Kwaļo̧k Gospel eo im Kōkajoorļo̧k Membōr ro Rekāāl im Ro Rej Kab Bar Ro̧o̧ltok

Jej aolep ajri ro nejin Jemedwōj Ilan̄ eo eweppān an iakwe ajri ro Nejin. E ej leļo̧k n̄an aolep iien em̧m̧an n̄an obrak kōn An iakwe kōn Jisōs Kraist im gospel eo An (lale Jon 3:16; 2 Nipai 26:24–28; Alma 26:37; Laajrak in Tōmak ko 1:3).

Juon wāween jej kwaļo̧k ad iakwe n̄an Anij ej ilo ad iakwe im jerbal n̄an ajri ro Nejin (lale Matu 22:36–39; 25:40). Jej kajjieon̄ n̄an iakwe im jerbal āinwōt an kar Jisōs Kraist kōm̧m̧ane. Iakwe in ej im̧we kōj n̄an tōbar im jipan̄ armej ro jān aolep kabun̄ ko, kūl ko, im m̧anit ko (lale Jerbal 10:34; 2 Nipai 26:33).

Kōnke jej iakwe Anij im ajri ro Nejin, jej make kōņaan jeere kōjeraam̧m̧an ko E ekar litok n̄an kōj (lale Jon 13:34–35) im jipan̄ aintok Israel. Jej pukōt n̄an jipan̄ armej en̄jake lan̄lōn̄ eo me jej en̄jake (lale Alma 36:24). Āinwōt rikaļoor ro an Jisōs Kraist, jej kotak meram eo An (lale 3 Nipai 18:24–25). Jej kōnono anemkoj kōn Rilo̧mo̧o̧r im kareel eo An ilo mour ko ad (lale Katak im Bujen Ko 60:2). Jej kwaļo̧k iakwe, iien, en̄jake ko, im būrookraam̧ ko an Kabun̄ in n̄an kōjeraam̧m̧an ajri ro nejin Anij im jipan̄ er epaakeļo̧k Rilo̧mo̧o̧r. Jej kwaļo̧k kaki men kein ilo wāween ko rejejjet im watōki remman āinwōt m̧ōttan ļo̧k iiaio ko ad make, ilo online, im ko jet.

Rilo̧mo̧o̧r ej karuwaineneik aolep n̄an bōk gospel eo An im m̧aanjabpopo n̄an mour indeeo (lale Alma 5:33–34). Āinwōt rikaļoor ro An, jej ļoor waanjon̄ak eo An, karuwaineneik aolep n̄an “itok n̄an Kraist, im weeppān ilo e” (Moronai 10:32).

Jej jar kōn im̧we im tōl kōn wāween karuwaineneik ro jet n̄an:

• Itok im loe kōjeraam̧m̧an ko rej n̄an aolep ilo ejelok kalijōklok ilo Jisōs Kraist, gospel eo An, im Kabun̄ eo An (lale Jon 1:37–39, 45–46).

• Itok im jipan̄ kōm jerbal n̄an armej ro rej pād ilo aikuj.

• Itok im erom̧ uwaan Kabun̄ eo kar kōjepļaaktok an Jisōs Kraist.

N̄e karuwainene ko ad rej pedped ioon aikuj ko im itok limo ko an juon armej, kōrā ak m̧aan epidodo aer wōnm̧aeik karuwainene kein. Enan̄in aolep iien, karuwainene ej āinwōt meļeļe in kobaik baam̧le eo ad, ro m̧ōttad, im ro ruturid ilo ta eo emōj ad kōm̧m̧ane. N̄an waanjon̄ak, jemaron̄ karuwaineneik er n̄an:

• Kobatok ippām ilo im̧ōko im̧ōm n̄an m̧akūtkūt ko.

• Kobatok ippām n̄an kabun̄jar im ekkatak gospel eo,

• Etal n̄an m̧akūtkūt ko rejenolo̧k, ko āinwōt kōjeraam̧m̧an nin̄nin̄ ak peptaij.

• Bōk koņaad ilo ward im m̧akūtkūt ko an jukjuk in pād eo ak jerbal in jipan̄, ekoba būroojāāk ko kar ejaaki jān JustServe.org (ijo ekkar).

