Dagiti Annuroten ken Pangiwanwan iti Simbaan

Mapasangbay ti amin a dumar-ay iti miting ti sakramento, iti dadduma pay a miting iti Domingo, ken kadagiti pasken a paglilinnangenan ti Ti Simbaan ni Jesucristo dagiti Santo iti Ud-udina nga Aldaw. Pagrebbengan ti mangimatmaton nga opisial [presiding officer] a mangsigurado a raemen ti amin a dumardar-ay iti sagrado a kasasaad.

Nasken a liklikan dagiti dumardar-ay dagiti pakasingaan wenno pakaburiboran a maikontra iti panagdaydayaw wenno dadduma pay a panggep ti miting. Nasken a maraem ti amin a naidawat a kasapulan iti edad ken kababalin iti nadumaduma a miting ken pasken ti Simbaan. Kasapulan dayta ti panangliklik iti nabatad a romantiko a panagtigtignay ken iti panagkawkawes wenno panaglanglanga a pakaigapuan ti pannakasinga. Lapdanna pay ti panagsasao a mainaig iti politika wenno panagsao maipapan iti seksual nga orientasion wenno dadduma pay a personal a kababalin iti wagas a pakasingaan kadagiti miting a naipamaysa iti Mangisalakan.

No adda saan a maitutop a panagtigtignay, mangted ti bishop wenno stake president iti pribado a balakad iti pudno a kaipapanan ti ayat. Allukoyenna ida a ti panagtigtignayda ket saan nga umno para iti okasion a mangipamaysa iti panangtulong a mangpatalinaed iti maysa a sagrado a lugar para iti tunggal maysa a dumar-ay nga addaan iti naisangsangayan a panangyunay-unay iti panagdaydayaw iti Nailangitan nga Ama ken iti Mangisalakan.

Agtalinaed a pribado a sanikua dagiti balay a pagmimitingan ti Simbaan a maipaulog kadagiti annuroten ti Simbaan. Dagiti tao a saan a mayat a mangsurot kadagitoy a pangiwanwan [guidelines] ket makiddaw iti nadayaw a wagas a saan a dumar-ay kadagiti miting ken pasken ti Simbaan.

No ipalubos ti lokal a linteg, mabalin dagiti sumaganad nga agdama nga agserserbi nga opisial ti Simbaan nga agtignay iti takemda a mangannong iti seremonia ti kallaysa a sibil:

• Mission president

• Stake president

• District president

• Bishop

• Branch president

Mabalin laeng dagitoy nga opisial nga aramiden ti kallaysa a sibil iti maysa a lalaki ken maysa a babai. Nasken pay a mayaplikar amin dagiti sumaganad a kondision:

• Maysa a miembro ti Simbaan ti nobia wenno nobio wenno addaan iti petsa ti panagbuniag.

• Adda ti rekord ti kinamiembro ti nobia wenno ti nobio, wenno kalpasanto ti panagbuniag, iti yunit ti Simbaan a pangidauluan ti opisial.

• Legal nga awtorisado ti opisial ti Simbaan a mang-officiate iti kallaysa a sibil iti hurisdiksion a pakaangayanto ti kallaysa.

Mabalin a maangay ti seremonia ti kallaysa iti maysa a pasdek ti Simbaan no saan a mangsinga iti eskediul dagiti regular nga aktibidad ti Simbaan. Nasken a saan a maangay dagiti kallaysa iti Sabbath wenno kadagiti sardam ti Lunes. Nasken a simple ken nadayaw dagiti kallaysa a maannong kadagiti pasdek ti Simbaan. Nasken a sagrado, naraem, ken narag-o ti musika.

Mabalin a maannong dagiti kallaysa iti chapel, cultural hall, wenno sabali pay a maitutop a siled. Nasken a suroten dagiti kallaysa dagiti pangiwanwan iti umno a panangusar iti balay a pagmimitingan.

Iti panangannong iti maysa a kallaysa a sibil, kasao ti opisial ti Simbaan ti agassawa ket kunana, “Agpinnetpetkayo koma iti kannawan nga imayo.” Kalpasanna kunana, “[Naan-anay a nagan ti nobio] ken [naan-anay a nagan ti nobia], nagpinnetpetkayon iti kanawan nga imayo kas pagilasinan dagiti kari a sumrekkayon iti imatang ti Dios ken dagitoy a saksi.” (Mabalin a nasaksakbay a pilien wenno isingasing ti agassawa dagitoy a saksi.)

Kalpasanna kasao ti opisial ti nobio ket agsaludsod, “[Naan-anay a nagan ti nobio], awatem kadi ni [naan-anay a nagan ti nobia] kas nakikallaysaam nga asawam a mayannurot iti linteg, ket sipapasnek kadi nga ikarim iti bukodmo a pagayatan ken pili kas kaingungotna ken nakikallaysaam nga asawana a mayannurot iti linteg a kumappengkanto kenkuana ket awan sabali; a tungpalemto ti amin a linteg, pagrebbengan, ken obligasion maipanggep iti nasantuan a kasasaad ti matrimonia; ket ayatem, dayawem, ken ipategmonto isuna bayat ti panagbiagyo a dua?”

Sungbatan ti nobio iti, “Wen” wenno “Aramidek.”

Kalpasanna kasao ti opisial ti Simbaan ti nobia ket agsaludsod, “[Naan-anay a nagan ti nobia], awatem kadi ni [naan-anay a nagan ti nobio] kas nakikallaysaam nga asawam a mayannurot iti linteg, ket sipapasnek kadi nga ikarim iti bukodmo a pagayatan ken pili kas kaingungotna ken nakikallaysaam nga asawana a mayannurot iti linteg a kumappengkanto kenkuana ket awan sabali; a tungpalem ti amin a linteg, pagrebbengan, ken obligasion maipanggep iti nasantuan a kasasaad ti matrimonia; ket ayatem, dayawem, ken ipategmonto isuna bayat ti panagbiagyo a dua?”

