« មេរៀនទី ១១ ឯកសារគ្រូបង្រៀន ៖ រីករាយនឹងពរជ័យនៃសាសនាចក្ររបស់ព្រះអម្ចាស់ » ឯកសារគ្រូបង្រៀនអំពីព្រះយេស៊ូវគ្រីស្ទ និងដំណឹងល្អដ៏អស់កល្បអស់កាលជានិច្ចរបស់ទ្រង់ ( ឆ្នាំ ២០២៣ )
« មេរៀនទី ១១ ឯកសារគ្រូបង្រៀន » ឯកសារគ្រូបង្រៀនអំពីព្រះយេស៊ូវគ្រីស្ទ និងដំណឹងល្អដ៏អស់កល្បអស់កាលជានិច្ចរបស់ទ្រង់
មេរៀនទី ១១ ឯកសារគ្រូបង្រៀន
រីករាយនឹងពរជ័យនៃសាសនាចក្ររបស់ព្រះអម្ចាស់
អំឡុងពេលនៃការងារបម្រើក្នុងព្រះជន្មរមែងស្លាប់របស់ទ្រង់ ហើយជាថ្មីម្ដងទៀតនៅថ្ងៃចុងក្រោយ ព្រះយេស៊ូវគ្រីស្ទបានហៅពួកសាវក ហើយបានរៀបចំសាសនាចក្ររបស់ទ្រង់ ។ នៅក្នុងមេរៀននេះ សិស្សនឹងមានឱកាសដើម្បីពិចារណាអំពីពរជ័យទាំងឡាយដែលមានសម្រាប់ពួកគេតាមរយៈសាសនាចក្ររបស់ព្រះអម្ចាស់ ។ ពួកគេក៏នឹងពិចារណាផងដែរនូវអ្វីដែលពួកគេអាចធ្វើដើម្បីកែលម្អបទពិសោធន៍ផ្ទាល់ខ្លួន និងអ្នកដទៃទៀតនៅក្នុងសាសនាចក្រនេះ ។
យោបល់សម្រាប់ការបង្រៀន
យើងអាចស្វែងរកគោលបំណងនៅក្នុងសាសនាចក្ររបស់ព្រះអម្ចាស់ ។
ការអភិវឌ្ឍការបង្រៀន និងការរៀនសូត្ររបស់យើង
ត្រូវគោរពដល់សាសនាដទៃ ។ នៅពេលអ្នកពិភាក្សាអំពីពរជ័យដ៏ពិសេសនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ សូមធានាឲ្យបានថាការពិភាក្សារបស់អ្នកគឺគោរពចំពោះជំនឿផ្សេងទៀត ។ វាអាចមានសារៈសំខាន់ក្នុងការសង្កត់ធ្ងន់ទៅលើការរួមចំណែកដ៏សំខាន់ និងវិជ្ជមានដែលសាសនាផ្សេងទៀតបានធ្វើក្នុងប្រវត្តិសាស្ត្រ ហើយបន្តធ្វើនៅសម័យរបស់យើង ។
អ្នកអាចចាប់ផ្តើមថ្នាក់ដោយការចែកចាយនូវសាច់រឿងដូចខាងក្រោម ៖
អ៊ីស្សាប៊ែឡាទើបតែឈប់ទៅព្រះវិហារនៅពេលថ្មីៗនេះ ។ នាងចាប់ផ្តើមជឿថា នាងអាចមានព្រះវិញ្ញាណដោយពុំចាំបាច់ចូលរួមនៅក្នុងព្រះវិហារនោះទេ ។ បន្ទាប់ពីប្រាប់អ្នកអំពីពេលខ្លះដែលនាងមានមានព្រះវិញ្ញាណដោយខ្លួននាង នោះនាងសួរអ្នកថាហេតុអ្វីបានជាអ្នកគិតថាការចូលរួមក្នុងព្រះវិហារគឺសំខាន់ ។
-
តើទស្សនៈនេះមានលក្ខណៈទូទៅប៉ុណ្ណានៅក្នុងចំណោមយុវវ័យដែលអ្នកស្គាល់ ?
