Jerbal in Karejar
Jerbal in Karejar kōn Jerbal in Jipan̄ ko an Tam̧peļ
Pedped ko

Pedped ko an Jerbal in Karejar, M̧aaj 2020

Jerbal in Karejar kōn Jerbal in Jipan̄ ko an Tampeļ

N̄e jej jipan̄ ro jet m̧ōņōņō kōn kōjeram̧man ko an tampeļ, jej jerbal in karejar.

Pija
ministering

Pija ko jān Getty Images; pija in Tegucigalpa Honduras Temple

Liaona, M̧aaj 2020

Eļap tokjen an ikutkut ad pād ilo tampeļ. Būreejtōn Russell M. Nelson eaar katakin “tampeļ eo eaorōk n̄an ad lo̧mo̧o̧r im ad mour ippān Anij ilo mour eo eutiejtata im ippān baam̧le ko ad. …

“… Kajjojo iaad jej aikuj kōkajoorļo̧k im katakin ilo jetōb eo me ej wōnm̧anļo̧k wōt ilo im̧weo̧ imōn Irooj.”1

Jerbal ilo tampeļ aikuj bwe jen lale ien ko ad, eddo ko ad, im mennin jipan̄ ko, barainwōt kōppopo ilo jetōb. Jej jerbal in karejar n̄e jej kwaļo̧k apan̄ ko rej dāpij ro jeid im jatūd jān tampeļ im jipan̄ er kappukot uwaak ko.

Tampeļ eo Ej juon Kōjeraam̧m̧an Jabdewōt Emaron̄ Mōņōņō Kake

Juon eo ejkab ro̧o̧ltok jān mijen, Meg, eaar etetal ļo̧k n̄an kōjem ko ilo Kona Hawaii Temple ke ej kile juon jiron̄ ej jijōt make iaan ilo juon jea nabōj. Meg eaar en̄jake ke ej aikuj kōnono ippān jiron̄ in, bōtaab eaar jab jeļā ta en ba. Innem eaar kajjitōk ta meļeļein eo̧ eo ilo neen jiron̄ eo. Menin eaar ijjino juon bwebwenato eo me eaar kōtļo̧k bwe jiron̄ eo, Lani, en kwaļo̧k kadkadin.

Lani eaar ba n̄an Meg kōn mōjņo̧ eo an n̄an ro̧o̧ltok n̄an m̧akūtkūt ko an Kabun̄, membōr ro rem̧m̧an rej jipan̄e, im kōjatdikdik eo an bwe juon raan enaaj liāp ippān leddik eo nejin.

Meg eaar karuwaineneik Lani bwe en jijōt ippān ilo ruum̧ in kōttar eo ilo tampeļ eo. Raar jab maron̄ kijerin wōnm̧anļo̧k wōt n̄an lowaan tampeļ eo, bōtaab raar maron̄ tōparļo̧k kōjem̧ eo. Ekar em̧m̧an ippān Lani, im raar etal ippān doon ļo̧k n̄an kōjem eo. Juon rijerbal in tampeļ eaar ān̄inļo̧k er n̄an juon jea me ej pād ium̧win juon pijaan Rilo̧mo̧o̧r eo.

Ke rej jijōt ippān doon, Lani eaar unoojdikdik, “Ilukuun kar kōņaan itok n̄an tampeļ rainin, ak iaar ikūm̧kūm.” Kōnke Meg eaar ļo̧o̧r Jetōb eo, eaar jipan̄ uwaake jar eo an Lani.

Ļōmņak ko n̄an Jipan̄ Ro Jet me ejjeļo̧k aer Peba in Mālim n̄an Deļo̧n̄e Tampeļ

Jekdoon ro ejjeļo̧k aer peba in mālim n̄an deļon̄e tampeļ remaron̄ jeraam̧m̧an kōn tampeļ eo.

  • Kwaļo̧k en̄jake ko am̧ kōn ekōjkan an Irooj kōjeraam̧m̧an eok kōn jerbal ko an tampeļ.