Sungbatan ti nobia iti, “Wen” wenno “Aramidek.”

Kalpasanna, kasao ti opisial ti Simbaan ti agassawa ket kunana, “Babaen iti legal a turay a naited kaniak kas maysa nga elder ti Ti Simbaan ni Jesucristo dagiti Santo iti Ud-udina nga Aldaw, isaok kadakayo, [nagan ti nobio] ken [nagan ti nobia], agassawa, legal ken mayannurot iti linteg a nagkallaysa para iti panawen ti mortal a panagbiagyo.”

(Adda sabali a panangisao para iti chaplain a saan nga agserserbi kas mangimatmaton nga opisial ti Simbaan: “Babaen iti legal a turay a naited kaniak kas maysa a chaplain iti [branch ti military wenno civilian organization] isaok kadakayo, [nagan ti nobio] ken [nagan ti nobia], agassawa, legal ken mayannurot iti linteg a nagkallaysa para iti panawen ti mortal a panagbiagyo.”)

“Bendisionan koma ti Dios ti panagkaykaysayo a buyogan ti rag-o iti kaputotanyo ken napaut a panagbiag ken naragsak a panagdennayo, ken bendisionannakayo koma a mangpatalinaed a nasagraduan dagiti kari nga inaramidyo. Ket idawatko dagitoy a bendision kadakayo iti nagan ni Apo Jesucristo, amen.”

Opsional ti awis nga aginnagek kas agassawa, a maibatay kadagiti pagalagadan ti kultura.

Bayat ti endowment ken dagiti ordinansa ti pannakailantip iti templo, agsuot dagiti miembro ti Simbaan iti puraw a kawes. Agsuot dagiti babbai iti sumaganad a puraw a kawes: maysa nga atiddog-ti-manggasna wenno tallo-kapat-ti manggasna a bado (wenno palda ken atiddog-ti-manggasna wenno tallo-kapat-ti-manggasna a blusa), medias wenno stocking [hoisiery], ken sapatos wenno tsinelas.

Agsuot dagiti lallaki iti sumaganad a puraw a kawes: maysa nga atiddog-ti-manggasna a kamisadentro, kurbata wenno bow tie, pantalon, medias, ken sapatos wenno tsinelas.

Bayat ti endowment ken dagiti ordinansa ti pannakailantip, agsuot dagiti miembro ti Simbaan iti nayon a seremonial a kawes iti rabaw ti puraw a kawesda.

Allukoyen dagiti lider ti ward ken stake dagiti na-endow a miembro a manggun-od iti bukodda a kawes ti templo. Mabalin a magatang dagiti kawes ken garment iti templo manipud iti tiendaan ti Church Distribution wenno iti store.ChurchofJesusChrist.org. Mabalin a tulongan dagiti clerk ti stake ken ward dagiti miembro nga agorder iti kawes.

Makitulag dagiti miembro nga umawat iti endowment nga agaruat iti kawes ti templo iti unos ti panagbiagda.

Sagrado a pribilehio ti agkawes iti garment iti templo. Ti panangaramid iti daytoy ket maysa nga akinruar a panangipeksa iti akin-uneg a panagkumit a sumurot iti Mangisalakan a ni Jesucristo.

Ti garment ket maysa a pammalagip dagiti katulagan a maaramid iti templo. No umisu ti pannakaikawesna iti unos ti panagbiag, agserbinto daytoy a maysa a salaknib wenno proteksion.

Nasken a mayaruat ti garment iti uneg ti akinruar a kawes. Maysa a personal a preperensia no maikawes nga akinruar wenno akin-uneg iti garment ti templo dagiti dadduma pay nga undergarment.

Nasken a saan nga ikkaten ti garment para kadagiti aktibidad a mabalin a nainkalintegan a maaramid bayat ti panangaruat iti garment. Nasken a saan a balbaliwan daytoy tapno maibagay iti nadumaduma nga estilo ti kawes.

Sagrado ti garment ken nasken a matrato iti panagraem. Nasken nga agkalikagum dagiti na-endow a miembro iti pannarabay ti Nasantuan nga Espiritu tapno masungbatan dagiti personal a saludsod maipapan iti panagaruat iti garment.

Tapno maibelleng dagiti daanen a garment ti templo, nasken a putden ken dadaelen dagiti miembro dagiti marka. Kalpasanna gettengen dagiti miembro ti nabati pay a lupot tapno saan a mailasin a maysa a garment. Mabalin nga ibelleng ti nabati pay a lupot.

Mabalin nga ited dagiti miembro dagiti garment ken kawes iti templo a nasayaat ti kondisionna kadagiti dadduma pay a na-endow a miembro.

No mabalin, maitabon wenno mapuoran dagiti pimmusay a na-endow a miembro a nakasuot iti kawes iti templo. No dagiti tradision ti kultura wenno dagiti kannawidan iti panagitabon ti mangaramid a saan a maitutop wenno narigat daytoy, mabalin a maitupi ti kawes ken maikabil iti abay ti bangkay.

Makawesan ti bangkay ti maysa a lalaki kadagiti garment iti templo ken iti sumaganad a puraw a kawes: maysa nga atiddog-ti-manggasna a kamisadentro, kurbata wenno bow tie, pantalon, medias, ken sapatos wenno tsinelas. Makawesan ti bangkay ti maysa a babai kadagiti garment iti templo ken iti sumaganad a puraw a kawes: maysa nga atiddog-ti-manggasna wenno tallo-kapat-ti-maggasna a bado (wenno maysa a palda ken atiddog-ti-manggasna wenno tallo-kapat-ti-maggasna a blusa), medias wenno stocking [hosiery], ken sapatos wenno tsinelas.