-
តើអ្នកនឹងឆ្លើយសំណួររបស់អ៊ីស្សាប៊ែឡាយ៉ាងដូចម្ដេច ?
បន្ទាប់ពីសិស្សចែកចាយហើយ នោះអ្នកអាចសរសេរចំណងជើងខាងក្រោមនៅលើក្តារខៀន ៖ ពរជ័យទាំងឡាយនៃការចូលរួមនៅក្នុងសាសនាចក្ររបស់ព្រះអម្ចាស់ ។ បន្ទាប់មក សូមអញ្ជើញសិស្សឲ្យសរសេរគំនិតរបស់ពួកគេនៅក្រោមចំណងជើងនេះ ។
សិស្សអាចសរសេរពរជ័យមួយចំនួនខាងក្រោមនេះ ៖ ការទទួល និងប្រើប្រាស់សិទ្ធិអំណាចបព្វជិតភាព និងកូនសោ ការទទួលពិធីបរិសុទ្ធ និងការធ្វើសេចក្តីសញ្ញា ការរៀនគោលលទ្ធិដ៏បរិសុទ្ធ និងច្បាស់លាស់ ការទទួលជំនួយក្នុងការប្រែចិត្ត ការស្វែងរកឱកាសដើម្បីប្រមូលផ្តុំវង្សអ៊ីស្រាអែល ការជួយជនក្រីក្រ និងបំពេញតម្រូវការមនុស្សធម៌ ការចូលរួមក្នុងកិច្ចការព្រះវិហារបរិសុទ្ធសម្រាប់មរណជន មានឱកាសបម្រើ និងទំនាក់ទំនងជាមួយអ្នកដទៃ និងពង្រឹងក្រុមគ្រួសារ ។
-
តើពរជ័យមួយណាដែលអ្នកគិតថាមានលក្ខណៈពិសេសសម្រាប់សាសនាចក្ររបស់ព្រះអម្ចាស់ ?
នៅពេលអ្នកមានការពិភាក្សានេះ សូមពិចារណាពីសកម្មភាព និងសំណួរខាងក្រោមមួយណាដែលនឹងមានសារៈប្រយោជន៍ដើម្បីបញ្ជាក់ពីពរជ័យពិសេសនៃសាសនាចក្រ ។ ( ប្រហែលជាអ្នកនឹងមិនមានពេលដើម្បីពិភាក្សាពីប្រធានបទទាំងអស់នោះទេ ។ អ្នកក៏អាចជ្រើសរើសស្វែងយល់ស៊ីជម្រៅនៃផ្នែកផ្សេងៗនៃការពិភាក្សានេះផងដែរ ) ។
សិទ្ធិអំណាចបព្វជិតភាព និងកូនសោទាំងឡាយ
អ្នកអាចសូមឲ្យសិស្សសម្តែងនូវសាច់រឿងខាងក្រោមនេះជាដៃគូ ៖
មិត្តភក្តិរបស់អ្នកដែលបង្ហាញចំណាប់អារម្មណ៍នៅក្នុងសាសនាចក្រនិយាយថា « ខ្ញុំយល់ថា ព្រះវិហាររបស់ឯងបានដឹកនាំដោយពួកសាវក ។ តើពួកគាត់ខុសគ្នានឹងពួកអ្នកដឹកនាំ នៅព្រះវិហារផ្សេងៗដោយរបៀបណា ?
