“36. Ejaake, Ukōte, im Leļo̧k Etan Iunit ko Rekāāl,” Bok in Bōk Meļeļe eo Eļap: Jerbal ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata (2020).
“36. Ejaake, Ukōte, im Leļo̧k Etan Iunit ko Rekāāl,” Bok in Bōk Meļeļe eo Eļap.
36.
Ejaake, Ukōte, im Leļo̧k Etan Iunit ko Rekāāl
36.0
Kadkad In
Membōr ro an Kabun̄ in rej uwaan jarlepju ko pedped ioon ia eo rej jokwe ie (lale Mosaia 25:17–24). Jarlepju kein rej menin aikuj n̄an ejaake im kōm̧m̧ane jerbal eo an Kabun̄ in ium̧win mālim an priesthood eo ejetjet. Ritōl ro an jarlepju ko rej leļo̧k n̄an er priesthood ki ko n̄an kōmālim kōm̧m̧ane kain̄i ko an priesthood. Jarlepju ko rej barāinwōt jipan̄ membōr ro kōkajoorļo̧k tōmak eo an kajjojo ilo aer kabun̄jar n̄an Anij, ekkatak katak ko an Jisōs Kraist, im jerbal.
Jarlepju ko an Kabun̄ in (barāinwōt kūr er unit ko) ekoba stake ko, district ko, ward ko, im branch ko. Rej ejaak, ukōte, ak kabōjrake wōt n̄e emenin aikuj.
Ritōl ro rej jerbal n̄an kōļapļo̧k kajoor ilo jetōb eo an membōr ro m̧oktak jān kajjitōk n̄an ejaake juon iunit kāāl ak ukōte jem̧lo̧k in tōrerein juon iunit. Iunit ko rekāāl rej aikuj in kar ejaak wōt n̄e iunit ko rej pād kiiō rejjab bwe aer kajoor.
Kōn jipan̄ ilo United States im Canada, kūrļo̧k 1-801-240-1007. Itulikin United States im Canada, kūrļo̧k eria opiij eo.
36.1
Ejaake ak Ukōt Stake ko im District ko
Stake ko raar ejaak jān district ko ak jān an ajej stake ko. Juon stake būreejtōn ak mijen būreejtōn emaron̄ kajjitōk n̄an ejaake juon stake kāāl. Ej m̧oktata kanooj lale bwe enaaj tōpar jidikin men ko aikuji rej waļo̧k ilo tebōļ in:
Jidik in Men ko Aikuji n̄an Ejaake juon Stake
|
U.S. im Canada |
Aolep laļ ko jet | |
|---|---|---|
|
Oran membōr ro (niknik im jāniknik) | U.S. im Canada 3,000 | Aolep laļ ko jet 1,900 |
|
Oran ro reniknik, rikabwijer Melkesidek Priesthood ro rej kōļļā juon m̧ōttan jon̄oul remaron̄ in jerbal ilo kūr ko an ritōl | U.S. im Canada 180 | Aolep laļ ko jet 120 |
|
Oran ward ko | U.S. im Canada 5 | Aolep laļ ko jet 5 |
District ko raar ejaak jān branch ko ilo juon mijen ak juon stake eo ej jutak. Ejjeļo̧k jon̄an oran membōr ro ak branch ko aikuji n̄an ejaake juon district.
Juon district aikuj in wōr jon̄an kajoor eo aikuji n̄an juon stake kōn diktata in jiljino allōn̄ ko m̧okta jān an juon mijen būreejtōn maron̄ kajjitōk n̄an kōm̧m̧ane bwe en stake.
Jem̧lo̧kin tōrerein ko an juon stake ak district rej ļoor jem̧lo̧kin tōrerein ko an iunit ko me rej pād ilowaan. N̄an kajjitōk kōn oktak in jem̧lo̧kin tōrerein ko an stake ak district ak kōm̧akūtļo̧k juon iunit n̄an juon stake ak district epaake, stake būreejtōn ro ak mijen būreejtōn ro rej kobaik juon karōk im kōjbwebweik elmakot eo.
Juon stake ak mijen būreejtōn rej jino juon kajjitōk ilo “Boundary and Leadership Proposals.” Eļan̄n̄e ejjab maron̄ kōjerbal online system eo, emaron̄ download peba boom̧ ko jān jiped link eo.
Kōmālim kajjitōk eo n̄an oktak ko an stake ko rej itok jān Būreejtōnji eo Kein Kajuon im Doulul eo an Jon̄oulruo Rijilōk ro. Eiten aolep iien, rej kōm̧m̧ane juon jokāālet ilowaan jiljino wiik ko ālkin bōk juon kajjitōk kar kadedeļo̧k.
