“31. Dagiti Interbyu ken Dadduma Pay a Miting kadagiti Miembro,” Dagiti Napili manipud iti Sapasap a Handbook (2023).
“31. Dagiti Interbyu ken Dadduma Pay a Miting kadagiti Miembro,” Dagiti Napili manipud iti Sapasap a Handbook
31.
Dagiti Interbyu ken Dadduma Pay a Miting kadagiti Miembro
31.0
Pakauna
Masansan nga agministro ni Jesucristo iti dadduma a saggaysa (kitaen, kas pagarigan, iti Juan 4:5–26; 3 Nephi 17:21). Ay-ayatenna ti tunggal maysa kadagiti annak ti Dios. Tulonganna ida a saggaysa.
Makatulong daytoy a kapitulo kadagiti amin a lider nga addaan iti gundaway a makipagkita kadagiti indibidual a miembro.
31.1
Dagiti Pangiwanwan a Pagbatayan
31.1.1
Agsagana a Naespirituan
Isaganam ti bagim iti naespirituan babaen ti kararag, panagadal iti nasantuan a kasuratan, ken nalinteg a panagbiag. Dumngeg kadagiti arasaas ti Espiritu Santo.
31.1.2
Tulongan ti Miembro a Makarikna iti Ayat ti Dios
No umay kadakayo dagiti miembro para iti interbyu wenno agpatulong iti bukod a karit, masansan a ti kasapulanda unay ket ti pannakaammo nga ay-ayaten ida ti Nailangitan nga Ama.
Dagiti nasantuan a kasuratan ken balikas dagiti propeta iti ud-udina nga aldaw ti mangawis iti Espiritu ken mangisuro iti natarnaw a doktrina. Usaren dagitoy a mangparegta ken mangallukoy, saan a mangkondena, mangpilit, wenno mangpataud iti buteng (kitaen iti Lucas 9:56).
31.1.3
Tulongan ti Miembro a Manggun-od iti Bileg ti Mangisalakan
Allukoyen dagiti miembro nga umasideg Kenkuana. Tulongan ida a manggun-od iti bliegna a mangpapigsa, mangliwliwa, ken mangsubbot.
31.1.4
Tulongan ti Miembro a Makarikna a Komportable ken Natalged
Kanayon nga ikkan ti miembro iti pagpilian a kaadda ti maysa a tao bayat ti interbyu wenno miting. No makipagkita iti maysa a miembro ti kasungani a sekso, maysa nga ubing, wenno agtutubo, siguraduen nga adda kaduana a maysa a nagannak wenno sabali pay a nataengan. Mabalinna ti makikadua ti miting wenno aguray iti ruar ti siled, depende iti kayat ti miembro no asino ti pakimitingam.
Saanmo nga ibinglay ti kumpidensial nga impormasion iti asino man—a pakairamanan ti asawam wenno dadduma pay a lider ti Simbaan—malaksid no mangted ti miembro iti pammalubos.
31.1.5
Agdamag kadagiti Naparegta a Saludsod ken Dumngeg a Naimbag
No makipagkita iti maysa a miembro, agdamagka kadagiti saludsod a makatulong kenka a makaawat iti kasasaadna.
Bayat ti panagsarita ti miembro, dumngeg a naimbag ken siaannad.
31.1.6
Yallukoy ti Panagpannuray iti Bukod a Kabaelan
Gapu iti panagayatmo kadagiti miembro, mabalin a kayatmo a dagus ti mangidiaya kadagiti pangrisut kadagiti parikutda. Nupay kasta, ad-adda a bendisionamto ida babaen ti panangtulongmo kadakuada a mangbirok kadagiti bukodda a pangrisut ken mangaramid kadagiti bukodda a pangngeddeng (kitaen iti Doktrina ken Katulagan 9:8).
31.1.7
Suportaran dagiti Panagkagumaan nga Agbabawi
Ti laeng bishop wenno stake president ti makatulong iti maysa a tao a mangrisut kadagiti nadagsen a basol. Sumagmamano kadagitoy ti nailista iti 32.6. No nakaaramid ti miembro iti ania man kadagitoy a basol, nasken a makipagkita a dagus iti bishop wenno stake president.
