Kōmeļeļe in Kadkadin ilo Tukadu in

Irooj eaar katakin, “Kōtļo̧k bwe em̧m̧aan otemjej en jeļā jerbal eo an, im n̄an m̧akūtkūt ilo opij eo me jitōn̄e n̄an e, ilo aolep laļn̄ijn̄ij” (Katak im Bujen Ko 107:99). Āinwōt juon ritōl ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata, kwoj aikuj kappukot revelesōn eo am̧ make n̄an jipan̄ eok ekkatak im kakūrm̧ool eddo ko kōn kūr eo am̧.

Ekkatak jeje ko rekwojarjar im katak ko an rikanaan ro ilo raan ko āliktata enaaj jipan̄ eok meļeļe im kakūrm̧ool eddo ko am̧. Ilo am̧ ekkatak naan ko an Anij, enaaj ļapļo̧k am̧ bōk kareel eo an Jetōb (lale Katak im Bujen Ko 84:85).

Kwoj barāinwōt ekkatak eddo ko am̧ jān ekkatak naan in kōmeļeļe ko ilo bok in bōk meļeļe in. Kōmeļeļe kein remaron̄ karuwaineneik tok revelesōn ko eļan̄n̄e rej kōjerbale n̄an letok meļeļe in pedped ko, kakien ko, im wāween jerbal ko n̄an kōjerbali ilo aer pukōt tōl eo an Jetōb.

Bok in Bōk Meļeļe Eļap: Jerbal ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata ej letok unin tōl n̄an aolep im ritōl ro rōutiej ilo ijo jokwe ie an Kabun̄ in. Ej ajej n̄an jekjōn ko:

• Pedped in Katak eo: Jebta kein rej letok pedped in katak eo im pedped in katak ko n̄an jerbal ilo Kabun̄ in. Rej kōmeļeļeik:

  • Karōk in m̧ōņōņō eo an Anij, jerbal in lo̧mo̧o̧r eo An im mour ijo eutiej tata, im jibadbad eo an Kabun̄ in.

  • Eddo eo an baam̧le ilo karōk eo an Anij, jerbal in lo̧mo̧o̧r eo An im mour ijo eutiej tata ilo m̧weo, im jemjerā eo ikōtaan m̧weo im Kabun̄ in.

  • Pedped in katak ko an priesthood.

  • Pedped in katak ko n̄an tōl ilo Kabun̄ eo an Rilo̧mo̧o̧r.

• Doulul ko ilo Kabun̄ in: Jebta kein rej letok naan in kōmeļeļe ko n̄an stake būreejtōnji ro im bisoprik ro, ritōl ro an doulul eo an elder ro, ritōl ro an doulul ko ilo stake im ward, im ritōl ro jet me rej jerbal ilo Kabun̄ in.

• Jerbal in Lo̧mo̧o̧r im Mour ijo Eutije Tata: Jepta kein rej kōmeļeļeik dilepān jerbal eo an Kabun̄ in:

  • Mour kōn gospel eo an Jisōs Kraist

  • Jipan̄ armej ro rej pād ilo aikuj

  • Kūr aolep n̄an bōk gospel eo

  • Kobaik baam̧le ko n̄an indeeo

• Tōl Kabun̄ eo: Jebta kein rej letok bar jet unin tōl ko n̄an tōl Kabun̄ in. Unin kōnono ko ekoba kweilo̧k ko, kūr ko, rekoot ko, jāān ko, im kakien ko.

Taitōļ ko im jekjōn ko ilaļ ilo bok in bōk meļeļe in rej nōm̧ba n̄an kōm̧m̧an bwe unin kōnono ko en pidodo n̄an loe im kein jipan̄. N̄an waanjon̄ak, kōmeļeļe kōn wōn emaron̄ liāp ilo juon tampeļ ej waļo̧k ilo 27.3.1. Nōm̧ba eo 27 ej ba kōn jepta eo, nōm̧ba eo 3 ej ba kōn jekjōn eo ilo jebta jab eo, im nōm̧ba 1 ej ba kōn jekjōn eo ilaļ in jekjōn eo.

