Ang mga Tawo sa Pakigsaad sa Ginoo

• Unsa man ang usa ka pakigsaad? Ngano nga ang mga Santos sa Ulahing mga Adlaw gitawag og mga tawo sa pakigsaad?

Gikan sa sinugdanan, ang Ginoo mihimo og mga pakigsaad uban sa Iyang mga anak dinhi sa yuta. Kon ang Iyang mga tawo mohimo og mga pakigsaad (o mga saad) uban Kaniya, sila nasayud kon unsa ang Iyang gilauman gikan kanila ug unsang mga panalangin ang ilang malauman gikan Kaniya. Mas maayo ang ilang pagbuhat sa Iyang mga buluhaton dinhi sa yuta. Ang mga tawo kinsa nakigsaad sa Ginoo ug kinsa gihimoan og mga pakigsaad sa Ginoo gitawag og mga tawo sa pakigsaad sa Ginoo. Ang mga miyembro sa Simbahan mga kabahin sa mga tawo sa pakigsaad sa Ginoo.

Diha sa ebanghelyo, ang usa ka pakigsaad nagpasabut nga usa ka sagradong kauyonan o saad nga gikauyonan tali sa Dios ug sa tawo o usa ka pundok sa katawhan. Sa paghimo og pakigsaad, ang Dios misaad og panalangin sa pagsunod sa piho nga kasugoan. Naghan-ay Siya og mga patakaran sa Iyang mga pakigsaad, ug Siya mopadayag niini nga mga patakaran ngadto sa Iyang mga propeta. Kon pilion nato nga mosunod sa mga patakaran sa mao nga pakigsaad, madawat nato ang mga gisaad nga mga panalangin. Kon pilion nato nga dili mosunod, Iyang pugngan ang mga panalangin, ug sa pipila ka mga sitwasyon usa ka silot usab ang ihatag.

Sama pananglit, sa dihang mipasakop kita sa Simbahan mihimo kita og pipila ka mga pakigsaad uban sa Dios (tan-awa sa kapitulo 20 niini nga basahon). Nakigsaad kita sa Manluluwas panahon sa bunyag sa pagdala sa atong kaugalingon sa Iyang pangalan. Misaad siya nga “ug kutob sa naghinulsol ug nabunyagan diha sa akong ngalan, nga si Jesukristo, ug molahutay ngadto sa katapusan ang mao maluwas” (D&P 18:22). Nakigsaad kita uban sa Ginoo sa atong pag-ambit sa sakrament (tan-awa sa kapitulo 23 niini nga basahon). Misaad kita sa pagdala sa Iyang ngalan diha sa atong kaugalingon, sa paghinumdom Kaniya, ug sa pagtuman sa Iyang mga kasugoan. Gisaaran kita nga ang Balaang Espiritu magauban kanato. (Tan-awa sa D&P 20:77–79.) Sa dihang nakadawat kita sa mga ordinansa sa templo, mihimo kita og lain pang sagrado nga pakigsaad ug gisaaran og himaya alang sa matinud-anong pagkamasulundon (tan-awa sa D&P 132; tan-awa usab sa kapitulo 47 niini nga basahon).

Ang Dios mihimo usab og espesyal nga mga pakigsaad ngadto sa piho nga mga tawo og mga pundok. Mihimo siya og espesyal nga mga pakigsaad kang Adan, Enoch, Noe, sa mga anak sa Israel, ug ni Lehi (tan-awa sa Moises 6:31–36, 52; Genesis 9:9–17; Exodo 19:5–6; 2 Nephi 1). Mihimo siya og espesyal nga mga pakigsaad kang Abraham ug sa iyang mga kaliwatan nga mipanalangin sa mga miyembro sa Simbahan ug sa tanang kanasuran sa yuta karon.

• Hunahunaa ang mga pakigsaad nga imong gihimo uban sa Dios ug ang mga panalangin nga Iyang gisaad kanimo sa paghupot niini nga mga pakigsaad.

• Unsa ang pakigsaad kang Abraham?

