Dagiti Handbook ken Takem [Calling]
20. Dagiti Aktibidad

“20. Dagiti Aktibidad,” Dagiti Napili manipud iti Sapasap a Handbook (2023).

“20. Dagiti Aktibidad,” Dagiti Napili manipud iti Sapasap a Handbook

Ladawan
balasitang nga addaan iti water blaster

20.

Dagiti Aktibidad

20.1

Dagiti Panggep

Dagiti aktibidad ti Simbaan ti mamagguummong kadagiti miembro ti Simbaan ken dadduma pay kas “makipagili kadagiti santo” (Taga Efeso 2:19). Dagiti panggep para kadagiti aktibidad mabalinna nga iraman ti sumaganad:

  • Mangpapigsa iti pammati ken ni Jesucristo.

  • Mangipaay iti ragragsak ken mangpatanor iti panagkaykaysa.

  • Mangipaay kadagiti gundaway para iti bukod a panagdur-as.

  • Magpapigsa kadagiti indibidual ken pamilia.

  • Mangtulong kadagiti miembro a makiraman iti aramid ti pannakaisalakan ken pannakaitan-ok (kitaen iti 1.2).

20.2

Panagplano kadagiti Aktibidad

Sakbay ti panagplano iti maysa nga aktibidad, ibilang dagiti lider dagiti naespirituan ken temporal a kasapulan dagiti miembro. Agkalikagum dagiti lider a manggun-od iti pannarabay ti Espiritu no agikedkeddeng no ania a kita ti aktibidad ti makatulong a mangpennek kadagita a kasapulan.

20.2.1

Pagrebbengan para iti Panagplano kadagiti Aktibidad

Mabalin nga iplano dagiti aktibidad ti ward iti ania man kadagiti sumaganad a wagas, a maibatay kadagiti lokal a kasapulan:

  • Mabalin nga imatonan ti konseho ti ward ti panagplano.

  • Mabalin nga idutok ti konseho ti ward dagiti naitudo nga organisasion a tumulong a mangplano iti maysa wenno ad-adu pay nga aktibidad.

  • No kasapulan ken no sadino nga umdas dagiti miembro, mabalin a buklen ti bishopric ti komite dagiti aktibidad iti ward.

Para iti impormasion maipapan iti panagplano kadagiti aktibidad dagiti agtutubo, kitaen iti 10.2.1.3 ken 11.2.1.3.

20.2.2

Panangawis iti Amin a Makiraman

Nasken a tumulong iti amin dagiti agplano kadagiti aktibidad, nangnangruna kadagiti baro a miembro, saan unay nga aktibo a miembro, agtutubo, single adult, addaan iti pagkurangan, ken tattao a sabali ti pammatida.

Saan koma a mangted dagiti aktibidad iti di umisu a pakadagsenan kadagiti lider ken miembro.

20.2.3

Dagiti Pagrukodan

Nasken a makaitag-ay dagiti aktibidad ken mangyunay no ania ti “nadalus, makaay-ayo, wenno nasayaat a pakasaritaan wenno pakaidayawan” (Pagannurotan ti Pammati 1:13). Mabalin a saan a karaman kadagiti aktibidad ti ania man a maikontra kadagiti pannursuro ti Simbaan.

20.2.6

Panagpondo para kadagiti Aktibidad

Nasken a simple ti kaaduan nga aktibidad ken bassit wenno awan ti magastosda. Nasken nga aprobaran a nasapsapa ti bishopric wenno panguluen ti stake ti ania man a magastos.

Gagangay a saan koma nga agbayad dagiti miembro tapno makipaset kadagiti aktibidad. Para kadagiti annuroten ken pangiwanwan iti panangpondo kadagiti aktibidad, kitaen iti 20.6.

20.4

Komperensia dagiti Agtutubo

Mangrugi iti Enero ti tawen nga agtawenda iti 14, maawis dagiti agtutubo a lallaki ken agtutubo a babbai a makipaset a sangsangkamaysa iti komperensia dagiti agtutubo. Gagangay a maminsan iti kada tawen a maangay dagiti komperensia dagiti agtutubo iti lebel ti ward wenno stake. Mabalinda pay a maangay iti multistake wenno area level. Iti tawen a maituding dagiti agtutubo a tumabuno iti komperensia ti FSY, nasken a saan a mangangay dagiti stake ken ward kadagiti komperensia dagiti agtutubo.

