Kūr ko ilo Kabun̄ in

Jemedwōj Ilan̄ ekar leļo̧k n̄an Jisōs Kraist juon mijen ekwojarjar n̄an kakūrm̧oole (lale Luk 4:18–19; Jon 6:38; 3 Nipai 27:14–16). Ilo iien jerbal in karejar eo An, Rilo̧mo̧o̧r eo ekar lōke ro Rikaļoran kōn eddo ko raorōk (lale Luk 10:1–9). Ejjeļo̧k oktak, Irooj ej kūr em̧m̧aan ro im kōrā ro n̄an jerbal ilo Kabun̄ in rainin kōn kūr ko reim̧we jān ro Rikarejeran. Iien kein rem̧m̧an n̄an jerbal rej jeļā kaki āinwōt kūr ko.

Kūr ko rej liļo̧k n̄an membōr ro iien ko rem̧m̧an n̄an en̄jake lan̄lōn̄ eo kōn jerbal n̄an Anij kōn jerbal n̄an ajri ro Nejin (lale Mosaia 2:17). Kūr ko rej barāinwōt jipan̄ membōr ro kōļapļo̧k tōmak eo aer im epaakeļo̧k Irooj.

Ejjab em̧m̧an n̄an make kōņaan tōl n̄an kūr ko rejenolo̧k ilo Kabun̄ in (lale Mark 10:42–45; Katak im Bujen Ko 121:34–37). Ak ejjeļo̧k membōr ro an Kabun̄ in rej “walōn̄ļo̧k (advance)” jān juon kūr n̄an bar juon. Ālkin jerbal ilo juon kūr, rej aikuj jab kōtmene n̄an bōk juon kūr eo eļapļo̧k eddo eo ie ak aorōkļo̧k (prominence). Jerbal ilo tiljek ilo juon kūr ej ļapļo̧k an aorōk jān ta kūr eo. Irooj ej kautiej ajeļo̧k eo an aolep ro me rej jerbal ilo Kabun̄ in.

Jepta in ej kōmeļeļeik ekōjkan an membōr ro kūr n̄an jerbal ilo Kabun̄ in im ekōjkan aer kōtļo̧k jān kūr ko aer. Ej barāinwōt koba juon Jaat in Kūr ko me ej letok meļeļe eo kōn leļo̧k kūr ko rejenolo̧k, rejtake membōr ro ilo kūr ko aer, im kōjenolo̧k er (lale 30.8).

Bōk juon kūr n̄an jerbal aikuj in juon en̄jake eo eļap meļeļe in ilo jetōb n̄an juon membōr. Kūr ko n̄an jerbal n̄an Irooj rej ekwojarjar im iien ko rem̧m̧an rōlan̄lōn̄. Ritōl ro rej kōnono kōn menin kōn wāween eo rej leļo̧k juon kūr. Rej aikuj jab leļo̧k kūr ko ilo juon jekjek bajjōk (casual).

Jaat in Kūr ko ej kwaļo̧k kōn wōn eo emaron̄ leļo̧k kajjojo kūr (lale 30.8). Ālkin bōk mālim ko remenin aikuj, ritōl ro kōmālim e ej kapilōk ippān membōr eo n̄an meļeļe eļan̄n̄e jekjek ko an membōr eo rej kōtļo̧k bwe en jerbal. Ritōl eo ej barāinwōt pukōt n̄an meļeļe eļan̄n̄e membōr eo ej erreo im m̧ōņōņō in jerbal.

N̄e juon ritōl ej leļo̧k juon kūr, ej kōmeļeļeik bwe ekar itok jān Irooj. Eļan̄n̄e aikuj, emaron̄ leļo̧k n̄an membōr eo iien n̄an jar ilo ļōmņak kōn kūr eo, pukōt kapene eo an make ilo jetōb.

Ritōl eo emaron̄ barāinwōt:

• Kōmeļeļeik jibadbad eo, aorōk eo, im eddo ko an kūr eo.

• Jipan̄ membōr eo kalimjōk eļaptata armej ro enaaj jerbal n̄an er. (N̄e ewōr, ritōl eo ej leļo̧k juon laajrak in armej rein jān Leader and Clerk Resources.)

• Kōketak membōr eo n̄an pukōt Jetōb eo an Irooj ilo kakūrm̧ool kūr eo.

• Kam̧ool bwe Irooj enaaj jipan̄ membōr eo im naaj kōjeraam̧m̧an e kōn an jerbal ilo tiljek.

• Jiron̄ membōr eo wōn eo enaaj leļo̧k kaminene im rejtak eo n̄an kūr eo.

• Jiron̄ membōr eo wōn eo n̄an riboot n̄an e kōn kijejeto ko an.