Maikabil ti seremonial a kawes iti templo iti bangkay kas naibilin iti endowment. Maikabil ti roba iti kannawan nga abaga ken maigalut iti singdan iti kannigid a siket. Maikabil ti apron iti aglawlaw ti siket. Maikabil ti barikes [sash] iti aglawlaw ti siket ken maigalut iti bow iti ngato ti kannigid a padingpading. Gagangay a maikabil ti cap ti lalaki iti abay ti bangkayna agingga nga orasen tapno mairikep ti casket wenno pagyanan. Kalpasanna maikabil ti cap nga adda ti bow iti ngato ti kannigid a lapayag. Mabalin a maibalkot ti belo ti babai iti pungan iti likudan ti ulona. Opsional ti panangabbong iti rupa ti babai sakbay ti pannakaitabon wenno pannakapuor, kas ikeddeng ti pamilia.

Imbilin ti Apo, “Saankayo … a mamapatay, wenno agaramid iti ania man a kaarngina” (Doktrina ken Katulagan 59:6). Suppiaten ti Simbaan ti elektibo a panagpaikkat iti sikog wenno aborsion para iti personal wenno sosial a pagimbagan. Nasken kadagiti miembro a saanda a makiraman, mangyobra, makipagurnos, mangbayad, mangpalugod, wenno mangyallukoy iti panagpaikkat iti sikog wenno aborsion. Dagiti mabalin laeng nga eksepsion ket no:

• Ti panagsikog ket bunga ti napilit a pannakarames wenno panagkanaig nga agkabagian wenno incesto.

• No inkeddeng ti nalaing a mangngagas nga agpeggad ti biag wenno salun-at ti ina.

• Natakuatan ti nalaing a mangngagas nga adda nakaro a diperensia ti fetus a saan a mangpalugod nga agbiag ti maladaga no maipasngay.

Nupay dagitoy nga eksepsion saan a dagus a mangikalintegan iti panagpaikkat iti sikog. Kadagsenan a banag ti aborsion wenno panangpaikkat iti sikog. Nasken a maibilang laeng daytoy kalpasan a nakaawat dagiti tao a responsable iti pammatalged babaen ti kararag. Mabalin a makiuman dagiti miembro iti bishopda kas paset daytoy a proseso.

Ti abuso ket madi a panangtrato wenno panangbaybay-a iti dadduma iti wagas a makaigapu iti pisikal, seksual, emosional, wenno pinansial a pannakadangran. Iti kasasaad ti Simbaan saan a makanunongan ti abuso iti ania man a kita. Dagiti agabuso kadagiti assawa, annak, dadduma pay a miembro ti pamilia, wenno asino man nga aglabsiong kadagiti linteg ti Dios ken tao.

Maallukoy ti amin a miembro, nangruna dagiti nagannak ken lider, nga agalibtak ken agganetget ken aramidenda ti amin a kabaelanda a mangsaluad kadagiti annakda ken dadduma pay a maibusor iti abuso. No adda ammo dagiti miembro maipanggep iti pannakaabuso, ireportda daytoy kadagiti sibil nga agturay ken yumanda iti bishop. Nasken nga ibilang dagiti lider iti Simbaan a serioso dagiti report iti abuso ken saanda a di ikankano dagitoy iti kaano man.

Amin a nataengan a makipagtrabaho kadagiti ubbing wenno agtutubo ket nasken a leppasenda ti training iti panangsaluad kadagiti ubbing ken agtutubo iti uneg ti makabulan a pannakakanunongda (kitaen iti ProtectingChildren.ChurchofJesusChrist.org). Nasken nga ulitenda ti training iti tunggal tallo a tawen.

No mapasamak ti abuso, ti umuna ken dagus a pagrebbengan dagiti lider ti Simbaan ket mangtulong kadagiti naabuso ken mangsaluad kadagiti nalaka a maabuso a tattao manipud iti pannakaabuso iti masanguanan. Nasken a saan nga allukoyen dagiti lider ti tao nga agtalinaed iti maysa a pagtaengan wenno situasion nga adda panagabuso wenno saan a natalged.

Pribilehio dagiti agassawa a makabael a mangipasngay kadagiti annak a mangipaay kadagiti mortal a bagi para kadagiti espiritu nga annak ti Dios, a pagrebbenganda ngarud a taraknen ken padakkelen (kitaen iti 2.1.3). Personal ken pribado unay ti pangngeddeng maipapan iti no mano nga annak ti paaddaen ken no kaano a maaddaan kadakuada. Nasken a pangngeddeng daytoy iti nagbaetan ti agassawa ken ti Apo.

Ti linteg ti Apo iti kinadalus ti dayaw isu ti:

• Panangliklik iti seksual a pannakinaig iti ruar ti legal a kallaysa ti maysa a lalaki ken maysa a babai.

• Pidelidad iti uneg ti panagdenna nga agassawa.

Naisangrat nga agbalin a nangayed ken sagrado ti pisikal nga intimasia iti nagbaetan dagiti agassawa. Inordenan ti Dios daytoy para iti panagparsua kadagiti annak ken para iti pangyebkasan iti ayat dagiti agassawa.

Saan nga anamongan ti Simbaan ti pornograpia iti ubing iti ania man a kita. No maammuan wenno agsuspetsa ti bishop wenno stake president a mairaman ti maysa a miembro iti pornograpia iti ubing, dagus a surotenna dagiti pangiturong iti 38.6.2.1.

Saan nga anamongan ti Simbaan ti panangputed iti genital ti babai.

Saan nga anamongan ti Simbaan ti ania man a kita ti insesto. Kas nausar ditoy, ti insesto ket seksual a relasion iti nagbaetan:

• Ti maysa a nagannak ken ti maysa nga anak.

• Ti maysa a lelang/lelong ken ti maysa nga apoko.

• Dagiti agkakabsat.

• Ti maysa nga uliteg wenno ikit ken ti maysa a kaanakan a babai wenno kaanakan a lalaki.

Kas naaramat ditoy, anak, apoko, kabsat, kaanakan a babai, ken kaanakan a lalaki iramanna dagiti relasion a mainaig iti biolohikal, ampon, siuman, wenno aywan.