Planuen ken ipatungpal ti konseho dagiti agtutubo ti ward dagiti komperensia dagiti agtutubo iti ward, iti babaen ti panangiturong ti bishopric (kitaen iti 29.2.6). Gun-oden ti bishopric ti pananganamong ti panguluen ti stake maipapan kadagiti plano para iti komperensia dagiti agtutubo iti ward.

Bayat ti panagplano dagiti lider ken agtutubo iti komperensia dagiti agtutubo, nasken a tungpalenda dagiti annuroten iti daytoy a kapitulo ken dagiti sumaganad a pangiwanwan:

  • Mabalin nga usaren ti tinawen a tema dagiti agtutubo ti Simbaan kas tema ti komperensia.

  • Mangplano kadagiti aktibidad a maitunos iti tema.

  • Manggun-od iti pananganamong ti bishopric wenno panguluen ti stake para kadagiti amin nga agsarita ken aktibidad.

  • Mangsigurado iti umdas a superbision dagiti nataengan iti amin nga oras (kitaen iti 20.7.1).

20.5

Dagiti Annuroten ken Pangiwanwan para iti Panagpili ken Panagplano kadagiti Aktibidad

20.5.1

Dagiti Aktibidad iti Komersio wenno Politika

Saan a maipalubos dagiti aktibidad a maangay para iti ania man a panggep iti komersio wenno politika (kitaen iti 35.5.2).

20.5.2

Dagiti Sala ken Musika

Iti amin a sala, ti panagkawes, panangurnos iti bagi, panagsilaw, estilo ti panagsala, liriko, ken musika ket makatulong koma iti aglawlaw a makapagtalinaed ti Espiritu ti Apo.

20.5.3

Dagiti Rabii ti Lunes

Maallukoy dagiti miembro a mangangay kadagiti aktibidad ti pamilia iti Lunes wenno iti dadduma pay nga oras. Nasken nga awan ti maangay nga aktibidad, miting, wenno serbisio ti panagbuniag iti Simbaan kalpasan ti 6:00 p.m. kadagiti aldaw ti Lunes.

20.5.5

Dagiti Agpatpatnag nga Aktibidad

Dagiti agpatpatnag nga aktibidad iti Simbaan para kadagiti nagtipon a grupo dagiti agtutubo a lallaki ken agtutubo a babbai ket nasken nga anamongan ti bishop ken ti stake president. Kasta met laeng kadagiti aktibidad para kadagiti miembro a lallaki ken babbai nga awan asawana.

Saan a maanamongan dagiti agpatpatnag nga aktibidad kadagiti meetinghouse ti Simbaan wenno paraangan ti meetinghouse.

20.5.8

Panangngilin iti Aldaw ti Sabbath

Awan ti mayiskediul a panagkamping, pasken iti ay-ayam, wenno pasken ti paglilinglingayan ti Simbaan iti Domingo. Kasta met a saan nga agbiahe dagiti grupo dagiti agtutubo ken dadduma pay a mapan wenno agawid kadagiti panagkamping wenno komperensia dagiti agtutubo iti Domingo.

20.5.10

Dagiti isasarungkar iti Templo

Naurnos dagiti isasarungkar iti templo iti lebel ti ward wenno stake iti uneg ti naituding a distrito ti templo.

20.6

Dagiti Annuroten ken Pangiwanwan para iti Panangpondo kadagiti Aktibidad

20.6.1

Dagiti Aktibidad a Mabayadan kadagiti Pondo iti Badyet iti Ward wenno Stake

Rumbeng a mausar dagiti pondo ti badyet ti ward wenno stake a mangbayad iti amin nga aktibidad—malaksid kadagiti posible nga eksepsion a nailista iti 20.6.2.

20.6.2

Panagpondo para kadagiti Kamping dagiti Agtutubo

No ti badyet ti ward wenno stake ket awanan iti umdas a pondo para kadagiti aktibidad a nailista iti baba, mabalin a kiddawen dagiti lider kadagiti participant a mangbayad iti paset wenno amin dagitoy:

  • Maysa a tinawen a napaatiddog a kamping ti Aaronic Priesthood wenno umasping nga aktibidad.

