E aha tā te ’ā’amu nō noela e ha’api’i nei ia tātou nō ni’a i te aupurura’a

’Aita te ta’ata ha’apa’o fare i vaiiho i te hō’ē vāhi nō te Fa’aora, ’eiaha roa atu rā tātou ato’a e rave i taua hape ra ! E nehenehe tātou e vaiiho i te hō’ē vāhi nō te Fa’aora i roto i tō tātou ’ā’au ma te vaiiho i te hō’ē vāhi nō tō tātou mau taea’e ’e mau tuahine i tā tātou ’amura’a mā’a, i roto i tō tātou fare ’e i roto i tā tātou mau peu tumu. E rave rahi mau peu tumu ’utuāfare e nehenehe e riro ’ei mea au māite ’e e mea hau atu i te fa’ahiahia ma te fa’aōra’a mai i te tahi atu mau ta’ata. E peu tumu nā Daiana ’e tōna ’utuāfare ’ia ani manihini i te hō’ē ta’ata ’ia ’āmui mai ’ia rātou i te noela. I te ’āva’e Tītema ato’a, e tāu’aparau rātou ’e e fa’aoti ’o vai tā rātou e hina’aro e ani manihini.² Penei a’e e nehenehe tō ’outou ’utuāfare e ha’amata i te hō’ē peu tumu mai teie. E hina’aro paha te hō’ē ta’ata tā ’outou e aupuru ra e ’āmui mai i tō ’outou ’utuāfare i roto i te hīmenera’a i te mau hīmene auhia nō noela. E nehenehe ’outou e vaiiho i te hō’ē vāhi i te taime tāmā’ara’a i te pō nōela nō te hō’ē ta’ata ’aita e ’utuāfare i roto i te tuha’a fenua.

E aha te rāve’a maita’i a’e nō te fa’ahanahana i te Fa’aora, maori ra ’ia pe’e i tōna hi’ora’a nō te fa’aōra’a mai ? E ha’amana’o ē, tē ani nei ’oia « [te ta’ata] ato’a ’ia haere mai iāna ra ’e ’ia rave i tōna ra maita’i ; ’e ’aita roa ’oia e fa’a’ore i te hō’ē tei hina’aro iāna ra, te ta’ata ’ere’ere ’e te uouo, te tītī ’e te ti’amā, te tāne ’e te vahine… ’e hō’ē ana’e tō te ta’ata ato’a ti’ara’a i mua i te Atua, te ’āti Iuda ’e te Etene ato’a ho’i » (2 Nephi 26:33). Vaiiho i te hō’ē vāhi ’e e fa’atupu i te fa’aōra’a mai.

E au ra e mea tano, tei rotopū te mau tīa’i māmoe i te mau ta’ata mātāmua tei fāri’i i te ’aiū Fa’aora. ’Ua parau te mau peropheta tahito ia Iesu Mesia mai, te « tīa’i māmoe nō ’Īsera’ela » (Salamo 80:1) ’e te « tīa’i māmoe nā te ao ato’a nei » (1 Nephi 13:41). ’E ’ua parau te Mesia iāna iho, « ’O vau te tīa’i māmoe maita’i ra, ’e ’ua ’ite i tā’u mau māmoe » (Ioane 10:14). Te ’itera’a i tā tātou mau māmoe ’e te tīa’ira’a ’o te hō’ē ïa tufa’a faufa’a roa nō te utuutura’a ’e te aupurura’a mai tā te Fa’aora i nā reira.

Ma te mau mori purapura ’e te mau fa’a’una’una i fa’anehenehehia, e rave rahi nō te hi’o i te roara’a o te tau noela. Penei a’e rā, te ruperupe rahi roa a’e o te tau e ’itehia mai ïa, ’ia ha’amana’o ana’e tātou e fa’atumu i ni’a i te feiā ’o tā tātou e aupuru nei ’e ’ia hi’ohi’o i tā tātou iho mau nana. E nehenehe te hi’ohi’ora’a e riro i te pāpa’ira’a noa nō te ravera’a fa’ahiahia a te hō’ē ta’ata ’aore rā te anira’a nō ni’a i te mau fa’anahora’a nō te tau fa’afa’aeara’a a te hō’ē ta’ata. E hi’ohi’o tātou ’ia ’ite ana’e tātou ’e ’ia pāhono tātou i te mau hina’aro o vetahi—te mea pāpū ’e te mea pāpū ri’i.