សិស្សអាចអាន អេភេសូរ ២:១៩–២០; ម៉ាថាយ ១០:១, ៧–៨; ១៦:១៩; កិច្ចការ ១:២១–២២ និង គោលលទ្ធិ និងសេចក្តីសញ្ញា ១០៧:២៣ ជាមួយគ្នាដើម្បីចាប់ផ្តើមសកម្មភាពនេះ ។ ( អ្នកអាចនឹងចង់វាយតម្លៃការយល់ដឹងរបស់សិស្សអំពីកូនសោបព្វជិតភាព ហើយបន្ថែមលើការយល់ដឹងរបស់ពួកគេ ប្រសិនបើចាំបាច់ ។ សូមមើលសុន្ទរកថារបស់ប្រធានរ័សុល អិម ណិលសុន ៖ « Keys of the Priesthood » [ Ensign ខែ តុលា ឆ្នាំ ២០០៥ ទំព័រ ៤០–៤៤ ] សូមយោងទៅផ្នែក « ចង់បានបន្ថែមទៀតទេ ? » នៃឯកសាររៀបចំនេះផងដែរ ) ។
-
តើពរជ័យអ្វីខ្លះអាចបានមកតែតាមរយៈអានុភាព និងសិទ្ធិអំណាចនៃបព្វជិតភាពបរិសុទ្ធប៉ុណ្ណោះ ? ( សូមពិចារណារំឭកសេចក្ដីថ្លែងការណ៍ដោយ ប្រធាន ដាល្លិន អេក អូក និង អែលឌើរ រ៉ូបឺត ឌី ហែល នៅក្នុងផ្នែកទី ១ នៃឯកសាររៀបចំនេះ ) ។ តើនៅពេលណាដែលអ្នកបានដកពិសោធន៍ពរជ័យទាំងនេះ ?
ពិធីបរិសុទ្ធបព្វជិតភាព និងសេចក្តីសញ្ញា
-
តើអ្នកមានអារម្មណ៍យ៉ាងណាចំពោះការទទួលពិធីបរិសុទ្ធដ៏ពិសិដ្ឋ និងការធ្វើសេចក្ដីសញ្ញាដ៏ពិសិដ្ឋជាមួយព្រះ ? ( អ្នកអាចអញ្ជើញសិស្សឲ្យសញ្ជឹងគិតពីពរជ័យដែលកំពុងរង់ចាំពួកគេ នៅពេលពួកគេបន្តដើរទៅមុខនៅលើផ្លូវនៃសេចក្ដីសញ្ញានេះ ) ។
ការបញ្ជាក់អំពីគោលលទ្ធិរបស់ព្រះអម្ចាស់
-
តើយើងទទួលបានការការពារពី « គ្រប់អស់ទាំងខ្យល់នៃសេចក្ដីបង្រៀន » ( អេភេសូរ ៤:១៤ ) កាលដែលយើងចូលរួមក្នុងសាសនាចក្រដោយរបៀបណា ? ( សូមមើល អេភេសូរ ៤:១១–១៤ ជាមួយគ្នា ) ។ តើសន្និសីទទូទៅបានជួយអ្នករៀន និងយល់ពីគោលលទ្ធិរបស់ព្រះគ្រីស្ទដោយរបៀបណា ?
កិច្ចការព្រះវិហារបរិសុទ្ធ
-
តើកិច្ចការព្រះវិហារបរិសុទ្ធ និងពង្សប្រវត្តិបានផ្តល់ពរជ័យដល់អ្នកដោយផ្ទាល់ដោយរបៀបណា ?
ការប្រមូលផ្ដុំវង្សអ៊ីស្រាអែល
-
តើសាសនាចក្ររបស់ព្រះអម្ចាស់បានជួយអ្នកប្រមូលផ្តុំវង្សអ៊ីស្រាអែលនៅផ្នែកទាំងសងខាងនៃវាំងននដោយរបៀបណា ? តើសកម្មភាពទាំងនេះមានឥទ្ធិពលលើជីវិតរបស់អ្នកដោយរបៀបណា ?