36.2
Ejaake ak Ukōt Ward ko im Branch ko ilo Stake ko
Ward ko im branch ko ilo stake ko kar ejaak jān iunit ko em̧ōj aer waļo̧k kadede. Juon stake būreejtōn emaron̄ kajjitōk n̄an ejaake juon ward ak branch kāāl ilo stake eo. M̧oktata ej kanooj lale bwe iunit eo ekāāl enaaj tōpar jidik in men ko aikuji rej waļo̧k ilo tebōļ kein.
Jidik in Men ko Aikuji n̄an Ejaake juon Ward
|
U.S. im Canada |
Aolep laļ ko jet | |
|---|---|---|
|
Oran membōr ro (niknik im jāniknik) | U.S. im Canada 300 | Aolep laļ ko jet 150 |
|
Oran ro reniknik, rikabwijer Melkesidek Priesthood ro rej kōļļā juon m̧ōttan jon̄oul remaron̄ in jerbal ilo kūr ko an ritōl | U.S. im Canada 1 n̄an aolep 20 membōr ro (niknik ak jāniknik). Ej aikuj in diktata 20. | Aolep laļ ko jet 1 n̄an aolep 20 membōr ro (niknik ak jāniknik). Ej aikuj in diktata 15. |
Jidik in Men ko Aikuji n̄an Ejaake juon Branch ilo juon Stake
|
Oran membōr ro (niknik im jāniknik) |
20 |
|---|---|
|
Oran ro reniknik, rikabwijer Melkisedek Priesthood ro rej kōļļā juon m̧ōttan jon̄oul remaron̄ in jerbal ilo kūr ko an ritōl |
4 |
Juon stake būreejtōn emaron̄ kajjitōk n̄an ukōt juon branch n̄an juon ward n̄e iunit eo ej tōpar jidik in men ko aikuji im ekar lo juon armej eo me emaron̄ jerbal āinwōt bisop.
Juon stake būreejtōn emaron̄ kajjitōk n̄an bar karōk ak kabōjrak ward ko im branch ko n̄e ewōr juon aikuj ealikkar.
Juon stake būreejtōn ej jino juon kajjitōk ekāāl ilo “Boundary and Leadership Proposals.” Eļan̄n̄e ejjab maron̄ kōjerbal online system eo, emaron̄ download peba boom̧ ko jān jiped link eo.
Būreejtōnji eo Kein Kajuon wōt emaron̄ kōmālim kajjitōk eo. Eitōn aolep iien, rej kōm̧m̧ane juon jokāālet ilowaan emān wiik ko ālkin bōk juon kajjitōk ededeļo̧k.
36.3
Ejaake ak Ukōt Branch ko ilo Mijen ko
Juon mijen būreejtōn emaron̄ kajjitōk n̄an ejaake branch ko rekāāl ilo juon mijen. Ejjeļo̧k juon jon̄an oran membōr ro aikuji n̄an ejaake juon branch ilo juon mijen. Ijo wōt ke, eitōn aolep iien branch ko rekāāl aikuj in diktata emen rikabwijer ro an priesthood. Diktata aikuj juon eo eniknik, rikabwijer Melkisedek Priesthood eo ej kōļļā juon m̧ōttan jon̄oul.
Juon mijen būreejtōn ej jino juon kajjitōk ekāāl ilo “Boundary and Leadership Proposals.” Eļan̄n̄e ejjab maron̄ kōjerbal online system eo, emaron̄ download peba boom̧ ko jān jiped link eo.
Eria Būreejtōnji eo emaron̄ leļo̧k mālim eo āliktata ak kowaan kajjitōk eo an mijen būreejtōn eo n̄an:
-
Ejaake ak leļo̧k etan juon branch kāāl ilo juon mijen.
-
Kabōjrak juon branch ilo juon mijen.
-
Ukōt jem̧lo̧kin tōrerein ko an branch eo ilo juon mijen eļan̄n̄e oktak eo ejjab jelet juon stake, juon district, ak bar juon mijen.
Eria Būreejtōnji eo aikuj jilkinļo̧k kōmālim in kajjitōk eo n̄an opiij ko reļļap an Kabun̄ in n̄an eddōkļo̧k eo m̧okta jān an branch eo maron̄ ejaake ak ukōte ilo system ko an Kabun̄ in.
Eria Būreejtōnji eo emaron̄ rie bōtaab ejjab leļo̧k kōmālim eo āliktata kōn kajjitōk eo an juon mijen būreejtōn n̄an:
-
Kōm̧akūtļo̧k juon branch n̄an bar juon stake, district, ak mijen.
-
Ukōt āt eo etan juon branch epād kadede ilo juon mijen.
-
Ukōt jem̧lo̧kin tōrerein ko an branch eo ilo juon mijen eļan̄n̄e oktak eo enaaj jelet juon stake, juon district, ak juon mijen.
