Vauvaura’a ’ōmuara’a

’Ua a’o mai te Fatu, « ’a tu’u atu i te mau ta’ata ato’a ’ia ha’api’i mai i tāna iho ’ohipa, ’e ’ia rave ho’i i te ’ohipa i roto i te tōro’a tei fa’ata’ahia nōna ra, ma te itoito ato’a » (Te Ha’api’ira’a Tumu ’e te mau Fafaura’a 107:99 ’Ei ta’ata fa’atere i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei, e ’imi ’outou i te heheura’a a te ta’ata iho nō te tauturu ia ’outou ’ia ha’api’i mai ’e ’ia rave i te mau ’ohipa o tō ’outou pi’ira’a.

E tauturu te tuatāpapara’a i te mau pāpa’ira’a mo’a ’e te mau ha’api’ira’a a te mau peropheta o te mau mahana hope’a nei ia ’outou ’ia hāro’aro’a ’e ’ia rave i tā ’outou mau ’ohipa. ’A tuatāpapa ai ’outou i te mau parau a te Atua, e rahi atu tō ’outou fāri’ira’a i te fa’aurura’a a te Vārua (hi’o Te Ha’api’ira’a Tumu ’e te mau Fafaura’a 84:85).

E ha’api’i ato’a mai ’outou i tā ’outou mau ’ohipa nā roto i te tuatāpapara’a i te mau arata’ira’a i roto i teie buka arata’i. E nehenehe teie mau arata’ira’a e ani i te heheura’a mai te mea e fa’a’ohipahia te reira nō te hōro’a i te hō’ē hāro’aro’ara’a i te mau parau tumu, te mau fa’aturera’a, ’e te mau terera’a ’ohipa e fa’a’ohipa ’a ’imi ai ’outou i te arata’ira’a a te Vārua.

E hōro’a te Buka arata’i rahi : Te tavinira’a i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei i te arata’ira’a nō te feiā fa’atere rahi ’e nō te fenua iho. ’Ua vāhihia te reira i roto e maha tuha’a :

• Te niu parau ha’api’ira’a : E vauvau teie mau pene i te parau ha’api’ira’a ’e te mau parau tumu nō te tāvinira’a i roto i te ’Ēkālesia. Tē fa’ata’a nei te reira i :

  • Te fa’anahora’a nō te ’oa’oa a te Atua, te ’ohipa nō te fa’aorara’a ’e te fa’ateiteira’a, ’e te fā a te ’Ēkālesia.

  • Te ti’ara’a o te ’utuāfare i roto i te fa’anahora’a a te Atua, te ’ohipa nō te fa’aorara’a ’e te fa’ateiteira’a i roto i te fare, ’e te autā’atira’a i rotopū i te ’utuāfare ’e te ’Ēkālesia.

  • Mau parau tumu o te Autahu’ara’a

  • Te mau parau tumu o te fa’aterera’a i roto i te ’Ēkālesia a te Fa’aora.

• Te pupu o te ’Ēkālesia : Tē hōro’a nei teie mau pene i te mau arata’ira’a nō te mau peresidenira’a titi ’e te mau ’episekōpora’a, te feiā fa’atere pupu autahu’ara’a, te feiā fa’atere nō te mau pupu o te titi ’e te pāroita, ’e nō vetahi ’ē atu e tāvini nei i roto i te ’Ēkālesia.

• Te ’ohipa nō te fa’aorara’a ’e te fa’ateiteira’a : Tē ha’api’i nei teie mau pene i te ’ohipa tumu a te ’Ēkālesia :

  • Te orara’a i te ’evanelia a Iesu Mesia

  • Te ha’apa’ora’a i te feiā nava’i ’ore

  • Te anira’a i te mau ta’ata ato’a ’ia fāri’i i te ’evanelia

  • Te tāhō’ēra’a i te mau ’utuāfare nō te tau a muri atu

• Te fa’aterera’a i te ’Ēkālesia : Tē vauvau nei teie mau pene i te mau arata’ira’a hau atu nō te fa’atere i te ’Ēkālesia. Te mau tumu parau nō ni’a i te mau putuputura’a, te mau pi’ira’a, te mau parau pāpa’i, te faufa’a moni, ’e te mau fa’aturera’a.

’Ua tānūmerahia te mau upo’o parau ’e te mau tuha’a upo’o parau i roto i teie buka arata’i nō te fa’a’ōhie i te ’imira’a ’e te fa’ahorora’a i te mau tumu parau. ’Ei hi’ora’a, ’ua hōro’ahia te mau arata’ira’a nō ni’a i te fa’aipoipora’a hiero i roto i te 27.2.1. Te nūmera 27 nō te pene, te nūmera 2 nō te hō’ē tuha’a i roto i te reira pene, ’e te nūmera 1 nō te hō’ē ïa tuha’a upo’o parau.