No maysa a menor de edad ti biktima ti insesto, awagan ti bishop wenno stake president ti abuse help line ti Simbaan kadagiti pagilian no adda a magun-od daytoy (kitaen iti 38.6.2.1). Iti dadduma a pagilian nasken nga agkiddaw ti stake president iti pannarabay manipud iti area legal counsel iti area office. Maallukoy pay isuna a makiuman iti Family Services staff wenno iti welfare ken self-reliance manager iti area office.

Kasapulan ti maysa a konseho iti kinamiembro iti Simbaan ken kasapulan ti anotasion iti rekord no aglabsing ti maysa a miembro iti insesto. Ti insesto dumani kanayon a mamagkasapulan iti Simbaan a mangibabawi iti kinamiembro ti maysa a tao.

No aglabsing ti maysa a menor de edad iti insesto, kontaken ti stake president ti Opisina ti Umuna a Panguluen para iti direksion.

Masansan nga agsagaba iti nakaro a trauma dagiti biktima ti insesto. Agresponde dagiti lider nga addaan iti naimpusuan a panagrikna ken asi. Mangipaayda iti naespirituan a suporta ken panangbalakad a mangtulong kadakuada a mangparmek kadagiti makadadael nga epekto ti insesto.

No dadduma marikna ti bain wenno basol dagiti biktima. Saan a nagbasol dagiti biktima. Matulongan dagiti lider ida ken dagiti pamiliada a makaawat iti ayat ti Dios ken ti pangpaimbag a sumangbay babaen ken ni Jesucristo ken ti Pannubbotna (kitaen iti Alma 15:8; 3 Nephi 17:9).

Kas nayon iti panangawat iti naparegta a tulong dagiti lider ti Simbaan, biktima ken dagiti pamiliada, mabalin a kasapulan dagiti pamilia ti propesional a pannakabalakad. Para iti impormasion, kitaen iti 38.6.18.2.

Agpokus ti okulto iti sipnget ken mangiturong iti panangallilaw. Dadaelenna ti pammati ken ni Jesucristo.

Iraman ti okulto ti panagrukbab ken ni Satanas. Iramanna pay dagiti mistikal nga aktibidad a saan a maitunos iti ebanghelio ni Jesucristo. Mairaman dagiti kasta nga aktibidad (ngem saan a limitado iti) panagpadles, lunod, ken dagit kannawidan iti panagagas a panangtulad iti pannakabalin ti priesthood ti Dios (kitaen iti Moroni 7:11–17).

Saan koma a makipaset dagiti miembro ti Simbaan iti ania man a kita ti panagrukbab ken ni Satanas wenno makipaset iti ania man a wagas iti okulto. Saanda koma nga agpokus iti kasta a kinasipnget kadagiti saritaan wenno kadagiti miting ti Simbaan.

Saan nga anamongan ti Simbaan ti pornograpia iti ania man a kita. Ti panangusar iti pornograpia iti ania man a kita mangdadael iti biag ti tao, pamilia, ken kagimongan. Daytoy pay ti mangpapanaw iti Espiritu ti Apo. Nasken a liklikan dagiti miembro ti Simbaan ti amin a kita ti banag a mainaig iti pornograpia ken mangsuppiat iti panangpataud, panangisaknap, ken pannakausarna.

Gagangay nga umdasen ti personal a panagbalakad ken dagiti saan a pormal a panagiget iti kinamiembro para iti panangtulong iti maysa a tao nga agbabawi iti panangusarna iti pornograpia. Gagangay a saan a maangay dagiti konseho iti kinamiembro. Nupay kasta, mabalin a kasapulan ti maysa a konseho para iti napalaus ken nainkapilitan a panangusar iti pornograpia a naigapu iti pannakadangran iti panagasawa ti maysa a miembro wenno pamilia (kitaen iti 38.6.5). Kasapulan ti maysa a konseho no ti maysa a miembro ket agparnuay, agiwaras, agtagikua, wenno maulit-ulit nga agbuya kadagiti ladawan dagiti ubbing nga adda pakainaiganna iti pornograpia (kitaen 38.6.6).

Annak ti Dios ti amin a tao. Agkakabsat ti amin a lallaki ken babbai a paset ti nadiosan a pamiliana (kitaen iti “Ti Kaamaan: Maysa a Waragawag iti Lubong”). Ti Dios “inaramidna a maymaysa a dara ti amin a nasion” (Dagiti Aramid 17:26). “Agpapada ti amin” Kenkuana (2 Nephi 26:33). Tunggal tao ket “kapatpateg ti panagkitana iti maysa a parsua ti sabali” (Jacob 2:21).

Ti panangidumduma ket saan a maitunos iti naipalgak a balikas ti Dios. Ti pananganamong ken saan a pananganamong ti Dios ket agpannuray iti debosion Kenkuana ken kadagiti bilinna, saan nga iti maris ti kudil wenno dadduma pay a kababalin.

Awagan ti Simbaan dagiti amin a tao tapno mangliklik kadagiti kababalin ken tignay ti panangidumduma iti ania man a grupo wenno indibidual. Dagiti miembro ti Simbaan ti mangidaulo iti panangitandudo iti panagraem kadagiti amin nga annak ti Dios. Suroten dagiti miembro ti bilin ti Mangisalakan nga ayaten dagiti dadduma (kitaen iti Mateo 22:35–39). Ikarigatanda ti agbalin a tao nga addaan naimbag a nakem iti amin, a mangilaklaksid iti panangidumduma iti ania man a kita. Karaman daytoy ti panangidumduma a naibatay iti puli, etniko, nasionalidad, tribu, sekso, edad, pagkurangan, kasasaad ti kagimongan ken ekonomia, pammati iti relihion wenno saan a pammati, ken seksual nga oirentasion.