សូមឲ្យសិស្សជ្រើសរើសពរជ័យមួយនៅក្នុងបញ្ជីនៅលើក្ដារខៀន ដែលពួកគេចង់រីករាយជាមួយកាន់តែពេញលេញនៅក្នុងជីវិតរបស់ពួកគេ ។ សូមផ្តល់ពេលវេលាឲ្យសិស្សធ្វើផែនការ រួមទាំងការសរសេរពីជំហានដែលពួកគេអាចធ្វើ ដើម្បីទទួលបានពរជ័យដែលពួកគេបានស្វែងរក ។
យើងអាចធ្វើឲ្យវួដ និងសាខារបស់យើងជាកន្លែងស្វាគមន៍ ។
អ្នកអាចសួរសិស្សពីអ្វីដែលពួកគេនឹងធ្វើ ប្រសិនបើត្រូវបានសុំឲ្យបម្រើជាមួយនរណាម្នាក់ក្នុងវួដ ឬសាខារបស់ពួកគេដែលមានគំនិតខុសគ្នាខ្លាំង ឬអ្នកដែលអាចនឹងមានការពិបាកក្នុងការធ្វើការជាមួយ ។
-
តើអ្នកបានរីកចម្រើនក្នុងភាពជាសិស្សរបស់អ្នកដោយរបៀបណា នៅពេលអ្នកបានបម្រើ និងធ្វើការជាមួយសមាជិកសាសនាចក្រផ្សេងទៀត ? ( សូមមើល សេចក្តីថ្លែងការណ៍របស់អែលឌើរ ឌី ថត គ្រីស្តូហ្វឺសិន នៅក្នុងផ្នែកទី ២ នៃឯកសាររៀបចំនេះ ) ។
សូមពិចារណាមើល មរ៉ូណៃ ៦:៤–៥ ជាមួយគ្នា ហើយសួរសិស្សថាតើពួកគេធ្លាប់មានបទពិសោធន៍នៅព្រះវិហារ នៅពេលដែលពួកគេទទួលអារម្មណ៍ថាត្រូវបានគេចង់ចាំ ចិញ្ចឹមបីបាច់ ឬពង្រឹងដោយនរណាម្នាក់ ។ ពួកគេក៏អាចគិតអំពីគ្រាដែលពួកគេមានអារម្មណ៍ឯកោនៅព្រះវិហារផងដែរ ។
-
ហេតុអ្វីបានជាអ្នកគិតថាមនុស្សមួយចំនួនអាចមិនមានអារម្មណ៍ថាពួកគេជាសមាជិកនៅព្រះវិហារ ? តើយើងអាចធ្វើអ្វីខ្លះ ដើម្បីជួយអ្នកដទៃឲ្យទទួលអារម្មណ៍នៃសេចក្ដីស្រឡាញ់ និងមានចំណែកនៅឯព្រះវិហារ ? ( អ្នកអាចចង់ពិនិត្យឡើងវិញនូវ ឧទាហរណ៍ដែលស៊ីស្ទើរ ខារូល អិម ស្ទីហ្វិន ចែកចាយ នៅក្នុងផ្នែកទី ៣ នៃឯកសាររៀបចំនេះ ។ អ្នកក៏អាចមើលជាមួយគ្នាផងដែរនូវវីដេអូ « Inviting Others to ‘Come and Stay’ » [ ១:៣៩ ] ) ។
សូមរំឭកសិស្សថា ពេលរៀបចំខ្លួនសម្រាប់ថ្នាក់ ពួកគេត្រូវបានអញ្ជើញឲ្យគិត ពីនរណាម្នាក់ដែលអាចទទួលបានពរជ័យដោយការរាប់អានរបស់ពួកគេ ។ សូមផ្តល់ពេលវេលាខ្លះដល់សិស្សឲ្យសញ្ជឹងគិតអំពីអ្វីដែលពួកគេអាចធ្វើបាន ដើម្បីជួយបុគ្គលនេះទទួលអារម្មណ៍នៃសេចក្ដីស្រឡាញ់ និងស្វាគមន៍នៅព្រះវិហារ ។
សម្រាប់ពេលក្រោយ
ដើម្បីបំផុសគំនិតសិស្សឲ្យរៀបចំខ្លួនសម្រាប់ថ្នាក់បន្ទាប់ សូមពិចារណាពីការផ្ញើសារខាងក្រោមក្នុងអំឡុងសប្តាហ៍នេះ ៖ តើការអង្គុយនៅជិតព្រះបាទារបស់ព្រះអង្គសង្គ្រោះ ហើយស្តាប់ទ្រង់បង្រៀន នឹងមានលក្ខណៈបែបណាទៅ ? កាលអ្នកអាន ឯកសាររៀបចំសម្រាប់មេរៀនទី ១២ សូមពិចារណាអំពីឥទ្ធិពលដែលការបង្រៀនរបស់ព្រះគ្រីស្ទកំពុងមានលើជីវិតរបស់អ្នក ។