• Karon̄ membōr eo kōn jabdewōt kweilo̧k ko e ej aikuj pād ie im jabdewōt kein jipan̄ ko me rej pād.

• Jipan̄ membōr eo jeļā ewi jon̄an awa ej menin aikuj n̄an kallim̧ur n̄an kūr eo.

• Ekōnono kōn jabdewōt n̄ūrbōktak ko ak apan̄ ko an kūr eo.

• Uwaaki kajjitōk ko emaron̄ wōr an membōr eo.

Eļan̄n̄e membōr eo ej rim̧are, ritōl eo ej kūrtok eo pālele n̄an an pād n̄e leļo̧k kūr eo.

Eļan̄n̄e kūr eo ekitbuuj jerbal ippān ajri ro ak jodikdik ro, ritōl eo ej kōmeļeļeik bwe membōr eo enaaj aikuj in kadedeļo̧k kaminene in kōjparok eo an ajri im jodikdik ro. Kaminene in ej pād ilo ProtectingChildren.ChurchofJesusChrist.org. Membōr eo ej aikuj kadedeļo̧k ilowaan juon allōn̄ ālkin an kar rejtak im aolep jilu iiō ko ālkin.

Ro raar kūr n̄an elōn̄ iaan jerbal ko ilo Kabun̄ in rej aikuj jake m̧aanļo̧k n̄an rejetak m̧okta jān aer jino jerbal (lale Katak im Bujen Ko 28;13; 42.11). Kōn rejtake ro kar kūr n̄an jerbal, membōr ro rej kallim̧ur kōn jipan̄ eo aer im m̧ōņōņō n̄an jipan̄.

Jaat in Kūr ko ej kwaļo̧k eļan̄n̄e juon rejetak ej menin aikuj im wōn ro rej bōk kuņaer ie (lale 30.8). Ritōl eo me ekar lale an kūr eo leļo̧k, ak juon ritōl an priesthood eo ej kōmalimi, ej kwaļo̧k armej eo n̄an rejtak.

Armej eo me ej kōjeikik rejtak eo ej m̧oktata kwaļo̧k wōn eo kar kōtļo̧k jān jerbal eo (eļan̄n̄e ewōr). E ej kajjitōk ippān membōr ro n̄an leļo̧k juon kakōļļe in kam̧m̧olol kōn jerbal in jipan̄ eo an armej eo (lale 30.6).

N̄e kwaļo̧k juon armej n̄an rejtak, ritōl eo an priesthood kar kōmālim ej kajjitōk ippān n̄an jutak. Ritōl eo ej emaron̄ kōjerbal naan ko āinwōt kein:

“[Āt eo] em̧ōj kūri āinwōt [jerbal eo]. Ro rej errā kōn rejtake [ļeo ak lio) emaron̄ kwaļo̧k kōn kotak pein. [Bōjrak ilo jidik iien.] Ro rej jum̧ae, eļan̄e ewōr, maron̄ barāinwōt kwalo̧ke. [Bōjrak ilo jidik iien.]”

Armej eo me kar kwaļo̧ke aikuj bōk koņaan ilo rejtake eo. Eļan̄n̄e elōn̄ļo̧k jān juon armej rej kwaļo̧ke, remaron̄ rejtake er āinwōt juon kumi.

Eļan̄n̄e juon membōr eo ej mour kōn kein im bujen ko an ej jum̧ae kūr eo, ritōl eo ej tōl ak ritōl eo an priesthood kar kōmālim kar kappeik ej kweilo̧k ippān ļeo ak lio ilo makeļo̧k ālkin kweilo̧k eo. Ritōl eo ej pukōt n̄an meļeļe etke membōr eo ej jum̧ae. Ej kajjitōk eļan̄n̄e membōr eo ejeļā kōn m̧wil eo me emaron̄ kōm̧m̧an bwe armej eo en jab ekkar jān an jerbal ilo jerbal eo. Eļan̄n̄e membōr eo ej jum̧ae ejjab jeļā kōn kain m̧wil in, rej kōketak ļeo ak lio n̄an rejtak im jipan̄ armej eo ilo kūr eo.

Membōr ro wōt rej mour kōn kien im bujen ko aer maron̄ bōk koņaan ilo rejtak eo. Ijo wōt ke, eļan̄n̄e juon ejjab membōr ak juon membōr me ejjab mour kōn kien ko im bujen ko an ewōr an kajjitōk ko kōn jerbal eo, emaron̄ kwaļo̧ki ippān bisop eo ak stake būreejtōn eo ilo makeļo̧k ālkin kweilo̧k eo.