Allukoyen ti Simbaan dagiti pamilia ken miembro a tumulong nga addaan iti kinasensitibo, ayat, ken panagraem kadagiti tao nga agkursunada iti dadduma a kapadada a lalaki wenno babai. Itandudo pay ti Simbaan ti pannakaawat iti kagimongan iti kaaduan tapno mangipakita kadagiti pannursurona maipapan iti kinaimbag, pannakaibilang, panagayat iti dadduma, ken panagraem iti amin a tao. Awan ti aramiden ti Simbaan maipapan kadagiti pakaigapuan ti panagkursunada iti kapada a lalaki wenno babai (same-sex attraction).

Iparit dagiti bilin ti Dios ti amin a saan a nadalus a kababalin, heteroseksual man wenno agpada a lalaki wenno babai. Balakadan dagiti lider ti Simbaan dagiti miembro a nagsalungasing iti linteg ti kinadalus ti dayaw. Tulongan ida dagiti lider a maaddaan iti nalawag a pannakaawat iti pammati ken ni Jesucristo ken iti Pannubbotna, ti proseso ti panagbabawi, ken ti panggep ti biag ditoy daga.

No marikna dagiti miembro ti panagkursunada iti kapada a lalaki wenno babai (same-sex attraction) ken ikarkarigatanda nga agbiag iti linteg ti kinadalus, suportaran ken paregtaen ida dagiti lider iti pangngeddengda. Mabalin nga umawat dagitoy a miembro kadagiti calling iti Simbaan, ken umawat kadagiti ordinansa ti templo no maikarida. Mabalin ti umawat ken mangaramat iti priesthood dagiti lallaki a miembro ti Simbaan.

Amin a miembro a mangtungpal kadagiti katulaganda ket umawatto iti amin a naikari a bendision iti kinaagnanayon ipalubos man wenno saan dagiti kasasaadda nga umawat kadagiti bendision ti agnanayon a kallaysa ken panagbalin a nagannak iti daytoy a biag (kitaen iti Mosiah 2:41).

Kas maysa a pagbatayan a mainaig iti doktrina, a naibatay kadagiti nasantuan a kasuratan, pasingkedan ti Simbaan a ti panagasawa iti nagbaetan ti lalaki ken babai ket napateg iti plano ti Namarsua para iti agnanayon a pagtungpalan dagiti annakna. Pasingkedan pay ti Simbaan nga ilawlawag ti linteg ti Dios ti kaipapanan ti panagasawa kas legal ken nainkalintegan a panagkaykaysa ti maysa a lalaki ken maysa a babai.

Kangrunaan a pagrebbengan dagiti nagannak para iti edukasion dagiti annakda maipapan iti seks. Nasken nga addaan dagiti nagannak iti napudno, nalawag, ken agtultuloy a pannakisarita kadagiti annakda maipapan iti nasalun-at, nalinteg a seksualidad.

Saan nga anamongan ti Simbaan ti seksual a panagabuso Kas nausar ditoy, ti seksual a panagabuso kaipapananna ti panangipapilit iti ania man a saan a tinarigagayan a seksual nga aramid iti sabali a tao. Ti seksual nga aramid iti maysa a tao a saan a mangted wenno makaited iti legal a pammalubos ket maibilang a seksual a panagabuso. Mabalin a mapasamak pay ti seksual a panagabuso iti maysa nga asawa wenno iti relasion ti pannakisinnarak. Para iti impormasion maipapan iti seksual a panagabuso iti maysa nga ubing wenno agtutubo, kitaen iti 38.6.2.3.

Iraman ti seksual a panagabuso ti nalawa a sakup dagiti aramid, manipud iti panangbutbuteng agingga iti panangrames ken dadduma pay a kita ti seksual a panangranggas. Mabalin a mapasamak daytoy iti pisikal, berbal, ken iti dadduma pay a wagas. Para iti pannarabay maipapan iti panangbalakad kadagiti miembro a nakapadasen iti seksual a pannakaabuso, rames, wenno dadduma pay a kita ti seksual a pannakaranggas, kitaen iti 38.6.18.2.

No agsuspetsa dagiti miembro wenno adda ammoda a seksual a pannakaabuso, agtignayda a mangsaluad kadagiti biktima ken dadduma pay a madagdagus no mabalin. Iraman daytoy ti panangireport kadagiti sibil nga agturay ken panangipakaammo a dagus iti bishop wenno stake president. No naabuso ti maysa nga ubing, nasken a suroten dagiti miembro dagiti pangiturong iti 38.6.2.

Napateg a sagut manipud iti Dios ti mortal a biag—maysa a sagut a nasken a maipateg ken masaluadan. Sibibileg a suportaran ti Simbaan ti pananglapped iti panagpakamatay.

Kaaduan a tao a nakapanunot iti panagpakamatay ti agtarigagay nga agsapul iti pannakagin-awa manipud iti pisikal, mental, emosional, wenno naespirituan a saem. Kasapulan dagiti kasta nga indibidual ti ayat, tulong, ken suporta manipud iti pamilia, kadagiti lider ti Simbaan, ken kadagiti kualipikado a propesional.

Mangted ti bishop iti eklesiastikal a suporta no mangpampanunot ti maysa a miembro ti panagpakamatay wenno pinadasnan daytoy. Tulonganna pay a dagus ti miembro a makagun-od iti propesional a tulong.

Iti baet dagiti kasayaatan a panagkagumaan dagiti ay-ayaten, lider, ken propesional, saan a kanayon a malapdan ti panagpakamatay. Daytoy ti mangibati iti nauneg a pannakasair ti puso, pannakaburibor ti rikna, ken saan a masungbatan a salsaludsod para kadagiti ay-ayaten ken dadduma pay. Nasken a balakadan ken liwliwaen dagiti lider ti pamilia. Ipaayda ti panangasikaso ken panangsuporta.

Saan nga umno a gudasen ti maysa a tao ti bukodna a biag. Nupay kasta, ti laeng Dios ti makabael a mangukom kadagiti kapanunotan, aramid, ken lebel ti kaadda ti sungsungbatan ti tao (kitaen iti 1 Samuel 16:7; Doktrina ken Katulagan 137:9).