  • Maysa a tinawen a napaatiddog a kamping ti Young Women wenno umasping nga aktibidad.

  • Maysa a tinawen a day camp wenno umasping nga aktibidad para kadagiti ubbing ti Primary nga agtawen iti 8 agingga iti 11.

Saan koma a nalabes ti gastos wenno panagbiahe para iti tinawen a kamping. Ti kinakurang ti personal a pondo ket saan koma a manglapped iti maysa a miembro a makipaset.

20.6.3

Panagpondo para kadagiti Komperensia ti FSY

Mabalin a makiddaw kadagiti agtutubo nga agkontribusion iti bayad tapno tumabuno kadagiti komperensia a Para iti Pigsa dagiti Agtutubo [For the Strength of Youth] (FSY). No ti gastos ket manglapped iti maysa nga agtutubo a makipaset, mabalin nga usaren ti bishop dagiti pondo ti badyet ti ward a mangbayad iti amin wenno paset daytoy a bayad. Kitaen iti FSY.ChurchofJesusChrist.org.

20.6.5

Dagiti Pasken iti Panagurnong iti Pondo

Dagiti gastos para kadagiti aktibidad ti stake ken ward ket gagangay a mabayadan kadagiti pondo ti badyet. Nupay kasta, mabalin a palugodan ti stake president wenno bishop ti maysa a pasken ti panagurnong iti pondo [fundraising] iti kada tawen para laeng kadagiti sumaganad a panggep:

  • Tapno makatulong a mangbayad kadagiti aktibidad a nailista iti 20.6.2.

  • Tapno makatulong a gumatang kadagiti alikamen a kasapulan ti yunit para kadagiti tinawen a kamping.

20.7

Dagiti Annuroten ken Pangiwanwan iti Panagtalged para kadagiti Aktibidad

20.7.1

Superbision dagiti Nataengan

Nasken nga adda uray dua laeng a nataengan kadagiti amin nga aktibidad ti Simbaan a dar-ayan dagiti ubbing ken agtutubo. Mabalin a kasapulan ti ad-adu pay a nataengan depende iti kadakkel ti grupo, dagiti paglaingan a kasapulan iti aktibidad, wenno dadduma pay a banag. Maallukoy dagiti nagannak a tumulong.

Amin a makipagtrabaho kadagiti ubbing ken agtutubo ket nasken a leppasenda ti panagsanay iti panangsaluad kadagiti ubbing ken agtutubo. Kitaen iti ProtectingChildren.ChurchofJesusChrist.org.

20.7.2

Kasapulan nga Edad para iti Pannakiraman kadagiti Aktibidad dagiti Agtutubo

Babaen ti pananganamong dagiti dadakkelda, mabalin a dumar-ay dagiti agtutubo kadagiti kamping iti rabii mangrugi iti Enero iti tawen nga agtawenda iti 12. Mabalinda ti dumar-ay kadagiti sala, komperensia dagiti agtutubo, ken komperensia ti FSY mangrugi iti Enero iti tawen nga agtawenda iti 14.

20.7.4

Pammalubos ti Nagannak

Saan a mabalin a makipaset dagiti ubbing ken agtutubo iti maysa nga aktibidad ti Simbaan no awan ti pammalubos dagiti nagannak wenno guardianda. Para kadagiti aktibidad iti Simbaan a pakairamanan ti panagparabii, napaut a panagbiahe, wenno nangatngato ngem kadagiti gagangay a peggad, kasapulan ti naisurat a pammalubos.

Ited dagiti nagannak ken guardian daytoy a pammalubos babaen ti panangpirmada iti Permission and Medical Release form.

20.7.5

Dagiti Panangireport iti Panagabuso

Ania man a panagabuso a mapasamak bayat ti maysa nga aktibidad ti Simbaan ket nasken a maireport kadagiti agturay a sibil. Nasken a kontaken a dagus ti bishop. Adda dagiti instruksion para kadagiti miembro iti 38.6.2.7. Adda dagiti instruksion para kadagiti bishop iti 38.6.2.1.