• Bōk koņaad ilo būrookraam̧ ko im m̧akūtkūt ko an Kabun̄ in. Men kein remaron̄ kobaik m̧akūtkūt ko an Būraimere, m̧akūtkūt ko an jodikdik ro, menmenbwij an baam̧le, kūlaaj ko an un̄n̄are-peid make, BYU-Pathway Wordlwide eo, im kūlaaj in katak riit, jeje im kajin Pelle.

• Bwebwenato ippān full-time mijenede ro im ron̄jake enaan ko aer.

N̄an ļōmņak ko reļļapļo̧k im kein jipan̄ ko, lale share.ChurchofJesusChrist.org im “Sharing the Gospel[Kwaļo̧k Gospel eo]” ilo Gospel Library eo.

Pedped ko kōn iakwe, jeere, im karuwainene ej bar jerbal n̄an kōkajoorļo̧k membōr ro rekāāl im ro rej kab bar ro̧o̧ltok.

Stake būreejtōn eo ej kabwijer kii ko ilo stake eo n̄an kwaļo̧k gospel eo im kōkajoorļo̧k membōr ro rekāāl im rej kab bar ro̧o̧ltok. E im rikakpilōklōk ro an rej leļo̧k aolepān tōl ko n̄an kijejeto kein. E ej kanooj lale bwe jerbal in ej ļeļōn̄tak n̄an ekōnono kake aolep iien ilo kweilo̧k ko an stake.

Ekkā ilo allōn̄ otemjeļo̧k, stake būreejtōn eo ej kweilo̧k ippān mijen būreejtōn eo n̄an kōtōbalbal kijejeto ko ikōtaan ritōl ro an stake im ritōl ro an ward im mijenede ro rej jerbal aolep raan. Ro jet remaron̄ pād ekoba:

• Rikakpilōklōk ro ilo stake eo im mijen būreejtōnji ro .

• Kile ko̧o̧njeļ ro reutiej n̄an ļeļo̧k eddo ioer.

• Būreejtōn eo an Doulul eo an Kōrā ro an stake eo.

• Mijenede ro kar kappeik er jān mijen būreejtōn eo.

kamiti an ritōl rūtto ilo stake eo ekoba:

• Stake būreejtōnji eo.

• Būreejtōnji eo an Doulul eo an Kōrā an Stake

• Ko̧o̧njeļ ro routiej kar kappeik er n̄an jerbal ippān doulul eo an elder ro.

Ritōl rein rej kōmeļeļeik im rejtake doulul eo an elder ro im būreejtōnji ro an doulul eo an Doulul eo an Kōrā ro ilo jerbal in kwaļo̧k kōn gospel eo im kōkajoorļo̧k membōr ro rekāāl im rej bar ro̧o̧ltok (lale 23.5.2). Naan in kōmeļeļe ko remaron̄ bōk jikier ilo jekjek an juon douļuļ ak kajjojo armej. Ritōl ro an ward mijen remaron̄ ruwaineneik n̄an bōk naan in kōmeļeļe in.

N̄an eļapļo̧k kōn kweilo̧k ko an kamiti in, lale 29.3.9.

Stake būreejtōnji emaron̄ kappeik ko̧o̧njeļ ro routiej n̄an kōmeļeļeik im rejtake būreejtōnji ro an doulul eo an elder ro im ritōl ro an ward mijen. Juon ak elōn̄ļo̧k ko̧o̧njeļ ro reutiej remaron̄ kappeik er n̄an tōl kijejeto kein. Ijo wōt ke, aolep ko̧o̧njeļ ro routiej ewōr eddo kein ippāer n̄an ward ko im doulul ko me kar kappeik er n̄ani.

Ium̧win tōl eo an stake būreejtōn eo, būreejtōnji eo an Doulul eo an Kōrā ro ilo stake eo rej kōmeļeļeik im rejtake būreejtōnji ro an Doulul eo an Kōrā ro ilo ward ilo eddo ko aer n̄an kwaļo̧k gospel eo im kōkajoorļo̧k membōr ro rekaāl im ro rej kab bar ro̧o̧ltok.

Pija

ro rūtūrin rej kōnono

Bisoprik eo ej jerbal ippān doulul eo an elder ro im būreejtōnji ro an Doulul eo an Kōrā ro ilo aer tōl kijejeto ko an ward eo ilo kwaļo̧k kōn gospel eo im kōkajoorļo̧k membōr ro rekāāl im ro rej kab bar ro̧o̧ltok. Ritōl rein rej kōkapilōklōk doon aolep iien.

