Te ha’api’ira’a i te ta’ata i te ’evanelia

’Ia ha’api’i ana’e rātou i te ’evanelia, e pe’e te mau metua, te mau ’orometua, ’e te feiā fa’atere i te hi’ora’a o Iesu Mesia, ’o ’oia ho’i te ’Orometua Ha’api’i Rahi. Te ha’api’ira’a mai tā te Fa’aora te huru, e ti’aturira’a ’e e hōpoi’a mo’a ïa te reira.

E fa’a’ite te feiā fa’atere i te mau parau tumu nō te ha’api’ira’a mai te huru Mesia i muri nei, i te mau ’orometua ha’api’i i roto i tā rātou mau pupu. ’Ua fa’ata’a-hu’ahu’a-hia atu teie mau parau tumu i roto i te Ha’api’ira’a mai tā te Fa’aora.

17.1.1

Here i te feiā tā ’outou e ha’api’i ra

’Ua riro te mau mea ato’a tā te Fa’aora e rave ’ei fa’a’itera’a nō tōna here (hi’o 2 Nephi 26:24). E pe’e te feiā fa’atere ’e te mau ’orometua ha’api’i i tōna hi’ora’a nā roto i te fa’a’itera’a i te here i te feiā tā rātou e ha’api’i ra. E pure rātou nō te feiā tā rātou e ha’api’i ra ma te fa’ahiti i tō rātou i’oa, e ’imi ’ia fa’atū’ati atu ’e ’ia hāro’aro’a ia rātou, ’e ’ia fa’atumu i ni’a i te mau hina’aro o te ta’ata tāta’itahi. E haere rātou e fārerei i te mau melo o tā rātou piha ha’api’ira’a ’aore rā pupu autahu’ara’a, ’o tē ’ore e haere mai nei.

17.1.2

Ha’api’i nā roto i te Vārua

Nō te fa’auru i te ta’ata ’ia roa’a te fa’aro’o ia Iesu Mesia, e mea ti’a i te mau ’orometua ’ia ha’api’i nā roto i te Vārua. E ’imi te mau ’orometua i te arata’ira’a a te Vārua ’a fa’aineine ai ’e ’a ha’api’i ai rātou, ’e e tūtava rātou i te ora ma te ti’amā nō tāna fa’aurura’a i te mau mahana ato’a.

17.1.3

Ha’api’i i te ha’api’ira’a tumu

’Ua ha’api’i te Fa’aora i te ha’api’ira’a tumu a tōna Metua. ’A pe’e ai rātou i te hi’ora’a o te Fa’aora, e fa’atumu te mau ’orometua i ni’a i te mau parau mau faufa’a roa ’e te fa’aora o te ’evanelia. E ha’api’i rātou ma te fa’a’ohipa i te mau pāpa’ira’a mo’a, te mau ha’api’ira’a a te mau peropheta nō te mau mahana hope’a nei, ’e te mau mātēria ha’api’i i ha’amanahia. E arata’i te mau ’orometua i te mau ’āparaura’a fa’auru ma te ha’apāpū ē, e mea fa’aitoito te reira i te ta’ata ’e te pāpū maita’i i te pae nō te ha’api’ira’a tumu. ’Ua tāpurahia te mau mātēria tei ha’amanahia i roto i te mau Arata’ira’a nō te fa’anahora’a ha’api’ira’a i ni’a i te ChurchofJesusChrist.org.

Nō te riro ’ei ta’ata fa’afāriuhia i te Fatu ia Iesu Mesia, e hōpoi’a nā te melo tāta’itahi o te ’Ēkālesia i te ’apora’a mai i te ’evanelia nōna iho. Ta’a ’ē noa atu i te reira, e hōpoi’a nā te mau metua ’ia ha’api’i i te ’evanelia i tā rātou mau tamari’i. E mea ti’a ’ia fa’atumu i te’apora’a ’e te ha’api’ira’a i te ’evanelia i ni’a i te ’utuāfare. E fa’aitoito ’e e turu te feiā fa’atere ’e te mau ’orometua ha’api’i i te ha’api’ira’a ’e te ’apora’a mai i te ’evanelia fa’atumuhia i ni’a i te ’utuāfare.

E fa’aitoito te feiā fa’atere ’e te mau ’orometua ha’api’i i te mau melo ’ia ’imi i tō rātou iho fa’aurura’a nō ni’a i te huru e tuatāpapa ’e e ha’api’i i te ’evanelia. ’Ia riro te mau pāpa’ira’a mo’a ’e te mau a’ora’a nō te ’āmuira’a rahi ’ei mātēria ha’api’ira’a mātāmua nō rātou. Tē vai ato’a ra te mau mātēria tauturu mai te Mai, pe’e mai—nō te ta’ata hō’ē ’e te ’utuāfare ’e te mau ve’a a te ’Ēkālesia.

E hōpoi’a nā te feiā fa’atere te ha’api’ira’a ’e te ’apora’a i te ’evanelia i roto i tā rātou mau pupu. Te tahi o te mau rāve’a e rave ai rātou i teie hōpoi’a, ’ua fa’ata’ahia ïa i raro nei.

• Hōro’a i te hi’ora’a maita’i nā roto i te ’apora’a i te ’evanelia ’e te ha’api’ira’a i te reira mai tā te Fa’aora te huru.