Dagiti napukawan iti ay-ayaten gapu iti panagpakamatay ket makasarakda iti namnama ken pannakaagas ken ni Jesucristo ken iti Pannubbotna.

Maipasango dagiti indibidual a transgender kadagiti narikut a karit. Dagiti miembro ken saan a miembro a mabigbig a kas transgender—ken ti pamilia ken gagayyemda—nasken a matratoda iti kinasensitibo, kinasayaat, kinaasi, ken iti nawadwad nga ayat a kas ken ni Cristo. Mapasangbay ti amin a dumar-ay iti miting ti sakramento, iti dadduma pay a miting iti Domingo, ken kadagiti pasken a paglilinnangenan ti Simbaan (kitaen iti 38.1.1).

Ti katatao [gender] ket maysa a napateg a saguday ti kinatao iti plano iti kinaragsak ti Nailangitan nga Ama. Ti nairanta a kaipapanan ti katatao [gender] iti waragawag ti kaamaan [family proclamation] ket biological a katataoda [biological sex] iti pannakaipasngay. Adda dagiti tao a makarikna ti saan a panagtunos ti biological a katataoda [biological sex] ken ti pakabigbigan ti katataoda [gender identity]. Kas bungana, mabalinda a mabigbig kas transgender. Awan ti aramiden ti Simbaan maipapan kadagiti pakaigapuan ti tattao a mangyam-ammo iti bagbagida kas transgender.

Kaaduanna a pannakiraman iti Simbaan ken iti sumagmamano nga ordinansa ket saan a mangidadduma iti katatao wenno gender. Mabalin a mabuniagan ken makumpirmaan dagiti tao a transgender kas nabalabala iti 38.2.8.10. Mabalinda pay ti makiranud iti sakramento ken umawat kadagiti bendision iti priesthood. Nupay kasta, maawat ti ordinasion iti priesthood ken dagiti ordinansa iti templo a mayannurot iti biological a katatao iti pannakaipasngay.

Agbalakad dagiti lider iti Simbaan maisuppiat iti elective medical wenno surgical intervention para iti panggep ti pananggandat a panangbaliw iti kasupadi a katatao ti biological a katatao ti maysa a tao iti pannakaipasngay ( “sex reassignment”) Ibalakad dagiti lider a ti panangaramid kadagitoy a tignay ti mangigapunto para kadagiti panagiget iti kinamiembro iti Simbaan.

Ibalakad pay dagiti lider maisuppiat iti social transitioning. Mairaman iti social transition ti panangbaliw iti kawes wenno panangurnos iti bagi, wenno panangbalbaliw iti nagan wenno sandi, tapno mangyam-ammo iti bagi a maisupadi iti biological a katataona iti pannakaipasngay. Ibalakad dagiti lider a dagiti mangaramid iti social transition ket makapadasto iti sumagmamano a panagiget iti kinamiembro iti Simbaan iti panawen daytoy a transision.

Mairaman kadagiti panangiget ti panangawat wenno panangaramat iti priesthood, panangawat wenno panangusar iti temple recommend, ken panangawat iti sumagmamano a calling iti Simbaan. Nupay naiget ti sumagmamano a pribelihio ti kinamiembro iti Simbaan, mapasangbay iti dadduma pay a pannakiraman iti Simbaan.

No ikeddeng ti maysa a miembro a balbaliwan ti napili a naganna wenno sandi a pangawag, ti napili a nagan mabalin nga isurat iti napili a name field iti rekord ti kinamiembro. Mabalin a maawagan ti tao iti napili a naganna iti ward.

Agduduma unay dagiti kasasaad iti tunggal yunit ken iti tunggal tao. Agiinnuman dagiti miembro ken lider ken makiumanda iti Apo. Tumulongto dagiti Panguluen ti Area kadagiti lokal a lider a nainriknaan a mangrisut a saggaysa kadagiti situasion. Makiinnuman dagiti bishop iti stake president. Nasken nga agdawat iti balakad dagiti stake president ken mission president manipud iti Panguluen ti Area (kitaen iti 32.6.3).

Ikeddeng ti pamilia ti pimmusay a tao no nasken a maitabon wenno mapuoran ti bangkayna. Irespetoda dagiti tarigagay ti indibidual.

Iti dadduma a pagilian, idawat ti linteg a kasapulan ti panangpuor. Iti dadduma a kaso, saan a praktikal ti panagitabon wenno kabaelan ti pamilia ti gastos. Iti amin a kaso, nasken a matrato ti bangkay iti respeto ken panagraem. Nasken a maipanamnama kadagiti miembro a kanayon a maaramat ti bileg ti Panagungar (kitaen iti Alma 11:42–45).

No mabalin, ti bangkay ti pimmusay a miembro a na-endow ket makawesan koma iti seremonial a kawes iti templo no maitabon wenno mapuoran daytoy (kitaen iti 38.5.8).

Mabalin nga ikeddeng dagiti nagannak no mangangayda kadagiti memorial wenno graveside service.

Saan a kasapulan wenno maannong dagiti ordinansa iti templo para kadagiti ubbing a matay sakbay a mayanak. Saan a daytoy ti mangipaidam iti posibilidad a nalabit a dagitoy nga ubbing ti agbalin a paset ti pamilia iti kinaagnanayon. Maallukoy dagiti nagannak nga agtalek iti Apo ken agdawat iti panangliwliwana.

Napateg a sagut manipud iti Dios ti mortal a biag. Ti eutanasia ket naigagara a panangigibus iti biag ti maysa a tao nga agsagsagaba iti di maagasan a sakit wenno dadduma pay a kondision. Ti maysa a tao a makiraman iti eutanasia, agraman ti panangtulong iti maysa a tao a matay babaen ti panagpakamatay, ket agsalungasing kadagiti bilin ti Dios ken mabalin nga agsalungasing kadagiti lokal a linteg.