20.7.6

Dagiti Panagannad iti Kinatalged, Panagsaranay iti Aksidente, ken Panangireport iti Aksidente

20.7.6.1

Dagiti Panagannad iti Kinatalged,

Siaannad nga amirisen dagiti lider ken participant dagiti aktibidad tapno masigurado ti bassit a pagpeggadan ti pannakadunor wenno sakit. Bassit koma laeng ti pagpeggadan kadagiti aktibidad iti pannakadadael ti sanikua. Bayat dagiti aktibidad, aramiden dagiti lider ti amin a kabaelanda tapno masigurado ti kinatalged.

20.7.6.2

Panangsaranay iti Aksidente

No mapasamak ti aksidente wenno pannakadunor iti sanikua ti Simbaan wenno bayat ti maysa nga aktibidad ti Simbaan, tungpalen dagiti lider dagiti sumaganad a pangiwanwan, kas maaramat:

  • Mangted iti umuna a tulong [first aid]. No kasapulan ti maysa a tao ti nayon a pannakaaywan ti mediko, kontaken ti emergency medical services. Kontaken met ti nagannak, guardian, wenno dadduma pay a kabagian ken ti bishop wenno stake president.

  • No adda maysa a tao a mapukaw wenno matay, ipakaammo a dagus iti lokal nga agipatpatungpal iti linteg.

  • Mangipaay iti suporta a mainaig iti rikna.

  • Saan a mangyallukoy wenno mangupay iti legal a tignay. Saan nga agaramid kadagiti panagkumit iti biang ti Simbaan.

  • Mangurnong ken mangidulin iti nagan dagiti saksi, impormasion ti kontakda, salaysay maipapan iti napasamak, ken dagiti retrato.

  • Ireport ti aksidente (kitaen iti 20.7.6.3).

20.7.6.3

Panangireport iti Aksidente

Nasken nga ireport dagiti sumaganad a situasion iti online iti incidents.ChurchofJesusChrist.org.

  • No mapasamak ti aksidente wenno pannakadunor iti sanikua ti Simbaan wenno bayat ti maysa nga aktibidad ti Simbaan.

  • Napukaw ti maysa a tao a makipaspaset iti maysa nga aktibidad ti Simbaan.

  • Madadael ti pribado, publiko, wenno sanikua ti Simbaan bayat ti maysa nga aktibidad ti Simbaan.

  • Agpeggad wenno manamnama ti legal a tignay.

No agbanag ti maysa a pasamak iti nakaro a pannakadunor, pannakatay, wenno pannakapukaw ti tao, ti stake president, bishop, wenno miembro a tinudinganna ket ipakaammona a dagus iti area office.

20.7.6.4

Seguro ken Dagiti Saludsod

No mapasamak ti pannakadunor kabayatan ti maysa a pasken ti Simbaan, ikeddeng dagiti lider no maaramat ti Church Activity Medical Assistance program.

Iti sumagmamano a kaso, mabalin nga addaan ti stake president wenno bishop kadagiti saludsod maipapan kadagiti isyu iti kinatalged wenno kiddaw a maisuppiat iti Simbaan. Ti stake president (wenno bishop, babaen ti pangiturongna) ket ibasarna dagiti saludsod iti Risk Management Division wenno iti area office.

20.7.7

Panagbiahe

Nasken nga anamongan ti bishop wenno stake president ti panagbiahe para kadagiti aktibidad iti Simbaan. Saan koma a mangted dagiti aktibidad iti di umisu a pakadagsenan kadagiti miembro. Saan a maipalubos ti adayo a panagbiahe para kadagiti aktibidad.

No mabalin, nasken nga agusar dagiti grupo ti Simbaan iti komersial a transportasion para iti adayo a panagbiahe. Nasken a lisensiado ken masaluadan daytoy ti liability insurance.

No agbiahe dagiti grupo ti Simbaan kadagiti pribado a lugan a pangpasahero, masapul nga adda iti natalged a kasasaad ti panagandar ti tunggal lugan. Nsken nga agusar ti tunggal tao iti maysa a seat belt. Nasken a lisensiado, responsable a nataengan ti tunggal drayber.