Si Abraham, usa ka propeta sa Daang Tugon, usa ka matarung kaayo nga tawo (tan-awa ang litrato dinhi niini nga kapitulo). Midumili siya sa pagsimba sa mga dios-dios sa iyang amahan. Iyang gisunod ang tanang mga kasugoan sa Ginoo. Tungod sa pagkamatarung ni Abraham, ang Ginoo mihimo og pakigsaad uban kaniya ug sa iyang mga kaliwatan.

Ang Ginoo misaad kang Abraham nga siya makaangkon og dili maihap nga mga kaliwatan. Misaad Siya nga ang tanan kanila may katungod nga makadawat sa ebanghelyo, sa mga panalangin sa priesthood, ug sa tanang mga ordinansa sa kahimayaan. Kini nga mga kaliwatan, pinaagi sa gahum sa priesthood, modala sa ebanghelyo ngadto sa tanang kanasuran. Pinaagi kanila, ang tanang mga pamilya sa yuta mapanalanginan (tan-awa sa Abraham 2:11). Ang Dios padayon sa pagsaad nga kon sila magmatarung Iyang itukod ang Iyang pakigsaad uban sa tanang henerasyon sa mga anak ni Abraham (tan-awa sa Genesis 17:4–8).

• Sa unsang paagi nga ang mga sugo diha sa pakigsaad ni Abraham ato usab nga magamit? (Hunahunaa kon sa unsang paagi kini nga pangutana magamit sa lain-laing mga sitwasyon, sama diha sa panimalay, sa trabahoan, sa komunidad, o isip mga misyonaryo.)

• Unsa ang mga panalangin ug mga responsibilidad nga moabut ngadto sa mga tawo sa pakigsaad sa Dios?

Ang mga kadugo ni Abraham dili lamang mao ang mga tawo nga gitawag sa Dios nga Iyang mga tawo sa pakigsaad. Sa pagpakigsulti ngadto kang Abraham, ang Dios miingon, “Kutob sa modawat niini nga Ebanghelyo pagatawgon sunod sa imong ngalan, ug pagaiphon nga imong binhi, [kaliwat] ug mobarug ug mopanalangin kanimo, ingon nga ilang amahan” (Abraham 2:10). Sa ingon, duha ka pundok sa katawhan ang gilakip diha sa pakigsaad nga gihimo uban ni Abraham: (1) Kang Abraham nga matarung nga kadugo ug (2) kadtong gisagop ngadto sa iyang kaliwat pinaagi sa pagdawat ug pagsunod sa ebanghelyo ni Jesukristo (tan-awa sa 2 Nephi 30:2).

Sa dihang kita gibunyagan dinhi sa Simbahan, misulod kita diha sa pakigsaad nga gihimo sa Ginoo uban ni Abraham, ug ni Jacob (tan-awa sa Mga Taga-Galacia 3:26–29). Kon kita masulundon, atong mapanunod ang mga panalangin niana nga pakigsaad. Aduna kitay katungod sa pagdawat og panabang ug giya gikan sa Espiritu Santo. Ang takus nga mga lalaki adunay katungod sa paghupot sa priesthood. Ang mga pamilya makadawat og mga panalangin sa priesthood. Makaangkon kita og kinabuhing dayon didto sa celestial nga gingharian. Wala nay mga panalangin nga labaw pa niini.

Kauban sa mga panalangin nga atong madawat isip mga tawo sa pakigsaad sa Dios, aduna kitay dakong responsibilidad. Ang Ginoo misaad kang Abraham nga pinaagi sa iyang kaliwatan ang ebanghelyo pagadalhon ngadto sa tibuok kayutaan. Gituman nato kini nga responsibilidad pinaagi sa full-time missionary nga programa sa Simbahan ug sa misyonaryo nga buhat nga gihimo sa mga miyembro. Ang kahigayunan nga makasangyaw sa ebanghelyo ngadto sa tibuok kalibutan anaa lamang sa Simbahan sa Ginoo ug sa Iyang mga tawo sa pakigsaad.