  • Karuwaineneik juon n̄an etal n̄an juon iien kalojooj an tampeļ ak visitor center ko. Kappukot open house ko rej itok ilo temples.ChurchofJesusChrist.org.

  • Alooji pija ko im ekkatak eļapļo̧k kōn tampeļ ilo temples.ChurchofJesusChrist.org.

Kōm̧m̧an bwe Etal n̄an Tampeļ en Pidodoļo̧k n̄an Ro Jet

Jekdoon n̄an membōr ro ewōr aer peba in mālim n̄an deļo̧n̄e tampeļ n̄an tampeļ, etal n̄an tampeļ emaron̄ juon mennin apan̄. Jet remaron̄ aikuj in etal ettoļo̧k. Jet emaron̄ lōn̄ ajri ro redik ak rūtto ro rej aikuj jipan̄. Jemaron̄ jerbal ippān doon n̄an kōm̧m̧an bwe jerbal in jipan̄ ilo tampeļ en n̄an aolep.

Leola Chandler ekar en̄jake edodo ilo an lale ļeo ippān enan̄inmej im ajri ro emān nejier. Kiō eaar kāālet n̄an kōjeno̧lo̧k juon iien aolep Juje n̄an etal n̄an juon tampel eo me epaaktata. Eaar erom̧ juon mennin kaenōm̧m̧an im kajoor ilo mour eo an.

Juon raan eaar ron̄ ke jejjo iaan kōrā ro rerūtto ilo ward eo raar lukkuun kōņaan etal n̄an tampeļ, bōtaab eaar ejjeļo̧k iaļaer. Leola eaar ba emaron̄ ettōr n̄an er. Ilo iiō ko 40 tokālik, eaar jakutkut an etal n̄an tampeļ make iaan.2

Leola eaar jeraam̧m̧an, im eaar kōjeraam̧m̧an ro jet ke ej m̧ōņōņō in ektak er ippān n̄an tampeļ eo.

Ļōmņak ko n̄an Jipan̄ Ro Jet Etal n̄an Tampeļ

Ekōjkan am̧ maron̄ jipan̄ ro jet ikutkut ļo̧k aer etal n̄an tampeļ? Komaron̄ loe bwe ejja ļōmņak kein remaron̄ bar jipan̄ eok.

  • Etal ippān doon. Kajjitōk n̄an leļo̧k ak karōk iaļan emakūtkūt n̄an juon. Emaron̄ rōjan̄ bar juon n̄an bar etal n̄an tampeļ.

  • Kajjitōk ippān ro uwaan baamle eo am̧ ak ward eo n̄an jipan̄ eok kōm̧m̧ani kain̄i ko n̄an ro jibūm im jim̧aam̧, eļaptata n̄e elōn̄ etan baamļe repojak n̄an kōm̧m̧an kain̄i.

  • Kajjitōk bwe kwon lale ajri bwe ro jineer im jemāer ren etal n̄an tampeļ. Ak kōm̧m̧an kōņ n̄an kajjojo lale nejin doon.

N̄e Ettoļo̧k Tampeļ Eo

Chandradas “Roshan” im Sheron Antony jān Colombo, Sri Lanka, raar kāālet n̄an liāp ilo tampeļ. Ro m̧ōttaer Ann im Anton Kumarasam raar lukkuun m̧ōņōņō kōn er. Ak raar jeļā bwe eaar jab pidodo ak dik wōņāān etal n̄an Manila Philippines Tampeļ.

Roshan im Sheron raar kakwōņ jāān im boke etaer allōn̄ ko m̧oktaļo̧k n̄an bōk wōņāān ko remaron̄i. Āliktata, raan eo eaar itok. Bōtaap, ilo kōtaan kōttar eo aer ilo Malaysia, rej kab jeļā bwe n̄an wōnm̧aanļo̧k wōt n̄an Philippines, rej aikuj visa ak aikuj kelo̧k ilo juon baļuun eoktak. Rejjab kar maron̄ ebōk aaer visa, im raar jab maron̄ kōļļā wōņāān tikōt ilo bar juon baļuun. Bōtaab raar jab maron̄ ļōmņak in ro̧o̧l n̄an kapijuknen ilo aer jan̄in liāp.

