Buhata aron Pagsabot sa Nanglabay nga Panahon

Ang pagtuon sa kasaysayan sa Simbahan makatabang kanato sa pagkakita sa kamot sa Dios diha sa mga kinabuhi sa Iyang mga anak. Kini buhong sa mga istorya sa hugot nga pagtuo, kaisog, ug kamaayo sa mga Santos sa Ulahing mga Adlaw sa nanglabay nga panahon. Usahay, kini nagpadayag usab sa ilang tawhanong mga kahuyang ug nagpakita sa mga kalisod nga tanan kita nag-atubang samtang naninguha sa pagsunod ni Jesukristo. Nagsinati sa mga kalisod sa kasaysayan sa Simbahan o nagkat-on mahitungod sa mga butang sa nanglabay nga panahon nga wala motumbas sa atong mga gipaabot makahagit sa atong hugot nga pagtuo.

Matag usa kanato nagtubag ngadto sa bag-ong impormasyon mahitungod sa kasaysayan sa lainlaing paagi. Mga pangutana nga makasilo sa usa ka tawo mahimong makapaabtik sa lain. Tanan kita nagdala og lainlaing mga pangagpas, mga gipaabot, kasinatian sa kinabuhi, ug kahibalo sa atong gipangita alang sa pagsabot. Ang paggamit sa mosunod nga mga baroganan samtang kita nagtuon sa kasaysayan makatabang kanato sa pagtan-aw sa nanglabay nga panahon sa mas klaro ug mapuslanong paagi:

• Ilha ang mga kinutoban sa atong kahibalo. Ang mga kasaysayan mga hubad sa nanglabay nga panahon nga gibase diha sa may kinutobang mga tinubdan nga nagpabilin. Adunay daghang mga butang nga kita makasulti uban ang pagsalig mahitungod sa nanglabay nga panahon. Apan adunay daghang mga butang nga kita wala lamang mahibalo. Ug ang mga impormasyon nga kita aduna kanunay nga nagtugot sa mas sobra sa usa ka hubad. Kon magpabilin kitang mapainubsanon mahitungod sa unsay atong gihunahuna nga kita nahibalo, kita mahimo nga mas bukas ngadto sa bag-o nga mga pagpasabot samtang dugang nga mga tinubdan nanggula. Hinumdomi nga usahay kita kinahanglan nga mopahiangay uban sa pipila ka dili klaro nga kahulogan o kadudahan, bisan sa mga pangutana nga ingon og importante.

• Paabot og kausaban. Kon kita magtuon sa nanglabay nga panahon, usahay atong mahibaloan nga ang mga gibuhat, mga pagtulon-an, ug mga ideya nga atong gihunahuna nga dili mausab sa tinud-anay nausab og gamay. Ang sukaranang mga baroganan sa ebanghelyo mahangturon, apan ang mga paagi nga sila nasabtan ug napahayag sa kadugayan nagpakita sa pagsunod-sunod nga kinaiyahan sa pagpadayag ug sa kanunay nga kausaban sa tawhanong kultura. Ang baroganan sa nagpadayon nga pagpadayag nagtabang kanato sa paglawig niini nga mga kausaban. Mahimo nimong mahibaloan nga ang pagkat-on pa og dugang mahitungod sa daghang butang nga nangausab maghimo niini nga mas sayon sa pag-ila sa mga butang nga mohangtod.

• Han-aya ang mga butang sumala sa kinatibuk-ang kahulogan. Usa ka tawo makausa miingon, “Ang nanglabay nga panahon usa ka langyaw nga nasod: lahi ang ilang gipanghimo didto.”¹ Ang mga tawo sa nanglabay nga panahon dihay lahi nga mga pangagpas mahitungod sa kalibotan kay sa kita aduna. Migamit sila og lahi nga mga hulagway ug mga pulong sa pagpaghulagway sa ilang kasinatian. Kon gusto nato nga mas masabtan og maayo ang mga pulong ug mga lihok niadtong sa nanglabay nga panahon, kinahanglan usab nga masabtan ang kultura ug ang kinatibuk-ang kahulogan nga kini nahitabo. Kana wala magpasabot nga dili kita makasalikway sa mga butang mahitungod sa mga kultura sa nanglabay nga panahon. Sa tinuod, adunay pipila ka mga butang gikan sa nanglabay nga panahon nga ang ebanghelyo nagpahibalo kanato sa pagsalikway. Apan ang pagsabot sa kinatibuk-ang kahulogan sa kasaysayan nagtabang kanato sa pagpalayo gikan sa pagpugos sa atong mga panghunahuna karon diha sa mga tawo sa nanglabay nga panahon sa paagi nga nagpugong sa pagsabot.

• Hinumdomi nga ang mga katawhan makahimo og mga sayop. Kon kita mag-istorya og gikan sa kasaysayan sa Simbahan, kita may kalagmitan nga mopunting sa bayanihong mga lihok ug malipayong mga kataposan. Kini maayo nga hinumdoman ang mga tawo kon sila anaa sa ilang labing maayo. Apan kita usahay makalimot nga ang mga Santos sa Ulahing Adlaw sa nanglabay nga panahon, lakip ang unang mga lider sa Simbahan, mga tawo. Ang mga tawo adunay mga kahuyang. Sila nakahimo og mga sayop. Sila nakasala. Hinumdomi nga ang Dios naggamit sa dili hingpit nga mga tawo sa pagtuman sa Iyang buhat. Kita makakat-on gikan sa ilang mga kontribusyon ug sa ilang mga kasaypanan. Ug samtang kini maayo nga tan-awon sa walay paglipod-lipod sa mga bahin nga mahagiton sa kasaysayan sa Simbahan, ayaw tutoki kini sa paagi nga mahimong hinungdan nga dili nimo mahinumdoman ang maayo ug ang nindot.

• Pagbantay alang sa gidudahan nga mga hubad. Dili tanan nga mga hubad sa nanglabay nga panghitabo managsama ka balido. Ang mga tawo naghimo og daghang mga pag-angkon mahitungod sa kasaysayan sa Simbahan, maayo ug masupakon, nga napakyas sa pagkab-ot sa sumbanan alang sa pagkawalay sayop, kasaligan, ug makiangayon. Kini ilabi katinuod sa panahon nga bisan kinsa makapamantala sa ilang mga panghunahuna sa klik sa usa ka button. Ang Ginoo midirekta kanato sa pagpaninguha og kaalam “gikan sa labing maayong mga basahon.”² Isip usa ka estudyante sa kasaysayan sa Simbahan, ikaw makagamit sa duha ka himan sa pagka-iskolar ug sa gasa sa Espiritu Santo.

Importanting mga kasulatan: 1 Nephi 11:17; Doktrina ug mga Pakigsaad 88:118