Faaohiparaa i teie buka

E ono tuhaa i faanahohia no te mau hoho‘a i roto i teie buka: Faufaa Tahito, Faufaa Apî, Buka a Moromona, Aamu o te Ekalesia, Faaohiparaa i te Evanelia, e te mau Peropheta o te mau Mahana Hopea nei. E nehenehe ta outou e faaohipa i teie mau hoho‘a no te haapii mai e no te haapii atu i roto i te pô utuafare e i te fare pureraa. I roto i te tabula i raro nei, te faaitehia nei te upoo parau o te hoho‘a tata‘itahi e tae noa’tu i te mau faahororaa i roto i te mau papa‘iraa mo‘a e i te tahi atu mau tautururaa e ti‘a ia faaohipahia no te haapii mai e no te aparau i ni‘a i te reira mau hoho‘a. Na roto i to outou ma‘imiraa i te reira mau papa‘iraa mo‘a e te reira mau rave‘a tauturu, na te reira e faahohonu i to outou iteraa i te mau ohipa i tupu e i te mau parau tumu o te evanelia i ma‘itihia. E feruri i ni‘a i teie mau mana‘o i muri nei no te faaohiparaa i te mau hoho‘a e te mau faahororaa:

• A ani i te taata ia mai‘mi i te mau papa‘iraa mo‘a e i te tahi atu mau rave‘a e tuati i ni‘a i te hoê hoho‘a. A ani ia ratou ia tai‘o e aore ra, ia faahiti poto noa mai i te reira i roto i te hoê aparauraa i ni‘a i te reira hoho‘a.

• A ani i to te utuafare e aore ra, i te mau melo o te piha haapiiraa ia tatara mai i te mea ta ratou e ite ra i roto i te hoho‘a e aore ra, eaha to ratou mana‘o no ni‘a i te hoho‘a. Eaha te mau parau tumu o te evanelia ta te reira hoho‘a e haapii ra ? Eaha te mau faaohiparaa e tano no to tatou oraraa i teie mahana ?

• A ani i te mau taata ia hi‘o i to ratou iho oraraa na roto i te reira mau hoho‘a. E nehenehe ta ratou e faaau e piti hoho‘a. E riro to ratou mau mana‘o e ta ratou mau uiraa no ni‘a i te mau mea ta ratou e ite ra, i te faatupu mai i te aparauraa i ni‘a i te mau papa‘iraa mo‘a e i ni‘a i te mau parau tumu o te evanelia.