I te pohera’a te tāne fa’aipoipo a Cheryl, ’o Mick, ’ua māuiui roa ’oia. ’A piri noa mai ai tāna noela mātāmua ōna ana’e, ’ua rahi roa ato’a te ’ōtahira’a. ’Auae rā, tōna tuahine aupuru ’o Shauna tei reira. E ani manihini ’o Shauna ’e tāna tāne, ’o Jim, e rave rahi taime ia Cheryl e haere e orihaere i te mau pue tau fa’afa’aeara’a. ’Ua ’ite rāua i te pereue tahito roa ’o Cheryl ’e ’ua fa’aoti e rave i te hō’ē mea nō te reira. Tau mahana hou te noela, ’ua pupu ’o Shauna ’e ’o Jim i te hō’ē tao’a nō noela nā Cheryl : Hō’ē pereue mahanahana ’āpī nehenehe. ’Ua ’ite maita’i rāua i te mau hina’aro pae tino ’o Cheryl nō te hō’ē pereue mahanahana ’oia ato’a i tōna mau hina’aro i te pae ’āehuehu nō te parau o te tāmahanahanara’a ’e te hoara’a. ’Ua rave rāua ma te ti’a ia rāua nō te pāhono i taua mau hina’aro ra ma te au maita’i, ’e ’ua hōro’a mai rāua i te hō’ē hi’ora’a maita’i mau e nāhea tātou ato’a ’ia hi’ohi’o i tā tātou mau nana.³

« Mai haere tātou » e anira’a pūai teie ! ’Aita te mau tīa’i māmoe i mana’o ē e rohirohi roa tō rātou mau hoa nō te tere. ’Aita rātou i haere hau noa i Betelehema ma tā rātou iho mau rāve’a. ’Ua fāriu rātou ma te ’oa’oa i ni’a i te tahi ’e te tahi ’e ’ua parau « Mai haere tātou ! »

Noa atu ē ’aita tātou e nehenehe paha e ani i tō tātou mau hoa ’ia haere mai e hi’o i te Fa’aora ’āpī, e nehenehe tātou e ani ia rātou ’ia fāri’i i te vārua o noela (’aore ra te Vārua o te Mesia) ma te tāvinira’a ’e ’o tātou. « Te rāve’a nō te fa’arahi i te vārua o noela ’o te torora’a i te rima ma te ’ā’au hōro’a i te feiā e ha’ati ra ia tātou ’e ’ia hōro’a ia tātou iho », ’ua parau Bonnie L. Oscarson, peresideni tahito o te Feiā ’āpī tamāhine.⁴ ’A feruri na tē tāpe’a ra ’outou i te hō’ē mori hinu. E ’ite mai paha vetahi ’e e fana’o nā roto mai i te māramarama o tā ’outou mori hinu, e feruri na rā ē i te māhanahana tā rātou e nehenehe e fāri’i, mai te mea e fa’a’ohipa ’outou nō te fa’a’ama i tā rātou mori hinu ’e ’ia fa’ati’a ’ia tāpe’a i te māramarama nō rātou iho.

’Ua ha’api’i te Mesia iho ē te feiā e pe’e iāna e fāri’i i te māramarama o te ora (hi’o Ioane 8:12). Tē tāvinira’a mai tāna i rave ’o te hō’ē ïa rāve’a tā tātou e nehenehe e pe’e iāna ’e ’ia fana’o i taua māramarama ra i fafauhia mai. Nō reira ’a fa’a’ite atu i te māramarama ma te anira’a ia vetahi ’ē ’ia tāvini nā muri ia ’outou ! Nāhea ’outou ’e te feiā tā ’outou e aupuru ra e nehenehe ai e tāvini ’āmui ? E nehenehe ’ōrua e fa’aineine ’āmui i tā ’outou mā’a au-roa-hia ’aore rā e fa’ahitimahuta i te hō’ē ta’ata ma te hō’ē tao’a hōro’a ’aore rā hō’ē nota pāpa’i. E nehenehe ’ōrua to’opiti, ’ia ’āmuihia, e fāri’i i te māramarama e tae mai nā roto mai i te hi’ora’a o te Mesia nō te ’ohipa tāvinira’a.