Ti panangisardeng wenno panangtallikud kadagiti nalabes a wagas a mangsuporta iti biag para iti maysa a tao iti gibus ti biag ket saan a maibilang a eutanasia (kitaen 38.7.11).

Nasken a mapasangbay dagiti miembro a naimpeksion iti HIV (human immunodeficiency virus) wenno addaan iti AIDS (acquired immunodeficiency syndrome) kadagiti miting ken aktibidad ti Simbaan. Saan a pagpeggadan ti salun-at iti dadduma ti idadar-ayda.

Agtitinnulong ti panagsapul iti makabael a medikal a tulong, panangaramat iti pammati, ken panangawat kadagiti bendision ti priesthood para iti pannakaagas, a mayannurot iti pagayatan ti Apo.

Saan koma nga usaren wenno itandudo dagiti miembro dagiti aramid iti medikal wenno salun-at a mapagduaduaan a mainaig iti etika, naespirituan, wenno legal. Nasken nga agpakonsulta dagiti addaan parikut iti salun-at kadagiti makabael a propesional iti medisina a lisensiado kadagiti tay-ak a pagsanayanda.

Supiaten ti Simbaan ti panagusar iti marijuana para kadagiti saan a medikal a panggep. Kitaen iti 38.7:14.

Saan koma a marikna dagiti miembro nga obligadoda a mangpaatiddog iti mortal a biag babaen kadagiti nalabes a wagas. Dagitoy a pangngeddeng ti kasayaatan nga aramiden ti tao, no mabalin, wenno dagiti miembro ti pamilia. Rumbeng nga agsapulda iti nalaing a medikal a balakad ken nadiosan a panangiwanwan babaen ti kararag.

Dagiti bakuna nga ited dagiti nalaing a propesional iti medisina ket mangsalaknib iti salun-at ken mangtaginayon iti biag. Maallukoy dagiti miembro ti Simbaan a mangsalaknib iti bagbagida, dagiti annakda, ken dagiti komunidadda babaen ti panagpabakuna.

Kamaudiananna, addaan iti sungsungbatan dagiti indibidual nga agaramid kadagiti bukodda a pangngeddeng maipapan iti panagpabakuna. No adda pakaseknan dagiti miembro, nasken nga agpabalakadda kadagiti nalaing a propesional iti medisina ken agkalikagumda pay a maaddaan iti panangiwanwan ti Espiritu Santo.

Maysa a bilin ti Dios ti Word of Wisdom. Inlawlawag dagiti propeta a dagiti pannursuro iti Doktrina ken Katulagan 89 iramanna ti panagliklik iti tabako, naingel nga inumen (arak), ken napudot nga inumen (tsaa ken kape).

Adda pay dadduma a makadangran a sustansia ken aramid a saan a naibaga iti Word of Wisdom wenno dagiti lider ti Simbaan. Nasken nga usaren dagiti miembro ti sirib ken nainkararagan a panangikeddeng iti panagaramid kadagiti pili a mangitandudo iti pisikal, naespirituan, ken emosional a salun-atda.

Ti panangampon kadagiti ubbing ken panangipaay iti foster care ket mabalin a mangbendision kadagiti ubbing ken pamilia. Mabalin a maparnuay dagiti naayat, agnanayon a pamilia babaen ti panagampon. Dumteng man dagiti ubbing iti pamilia babaen ti panagampon wenno pannakayanak, agpadada a napateg a bendision.

Dagiti miembro nga agkalikagum a mangampon wenno mangipaay iti foster care kadagiti ubbing ket agtulnogda koma iti amin a mayaplikar a paglintegan dagiti pagilian ken gobierno a nairaman.

Saan koma nga agpa-autograpo dagiti miembro ti Simbaan kadagiti General Authority, Sapasap nga Opisial, wenno Area Seventy. Ti panangaramid iti kasta ket mangsinga kadagiti sagrado a calling-da ken ti pudno a kaipapanan dagiti miting. Mabalin pay a daytoy ti manglapped kadakuada a mangkablaaw kadagiti dadduma pay a miembro.

Saan koma a retratuen dagiti miembro dagiti General Authority, Sapasap nga Opisial, wenno Area Seventy kadagiti chapel.

Mairamam kadagiti magasin iti Simbaan:

• Ti Friend para kadagiti ubbing.

• TiPara iti Pigsa dagiti Agtutubo [For the Strength of Youth] para kadagiti agtututbo.

• Ti Liahona para kadagiti nataengan.

Allukoyen ti Umuna a Panguluen ti amin a miembro a mangbasa kadagiti magasin iti Simbaan. Makatulong dagiti magasin kadagiti miembro a mangadal iti ebanghelio ni Jesucristo, mangadal kadagiti pannursuro dagiti sibibiag a propeta, makarikna a konektadoda iti sangalubongan a pamilia ti Simbaan, mangsango kadagiti karit nga addaan iti pammati, ken ad-adda nga umasidegda iti Dios.

Ladawan

Wordmark ken simbolo ti Simbaan

Ti nagan, wordmark, ken simbolo ti Simbaan ket kangrunaan a pakabigbigan ti Simbaan.

Wordmark ken simbolo. Ti wordmark ken simbolo ti Simbaan (kitaen ti ilustrasion iti ngato) ket maaramat laeng kas inanamongan ti Umuna a Panguluen ken Korum dagiti Sangapulo-ket-dua nga Apostol. Mabalin a saan a mausar dagitoy kas pangarkos nga elemento. Saanda met a mabalin nga usaren iti ania man a personal, komersial, wenno promosional a wagas.

Dagiti kompiuter ken software a maus-usar kadagiti balay a pagmimitingan ti Simbaan ket ipaay ken imatmatonan dagiti headquarter ti Simbaan wenno ti opisina ti area. Aramaten dagiti lider ken miembro dagitoy a resources a mangsuporta kadagiti panggep ti Simbaan, agraman ti aramid iti family history.

Amin a software kadagitoy a kompiuter ket masapul nga umno a lisensiado iti Simbaan.