• E ara ē, e ha’apūai te ha’api’ira’a i roto i tā rātou mau pupu i te fa’aro’o, ’e e mea tano te ha’api’ira’a tumu.

• Mai te mea e melo te feiā fa’atere nō te ’āpo’ora’a pāroita, e ’āparau i te tahi atu mau melo o te ’āpo’ora’a e mea nāhea ’ia ha’amaita’i i te ha’api’ira’a ’e te ’apora’a i te ’evanelia i roto i te pāroita. E nehenehe te ’episekōpo e ani i te peresideni nō te Ha’api’ira’a Sābati ’ia arata’i i te reira mau ’āparaura’a.

• Mai te mea e tītauhia, ’a hōro’a i te i’oa o te tahi mau melo o te pāroita nō te pi’i ia rātou ’ei ’orometua ha’api’i i roto i tā rātou mau pupu, ma te pe’e i te mau arata’ira’a i roto i te 30.1.

• ’A fārerei atu i te mau ’orometua i pi’i-’āpī-hia nō te tauturu ia rātou i roto i tō rātou mau pi’ira’a (hi’o Ha’api’ira’a mai tā te Fa’aora, 38).

• ’A turu tāmau i te mau ’orometua ha’api’i i roto i tā rātou mau pupu. ’A paraparau tāmau i te mau ’orometua ha’api’i nō ni’a i tā rātou mau tauto’ora’a nō te patu i te fa’aro’o o te mau ta’ata tā rātou e ha’api’i ra. Mai te mea e tītauhia, ’a ani i te tauturu i te peresideni nō te Ha’api’ira’a Sābati.

I roto i te mau rurura’a ’āpo’ora’a a te mau ’orometua ha’api’i, e tau’aparau ’āmui te mau ’orometua ha’api’i i te mau parau tumu nō te ha’api’ira’a mai te Mesia te huru. E ’aparau ato’a rātou e nāhea ’ia ha’amaita’i te ha’api’ira’a ’e te ’apora’a i te ’evanelia. E fa’a’ohipa rātou i te Ha’api’ira’a mai tā te Fa’aora ’ei mātēria tauturu.

E fa’atupuhia te mau rurura’a ’āpo’ora’a a te mau ’orometua ha’api’i i te toru ’āva’e i te taime o te piha ha’api’ira’a e 50 minuti i te sābati.

• E nehenehe te mau rurura’a nō te mau ’orometua a te autahu’ara’a, te Sōtaiete Tauturu ’e te Feiā ’Āpī Tamāhine e fa’atupuhia i te sābati mātāmua ’aore rā te toru.

• E nehenehe te mau rurura’a nō te mau ’orometua o te Ha’api’ira’a Sābati e fa’atupuhia i te piti ’aore rā i te maha o te sābati.

E paraparau te peresidenira’a Paraimere i te hō’ē melo o te ’episekōpora’a nō te fa’ata’a e nāhea ’ia ha’apūai i te ha’api’ira’a i te Paraimere. E nehenehe te peresideni o te Ha’api’ira’a Sābati e tauturu, mai te mea e hina’arohia. ’Ua tāpurahia te tahi mau rāve’a i raro nei :

• E nehenehe te mau ’orometua ha’api’i o te Paraimere e haere i te mau rurura’a ’āpo’ora’a ’orometua ha’api’i ’e te mau ’orometua nō te tahi atu mau pupu.

• E nehenehe te mau rurura’a ’āpo’ora’a ’orometua ha’api’i ta’a ’ē e ravehia nō te mau ’orometua ha’api’i o te Paraimere. E nehenehe teie mau rurura’a e fa’atupuhia nō te roara’a e 20-minuti i te taime hīmenera’a a te Paraimere. ’Ei rāve’a rā, e nehenehe te reira e fa’atupuhia nā mua a’e ’aore rā, i muri a’e i te mau purera’a i te sābati ’aore rā i te tahi atu mahana i roto i te hepetoma.

• E nehenehe te mau melo o te peresidenira’a Paraimere e haere e hi’o i te mau piha ha’api’ira’a Paraimere,’e e ’āparau atu i muri iho i te mau ’orometua ha’api’i nō ni’a i te ha’api’ira’a mai tā te Fa’aora.

E nehenehe te ’āpo’ora’a pāroita e fa’anaho i te mau rurura’a ’āpo’ora’a ’orometua ha’api’i nō te mau metua, nō te tauturu ia rātou ’ia ha’amaita’i i te ha’api’ira’a ’evanelia i roto i te ’utuāfare. Mai te tahi atu mau rurura’a ’āpo’ora’a a te mau ’orometua ha’api’i, e fa’atupuhia te reira i te taime o te piha ha’api’ira’a e 50-minuti i te sābati.

E hi’o ’e e fa’anaho te ’āpo’ora’a pāroita i te mau rurura’a ’āpo’ora’a ’orometua ha’api’i. ’Ua mātarohia ē, nā te peresideni o te Ha’api’ira’a Sābati e arata’i i te mau putuputura’a. Terā rā, e nehenehe te ’episekōpora’a e ani i te tahi atu melo e arata’i i te reira.

Nō te ha’amāramaramara’a hau atu, ’a hi’o Ha’api’ira’a mai tā te Fa’aora, 3, ’aore rā teaching.ChurchofJesusChrist.org.