Isip mga tawo sa pakigsaad sa Dios, kita kinahanglan nga mosunod sa Iyang mga sugo. Ang Ginoo miingon, “Ako ang Ginoo, mapugos sa pagtuman kon kamo mobuhat sa unsa nga Ako misulti; apan kon kamo dili mobuhat sa unsa nga Ako misulti, kamo dili makaangkon og saad.” (D&P 82:10). Kon atong isalikway ang atong pakigsaad human madawat ang ebanghelyo, ang pakigsaad mahimong wala nay bili ug kita mobarug nga gipanghimaraut atubangan sa Dios (tan-awa sa D&P 132:4). Siya miingon: “Hunong sa pagpakasala, basin pa unya ang mapait nga paghukom mahulog diha sa inyong mga ulo. Alang kaniya ngadto kinsa daghan ang gihatag daghan ang gikinahanglan; ug siya kinsa nakasala batok sa labaw nga dako nga kahayag makadawat sa labaw nga dako nga panghimaraut.” (D&P 82:3–3).

• Unsa man ang atong gisaad nga buhaton dihang kita midawat sa ebanghelyo? Unsang mga panalangin ang gihatag kanato sa Langitnong Amahan kon kita motuman niini nga mga saad?

Ang kahingpitan sa ebanghelyo gitawag og bag-o ug walay katapusang pakigsaad. Naglakip kini sa mga pakigsaad nga gihimo panahon sa bunyag, atol sa sakrament, sulod sa templo, ug sa bisan unsang panahon. Ang Ginoo mitawag niini og walay katapusan tungod kay kini giordinahan sa walay katapusan nga Dios ug tungod kay ang pakigsaad dili gayud mausab. Gihatag niya kining sama nga saad ngadto kang Adan, Enoch, Noe, Abraham, ug sa ubang mga propeta. Niini nga pagkabutang dili kini bag-o. Apan ang Ginoo mitawag niini og bag-o tungod kay sa matag panahon nga ang ebanghelyo ipahiuli human nga kini gikuha gikan sa yuta, bag-o kini alang sa mga tawo kinsa modawat niini (tan-awa sa Jeremias 31:31–34; Ezequiel 37:26).

Kon atong dawaton ang bag-o ug walay katapusang pakigsaad, kita miuyon nga maghinulsol, magpabunyag, modawat sa Espiritu Santo, modawat sa atong mga endowment, modawat sa pakigsaad sa kaminyoon sulod sa templo, ug mosunod ug motuman ni Kristo hangtud sa katapusan sa atong kinabuhi. Kon buhaton nato ang atong mga pakigsaad, ang atong Langitnong Amahan misaad kanato nga kita makadawat sa himaya sa celestial nga gingharian (tan-awa sa D&P 132:20–24; tan-awa usab sa kapitulo 47 niini nga basahon).

Ang katalagsaon niana nga saad lisud sabton alang sa mga mortal. Ang mga kasugoan iyang gihatag alang sa atong kaayohan, ug kon kita magmatinud-anon kita mahimong sa kahangturan makaambit sa mga panalangin ug katahum sa langit ug sa yuta. Mahimo kitang makapuyo sa Iyang presensya ug makaambit sa Iyang gugma, kalooy, gahum, katalagsaon, kahibalo, kaalam, himaya, ug mga kamandoan.

• Unsa ang kalabutan sa pagkahimong mga tawo sa pakigsaad sa Ginoo diha sa paagi sa atong sininaan, binuhatan, ug sa pagsunod sa mga kasugoan sa Dios?

• 1 Pedro 2:9–10 (lahi nga katawhan)

• D&P 54:4–6 (mga epekto sa mga pakigsaad nga gisunod ug gilapas)

• D&P 132:7 (mga pakigsaad nga gihimo pinaagi sa tukma nga awtoridad)

• D&P 133:57–60 (katuyoan sa pakigsaad)

• D&P 35:24 (mga saad tungod sa pagkamasulundon ngadto sa mga pakigsaad)

• Mga Hebreohanon 8:6 (Si Jesukristo mao ang tigpataliwala sa usa ka mas maayo nga pakigsaad)

• Ang Giya ngadto sa mga Kasulatan, “Pakigsaad,” 208