Ejjab aolep stake im ward ko rej juon wōt aer kain aikuj. Bok in bōk meļeļe in epād ie unin tōl ko n̄an okoktak ko n̄an kakkari barāinwōt kein jipan̄ ko maron̄ ļōmņak kaki:

• Unin tōl ko n̄an okoktak ko n̄an kakkari () ej letok tōl eo kōn ekōjkan ukōte n̄an kakkari doulul ko im būrookraam̧ ko an Kabun̄ in n̄an iunit ko eoktak aikuj ko im kein jipan̄ ko.

• Kein Jipan̄ ko maron̄ ļōmņak kaki () epād bar jet meļeļe ko im tōl eo me emaron̄ jipan̄ n̄an ritōl ro an stake eo im ward eo.

Ritōl ro rej kappukōt im̧we eo kōn ewi wōt unin tōl ko im kein jipan̄ ko maron̄ ļōmņak kaki n̄an kōjerbali n̄an tōpar aikuj ko an membōr ro.

Bok in bōk meļeļe in enaaj meļeļe ko rekāāl jān iien n̄an iien. Juon laajrak in oktak ko rekāāl repād ilo “Tukadu in Meļeļe ko Rekāāl.”

N̄e kajjitōk ko rej walōn̄tak me rejjab kōnono kaki ilo jeje ko rekwojarjar, naan ko an rikanaan ro remour, ak bok in bōk meļeļe in, membōr in Kabun̄ in rej aikuj pedped ioon bujen ko aer ippān Anij, kapilōk eo an ritōl ro aer ijo jokwe ie, im im̧we eo an Jetōb kōn tōl.

Eļan̄n̄e ritōl ro ewōr aer kajjitōk ko kōn meļeļe ko ilo bok in bōk meļeļe in ak kōn juon men ejjab alikkar, rej kapilōk ippān ritōl eo eutiej ej tōl er ilo iien eo em̧ōkaj tata.

Ijello̧kin ijo me ej kwaļo̧k āinjuon:

• Naan kein bisop im bishoprik ilo bok in bōk meļeļe in rej keidi barāinwōt n̄an branch būreejtōn ro im branch būreejtōnji ro. Naan kein stake būreejtōn im stake būreejtōnji ilo bok in bōk meļeļe in rej keidi barāinwōt n̄an district būreejtōn ro im district būreejtōnji ro. Kōn juon kōmeļeļe ilo tukadu in kōn ekōjkan an mālim eo an district būreejtōn ro oktak jān stake būreejtōn ro, lale 6.3.

• Meļeļe ko n̄an ward ko im stake ko ekkā aer jerbal barāinwōt n̄an branch ko, district ko, im mijen ko.

• Meļeļe ko n̄an Jabōt rej jerbal n̄an jabdewōt raan eo me Jabōt ej kautieje ilo ijo kwoj jokwe ie.

• Naan in unit ej ba kōn ward im branch ko.

• Meļeļe ko n̄an ro jinen im jemān ekkā aer barāinwōt jerbal n̄an ro rej bōk eddo in lale.

Kūr ko an bisop eo im branch būreejtōn eo rejjab jon̄an wōt juon ilo mālim im eddo, barāinwōt kūr ko an stake būreejtōn eo im district būreejtōn eo. Bisop ej juon opiij ilo priesthood eo, im ekkapit eo ej kōmālim jān wōt Būreejtōnji eo Kein Kajuon. Stake būreejtōn ro rej kūr jān Routiej ro an Kabun̄ in im Eria Jiljilmjuonn̄oul ro.

Jet jebta ko ilo bok in bōk meļeļe in ekoba naan in kōmeļeļe ko n̄an kepaak opiij ko reļļap an Kabun̄ in ak eria opiij eo. Naan in kōmeļeļe eo n̄an kepaake opiij ko reļļap an Kabun̄ in ej jerbal n̄an ro ilo United States im Canada. Naan in kōmeļeļe eo n̄an kepaak eria opiij eo ej jerbal n̄an ro itulikin United States im Canada.