Bisoprik eo ej kanooj lale bwe kijejeto kein ren kōnono kaki im loloorjake ilo kweilo̧k ko an ward ko̧o̧njeļ eo im ko̧o̧njeļ eo an jodikdik ro. Bisoprik eo ej barāinwōt etale im kōmālim karōk eo an ward eo n̄an kwaļo̧k gospel eo im kōkajoorļo̧k membōr ro rekāāl im ro rej kab bar ro̧o̧ltok (lale 23.5.6).

Bisoprik eo ej kapilōk ippān stake būreejtōn eo n̄an kōmelet eļan̄n̄e n̄an kūr juon ritōl mijen an ward eo (lale 23.5.3 n̄an meļeļe ko reļļapļo̧k).

Bisop eo ej intōrpiuiki membōr ro rekāāl ilo iiō eo ejetjet n̄an bōk juon peba in mālim n̄an deļo̧n̄e tampeļ n̄an bōk jikin n̄an kōm̧m̧ani peptaij im kapene ko (lale 26.4.12). E ej barāinwōt intōpriuik ļaddik ro ilo iiō ko rejetjet n̄an bōk Priesthood eo an Aron (lale 38.2.9.1). E ekkar an kōm̧m̧ane intōrpiu kein ilowaan juon wiik in an membōr m̧ōj an kapen.

Bisoprik eo ej loloorjake ritōl ro jet n̄an kanooj lale bwe membōr ro rekāāl im ro rej kab bar ro̧o̧ltok ren wōr aer iien em̧m̧an n̄an jerbal. Kain iien kein rem̧m̧an remaron̄ jipan̄ membōr rein eddōkļo̧k ilo jetōb im en̄jake kajoor eo an Irooj ilo mour ko aer. Jerbal in jipan̄ emaron̄ barāinwōt jipan̄ membōr ro en̄jake lan̄lōn̄ im kalōk jemjerā ko repaak ippān ro jet ilo ward eo. Iien kein rem̧m̧an rej aikuj pedped ioon aikuj ko im maron̄ ko an membōr eo. Ilo jekjek ko jet, juon kūr emaron̄ ekkar. IIo ko jet, juon ijjitōn̄ eo ejjab kanooj ļap (formal) ejetjet tata.

Būreejtōnji ro an doulul eo an elder ro im Doulul eo a Kōrā ro rej tōl kijejeto ko raan n̄an raan an ward eo n̄an kwaļo̧k gospel eo im kōkajoorļo̧k membōr ro rekāāl im ro rej kab bar ro̧o̧ltok (lale 8.2.3 im 9.2.3). Būreejtōnji eo an doulul eo an elder ro rej tōl kijejeto kein n̄an membōr ro an doulul eo an elder ro. Būreejtōnji eo an Doulul eo an Kōrā ro ej tōl kijejeto ko n̄an membōr ro an Doulul eo an Kōrā ro. Rej jerbal ippān doon n̄an tōl kijejeto kein ippān ward ko̧o̧njeļ eo, ium̧win tōļ eo an bisop eo.

Ritōl rein ewōr ippāer eddo kein rej ellaajrak:

• Jipan̄ im̧we membōr ro n̄an iakwe ajri ro nejin Anij, n̄an kwaļo̧k gospel eo, im n̄an karuwaineneik ro jet n̄an bōk kōjeraam̧m̧an ko an Rilo̧mo̧o̧r (lale 23.1).

• Bōk kapilōk ippān membōr ro an dolulul eo ak Doulul eo an Kōrā ro kōn wāween kwaļo̧k gospel eo. Ekōnono kōn wāween n̄an pukōt armej ro n̄an mijenede ro n̄an katakin im ekōjkan n̄an rejtake armej ro me em̧ōj katakin er. Kapilōk ippān doon kōn aikuj ko an membōr ro rekāāl im ro rej ro̧o̧ltok im ekōjkan n̄an leļo̧k jipan̄.