31.1.8
Sumungbat a Siuumno iti Panagabuso
Saan a makanunongan ti abuso iti ania man a kita. Ibilangmo a serioso dagiti report ti pannakaabuso. No maammuam nga adda maysa a tao naabuso, ireportmo ti pannakaabuso kadagiti sibil nga awtoridad ken yumanmo iti bishop. Naited dagiti annuroten iti panagireport ken panangsungbat iti pannakaabuso iti 38.6.2.
31.2
Dagiti Interbyu
31.2.1
Dagiti Panggep dagiti Interbyu
Iti sapasap, interbyuen dagiti lider ti Simbaan dagiti miembro tapno maikeddeng no:
-
Nakasaganada met laeng nga umawat wenno makipaset iti maysa nga ordinansa.
-
Nasken met laeng a maawaganda iti maysa a posision iti Simbaan.
31.2.2
Dagiti Kita dagiti Interbyu
|
Asino ti mabalin nga ag-conduct iti interbyu |
Panggep ti interbyu |
|---|---|
Asino ti mabalin nga ag-conduct iti interbyu Bishop laeng | Panggep ti interbyu
|
Asino ti mabalin nga ag-conduct iti interbyu Ti bishop wenno maysa a mamagbaga a dutokanna | Panggep ti interbyu
|
31.2.3
Dagiti Interbyu iti Panagbuniag ken Kumpirmasion
31.2.3.1
Ubbing a Miembro ti Rekord
Iggem ti bishop dagiti tulbek ti priesthood para iti panangbuniag kadagiti 8 ti tawenna a miembro ti rekord iti ward-na. Gapu iti daytoy, isu wenno ti nadutokan a mamagbaga ti manginterbyu kadagiti sumaganad a tao para iti panagbuniag:
-
Ubbing nga agtawen iti 8 a miembro ti rekord.
-
Ubbing nga agtawen iti 8 a saan a miembro ti rekord ngem addaan iti miembro a nagannak wenno guardian.
-
Dagiti miembro ti rekord nga agtawen iti 9 ken natataengan a naitantan ti panagbuniagda gapu iti intelektual a pagkurangan.
Iti interbyu, siguraduen ti miembro ti bishopric a maawatan ti ubing dagiti panggep ti panagbuniag (kitaen iti 2 Nephi 31:5–20). Siguraduenna pay a maawatan ti ubing ti katulagan ti panagbuniag ken naikumit nga agbiag babaen iti daytoy (kitaen iti Mosiah 18:8–10). Saan a nasken nga usarenna ti naikeddeng a listaan dagiti saludsod. Saan a maysa nga interbyu daytoy tapno maikeddeng ti pannakaikari, idinto a “saan a kasapulan dagiti babassit nga ubbing ti panagbabawi” (Moroni 8:11).
31.2.3.2
Dagiti Convert
Iggem ti mission president dagiti tulbek ti priesthood para iti panangbuniag dagiti convert. Gapu iti daytoy, interbyuen ti maysa a full-time a misionario:
-
Dagiti tao nga agtawen iti 9 ken natataengan a di pay pulos nabuniagan ken nakumpirmaan. Kitaen iti 31.2.3.1 para iti eksepsion para kadagiti addaan iti intelektual a pagkurangan.
-
Dagiti ubbing nga agtawen iti 8 ken natataengan a saan a miembro ti Simbaan dagiti nagannak kadakuada.
-
Ubbing nga agtawen iti 8 ken natataengan nga addaan iti nagannak a mabuniagan ken makumpirmaan met.
31.2.4
Dagiti Interbyu para iti Panagorden iti Saad iti Aaronic Priesthood
Para iti ad-adu pay nga impormasion, kitaen iti 18.10.2.
31.2.5
Dagiti Interbyu iti Temple Recommend
Ti templo ket ti balay ti Apo. Maysa a sagrado a pribilehio ti iseserrek iti templo ken pannakiraman kadagiti ordinansa. Nailatang daytoy a pribilehio para kadagiti naespirituan a nakasagana ken agkagkagumaan nga agbiag kadagiti pagalagadan ti Apo, kas inkeddeng dagiti napusgan a lider ti priesthood.