E ’ere hō’ē ā hina’aro tō te mau titi ’e te mau pāroita ato’a. Tē vai ra i roto i teie buka arata’i te mau arata’ira’a nō te fa’atanora’a ’e te mau rāve’a tauturu fa’ahepo-’ore-hia :

• E hōro’a te Arata’ira’a nō te fa’atanora’a () i te arata’ira’a nō ni’a i te huru nō te fa’atanora’a i te mau pupu ’e te mau fa’anahora’a a te ’Ēkālesia i te mau ’āmuira’a e mau hina’aro ’e e mau rāve’a tauturu ta’a ’ē ri’i tā rātou.

• Tē vai ra i roto i Te mau rāve’a tauturu fa’ahepo-’ore-hia () te tahi atu ha’amāramaramara’a ’e te arata’ira’a maita’i nō te feiā fa’atere nō te titi ’e nō te pāroita.

E ’imi te feiā fa’atere i te fa’aurura’a nō te ’ite ē, tei hea te mau arata’ira’a ’e te mau rāve’a tauturu fa’ahepo-’ore-hia e fa’a’ohipa nō te pāhono i te mau hina’aro o te mau melo.

E fa’atanotanohia teie buka arata’i i terā ’e terā taime. Tē vai ra te hō’ē tāpura nō te mau tauira’a ’āpī i roto i te « Summary of Recent Updates ».

Mai te mea e hiti mai te mau uira’a ’aita i fa’a’itehia i roto i te mau pāpa’ira’a mo’a, i roto i te mau parau a te mau peropheta ora, ’aore rā, i roto i teie buka arata’i, e nehenehe te mau melo o te ’Ēkālesia e turu’i i ni’a i tā rātou mau fafaura’a ’e te Atua, i ni’a i te a’ora’a a tō rātou feiā fa’atere, ’e i ni’a i te fa’aurura’a a te Vārua nō te arata’ira’a.

Mai te mea e uira’a tā te feiā fa’atere nō ni’a i te mau ha’amāramaramara’a i roto i teie buka arata’i ’aore rā, nō ni’a i te mau mea ’aita i fa’a’itehia, e paraparau ’oi’oi rātou i tō rātou tino huimana fa’atere.

Mai te mea ’aita e fa’ata’ara’a ta’a ’ē i te tahi atu vāhi :

• Te mau ta’o ’episekōpo ’e ’episekōpora’a i roto i teie buka arata’i, e tano ato’a ïa nō te peresideni ’āma’a ’e te peresidenira’a ’āma’a. E tū’ati ato’a te ta’o peresideni titi ’e peresidenira’a titi i te peresideni mata’eina’a ’e te peresidenira’a mata’eina’a.

• E tū’ati ato’a te mau parau pāroita ’e titi i te mau parau ’āma’a, mata’eina’a ’e misiōni.

• Te mau parau nō te sābati, e au ato’a ïa nō te mau huru mahana sābati e fa’a’ohipahia i te fenua iho.

Te mau parau nō ni’a i te mau metua, e fa’a’ohipa-ato’a-hia ïa nō te mau tīa’i ha’amanahia.

Te pi’ira’a o te ’episekōpo ’e te peresideni ’āma’a ’aita te reira e tū’ati i roto i te mana ’e te hōpoi’a, ’aita ato’a i roto i te pi’ira’a o te peresideni titi ’e te peresideni mata’eina’a. Te ’episekōpo, hō’ē ïa tōro’a i roto i te autahu’ara’a, ’e nā te Peresidenira’a Mātāmua ana’e e fāri’i i tōna fa’atōro’ara’a. Nā te huimana fa’atere rahi ’e te mau Hitu ’Ahuru ārea e pi’i i te mau peresideni titi.

I roto i te tahi mau pene i roto i teie buka arata’i, tē vai ra te mau arata’ira’a nō te fārerei atu i te mau pū fa’aterera’a o te ’Ēkālesia ’aore rā, i te piha tōro’a o te ārea. Te arata’ira’a nō te fārerei atu i te pū fa’aterera’a rahi o te ’Ēkālesia, nō te feiā ïa i roto i te fenua Marite ’e i Canada. Te arata’ira’a nō te fārerei atu i te piha tōro’a o te ārea, nō te feiā ïa i rāpae’au i te fenua Marite ’e Canada.