• Kappeik rikarejar m̧aan im kōrā ro n̄an jerbal in karejar n̄an membōr ro rekāāl im ro rej kab ro̧o̧ltok (lale 21.2.1). Rikarejar m̧aan im kōrā ro rej jerbal in karejar maron̄ barāinwōt jitōn̄ er n̄an armej ro mijenede ro rej katakin er (menin ej kōm̧m̧an ilo jerbaļ in ippān doon ko ippān mijenede ro). Eļan̄n̄e emaron̄, ritōl ro rej kappeik membōr ro me raar ak remaron̄ ejake jemjerā ko repaake doon ippān armej rein kajjojo. Ritōl ro rej kōketak m̧aan ro im kōrā ro rej jerbal in karejar n̄an leļo̧k iakwe im jipan̄ āinwōt an Kraist.

• Leļo̧k iien ko repeļļo̧k im rem̧m̧an n̄an membōr ro rekāāl im rej kab bar ro̧o̧ltok n̄an jerbal āinwōt rikarejar m̧aan im kōrā ro. N̄an eļapļo̧k kōn jerbal in karejar, lale jebta 21.

• Jipan̄ ward ko̧o̧jenļ eo ejake juon karōk n̄an kwaļo̧k kōn gospel eo im kōkajoorļo̧k membōr ro rekāāl im membōr ro rej kab bar ro̧o̧ltok (lale 23.5.6).

• Tōl jerbal eo an ritōl mijen an ward eo. Eļan̄n̄e ritōl in ejjab kūr, juon membōr in būreejtōnji eo an doulul eo an elder ro ej bōk jerbal in (lale 23.5.3).

Būreejtōn eo an doulul eo an elder ro im būreejtōn eo an Doulul eo an Kōrā ro kajjo iaer rej jitōn̄ juon membōr in būreejtōnji eo n̄an jipan̄ tōl kijejeto kein. Būreejtōnji membōr rein ruo rej jerbal ippān doon. Rej kobaļo̧k ilo kweilo̧k in loloorjake jerbal in tōl ko wiik otemjeļo̧k (lale 23.5.7).

Bisoprik eo ej arto artak ippān stake būreejtōn eo n̄an kōmelet eļan̄n̄e n̄an kūr juon ritōl mijen an ward eo. Eļan̄n̄e rej kāālet n̄an kōdepakpaklo̧k kūr in, bisoprik eo ej bōk kapilōk ippān doulul eo an elder ro im būreejtōnji eo an Doulul eo an Kōrā ro ilo kāālet wōn eo n̄an kūri. Armej in ej aikuj juon rikabwijer Melkisedek Priesthood eo. Eļan̄n̄e ritōl in ejjab kar kūr, juon membōr in būreejtōnji eo an doulul eo an elder ro ej bōk jerbal in.

Ritōl eo an mijen ilo ward eo ej rie būreejtōnji eo an doulul eo an elder ro im būreejtōnji eo an Doulul eo an Kōrā ro ilo eddo in mijenede ko aer. E ej barāinwōt wōr eddo kein ippān:

• Loloorjake jerbal eo an ward membōr eo im ritōl ro, ward mijenede ro, im full-time mijenede ro. Menin ekoba jerbal in tōl kijejeto ko n̄an katakin, m̧akūtkūt in peptaij ko, im kijejeto ko n̄an kōkajoorļo̧k membōr ro rekāāl. Emaron̄ barāinwōt koba karōk wāween ko n̄an jipan̄ membōr ro an ward eo kwaļo̧k kōn gospel eo.

• Tōl kweilo̧k in loloorjake jerbal in tōl ko wiik otemjeļo̧k (lale 23.5.7).

• Pād ilo kweilo̧k ko an ward ko̧o̧njeļ eo n̄e kūr kom̧ n̄ane.

• Jipan̄ ward ko̧o̧njeļ eo ejake im jerbali karōk eo an ward eo n̄an kwaļo̧k kōn gospel eo im kōkajoorļo̧k membōr ro rekāāl im rej kab bar ro̧o̧ltok (lale 23.5.6).

• Ia eo ej emālim, karōk n̄an full-time mijenede ro n̄an m̧ōn̄ā ippān membōr ro. Kappukōt iien ko rem̧m̧an im peļļo̧k n̄an mijenede ro n̄an m̧ōn̄ā ippān baam̧le ko me elōn̄ jet iaer rejjab membōr im jet iaer rejaniknik n̄e ekkar. Kōketak er n̄an kwaļo̧k juon ennaan an gospel eo ippān baam̧le kein.