E mea ’ōhie ’ia feruri i te ’oa’oa rahi o te mau tīa’i māmoe tei fa’a’ite atu i te parau ’āpī fa’ahiahia nō te fānaura’a o te Mesia i te rahira’a ta’ata mai tā rātou i nehenehe. Fa’aarahia e te mau melahi, ’ua tae mai te Mesia tei tohuhia ! Tei i’ō nei ’oia ! Inaha, te fa’a’itera’a i te parau ’āpī o te Fa’aora ’ua riro ’ei parau tumu faufa’a roa nō te ’ā’amu o te fānaura’a. ’Ua hīmene te mau melahi. ’Ua fa’a’ite te feti’a i te ’ē’a. ’E ’ua fa’a’ite te mau tīa’i māmoe i te reira ia vetahi ’ē.

E nehenehe tātou e ’āmui atu i tō tātou reo i te ’ā’amu o noela ma te fa’a’ite atu i te parau ’āpī ’e te fa’a’ite-pāpū-ra’a nō te Fa’aora. « ’A fāri’i ai ’outou i te pi’ira’a ’ei mono nō te Fa’aora i roto i tā ’outou tauto’ora’a ’ia aupuru, e ui ia ’outou iho, ‘nāhea vau ’ia fa’a’ite atu i te māramarama o te ’evanelia i teie ta’ata ’aore rā i te fēti’i ?’ » ’ua ha’api’i te tuahine Jean B. Bingham, peresideni rahi nō te Sōtaiete Tauturu. « E aha tā te Vārua e fa’auru mai iā’u ’ia rave ? »⁵

Teie te tahi mau mana’o na ’outou nō te feruri ’a ’imi ai ’outou ’ia ’ite e nāhea ’outou i te fa’a’ite atu i tō ’outou ’itera’a pāpū nō te Fa’aora ’e tāna ’evanelia.

• ’Imi i te hō’ē ’īrava pāpa’ira’a mo’a ’o tē haru mai tō ’outou mana’o nō ni’a i te Fa’aora ’aore rā fa’a’ite atu nō te aha ’outou i māuruuru ai iāna. ’A fa’a’ite i te reira i te mau ta’ata tā ’outou e aupuru ra.

• Hāpono i te hō’ē parau pāpa’i ’aore rā, hō’ē parau poro’i nā ni’a i te rāve’a tūreiara’a tōtiare ’e te hō’ē video nō noela. Tē vai nei te tahi e mea māere i ni’a ChurchofJesusChrist.org!

• ’A paraparau i te hō’ē hoa nō ni’a i te hō’ē ha’amana’ora’a ta’a ’ē ’aore rā, i te hō’ē peu tumu ’o tē fa’aha’amana’o ia ’outou i te Mesia.

’Ia roa’a te fa’aro’o ē e fa’a’ite pāpū mai te Vārua Maita’i i te parau mau o tō ’outou ’itera’a pāpū, mai tāna i fa’a’ite pāpū ia Simeona ’e ia Anna ē ’o te ’aiū Iesu te Fa’aora (hi’o Luka 2:26, 38).

« Nō te fa’atura mau i te taera’a mai o [Iesu Mesia] i te ao nei, e ti’a ia tātou ’ia rave mai tāna i rave ’e ’ia toro i te rima ma te aumihi ’e te aroha nō tō tātou mau ta’ata tupu », ’ua parau Elder Dieter F. Uchtdorf nō te pupu nō te Tino ’Ahuru ma Piti ’āposetōlo. Teie tā tātou e nehenehe e rave i te mau mahana ato’a, nā roto i te parau ’e te ’ohipa. ’Ia riro te reira ’ei peu tumu nō noela nā tātou, noa atu te vāhi tei reira tātou—’ia rahi ri’i a’e te hāmani maita’i, ’ia rahi a’e te fa’a’orera’a hapa, ’ia iti a’e te ha’avāra’a, ’ia rahi a’e te māuruuru ’e ’ia rahi a’e te rima hōro’a i roto i te ’ōperera’a i tā tātou ’auhune i te feiā ’ati.⁶