Tapno maaramid daytoy a determinasion, interbyuen dagiti lider ti priesthood ti miembro babaen ti panangusar kadagiti saludsod iti LCR (kitaen met dagiti pangiwanwan iti 26.3).
31.2.6
Dagiti Interbyu para iti Panagorden iti Saad iti Melchizedek Priesthood
Iggem ti stake president dagiti tulbek ti priesthood para iti panangi-confer iti Melchizedek Priesthood. Iggemna pay dagiti tulbek para iti panagorden kadagiti saad ti elder ken high priest.
Babaen ti pananganamong ti panguluen ti stake, interbyuen ti bishop ti miembro babaen ti panangusar kadagiti saludsod a naipaay iti Melchizedek Priesthood Ordination Record.
31.3
Dadduma Pay a Gundaway a Makipagmiting dagiti Lider kadagiti Miembro
-
Mabalin a kiddawen dagiti miembro a makipagmiting iti maysa a lider ti Simbaan no kasapulanda ti naespirituan a panangiwanwan wenno addaanda kadagiti nadagsen a personal a parikut.
-
Makipagmiting ti bishop wenno ti maysa a tao a dinutokanna kadagiti miembro nga addaan iti temporal a kasapulan (kitaen iti 22.6).
-
Makipagmiting ti maysa a miembro ti bishopric iti tunggal maysa nga agtawen iti 11 bayat ti panagakarna manipud iti Primary a mapan iti korum dagiti deacon wenno maysa a klase ti Young Women.
31.3.1
Pannakimiting kadagiti Agtutubo
Mamindua iti makatawen a makipagmiting ti bishop wenno maysa kadagiti mamagbagana iti tunggal agtutubo. Nasken nga adda ti bishop iti uray maysa laeng kadagitoy a miting iti tunggal tawen. Mangrugi iti tawen a panagtawen ti agtutubo iti 16, nasken nga adda ti bishop kadagiti agpada a miting bayat ti tawen no mabalin.
Addaan met ti Young Women president iti pagrebbengan nga agminister iti tunggal maysa kadagiti agtutubo a babbai. Maaramidna daytoy babaen ti pannakimitingna kadagiti agtutubo a babbai a saggaysa (wenno iti sabali pay a nataengan nga adda).
31.3.1.2
Dagiti Topiko a Paglilinnawagan
Ti kangrunaan a panggep dagiti pannakimiting kadagiti agtutubo ket tapno mangbukel iti pammati iti Nailangitan nga Ama ken ni Jesucristo ken mangtulong kadagiti agtutubo a mangsurot Kadakuada. Nasken koma a makaitag-ay a naespirituan a padas dagitoy a miting.
31.3.2
Pannakimiting kadagiti Young Single Adult
Ipangpangruna ti bishop ti naespirituan a panagdur-as dagiti young single adult iti wardna. Makipagmiting isuna wenno ti nadutokan a mamagbagana iti tunggal young single adult iti uray maminsan laeng iti makatawen.
31.3.3
Pannakimiting kadagiti Miembro tapno Pagsasaritaan dagiti Calling ken Pagrebbenganda
Dagiti panguluen ti stake, bishopric, ken dadduma pay a lider ket makipagmiting a saggaysa kadagiti miembro nga agreport kadakuada maipapan kadagiti calling-da.
Ipeksa ti lider ti panagyamanna iti serbisio ti miembro ken mangidiaya iti pammaregta.
31.3.6
Propesional a Panagbalakad ken Therapy
Saan a naawagan dagiti lider ti Simbaan nga agbalin a propesional a mamalbalakad wenno mangipaay iti therapy. Itedda ti naespirituan a tulong, a mangipamaysa iti makapapigsa, makaliwliwa, makasubbot a pannakabalin ni Jesucristo. Malaksid iti daytoy napateg ken naparegta a tulong, mabalin a magunggonaan ti dadduma a miembro iti propesional a panangbalakad iti lugar nga adda a magun-od daytoy.
31.4
Pannakimiting kadagiti Miembro iti Virtual
Gagangay a makipagkita dagiti lider kadagiti miembro a personal para kadagiti interbyu ken tapno mangipaay iti naespirituan a tulong ken ministering. Nupay kasta, kas maysa nga eksepsion, mabalinda ti agmiting iti virtual no saan a praktikal ti panagmitingda iti personal.