-
Ejaake ak ukōte juon mijen branch n̄an juon rūm̧man ded ro ejjeļo̧k rejtaer ak rūtto ro ejjeļo̧k rejtaer; membōr ro me rejjab kōnono kajin eo ijo jokwe ie; membōr ro me rej lale er ilo im̧ōn rūtto ro, būrookraam̧ in kōm̧adm̧ōd ko, ak kalbuuj ko; ak membōr ro ilo jarin tariņae.
Ilo jekjek kein, Eria Būreejtōnji eo ej etale kajjitōk eo, im eļan̄n̄e rej rie, rej jilkinļo̧k n̄an kōmālimi. Būreejtōnji eo Kein Kajuon wōt emaron̄ leļo̧k kōmālim eo āliktata. Eitōn aolep iien, rej kōm̧m̧ane juon jokāālet ilowaan emān wiik ko ālkin bōk juon kajjitōk ededeļo̧k.
36.4
Leļo̧k Etan Iunit ko
Leļo̧k etan juon iunit aikuj in jipan̄ kile ro rej jokwe ilo eria eo. Eitōn aolep iien, leļo̧k āt ko an iunit ko repād kadede aikuj jab ukōti.
Eļan̄n̄e juon stake ak mijen būreejtōn ej kōņaan wōt n̄an ukōt etan juon iunit, ejjab aikuj in kōjerbal online system eo. Ej jilkinļo̧k kajjitōk eo jān kūrļo̧k 1-801-240-1007. Itulikin United States im Canada, ej kūrļo̧k eria opiij eo.
Eļan̄n̄e etan iunit eo ej aikuj in oktak kōnke kōn bar karōk jem̧lo̧kin tōrerein eo, stake ak mijen būreejtōn eo ej jino juon kajjitōk kāāl ilo online syster eo ilo Boundary and Leadership Proposals. Eļan̄n̄e ejjab maron̄ kōjerbal online system eo, emaron̄ download peba boom̧ ko jān jiped link eo.
Būreejtōnji eo Kein Kajuon wōt emaron̄ kōmālim kajjitōk kein.
Eria Būreejtōnji ro remaron̄ kōmālim kajjitōk ko n̄an ejaake ak leļo̧k etan branch ko rekāāl ilo mijen ko (lale 36.3).
36.4.1
Leļo̧k Etan Stake ko im District ko
Naan eo m̧oktata ilo etan stake eo ak district eo ej juon iaan men kein:
-
Jikin kweilo̧k eo me opiij ko reļļap an stake eo ak district eo ej pād ie.
-
Bar juon jikin kweilo̧k ilo stake eo ak district eo me kanooj jeļā kake n̄an membōr ro
-
Juon men ilo peļaak eo ilowaan jem̧lo̧kin tōrerein ko an stake eo ak district eo
IIlo Amedka im Canada, naan eo kein karuo ej jikin state eo ak province ilo ijo stake eo ak district eo ej pād ie. Ilo laļ ko jet, naan eo kein karuo ej etan laļ eo.
N̄e elōn̄ļo̧k jān juon stake ak district ilo ejja jikin kweilo̧k eo wōt, naan eo kein kajilu ej juon men ej kwaļo̧k kadkad in ilowaan jem̧lo̧kin tōrerein ko an iunit eo. Jet men ko rej kwaļo̧k kadkad in kōtļo̧k n̄an āt ko etan stake eo ak district eo rej waļo̧k itulaļ:
-
Jikin ko kam̧bōj eo ej kwaļo̧k (ituiōn̄, iturōk, iturear, ak iturilik)
-
Jukjuk in pād eo ak peļaak eo
-
Men eo ej kwaļo̧k kadkad in peļaak eo
Jet men ko kwaļo̧k kadkad in me rej jab kōtļo̧k n̄an āt ko etan stake eo ak district eo rej waļo̧k itulaļ:
-
Naan ko jet n̄an ba kajjien (n̄an waanjon̄ak, iturōk iturilik)
-
Āt ko etan armej
N̄e etan juon jikin kweilo̧k āinwōt etan state eo, province eo, ak laļ eo, ejjab āliji ilo āt eo. N̄an waanjon̄ok:
-
Idaho Falls Taylor Mountain Stake, ejjab Idaho Falls Idaho Taylor Mountain Stake
-
México City Azteca Stake, ejjab México City México Azteca Stake
36.4.2
Leļo̧k Etan Ward ko im Branch ko
Juon ward ak branch ej leļo̧k etan ālkin juon men ej kwaļo̧k kadkad in ilowaan jem̧lo̧kin tōrerein ko an. Jet men ko rej kwaļo̧k kadkad in kōtļo̧k n̄an āt ko etan ward eo im branch eo rej waļo̧k itulaļ:
-
Jikin Kweilo̧k
-
Jukjuk in pād eo ak peļaak eo
-
Iaļ
-
Baak
-
Jikuuļ
-
Men eo ej kwaļo̧k kadkad in peļaak eo
Jet men ko kwaļo̧k kadkad in me rej jab kōtļo̧k n̄an āt ko etan ward eo im branch eo rej waļo̧k itulaļ:
-
Jikin ko kam̧bōj eo kwaļo̧k (n̄an waanjon̄ak, iturear ak tuiōn̄ turilik)
-
Āt ko etan armej
-
Āt ko pedped wōt ioon view (n̄an waanjon̄ak, Temple View, Mountain View, ak River View)
-
Koba in ruo āt ko n̄an ejaake juon āt kāāl
Āt eo wōt etan juon men kwaļo̧k kadkad in ej kōjerbale ilo etan ward eo ak branch eo. Eļan̄n̄e elōn̄ļo̧k jān juon ward ak branch kōn ejja āt eo wōt, juon nōm̧ba ej kobaiki ejja āinwōt m̧ōttan āt eo, eo āinwōt Preston 1st Ward im Preston 2nd Ward.