Ro me rej kūr n̄an elōn̄ iaan jerbal ko an Kabun̄ in rej aikuj kōjenolo̧k. Jaat in Kūr ko rej kwaļo̧k wōn eo emaron̄ kōm̧m̧ane kōjenolo̧k eo (lale 30.8). Menin ekkar an waļo̧k ālkin rejtak membōr ro im m̧okta jān aer jino jerbal.

N̄an kōjenolo̧k juon membōr n̄an juon kūr ej meļeļe in n̄an leļo̧k n̄an ļeo ak lio mālim eo n̄an jerbal ilo kūr jab eo (lale 3.4.3.1). Juon iien kōjenolo̧k ej barāinwōt kitbuuj juon kōjeraam̧m̧an im kallim̧ur ko kar tōl jān Jetōb eo. Kōn elōn̄ļo̧k meļeļe, lale 18.11,

Pija

kōrā eo ej bōk juon kōjeraam̧m̧an an priesthood

Jon̄an wōt eo emaron̄, ritōl ro rej kōtļo̧k bwe membōr ren jerbal ilo kūr ko aer ebwe an to n̄an ejaki jemjerā ko rekajoor ippān ro rej jerbal n̄an er. Membōr ro emaron̄ barāinwōt aikuj iien n̄an ekkatak im eddōkļo̧k ilo eddo ko aer. Menin emaron̄ eļap tata aorōk n̄an ritōl ro an jodikdik ro im ajri ro barāinwōt būreejtōn ro an Doulul eo an Kōrā ro im doulul eo an elder ro. Aitokan tōre in jerbal in jipan̄ eo em̧m̧an n̄an ritōl ro ekārere, bōtaab ruo ļo̧k n̄an ļalem iiō ko ebwe an emakijkij.

Ilo elōn̄ wōt iaan jekjek ko, membōr rej kōtļo̧k jān kūr ko n̄e Irooj ej im̧we ritōl ro aer n̄an kōtļo̧k er. Jet membōr, āinwōt stake im mijen būreejtōn ro, ekka aer kōtļo̧k ālkin juon tōre in iien kar ejake. Juon armej emaron̄ barāinwōt kōtļo̧k kōn un ko jet, ko āinwōt jekjek ko an juon make ak baam̧le.

N̄e juon būreejtōn ak juon bisop ej kōtļo̧k, rikakpilōklōk ro an rej ilo ejjeļo̧k kajjitōk rej kōtļo̧k. Ro jet ilo doulul eo, ro āinwōt kūļōk ro, rijeje ro im rūkaki ro, ilo ejjeļo̧k kajjitōk rejjab kōtļo̧k.

Kōtļo̧k ko jān kūr ko ilo Kabun̄ in rej kōm̧m̧an jān juon eo ilo ejja jon̄an mālim eo wōt āinwōt armej eo me kar leļo̧k kūr ko. N̄an waanjon̄ak, eļan̄n̄e juon membōr in bisoprik eo ekar leļo̧k kūr eo, juon membōr in bisoprik eo ej leļo̧k kōtļo̧k eo.

Leļo̧k juon kōtļo̧k ej juon iien em̧m̧an aorōk n̄an juon ritōl n̄an kwaļo̧k kam̧m̧oolol im n̄an kile pein Anij ilo jerbal in jipan̄ eo an membōr eo. Ritōl eo ej kweilo̧k ippān membōr eo e make n̄an karon̄ ļeo ak lio kōn kōtļo̧k eo m̧okta jān an kōjeļļā kake ilo lo̧bwilej. E emaron̄ kāālet n̄an kajjitōk ippān membōr eo n̄an kwaļo̧k ta eo ekar ekkatak jān jerbal ilo kūr eo. Ro wōt me rej aikuj in jeļā rej karon̄ er kōn kōtļo̧k eo m̧okta jān an kōjeļļā kake.

Juon ritōl priesthood eo kar kōmālim ej kōjeļļā kōn kōtļo̧k eo ilo ejja ļamļam eo wōt me armej eo ekar rejtak ie. Ritōl eo emaron̄ kōjerbal naan ko āinwōt kein:

“[Āt eo] em̧ōj kōtļo̧k āinwōt [jerbal eo]. Ro rej kōņaan kwaļo̧k kam̧m̧oolol n̄an [ļeo ak lio] kōn jerbal in jipan̄ eo an emaron̄ in kwaļo̧ke kōn kotak peiūm̧.”

Ritōl ro rejjab kajjitōk eļan̄n̄e ewōr jabdewōt ej jum̧ae.

Stake būreejtōnji eo emaron̄ leļo̧k etan em̧m̧aan ro jeid im jatid n̄an kūr er ak kōtļo̧k er āinwōt bisop ro. Elmakot ko rej jilkinļo̧k n̄an Būreejtōnji eo Kein Kajuon kōn Leader and Clerk Resources (LCR). Juon membōr in stake būreejtōnji eo, juon kūļōk, ak rijeje eutiej emaron̄ kōpooj kajjitōk eo. Ijoke, stake būreejtōn eo wōt emaron̄ jilkinļo̧k kajjitōk eo.

