde Ererimbot”). Mmɔ ke akam eneme ɔtɔkiet enyuŋ eneme ye Abasi. Mmɔ enam ubiere mmɔ ke edidiana-kiet ye ke ima, ke ɔyɔhɔ ebuana eke mmɔ mbiba.

2.2

Utom Erinyaŋa-ukpɔŋ ye Edimenede ke Ufɔkiduŋ

First Presidency edɔhɔ ete ke, “Ufɔkiduŋ edi ntɔŋɔ eke edinen edu uwem” (First Presidency letter, Feb. 11, 1999).

Man anwam mbon ufɔk Abasi ke edi-nam utom erinyaŋa-ukpɔŋ ye edimenede ke ufɔkiduŋ, mme adausuŋ ke Ufɔk Abasi eteme mmɔ ete enim ufɔkiduŋ emi Spirit odude. Mmɔ nko eteme mbon ufɔk Abasi ete ekpono usen Sabbath, ekot enyuŋ ekpep ikɔ Abasi ke ufɔkiduŋ, enyuŋ enim mboho mbubreyo Monday kwa udua.

2.2.3.

Edikot ye Edikpep Ikɔ Abasi ke Ufɔkiduŋ

Edikot ye edikpep edi ke ufɔkiduŋ ndien Ufɔk Abasi enwa-nwam. Mme adausuŋ ke Ufɔk Abasi eteme kpukpru mbon ufɔk Abasi ete ekot ikɔ Abasi ke ufɔkiduŋ ke usen Sabbath ye ke ofuri udua.

Ewut edikot ŋwed Abasi ke Edi Etieme Mi Eke—Owo kiet-kiet ye mme Ufɔkemana emi edide ŋwed edikot ikɔ Abai ke ufɔkiduŋ.

2.2.4.

Mbono Mbubreyo ke Ufɔkiduŋ ye mme Edinam Efen

Mme prophet ekpere edem usen ema eteme mbon Ufɔk Abasi ete enim mbono mbubreyo kwa udua. Emi edi nsasana ini ɔnɔ mme owo ye ufɔkemana edikpep ikɔ Abasi, nsɔŋɔ ikɔ ntiense, mbɔp edidiana-kiet, nyuŋ ndara kiet eken.

Mbono mbubreyo emem etiene mme ndaha mbon ufɔkemana oro. Ekeme edinim oro ke usen Sabbath mme ke usen ye ini efen. Oro ekeme edisine:

  • Edikot ikɔ Abasi ye item (ekeme edikama mme ŋwed Edi, Etiene Mi ke nte enyimede).

  • Edinam-ŋkpɔ nnɔ mbon efen.

  • Edikwɔ mme edibre mme ikwɔ ye mme ikwɔ eke Primary (se ibuuot Efurenaŋ).

  • Edinwam mbon ufɔkemana ke Nkɔri Nditɔ-ŋwɔŋ ye eke Iwaad.

  • Esop ufɔkemana emi enamde mme uduak enim, ebiere mme mfina, enyuŋ ebono mme ini edinam ŋkpɔ.

  • Mme edinam mbre ɔnɔde inemesit.

Mbon ufɔk Abasi emi edide single ye mbon efen ekeme ediboho ke eboho ke midihe usen edikpono Sabbath man ebuana ke mbono mbubreyo enyuŋ esɔŋɔ kiet eken idem ke edikot ikɔ Abai.

2.2.5.

Edinwam mme Owo

Mme adausuŋ ke Ufɔk Abasi enwam mbon ufɔk Abasi emi enanade unwam eke ufɔkemana.

Mme adausuŋ ekeme edinwam mbon ufɔk Abasi emi ye mme ufɔkemana mmɔ enyene nti-ifet ke edibuana, uyɔhɔ ifiɔk ŋkpɔ-ebuana, ye nkɔri ke ŋkpɔ-spirit.

2.3

Ebuana ke ufɔt Ufɔkiduŋ ye ke Ufɔk Abasi

Utom erinyaŋa-ukpɔŋ ye edimenede ɔkɔŋɔ ke ufɔkiduŋ ndien Ufɔk Abasi enwa-nwam. Mme ido-mbet emi edi ke ebuana ke ufɔt ufɔkiduŋ ye ke Ufɔk Abasi.

  • Mme adausuŋ ye andikpep ekpono utom eke mme ete ye eka enyuŋ enwam mmɔ.

  • Ubak mme esop Ufɔk Abasi edi akpan-ŋkpɔ ke ward ye branch kiet-kiet. Emi esine esop udia-ɔbɔŋ ye mme class ye esop eboho emi enimde ke usen Sabbath. Ediwak mme esop, edinaam, ye mbubehe efen idihe ata-akpan-ŋkpɔ.

  • Edinwam nyuŋ mbuana ke utom Ufɔk Abasi oyom ata ɔyɔhɔ nwaidem. Abasi eyediɔŋ mbon ufɔk Abasi ke nte mmɔ enwamde enyuŋ ewade-idem ke Ufɔk Abasi Esie. Nte ededi, adaŋa ini esinde ke utom Ufɔk Abasi inaha nte ɔbiɔŋɔre ukeme mbon ufɔk Abasi ke edi-nam ubiɔŋ-utom mmɔ ke ufɔkiduŋ, ke itie-utom, mme ke ebiet efen nkure.