• Jerbal ippān ritōl eo ej lale tampeļ im menmenbwij an baam̧le ilo ward eo im rikapilōk ro n̄an jipan̄ ro rej ekkatak gospel eo, membōr ro rekāāl, im membōr ro me rej kab bar rooltok bwe ren bōk koņaer ilo jerbal in tampeļ im menmenbwij an baam̧le.

Mijenede ro an ward eo rej jipan̄ membōr ro an ward eo en̄jake lan̄lōn̄ n̄e rej kwaļo̧k gospel eo āinwōt kar kōmeļeļeik ilo 23.1. Rej jerbal ium̧win tōl eo an ritōl eo an mijen ward eo ak membōr eo an būreejtōnji eo an doulul eo an elder ro me rej bōk eddo in jerbal in. Būreejtōn ro an doulul eo an elder ro im Doulul eo an Kōrā ro emaron̄ elmakote membōr ro me remaron̄ jerbal.

Mijenede ro an ward eo rej katakin kōn naan im waanjon̄ak kōn ekōjkan n̄an iakwe ro jet, kwaļo̧k tōmak eo aer, im karuwaineneik ro jet n̄an bōk kōjeraam̧m̧an ko an gospel eo. Rej barāinwōt jipan̄ membōr ro an ward eo jerbal in karejar n̄an membōr ro rekāāl im rej kab bar ro̧o̧ltok.

Mijenede ro an ward eo rej bōk koņaer ilo kweilo̧k in loloorjake jerbal in tōl ko wiik otemjeļo̧k (lale 23.5.7).

Kwaļo̧k kōn gospel eo im kōkajoorļo̧k membōr ro rekāāl im ro rej ro̧o̧ltok aikuj in kōnono kake iien otemjej ilo kweiļo̧k ko an ko̧o̧ņjeļilo ward eo. Bisop eo emaron̄ kajjitōk ippān doulul eo an elder ro ak būreejtōn eo an Doulul eo an Kōrā ro n̄an tōl iien ekōnono kein, ko rej aikuj pedped ioon kajjojo armej. Bisop eo emaron̄ karuwaineneik ritōl eo an mijen ward eo n̄an pād ilo kweilo̧k ko an ward ko̧o̧njeļ eo.

Ko̧o̧njeļ eo emaron̄ arto artake karōk eo an ward n̄an kwaļo̧k gospel eo im kōkajoorļo̧k membōr ro rekāāl im ro rej kab bar ro̧o̧ltok. Rej barāinwōt bōk an doon lōmņak kōn ijjitōn̄ ko me aikuj in loloorjaki ilo aolep doulul ko. Bo̧o̧m kein āinwōt kein rej ellaaajrak maron̄ jipan̄ iien ekōnono kein:

• Rekoot in Eddōkļo̧k an Rikkatak an Mijenede. Full-time mijenede ro rej kōjerbal boom̧ in n̄an riboot kōn eddōkļo̧k eo an armej ro rej katakin er. Boom̧ in ej jipan̄ mijenede ro im membōr ro loloorjake jerbal eo aer. Ilo eria ko ijo mijenede ro rej kōjerbal Area Book Planner [Bok in Karōk an Eria] app eo, boom̧ in ej pād n̄an ritōl ro an ward eo ilo Leader and Clerk Resources (LCR) im ilo Member Tools app eo. Ilo eria ko jet, full-time mijenede ro rej kōjerbal juon pepa eo emōj kapeki.

• Eddōkļo̧k an Membōr ro Rekāāl im Ro Rej Kab Ro̧o̧ltok. Ritōl ro an ward eo rej kōjerbal boom̧ in n̄an karōk wāween ko n̄an jipan̄ membōr ro eddōkļo̧k ilo jetōb. Ej pād ilo LCR.

N̄an meļeļe ko reļļapļo̧k kōn ward ko̧o̧njeļ eo, lale 29.2.5.