Eddo ko an juon bisop rej eļlap (lale 7.1). Rej aikuji juon em̧m̧an in m̧ool, erreo ilo mour, keke mo̧o̧j ilo jetōb, im tiljek n̄an Rilo̧mo̧o̧r eo. Stake Būreejtōnji eo ej pukōt kapene eo jān Jetōb eo kōn wōn eo n̄an elmakote. N̄e elmakote juon em̧m̧aan n̄an jerbal āinwōt juon bisop, rej kanooj ļōmņak kōn 1 Timote 3:2–7. Rejjab kajjitōk elmakot ko jān membōr ro an ward eo. Lōn̄ļo̧k in meļeļe ko kōn men ko aikuj jān juon bisop kar litok ilo LCR.

M̧okta jān an stake būreejtōn eo maron̄ kūr juon bisop kāāl, ej aikuj bōk mālim eo kar je kōn elmakot eo an jān Būreejtōnji eo Kein Kajuon. Kōn mālim in, stake būreejtōņ eo emaron̄ kapit im kōjenolo̧k juon bisop ālkin an ward membōr ro kar rejetak e ilo juon kweilo̧k in kwojkwoj eo. Mālim eo jān ippān Būreejtōnji eo Kein Kajuon ej barāinwōt menin aikuj m̧okta jān an stake būreejtōn eo kōtļo̧k juon bisop. Stake būreejtōn eo emaron̄ jab ajeļo̧k eddo kein:

N̄e juon em̧m̧aan kar kūr āinwōt bisop ejjab juon pris utiej, stake būreejtōn eo ej kanooj lale bwe ej ekkapit juon pris eutiej m̧okta jān an kapit juon bisop. N̄e ewōr juon em̧m̧aan eo ej ekkapit n̄an bisop mokta, ej aikuj kōjenolo̧k wōt āinwōt juon bisop n̄an ward eo. Eļan̄n̄e em̧m̧aan eo ej kūr āinwōt rikakpilōklōk n̄an bisop ejjan̄in pris eutiej, rej aikuj kar ekkapit n̄an pris eutiej m̧okta jen aer kōjenolo̧k.

Ālkin an Būreejtōnji eo Kein Kajuon kar kōmālim elmakot eo an juon em̧m̧aan n̄an jerbal āinwōt bisop, rej kōmālim stake būreejtōn eo n̄an kapit e im kōjenolo̧k e. Stake būreejtōn eo:

1. Kūr em̧m̧aan eo kōn aolepān ettan.

2. Ba bwe ej kōm̧mane kōn mālim eo an Melkisedek Priesthood eo.

3. Kapit em̧m̧aan juon bisop (ijjelo̧kin elan̄n̄e emōj an kar ekkapit moktaļo̧k).

4. Kōjenolo̧k e n̄an tōl ioon ward eo im n̄an erom būreejtōn eo an Priesthood eo an Aron im doulul eo an pris ro, kōmejajaik eddo ko an n̄an rikabwijer ro an Priesthood eo an Aron im jiron̄ ro ilo ward eo (lale 7.1.2).

5. Leļo̧k n̄an e aolep ki ko, jim̧we ko, kajoor ko, im mālim eo an opiij eo an bisop, kwaļo̧k eļap tata n̄an jerbal ko an bisop eo āinwōt juon riekajet in Israel im āinwōt pris utiej eo ej tōl ilo ward eo (lale 7.1.1 im 7.1.3).

6. Ej leļo̧k naan in kōjeraam̧m̧an ko āinwōt an Jetōb eo tōl.

7. Ej kiili ilo etan Jisōs Kraist.

Eria Jiljilimjuonn̄ul eo ak Ritōl Utiej an Kabun̄ emaron̄ barāinwōt kūr, kapit, im kōjenolo̧k juon bisop kōn mālim jān Būreejtōnji eo Kein Kajuon.

Laajrak in jaat in kar kālet kūr ko an ward im stake eo. Kūr ko jet im iien ko rem̧m̧an an jerbal in jipan̄ rej kōmeļeļe juon bar jikin ilo bok in bōk meļeļe in.

Juon ward ak juon stake rejjab aikuj in kanne aolep kūr ko kar kōllajraki ilo jaat in. Ritōl ro rej kōmļet ewi wōt kūr ko n̄an kanni pedped ioon aikuj ko an iunit eo im ro rej pād n̄an jerbal.

Pija

Jabōt jikuuļ kūlaaj

Pija

ripālele ro rej kōnono ippān bisop eo