Etan ward eo ak branch eo ej aikuj in ilo kajin eo an eria eo. Eļan̄n̄e kajin eo ejjab kōjerbal Roman aļbapet, juon ukok kōjerbal jeje in Rom aikuj in koba ilo abūļkejen eo.
36.5
Kōm̧m̧ani Oktak ko kar Kajjitōk kaki
36.5.1
Stake im District Oktak ko
Leta in kōmālim eo n̄an ejaake ak kabōjrak juon stake ak district eitien aolep iien ej kalikkar raan, allōn̄ im iiō oktak ko renaaj kōm̧m̧an. Raan, allōn̄ im iiō in aikuj jab kōjeļļā kake m̧ae iien eo Ritōl Eutiej eo kar kappeik ej ekōnono kōn tipdik in meļeļe ko ippān stake ak mijen būreejtōn eo. Lukkuun oktak ko rejjab kōjeļļā kaki m̧ae iien kweilo̧k eo eļap an stake eo ak ward eo.
Stake ak mijen būreejtōn ro rej kōjeļļāikļo̧k opiij ko reļļap an Kabun̄ in ak eria opiij eo aer ālkin an oktak ko kar kōm̧m̧an.
36.5.2
Ward im Branch Oktak ko
Ālkin an juon stake ak mijen būreejtōn bōk mālim eo n̄an oktak ko an ward eo ak branch eo, ekka an wōr an 90 raan ko n̄an kwaļo̧k oktak ko n̄an aer rejtake jān membōr ro. Eļan̄n̄e ej aikuj in karum̧wijļo̧k aitokļo̧k jān 90 raan ko, ej kajjitōk mālim eo jān Opiij eo an Būreejtōnji eo Kein Kajuon.
Stake ak mijen būreejtōn ro rej kōjeļļāikļo̧k opiij ko reļļap an Kabun̄ in ak eria opiij eo aer ālkin an oktak ko kar kōm̧m̧an. Mab ko im iunit ko rejjab kōkāāl meļeļe ko aer m̧ae iien rej ļo̧o̧ki jān opiij ko reļļap an Kabun̄ in.
36.6
Basic Iunit Būrookraam̧
Kabun̄ in ekar ejaake Basic Iunit Būrookraam̧ eo n̄an kōjerbale jān jet branch ko reddik ak aiindoon jiddik ko em̧ōj kōmālim an membōr ro, jeļā kake āinwōt kurup ko (lale 37.7 n̄an meļeļe ko reļļapļo̧k kōn kurup ko). Eria Būreejtōnji eo emaron̄ kōmālim kōjerbal Basic Iunit Būrookraam̧ eo ilo branch ko reddik ak ilo kumi ko ijo jabdewōt iaan jekjek kein rej jerbal:
-
Kabun̄ in ej pād ilo jekjek ko im̧aan tata.
-
Membōr ro rej jokwe ettoļo̧k jān doon ilo jikin eo.
-
Oran membōr ro edik, im tōl ej kab baj jino tōn eddōkļo̧k.
-
Membōr ro ewōr aer aikuj ko kōn kajin ak rej pād ilo im̧ōn kōjparok ko, būrookraam̧ in kōm̧adm̧ōd ko, ak kalbuuj ko.
Eria Būreejtōnji eo emaron̄ barāinwōt kōmālim kōjerbal Basic Iunit Būrokraam̧ eo ilo kijen ko ak stake ko ijo jekjek kein rej waļo̧k.
Unin tōl ko n̄an būrookram̧ in litok ilo Bōk in Tōl an Basic Iunit Būrookram̧ eo. Meļeļe ko re rej litok ilo Branch Guidebook, Priesthood and Auxiliary Leaders’ Guidebook, Family Guidebook, im Teaching Guidebook.