Mangipaay ti Simbaan kadagiti material a tumulong kadagiti miembro a makasursuro ken agbiag iti ebanghelio ni Jesucristo. Karaman kadagitoy dagiti nasantuan a kasuratan, mensahe iti sapasap a komperensia, magasin, manual, libro, ken dadduma pay a resources. Allukoyen dagiti lider dagiti miembro nga usarenda dagiti nasantuan a kasuratan ken dadduma pay a resources kas kasapulan tapno agadal iti ebanghelio iti pagtaengan.

Maallukoy dagiti miembro ti Simbaan a mangipakita iti panagraem iti bagi kadagiti panagpilida maipapan iti maitutop a panagkawes ken panaglanga. Agduduma ti maitutop iti nadumaduma a kultura ken iti nadumaduma nga okasion.

Mabalin nga agayuno dagiti miembro iti ania man nga oras. Nupay kasta, gagangay nga aramidenda ti umuna a Domingo ti bulan kas aldaw a panagayuno.

Ti aldaw a panagayuno ket gagangay nga iramanna ti panagkararag, pananglangan a mangan ken uminum iti 24 nga oras (no kabaelan ti bagi), ken panangted iti nawadwad a daton iti panagayuno. Ti daton iti panagayuno ket maysa a donasion a pangtulong kadagiti agkasapulan (kitaen iti 22.2.2).

No dadduma maangay dagiti miting iti sapasap a Simbaan wenno lokal iti umuna a Sabbath ti bulan. No mapasamak daytoy, ikeddeng ti panguluen ti stake ti alternatibo a Sabbath para iti aldaw a panagayuno.

Supiaten ken ibalakad ti Simbaan maibusor iti panagsugal iti ania man a kita. Karaman ditoy ti panagpusta iti isports ken dagiti loteria nga isponsoran ti gobierno.

Masansan nga adda gundaway dagiti miembro nga agtalinaed kadagiti nakayanakanda a pagilian tapno mangbangon ken mangpapigsa iti Simbaan sadiay. Nupay kasta, bukod a pili ti imigrasion iti sabali a pagilian.

Dagiti miembro nga umakar iti sabali a pagilian ket agtulnogda koma kadagiti amin a maipakat a linteg (kitaen iti Doktrina ken Katulagan 58:21).

Saan koma nga idiaya dagiti misionario a mangesponsor iti imigrasion dagiti dadduma.

Nasken a tungpalen, dayawen, ken kanunongan dagiti miembro dagiti paglintegan iti ania man a pagilian a pagnaedan wenno pagdaliasatanda (kitaen iti Doktrina ken Katulagan 58:21–22; Pagannurotan ti Pammati 1:12). Iraman daytoy dagiti paglintegan a mangiparit iti panagproselayt.

Saan a maipalubos kadagiti miembro ti Simbaan nga umawag, ag-email, wenno agsurat kadagiti General Authority maipapan kadagiti saludsod a mainaig iti doktrina, bukod a karit, wenno kiddaw. Maallukoy dagiti miembro nga agpatulongda kadagiti lokal a liderda, agraman ti presidenteda iti Relief Society wenno korum dagiti elder, no agsapsapulda iti naespirituan a pannarabay (kitaen iti 31.3).

Maallukoy dagiti lider ken miembro a mangtaming kadagiti kasapulan dagiti amin nga agnanaed iti uneg ti yunitda. Maipatpateg dagiti miembro nga addaan iti pagkurangan ken makatulongda iti napapateg a wagas. Mabalin nga intelektual, sosial, emosional, wenno pisikal dagiti pagkurangan.

Adu a makaparegta, natan-ok, ken maikari iti kangatuan a panagraem ti masarakan iti adu a dadduma pay a pammati. Nasken a sensitibo ken managraem dagiti misionario ken dadduma pay a miembro kadagiti pammati ken tradision dagiti dadduma.

Maallukoy dagiti miembro ti Simbaan a makiraman kadagiti aramid a mainaig iti politika ken gobierno. Iti adu a pagilian, mabalin a karaman daytoy ti:

• Panagbutos.

• Pannakikappeng wenno panagserbi kadagiti partido a mainaig iti politika.

• Panangted iti pinansial a suporta.

• Panakipagsarita kadagiti opisial ken kandidato ti partido.

• Panagserbi kadagiti nabutosan wenno nadutokan nga opisina iti lokal ken nasional a gobierno.

Maallukoy pay dagiti miembro a makiraman kadagiti maikari a gapuanan tapno mapagbalin dagiti komunidadda a makapasalun-at a lugar a pagnaedan ken pagpatanoran kadagiti pamilia.

Saan koma a mangbukel dagiti lokal a lider ti Simbaan kadagiti miembro tapno makiraman kadagiti banag a mainaig iti politika. Wenno saan koma a padasen dagiti lider ti mangimpluensia no kasano a makiraman dagiti miembro.

Nasken pay a liklikan dagiti lider ken miembro dagiti sasao wenno galad a mabalin a mayulog a kas panangendorso ti Simbaan iti ania man a partido a politika, plataporma, annuroten, wenno kandidato.

Obligado dagiti lider ti Simbaan a mangsalaknib iti kinapribado dagiti miembro. Dagiti rekord ti simbaan, direktorio, ken umasping a material ket saan a mabalin nga usaren para kadagiti personal, komersial, wenno politikal a panggep.

Kas paset ti pagrebbenganda a mangaywan kadagiti agkasapulan (kitaen iti Mosiah 4:26), idaton dagiti miembro ti Simbaan ti panawen, talento, ken pannakigayyemda tapno mangpasangbay kadagiti nagkamang kas miembro ti komunidadda.

Maallukoy dagiti agkasapulan a miembro a makisarita iti bishop-da imbes a makiumanda kadagiti headquarter ti Simbaan wenno agkiddaw iti kuarta manipud kadagiti dadduma pay a lider wenno miembro ti Simbaan.