Jab lukkuun jeļā ta ren bar kōm̧m̧ane, Roshan eaar ko̧o̧ļ e Anton. Anton im Ann raar lukkuun kōņaan jipan̄. Er rej jejjo iaan ripālele ro ilo Sri Lanka me em̧ōj aer liāp ilo tampeļ, im rejeļa ke ej juon kōjeraam̧m̧an. Bōtaab ejjab to raar kōjerbal aolepān jāān ko aer n̄an jipan̄ juon eo uwaan baam̧le eo aer me ekar aikuj jipan̄, im ejjab bwe aer jāān n̄an jipan̄ Roshan im Sheron wia tikōt n̄an bar juon baļuun.

Ilo Sri Lanka ej m̧anit bwe ļeo pālele en wia an lio pālele m̧arm̧ar ko̧o̧ļ bwe en wōr an lio jāān eļan̄n̄e ļeo pālele emej. Ann eaar kāālet n̄an wia kake m̧arm̧ar eo an n̄an jipan̄ wiaik tikōt kāāl ko. Mennin letok eo an eļap eaar kōm̧m̧an bwe Roshan im Sheron ren maron̄ tōpar ļo̧k iien eo aer ilo Manila tampeļ.

“Ijeļā aorōkin liāp ilo tampeļ,” Ann eaar ba. “Iaar jeļā ke Sheron im Roshan renaaj kar juon kajoor n̄an branch eo. Iaar jab kōņaan bwe ren jako jen iien em̧m̧an in.”3

Ļōmņak ko n̄an Jipan̄ Ro me Rejjab Maron̄ Etal n̄an Tampeļ

Komaron̄ nej bōk kūr n̄an jerbal in karejar n̄an ro rejjab maron̄ ikutkut aer etal n̄an tampeļ ak jab maron̄ etal kōn wōt ettoļo̧kin im wōņāān. Bōtaab komaron̄ kappukot wāween ko n̄an jipan̄ er kam̧m̧olool kōn kōjeraam̧m̧an ko an tampeļ.

  • Katakin ak pād ippān doon ilo juon kōppopo an tampeļ ak kulaaj in menmenbwij.

  • Leļo̧k n̄an er pijaan juon tampeļ bwe ren katotoiki ilo m̧weo im̧weer.

  • Eļan̄n̄e em̧ōj am̧ pād ilo tampeļ, kwaļo̧k n̄an er en̄jake ko am̧ im naan in kam̧ool eo am̧ kōn kain̄i ko an tampeļ.

  • Jipan̄ er ekkatak eļapļo̧k kōn bujen ko raar kōm̧m̧ani im wāween kōjpāroki. Ļōmņak in kōjerbal “Understanding Our Covenants with God: An Overview of Our Most Important Promises,” ilo July 2012 Liahona.

© 2020 jān Intellectual Reserve, Inc. All rights reserved. Kar būriin ilo USA. Kōmālim ilo kajin English: 6/19. Kōmālim an ukook: 6/19. Ukook eo an Ministering Principles, March 2020. Marshallese. 16985 874

Kakeememej ko

  1. Russell M. Nelson, “Erom̧ Riwaanjon̄ak ro rej Armej ro Rekwojarjar ilo Raan-ko Āliktata,” Liaona, Nob. 2018, 114.

  2. Lale LaRene Gaunt, “Finding Joy in Temple Service,” Ensign, Oct. 1994, 8.

  3. Ann im Anton raar maron̄ bar bōk m̧arm̧ar eo ālkin aer kar karo̧o̧lļo̧k jāān ko aerro jān Church General Tempel Patron Assistance Fund, eo ej leļo̧k juon katton jāān in jipan̄ n̄an membōr ro rejjab maron̄ kōļļā wōņāān aer etal n̄an tampeļ.