Sauniaina o se Fuafuaga

Faataga lou aiga ia uluola faaleagaga i le faaogaina ma le manuia o tekinolosi e ala i le sauniaina o se fuafuaga o ala o faasalalauga. E tusa lava pe na o oe lou aiga, o le sauniaina o se fuafuaga o se laasaga taua lea. “Ia faatulaga tatau outou lava; ia saunia mea manaomia uma; ma faatu se fale, o se fale lava o le tatalo, o se fale o le anapogi, o se fale o le faatuatua, o se fale o le aoaoga, o se fale o le mamalu, o se fale o le faatulagaga tatau, o se maota o le Atua” (Mataupu Faavae ma Feagaiga 109:8).

“Po o le a lava le manaoga mo o tatou lava aiga, ia tatou aoao tagata taitoatasi o le aiga e faaaoga le tekinolosi ma le atamai mai le amataga—ia atiina ae se mafaufau mama. Sei o tatou aoao tamaiti i auala tatau e faaaoga ai tekinolosi mo le lelei. E mafai ona tatou aoao atu i latou ina ia iloilo e ala i le fesili ifo ia i latou lava, “Pe o le faaaogaina o lenei mea e i ai se faamoemoega lelei?” O a tatou filifiliga i le auala e aoao ai o tatou aiga i le taimi nei o le a aafia ai augatupulaga o le lumanai” (Joy D. Jones,“It Starts With Us [E Amata ia i Tatou]” [lauga na faia i le [Utah Coalition against Pornography] Konafesi o le Faapotopotoga e Tetee Atu i Ponokalafi i Iuta, 10 Mat. 2018], newsroom.ChurchofJesusChrist.org).

E ui o tuaoi faatulagaina e taua, na ofoina mai e Elder Bednar le fautuaga lenei: “Ia faaeteete ia aua nei faamalosia le so’ona faaaoga o tekinolosi po o le faatupulaia o tulafono ma tapu e le gata. O uiga moomia ma amioga amiotonu e le mafai ona uluola i se eleele e i ai pea pulega faamalosi ma le faamalosia. O lou alofa, onosai, aoao atu, ma auaunaga o le a tuuina atu ai se lagolagosua taua faaleagaga a o latou fetaomi atu i luma i luga o le ala sa’o ma le vaapiapi” (“E Tatau Ona Latou Folafola Atu Nei Mea i le Lalolagi” [lauga na tuuina atu i le semina mo peresitene fou o misiona, 24 Iuni, 2016], ChurchofJesusChrist.org). Na faaauau le fautua atu e Elder Bednar o mataupu faavae nei ia manatunatu i ai:

• O le aoaoina o fanau ia “faaaogaina ma le amiotonu le filifiliga ma avea ma e e faia e tusa ma le mataupu autu o Keriso nai lo mea faitino lea na’o le galueaiina.”

• Fesoasoani i fanau ia “aoao mai e faapea, pau le faamama e mafai ona manumalo ma ‘aloese mai ai le leaga lea e nofo i le loto ma le mafaufau o se soo faamaoni o Keriso. Ua na’o le mafutaga ma le Agaga Paia e mafai ai ona faamalosia le faasagatau atu i ‘ū fanafana mu uma lava a loo leaga’ [Efeso 6:16].”

• Fesoasoani i fanau ia “maua e ala i musumusuga le tele o auala e mafai ai ona faaaoga nei meafaigaluega e tulei ai i luma le galuega o le faaolataga.”

O le manatu e fatuina se fuafuaga e mafai ona i ai se lagona o le lofituina. Aua le tuuina uma lena mamafa i luga o oe lava ia. Galulue i lenei fuafuaga faatasi ma i latou e te alofa i ai. O nisi nei o fesili e talanoaina:

• O le a tonu le taimi e lelei ai le faaaogaina o le tekinolosi, ma mo le a le umi?

• O a mea e taliaina ma mea e le taliaina?

• O le a le tulaga o le vaavaaia o le a i ai?

• O a taunuuga pe afai e faia ma le loto i ai le solia o tulafono?

• O le a le tatou fuafuaga o le liliu ese mai ai pe a fai e faafuasei ona tatou fetaiai ma ala o faasalalauga lē lelei?

• O le a faapefea ona faamaumauina la tatou fuafuaga?

Ia ogatusa ma uunaiga faaleagaga. O faatulagaga e mafai ona fesoasoani e puipui lou aiga mai mea e le talafeagai, a e e le tumau le aoga i taimi uma. O le faatulagaga sili, o le filifiliga a le tagata lava ia ma le manao ina ia faia filifiliga sa’o, i le fesoasoani ai a le meaalofa o le Agaga Paia.