Ilo ekōnono kōn aikuj ko an jodikdik ro ilo ward eo, ko̧o̧njeļ eo an jodikdik ilo ward eo ej leļo̧k kōļmenļo̧kjeņ eo ejenolo̧k n̄an membōr ro rekāāl im ro rej kab bar ro̧o̧ltok im n̄an jodikdik ro ilo aer katakin er jān mijenede ro. Ko̧o̧njeļ eo ej barāinwōt ekōnono kōn wāween ko jodikdik ro remaron̄ bōk koņaer ilo karōk eo an ward eo n̄an kwaļo̧k kōn gospel eo im kōkajoorļo̧k membōr ro rekāāl im ro rej kab bar ro̧o̧ltok. N̄an eļapļo̧k kōn ward ko̧o̧njeļ eo an jodikdik, lale 29.2.6.

Kajjojo ward ej aikuj wōr juon an karōk em̧m̧an n̄an kwaļo̧k kōn gospel eo im kōkajoorļo̧k membōr ro rekāāl im ro rej kab bar ro̧o̧ltok. Emaron̄ jipan̄ tōl kweilo̧k ko, jerbal in jipan̄, im m̧akūtkūt ko. Earon̄ kobaik karōk ko im ļōmņak ko n̄an:

• Jipan̄ aolep en̄jake karuwainene ilo kweilo̧k ko im m̧akūtkūt ko an ward eo.

• Jipan̄ membōr ro jelā kōn lan̄lōn̄ in kwaļo̧k gospel eo.

• Rie armej ro kar katakin er jān mijenede ro.

• Jipan̄ membōr ro rekāāl im ro rej kab bar ro̧o̧ltok eddōkļo̧k ilo jetōb.

Būreejtōn ro an Doulul eo an elder ro im būreejtōn ro an Doulul eo an Kōrā ro rej jipan̄ ward ko̧o̧njeļ eo ejake karōk eo. Ritōl eo an ward mijen eo ej barāinwōt jipan̄. Bisop eo ej etale im kōmalimi.

Membōr ro an ward ko̧o̧njeļ eo rej bōk jerbal in tōļ bun̄tōn im̧aan ilo jerbale karōk eo. Rej riboot kōn eddōkļo̧k eo ilo kweilo̧k ko an ward ko̧o̧njeļ eo. Rej barāinwōt kōkāāl karōk eo n̄e emenin aikuj.

Aolep wiik, kweilo̧k ko ralikar em rekadu kitier rej kōm̧m̧an n̄an loloorjake kijejeto ko n̄an kwaļo̧k kōn gospel eo im kōkajoorļo̧k membōr ro rekāāl im ro rej kab bar ro̧o̧ltok. Eļan̄n̄e ritōl eo an mijen ilo ward eo ej kūr, e ej kōjeikik kweilo̧k kein. N̄e ejjab, membōr eo an būreejtōnji eo an doulul eo an elder ro ej bōk eddo in jerbal in kōjeikik.

Ro jet me rej ruwainene ekoba:

• Membōr ro emōj kappeik er an būreejtōnji eo an Doulul eo an Kōrā ro im doulul eo an elder ro.

• Mijenede ro an ward eo.

• Juon rijipan̄ ilo doulul eo an pris ro (ak būreejtōn eo an doulul eo an rūkaki ro ak tikōn ro eļan̄n̄e ejjeļo̧k pris ro ilo ward eo).

• Juon membōr in būreejtōnji eo erūtto tata an kūlaaj eo an Doulul eo an Jiron̄ ro.

• Mijenede ro rej jerbal aolep raan.

Er remaron̄ ekōnono kōn:

• Kōjerbal karōk eo an ward eo n̄an kwaļo̧k gospel eo im kōkajoorļo̧k membōr ro rekāāl im ro rej kab bar ro̧o̧ltok. Rej loloorjake karōk in ippān karōk ko im kōttōpar ko an mijenede ro rej jerbal aolep raan.

• Ijjitōn̄ ko kar liļo̧k ilo kweilo̧k ko im̧aanļo̧k.

• Wāween n̄an rie ro kar katakin er jān mijenede ro.

• Karōk ko n̄an m̧akūtkūt in peptaij ko rej itok wōt im karuwainene membōr ro n̄an pād.

Kweilo̧k kein remaron̄ kōm̧m̧an ilo an armej lukkuun jelm̧aeik doon ak kōm̧m̧an ilo mejatoto jān joko rettoļo̧k. Loloorjake m̧akūtkūt ko emaron̄ barāinwōt kōm̧m̧an ilo wāween ko jet, ekoba talboon ko, text, im email ko.